Memleɖa, September 13
Ame vevi nènye.—Dan. 9:23.
Ðekakpui dzaa koe nyagblɔɖila Daniel nye esi Babilontɔwo ɖe aboyoe kplɔe dzoe le wo de Yerusalem yi keke Babilon. Gake edze ƒãa be eƒe nu nyo Babilontɔwo ŋu. Wokpɔ Daniel ƒe “dzedzeme” eye wokpɔe be ‘nu mewɔ afi aɖeke nɛ o, edze ɖeka,’ eye wòtso ƒome vevi aɖe hã me. (1 Sam. 16:7) Le susu mawo taa, Babilontɔwo na hehee be wòasubɔ le fiasã me. (Dan. 1:3, 4, 6) Yehowa lɔ̃ Daniel le esi wòtiae be yeawɔ nuteƒe na ye ta. Le nyateƒe mea, Daniel anya xɔ abe ƒe 20 ene esi Yehowa gblɔ tso eŋu be enye ame dzɔdzɔe abe Noa kple Hiob, siwo subɔ Mawu nuteƒewɔwɔtɔe ƒe geɖe ene. (1 Mose 5:32; 6:9, 10; Hiob 42:16, 17; Eze. 14:14) Yehowa yi edzi lɔ̃ Daniel le eƒe agbemeŋkekewo katã me.—Dan. 10:11, 19. w23.08 2 ¶1-2
Kwasiɖa, September 14
[Se] nyateƒea ƒe kekeme kple didime kple kɔkɔme kpakple goglome gɔme.—Ef. 3:18.
Ne èdi be yeaƒle aƒe aɖea, àdi be yealé ŋku ɖe aƒea ŋu tsitotsito hafi aƒlee. Míate ŋu alé ŋku ɖe nuwo ŋu nyuie alea ne míele Biblia srɔ̃m. Ne èxlẽe dzradzradzraa, “Mawu ƒe gbedeasi kɔkɔeawo ƒe gɔmedzenuwo” koe nànya. (Heb. 5:12) Eya ta abe ale si ko nàyi aƒea me alé ŋku ɖe nuwo ŋu nyuie enea, anyo be nàdzro Biblia hã me tsitotsito. Mɔ nyui aɖe si dzi nàto awɔ esiae nye be nàde dzesi ale si Biblia ƒe akpa vovovoawo de nu wo nɔewo me. Dze agbagba nàse nyateƒenya siwo dzi nèxɔ se kple nu siwo tae nèxɔ wo dzi se hã gɔme. Hafi míate ŋu ase Biblia me nyawo gɔme nyuiea, ele be míadzro Biblia me nyateƒe goglowo me. Apostolo Paulo de dzi ƒo na nɔvia Kristotɔwo be woalé fɔ ɖe Mawu ƒe Nyaa sɔsrɔ̃ ŋu ale be woase “nyateƒea ƒe kekeme kple didime kple kɔkɔme kpakple goglome gɔme tsitotsito.” Esia awɔe be ‘woaƒo ke ɖe to ali ke sesĩe ɖe’ xɔse la me. (Ef. 3:14-19) Ele be míawo hã míawɔ nenema ke. w23.10 18 ¶1-3
Dzoɖa, September 15
Nɔviwo, mina nyagblɔɖila siwo ƒo nu le Yehowa ƒe ŋkɔ me la ƒe fukpekpewo, kple woƒe dzigbɔgbɔ blewu la, nanye kpɔɖeŋu na mi.—Yak. 5:10.
Ame siwo gbɔ dzi ɖi ƒe ŋutinyawo le Biblia me. Ðe manyo be nàku nu me tso wo ŋu oa? Wo dometɔ ɖekae nye David. Togbɔ be ɖevime kee wosi ami nɛ be wòava nye Israel-fia hãa, ehiã be wòalala ƒe geɖe hafi fianyenyea nasu esi. Simeon kple Ana hã yi edzi wɔ nuteƒe na Yehowa esime wonɔ lalam dzigbɔɖitɔe be yewoakpɔ Mesia si ƒe ŋugbe wodo. (Luka 2:25, 36-38) Esi nèle ŋutinya siawo me dzromaa, di ŋuɖoɖo na biabia siwo gbɔna: Nu kae anya kpe ɖe ame sia ŋu be wòte ŋu gbɔ dzi ɖi? Esi wògbɔ dzi ɖia, vi kae wòɖe nɛ? Aleke mate ŋu asrɔ̃ eƒe kpɔɖeŋua? Àte ŋu asrɔ̃ nu tso ame siwo megbɔ dzi ɖi o hã ƒe ŋutinyawo me. (1 Sam. 13:8-14) Ne èle woƒe ŋutinyawo xlẽm la, bia ɖokuiwò be: ‘Nu ka gbɔe wòtso be womete ŋu gbɔ dzi ɖi o? Nu kae do tso eme na wo?’ w23.08 25 ¶15