Ðe Viwòwo Le Dzadzraɖoɖia?
1. Nu ka tae wòhiã be sukuviwo nanɔ dzadzraɖoɖi?
1 Eteƒe madidi o, sukuviwo agaʋu suku nu ake. Ðikeke mele eme o be viwòwo ado go kplamatsɛdonu kple nyaƒoɖeamenu aɖewo siwo womedo go kpɔ o. Mɔnukpɔkpɔ bubuwo hã aʋu ɖi na wo be ‘woaɖi ɖase na nyateƒe la.’ (Yoh. 18:37) Ðe wole dzadzraɖoɖia?
2. Be viwòwo nanɔ dzadzraɖoɖi la, nu kawoe wòle be woanya?
2 Ðe viwòwo nya nu siwo dulɔlɔ̃ ƒe azãwo kpakple ŋkekenyui siwo dzɔ tso trɔ̃subɔsubɔ me la lɔ ɖe eme kpakple nu si tae menyo be woakpɔ gome le wo me o la nyuiea? Ðe wole dzadzraɖoɖi be woakpe akɔ kple nyaƒoɖeamenu siwo woado go ku ɖe suku kɔkɔ dede, gbeɖoɖoɖi, kpakple aha muame alo atike vɔ̃ɖiwo zazã ŋua? Ðe woagblɔ tso wɔna aɖe si me wogbe be yewomakpɔ gome le o ŋu be etsi tsitre ɖe yewoƒe subɔsubɔ ŋu ko evɔa, alo ɖe woate ŋu azã Biblia atsɔ aɖe woƒe dzixɔsewo mea?—1 Pet. 3:15.
3. Aleke dzilawo ate ŋu azã Ƒometadedeagu fiẽsi atsɔ adzra wo viwo ɖo na suku gɔme dzedze?
3 Zã Ƒometadedeagu Fiẽsi La: Ele eme be ne viwòwo do go nyaƒoɖeamenu aɖe le ƒea me le suku la, miadzro eme ɖekae godoo. Ne miedzro kuxi siwo woate ŋu ado go le suku me do ŋgɔ na sukunuʋuʋu la, ana dzi nanɔ viwòwo ƒo. Ðe manyo be miazã Ƒometadedeagu fiẽsi ɖeka alo esi wu nenema atsɔ adzro nu siawo me oa? Miate ŋu abia mia viwo ne woagblɔ nu siwo nana wotsia dzimaɖi vevie ne wole suku gɔme dzedze ake ŋu bum. Miagate ŋu adzro nu siwo me miedzro le ƒe si va yi me la me ake fifia si ɖeviawo gatsi ɖe edzi vie eye woƒe nugɔmesese dzi ɖe edzi. (Ps. 119:95) Miate ŋu awɔ wɔwɔfia aɖewo, siwo me mi dzilawo miawɔ mia ɖokui le abe nufiala, sukuɖaŋuɖola, alo woƒe sukuhati aɖe ene. Fia viwòwo ale si woazã Biblia atsɔ aɖo nya ŋu kpakple ale si woate ŋu azã agbalẽwo abe Reasoning kple Young People Ask ene. Dzila aɖe wɔa wɔwɔfiawo tsɔ fiaa viawo ale si woate ɖe woƒe nufiala yeyewo ŋu le sukunuʋuʋu ɖe sia ɖe ahana woanya be Yehowa Ðasefowoe yewonye.—Kpɔ December 15, 2010, ƒe Gbetakpɔxɔ, axa 3-5.
4. Nu kae dzila nyanuwo awɔ?
4 Kuxi siwo me wòle na sɔhɛ Kristotɔwo be woato le ŋkeke mamlɛ siawo me la nu ‘le sesẽm’ ɖe edzi. (2 Tim. 3:1) Dzila nyanuwo adze agbagba akpɔ kuxi siawo do ŋgɔ ahakpe ɖe wo viwo ŋu be woaɖu wo dzi. (Lod. 22:3) Hafi sukuviwo naʋu suku nu ake la, wɔ wò ŋutete ɖe sia ɖe nàkpe ɖe viwòwo ŋu be woanɔ dzadzraɖoɖi.