Agbalẽ Tɔxɛa Ŋlɔla

TOGBƆ be Amerikatɔ alafa memama 96 lɔƒo gblɔna be yewoxɔ Mawu dzi se hã la, xexlẽmea le ʋɛ wu kura le Europa kple Asia tɔwo dome. Gake le dukɔ siwo me ame akpa gãtɔ gblɔna be yewomexɔ se be Mawu nye ame si li o hã la, wo dometɔ ʋɛ aɖewo lɔ̃ ɖe edzi be ŋusẽ manyamanya aɖee na xexeme si míekpɔna la va dzɔ. Japan-nufiala xɔŋkɔ si nye Yukichi Fukuzawa, amesi ƒe nɔnɔmetata dze le woƒe gagbalẽ yen 10,000 tɔ dzi la ŋlɔ ɣeaɖeɣi be: “Wogblɔna be dziƒo mewɔa ame aɖeke wòkɔkɔna wua nɔvia o.” Dzɔdzɔmese si Fukuzawa susu be eyae wɔ amegbetɔwo ŋue wònɔ nu ƒom tsoe esi wòzã nya “dziƒo.” Ame geɖe, siwo dometɔ ɖekae nye Nobel nunanaxɔla Kenichi Fukui, xɔe se be “dziƒo” makpɔmakpɔ ma tɔgbe aɖe li. Egblɔ nya si fia be yexɔ se be ɖoɖo gã aɖe le xexeame godoo—si woyɔna le subɔsubɔhawo ƒe nyagbɔgblɔ me be “Mawu”—gake eya yɔe be “dzɔdzɔmenɔnɔme.”

² Agbalẽnyala siawo tɔgbe xɔe se be nane alo ame aɖe si li tegbetegbe ye wɔ nusianu si le xexeame. Nukatae? Wò ya bu nya sia ŋu kpɔ: Ɣe la nye ɣletivi si lolo ale gbegbe be anyigba ƒe lolome teƒe miliɔn ɖeka ate ŋu anɔ eme, gake nu sue aɖe ko wònye le Masa Ɣletivihatsotsoa me. Azɔ ɣletivihatsotso biliɔn geɖe siwo le xexeame dometɔ ɖeka koe Masa Ɣletivihatsotsoa nye. Dzɔdzɔmeŋutinunyalawo ƒe ŋkuléle ɖe nu ŋu di be yeafia be ɣletivihatsotso mawo le tetem ɖe aga tso wo nɔewo gbɔ le ablaɖeɖe gã aɖe me. Be nuwo nate dɔwɔwɔ le xexeame godoo la, ŋusẽ gã triakɔ aɖe hiã. Ameka alo nuka gbɔe ŋusẽ sia gbegbe tso? Biblia bia be: “Mifɔ mo dzi, ne miakpɔ nu! Ameka wɔ nusiawo, eye wòkplɔa eŋu nuwo doa goe dedie? Eyɔa wo katã ŋkɔ, eye wo dometɔ aɖeke mesusɔna o le eƒe ŋusẽ geɖe kple alɔkame sesẽ la nu.” (Yesaya 40:25, 26) Mawunyakpukpui sia fia be ame aɖee na nuwo te dɔwɔwɔ le xexeame—eyae nye Amesi gbɔ “alɔkame sesẽ” la tso.

