Nyui Kple Vɔ̃: Míate Ŋu Aka Ðe Nya Si Biblia Gblɔ Dzi
Ne míenɔ te ɖe míawo ŋutɔ ƒe seselelãme alo nu siwo ame bubuwo susu ko dzi wɔ tiatia aɖewo ku ɖe agbe nyui nɔnɔ ŋu la, mímate ŋu aka ɖe edzi be tiatia mawo anye nyuitɔ ɣesiaɣi o. Biblia gblɔ nu si tae, eye egafia nu geɖe hã mí. Mɔfiame siwo ku ɖe nyui kple vɔ̃ ŋu siwo dzi míate ŋu aka ɖo la le Biblia me, eye wokpena ɖe mía ŋu be míakpɔ dzidzɔ kple dzidzeme le agbe me.
MÍEHIÃ MƆFIAME TSO MAWU GBƆ
Yehowaa Mawu na eme kɔ le Biblia me be yemeɖoe be amegbetɔwo nakplɔ wo ɖokui alo afia mɔ wo ɖokui o, ke boŋ be ye ŋutɔ yeafia mɔ wo. (Yeremiya 10:23) Ema tae wòna mɔfiamewo ku ɖe agbe nyui nɔnɔ ŋu le Biblia me. Elɔ̃ mí eye medi be míawɔ tiatia siwo ana míase veve eye agbea nasesẽ na mí o. (5 Mose 5:29; 1 Yohanes 4:8) Vevietɔ wu la, eyae nye mía Wɔla, eya ta nunya kple sidzedze si hiã la le esi be wòaɖo aɖaŋu nyuitɔ na mí ku ɖe agbe nyui nɔnɔ ŋu. (Psalmo 100:3; 104:24) Ke hã, Mawu mezia mía dzi gbeɖe be míanɔ agbe ɖe yeƒe mɔfiamewo nu o.
Yehowa na nu sia nu si mía dzila gbãtɔ Adam kple Xawa hiã be woakpɔ dzidzɔ la wo. (1 Mose 1:28, 29; 2:8, 15) Ena mɔfiame bɔbɔe aɖewo hã wo, siwo dzi wòdi be woazɔ ɖo. Gake eɖe mɔ be woawo ŋutɔ woatiae ne woawɔ ɖe mɔfiame mawo dzi alo womawɔ ɖe wo dzi o. (1 Mose 2:9, 16, 17) Nublanuitɔe la, Adam kple Xawa tiae be yewoanɔ agbe ɖe yewo ŋutɔ yewoƒe nudidiwo nu, ke menye ɖe Mawu tɔ nu o. (1 Mose 3:6) Nu kae do tso eme? Esi amegbetɔwo le nu si woawo ŋutɔ di wɔm la, ɖe esia na wole dzidzɔ kpɔm wua? Kura o. Nu siwo le dzɔdzɔm tso gbe aɖe gbe ke la na míekpɔe be ne míegbe Mawu ƒe nudidiwo dzi wɔwɔ la, mímate ŋu akpɔ dzidzɔ kple dzidzeme vavã o.—Nyagblɔla 8:9.
Afi ka kee míetso o, míate ŋu akpɔ mɔfiame siwo akpe ɖe mía ŋu míatso nya me nyuie la le Biblia me. (2 Timoteo 3:16, 17; kpɔ aɖaka si nye “Agbalẽ Si Nyo Na Ame Sia Ame.”) Kpɔ ale si Biblia fiaa mɔ mí ɖa.
Srɔ̃ nu geɖe tso nu si tae wote ŋu gblɔna be Biblia nye “Mawu ƒe nya” ɖo la ŋu.—1 Tesalonikatɔwo 2:13. Kpɔ video si nye Ame Ka Tɔe Biblia Nye? le jw.org.
BIBLIA NA MÍENYA NU SI MAWU DI TSO MÍA SI
Ale si Mawu wɔa nu ɖe amegbetɔwo ŋu tso gɔmedzedzea me ke ƒe ŋutinyawo le Biblia me. Esia kpena ɖe mía ŋu míekpɔa Mawu ƒe susu le nyui kple vɔ̃, nu si aɖe vi na mí kple nu si agblẽ nu le mía ŋu la ŋu. (Psalmo 19:7, 11) Nufiame siwo le ŋutinya siawo me la ɖea vi ɣeawokatãɣi eye wokpena ɖe mía ŋu míewɔa tiatia nyuiwo gbe sia gbe.
Le kpɔɖeŋu me, bu aɖaŋuɖoɖo si dze le Lododowo 13:20 ŋu kpɔ. Egblɔ be: “Ame si zɔna kple nunyalawo la, adze nunya, ke ame si dea ha kple bometsilawo la, eme manyo nɛ o.” Nya ma nye nyateƒe troloo tso blema ke va de asi na egbea. Aɖaŋuɖoɖo nyui sia kple bubu geɖewo le Biblia me, eye woɖea vi ŋutɔ.—Kpɔ aɖaka si nye “Biblia Ƒe Aɖaŋuɖoɖowo Ðea Vi Ɣeawokatãɣi.”
Gake ɖewohĩ àbia be, ‘Aleke mawɔ aka ɖe edzi be aɖaŋu siwo Biblia ɖo ku ɖe agbe nyui nɔnɔ ŋu ate ŋu akpe ɖe ŋunye?’ Amewo ƒe nuteƒekpɔkpɔ siwo dze le nyati si kplɔ esia ɖo me ana míakpɔ ŋuɖoɖoa.
a Mawu ƒe ŋkɔe nye Yehowa.—Psalmo 83:18.