2 | “Akɔfafa Si . . . Tso Ŋɔŋlɔawo Me”

BIBLIA GBLƆ BE: “Nu siwo katã woŋlɔ ɖi tsã la, woŋlɔ wo ɖi be woatsɔ afia nu mí, ale be to míaƒe dzidodo kple akɔfafa si míekpɔ tso Ŋɔŋlɔawo me dzi la, mɔkpɔkpɔ nasu mía si.”—ROMATƆWO 15:4.

Nu Si Esia Fia

Akɔfanya geɖe le Biblia me siwo ate ŋu akpe ɖe mía ŋu dzi naɖo mía ƒo ne míele susu manyomanyowo bum ɖe mía ɖokui ŋu. Azɔ hã, Biblia na mɔkpɔkpɔ mí be eteƒe madidi o míaƒe vevesesewo nu ayi.

Ale Si Esia Ate Ŋu Akpe Ðe Mía Ŋu

Nu tena ɖe mí katã dzi ɣeaɖewoɣi; gake le ame siwo le blanuiléledɔ alo dzimaɖitsitsidɔ lém gomea, nu ate ŋu ate ɖe wo dzi ɣeawokatãɣi. Aleke Biblia ate ŋu akpe ɖe mía ŋu?

Biblia gblɔ nu nyui geɖe siwo ŋu míate ŋu anɔ bubum ɖe susu manyomanyoawo teƒe. (Filipitɔwo 4:8) Nya fakɔnamewo le Biblia me siwo ŋu bubu ate ŋu ana míaƒe susu nadze akɔ anyi eye míaƒe dzi hã nadze eme.—Psalmo 94:18, 19.
Ne míesena le mía ɖokui me be míele ɖeke me oa, Biblia ate ŋu akpe ɖe mía ŋu míakpɔe be míexɔ asi na Mawu.—Luka 12:6, 7.
Mawunyakpukpui geɖewo le Biblia me siwo na míeka ɖe edzi be mía Mawu, si wɔ mí la li kpli mí, eye enya ale si tututu míesena le mía ɖokui me.—Psalmo 34:18; 1 Yohanes 3:19, 20.
Mawu do ŋugbe le Biblia me be yeava ɖe míaƒe vevesesewo katã ɖa. (Yesaya 65:17; Nyaɖeɖefia 21:4) Ne nu te ɖe mía dzi veviea, ŋugbedodo sia ate ŋu ana dzi naɖo míaƒo eye míado dzi.

Ale Si Biblia Kpena Ðe Eŋu—Jessica

Ale Si Blanuiléledɔ Ðea Fu Nam

“Esi mexɔ ƒe 25 la, wokpɔ blanuiléledɔ sesẽ aɖe le ŋunye. Ne meli koa, nu siwo dzɔ va yi siwo na mese veve ŋutɔa vaa susu me nam zi ɖeka, eye nyemetea ŋu ɖea susu ɖa le wo ŋu o. Ðɔktawo gblɔ be susu manyomanyo siwo mebuna le nu siwo dzɔ ŋu tae meva le blanuiléledɔ lém. Wona atikem, gake wokpe ɖe ŋunye hã be magabu susu manyomanyowo tso nu siwo dzɔ va yia ŋu o.”

Ale Si Biblia Kpena Ðe Ŋunye

“Ne dɔa ho nama, vɔvɔ̃ ɖoam eye menɔa ƒoƒom, metsia dzodzodzoe le ɖokuinye me eye alɔ̃ menya dɔna nam o. Zi geɖe le zã mea, nu geɖe nɔa fu ɖem na nye susu, ta ɖeko susua nɔa tsaglãla tsam. Psalmo 94:19 na míenya be Mawu ate ŋu afa akɔ na mí eye wòana míakpɔ gbɔdzɔe ne míetsi dzodzodzoe akpa. Eya ta meda nye Biblia kple agbalẽvi aɖe si me meŋlɔ mawunyakpukpui siwo dea dzi ƒo nam ɖoa ɖe nye aba xa. Ne alɔ̃ menya dɔdɔm nam oa, mexlẽa mawunyakpukpui aɖewo eye esia faa akɔ nam.

“Biblia de dzi ƒo na mí be míaɖe nuŋububu siwo mewɔ ɖeka kple nu siwo míenya tso Mawu ŋu oa ɖa le susu me. Tsãa, mexɔe se be asixɔxɔ aɖeke mele ŋunye o eye ame aɖeke mate ŋu alɔ̃m o. Gake meva srɔ̃e be nuŋububu ma mewɔ ɖeka kple nu si Biblia gblɔ o, elabe egblɔ be Mawu nye Fofo lɔ̃ame si sea veve ɖe ame nu eye wòtsɔ ɖe le eme na mí katã. Vivivia, nyemegaɖea mɔ susu manyomanyowo kpɔa ŋusẽ ɖe dzinye o. Le ema teƒea, medzea agbagba bua ɖokuinye abe ale si Mawu buam ene. Esia kpe ɖe ŋunye be nyemegabunɛ be nyemele ɖeke me o.

“Mele mɔ kpɔm vevie na ɣeyiɣi si me míaƒe vevesesewo katã kple susu manyomanyo siwo míebuna ɖe mía ɖokui ŋua nu ayi tegbee. Menya be le etsɔmea, susumedɔléle aɖeke maganɔ anyi o. Esia kpena ɖe ŋunye medoa dzi fifia eye mekpɔa mɔ na etsɔme nyui ma, elabe menya be dɔléle sia maganɔ ŋunye o.”