³ Bu nugbagbe siwo le anyigba dzi hã ŋu kpɔ. Ðe wòanye be agbe dzɔ le eɖokui si abe alesi nɔnɔmetɔtrɔdzixɔselawo gblɔna enea? Lãmetsiwo ƒe dɔwɔwɔ ŋuti nunyala Michael Behe gblɔ be: “Wowɔ ŋgɔyiyi gã geɖe le dzɔdzɔmeŋutinunya me henya alesi nugbagbewo ƒe lãmetsiwo wɔa dɔe, gake alesi nugbagbevi suetɔ kekeakewo ƒe lãmenuwo wɔa dɔ gbogbo aɖewo pɛpɛpɛ la na dzɔdzɔmeŋutinunyalawo dze agbagba be yewoagblɔ afisi agbe dzɔ tso do kpoe. . . . Dzɔdzɔmeŋutinunyala geɖe te kpɔ gblɔ zi geɖe be numeɖeɖe aɖewo ka yewo si xoxo, alo be egbɔna yewo si ka ge kpuie alo be ava ka yewo si emegbe, gake kpeɖodzi aɖeke mele nyagbɔgblɔ mawo ŋu le dzɔdzɔmeŋutinunyagbalẽ adodoeawo me o. Nusi gale vevie wue nye be, susu sẽŋuwo li—le ɖoɖo si nu [nugbagbevi suewo] ƒe dɔwɔwɔ ŋutɔŋutɔ le nu—siwo ta míabu be numeɖeɖe si Darwin na le nugbagbewo ƒe dzɔdzɔme ŋu gɔmesese asesẽ tegbetegbe.”

⁴ Ðe nusi wofiana be menye nunyala aɖekee na agbe dzɔ o la sɔ tome na wò nyateƒea? Le kpɔɖeŋu me, na míabu nusi ame aɖewo kpɔ be enye “nusi gɔme sese sesẽ wu ɖesiaɖe le xexeame,” si nye amegbetɔ ƒe ahɔhɔ̃ ŋu kpɔ, bene míakpɔ alesi míaƒo nya tae. Ðk. Richard M. Restak gblɔ be: “Kɔmpiuta siwo de ŋgɔ wu ɖesiaɖe, si ƒe dɔwɔwɔ wotsɔ sɔ kple ahɔhɔ̃a tɔ, ƒe ŋutete gɔ̃ hã anɔ abe tagbatsu ƒe ahɔhɔ̃ ŋutete memama akpe ɖeka ƒe akpa ɖeka ko ene.” Amegbetɔ ƒe ahɔhɔ̃ de ŋgɔ sasasã wu tagbatsu tɔ. Wowɔe tso dzɔdzɔme be wòate ŋu asrɔ̃ gbegbɔgblɔwo. Edzraa eɖokui ɖo, egbugbɔ trɔa asi le eƒe dɔwɔɖoɖo ŋu, eye wòdzia eƒe ŋutete ɖe edzi. Ðikeke mele eme o be àlɔ̃ ɖe edzi be aɖaŋuwɔla li na kɔmpiuta si sesẽ wu ɖesiaɖe si ‘ƒe ŋutete anɔ abe tagbatsu tɔ me mama akpe ɖeka ƒe akpa ɖeka ko ene’ gɔ̃ hã. Ke amegbetɔ ƒe ahɔhɔ̃ ya ɖe?a

⁵ Anɔ ƒe 3,000 enye si, esime amegbetɔwo menya alesi woa ŋutɔwo ƒe ametia ƒe wɔwɔme wɔ nukui o la, Biblia-ŋlɔla aɖe de ŋugble le ametia ƒe wɔwɔme ŋu hegblɔ be: “Meda akpe na wò le alesi wowɔm nukutɔe la ta; wò dɔwɔwɔwo nye nukunu, eye nye luʋɔ dze si esia keŋ.” Togbɔ be menya nu tso domenyiŋusẽfianu (DNA) ŋu o hã la, eŋlɔ be: “Esi menye ʋukɔe la, wò ŋkuwo kpɔm, eye woŋlɔ ŋkeke, siwo katã ava emegbe, siwo dometɔ aɖeke meli haɖe o la, ɖe wò agbalẽ me.” (Psalmo 139:14, 16) Ameka ƒe nya gblɔm wònɔ? Amekae zã eƒe “alɔkame sesẽ” tsɔ wɔ nusianu si le xexeame?

⁶ Biblia ƒe kpukpui gbãtɔ gblɔ be: “Le gɔmedzedzea me Mawu wɔ dziƒo kple anyigba.” (Mose I, 1:1) Eyae nye Biblia Ŋlɔla hã, Amesi ʋã amewo woŋlɔ emenyawo. Eɖe eɖokui fia be yenye amesi míate ŋu ado ƒome ɖɔʋu kplii.