Ðe Xexemeʋa Adzɔ Kpuiea?—Nya Kae Biblia Gblɔ?

Le ƒe 30 siwo va yi me la, ame geɖe kpɔe be kadodo siwo le dukɔ vovowo dome la ka ɖe eme eye wònɔ nyonyom ɖe edzi. Gake nu siwo dzɔ nyitsɔ laa le xexea me na womegale kakam ɖe nya sia dzi o.

• “Amewo tsi dzi be aʋa si wɔm Israel kple Gaza le la agblẽ nu le dukɔ bubu siwo le nutoa me ŋu, elabe Hezbollah-srafowo va le avu wɔm kple Israel le Lebanon ƒe de dzi.”—Reuters, January 6, 2024.

• “Iran ƒe aʋawɔlawo le nuto geɖe dzi dzem eye wogadze bɔmb gblẽnuwo wɔwɔ gɔme. Azɔ hã, Russia kple China va wɔ ɖeka kple Iran eye esia wɔe be Europa kple Amerika ƒe dukɔwo tsi dzi vevie.”—The New York Times, January 7, 2024.

• “Russia yi edzi le nu gblẽm le Ukraine ŋu ale gbegbe.”—UN News, January 11, 2024.

• “China ƒe ganyawo le nyonyom eye woƒe aʋawɔŋusẽ le dzidzim ɖe edzi. Ame gbogbo aɖewo hã va le dzesi dem wo ɖokuiwo be yewonye Taiwantɔwo, eye Amerika kple China dome mele nyonyom tututu o. Esiawo katã ate ŋu awɔe be aʋa naɖo wo dome bɔbɔe.”—The Japan Times, January 9, 2024.

Ðe Biblia gblɔ nya aɖe tso ale si dukɔwo dome mele nyonyom egbea o ŋua? Ðe nudzɔdzɔ siawo ana xexemeʋa nadzɔa?

Biblia gblɔ nu siwo le dzɔdzɔm fifia ŋu nya ɖi

Biblia megblɔ aʋa siwo tututu teƒe kpɔm míele egbea ŋu nya ɖi o. Gake egblɔe ɖi be aʋawɔwɔ abɔ ŋutɔ le míaƒe ŋkekea me eye esia ‘aɖe ŋutifafa ɖa le anyigba dzi.’—Nyaɖeɖefia 6:4.

Biblia gblɔe ɖi le Daniel ƒe agbalẽa me be “le nuwuɣi la,” xexemedziɖuɖu siwo ʋlia ho kple wo nɔewo anɔ “wo nɔewo tutum,” alo anɔ avu wɔm be yewoakpɔ ŋusẽ. Avuwɔwɔ sia ana woazã aʋawɔla gbogbowo kple “kesinɔnuwo” alo ga geɖe.—Daniel 11:40, 42, 43.

Aʋa si le ŋgɔ gbɔna

Biblia na míenya be nuwo agblẽ ɖe edzi le xexea me hafi wòava nyo. Yesu gblɔe ɖi be “xaxa gã si tɔgbi meva kpɔ tso xexea ƒe gɔmedzedze va se ɖe fifia o la ava.” (Mateo 24:21) “Xaxa gã” ma ahe Armagedon-ʋa vɛ; woɖɔ aʋa ma be enye “Mawu Ŋusẽkatãtɔ la ƒe ŋkeke gã la ƒe aʋawɔwɔ.”—Nyaɖeɖefia 16:14, 16.

Gake Armagedon-ʋaa magblẽ nu le amegbetɔwo ŋu o, ɖe wòaxɔ na wo boŋ. Mawu ato aʋa ma dzi atsrɔ̃ amegbetɔwo ƒe dziɖuɖuwo elabe woƒe aʋawɔwɔwo gblẽ nu geɖe. Ne èdi be yeanya ale si Armagedon-ʋaa ana míakpɔ ŋutifafa tegbee la, xlẽ nyati siawo:

• “Nu Kae Nye Armagedon-ʋa La?”

• “Armagedon—Nu Nyui Aɖee Wònye!”