Akpa 6
Nusitae Mawu Ðe Mɔ Fukpekpe Li Ðo
1, 2. Aleke mía dzila gbãtɔwo gblẽ alesi Mawu dze nuwo gɔme nyuie na wo la mee?
NUKAE dzɔ? Nukae dzɔ si gblẽ alesi Mawu na nuwo dze egɔme nyuie na mía dzila gbãtɔwo le Eden ƒe Paradiso la me? Nukatae, le ŋutifafa kple ɖekawɔwɔ ƒe Paradiso si anɔ anyi teƒe la, vɔ̃ɖinyenye kple fukpekpee va xɔ aƒe ɖi ƒe akpe nanewoe nye sia?
2 Ŋuɖoɖoae nye be Adam kple Xawa mezã lɔlɔ̃nu faa ƒe tiatiawɔwɔblɔɖe si wona wo la nyuie o. Woŋlɔ be be womewɔ yewo be nuwo nadze edzi na yewo Mawu kple eƒe sewo manɔmee o. Wotso nya me be yewoaɖe yewo ɖokui ɖa le Mawu ƒe kpɔkplɔ te, kple susu be ana nu nadze edzi na yewo wu. Eyata wodze le lɔlɔ̃nu faa ƒe liƒo siwo Mawu do la ŋu.—Mose I, ta 3.
Xexeame Katã ƒe Dziɖulanyenye ƒe Nyaʋiʋli La
3-5. Nukatae Mawu metsrɔ̃ Adam kple Xawa eye wogadze nuwo wɔwɔ gɔme ake o?
3 Nukata Mawu metsrɔ̃ Adam kple Xawa eye wòwɔ atsu kple asi bubu ɖo wo teƒe o? Esi wotɔ gbe eƒe dziɖulanyenye, si nye eƒe fiaɖuɖu ƒe gome si womate ŋu atsɔ na ame bubu aɖeke o, tae.
4 Nyabiabia si wòdo ɖae nye: Ameka ƒe gomee wònye be wòaɖu dzi, eye ameka ƒe dziɖuɖue nye nyuitɔ? Esi wònye Mawue nye nuwɔwɔwo katã ƒe Wɔla ŋusẽkatãtɔ ta la, eƒe gomee wònye be wòaɖu wo dzi. Esi wònye nuwokatãnyala hã la, eƒe dziɖuɖue nye nyuitɔ kekeake na eƒe nuwɔwɔwo katã. Gake fifia wotɔ gbe Mawu ƒe dziɖuɖu. Hekpe ɖe eŋu la, ɖe nane gblẽ le eƒe nuwɔwɔ si nye amegbetɔ ŋua? Emegbe míava adzro alesi wòlɔ amegbetɔ ƒe nuteƒewɔwɔ ƒe nya la hã ɖe emee la me.
5 Amegbetɔ ƒe eɖokui ɖeɖe le Mawu ƒe kpɔkplɔ te do nyabiabia bubu hã ɖa: Ðe eme anyo na amegbetɔwo wu ne Mawu meɖu wo dzi oa? Kakaɖedzi le eŋu be Wɔla la nya ŋuɖoɖoa, gake mɔ aɖe si ŋu ɖikeke aɖeke mele o si dzi amegbetɔwo ato anyae nye be woaɖe mɔ le ablɔɖe ɖesiaɖe si wodi la ŋu na wo. Woawo ŋutɔwoe tiae nenema, eyata Mawu ɖe eƒe mɔ na wo.
6, 7. Nukatae Mawu ɖe mɔ ɖe ablɔɖe ɖesiaɖe ŋu na amegbetɔwo ɣeyiɣi didi sia gbegbe ɖo?
6 Esi Mawu na ɣeyiɣi si didi nyuie amegbetɔwo be woate woƒe ablɔɖewo katã kpɔ la, akpɔ nya si nye ne eme anyo na amegbetɔwo wu le Mawu ƒe dziɖuɖu te loo alo anyo na wo wu le woawo ŋutɔwo tɔ te la gbɔ zi ɖeka ɖe ɣeyiɣiawo katã nu. Eye ele be ɣeyiɣi si ŋu wòɖe mɔ le na wo la nasɔ gbɔ be amegbetɔwo naɖo afisi wobu be enye yewoƒe dunyahehe, mɔ̃ɖaŋu, dzɔdzɔmeŋutinunya, kple atikewɔwɔ me ŋgɔyiyiwo ƒe kɔkɔƒe kekeake.
7 Eyata Mawu ɖe mɔ na amegbetɔ bliboe va de asi na míaƒe egbeŋkekea me be wòatsɔ afia ɖikekemanɔmee be amegbetɔ ƒe dziɖuɖu ye manɔmee adze edzi hã. Eyata amegbetɔ te ŋu wɔ tiatia le dɔmenyonyo kple ŋutasesẽ dome, le lɔlɔ̃ kple fuléle dome, le dzɔdzɔenyenye kple madzɔmadzɔnyenye dome. Gake eƒe tiatia la metsonuwo hã dze ŋgɔe: nyuiwɔwɔ kple ŋutifafa loo alo vɔ̃ɖinyenye kple fukpekpe.
Gbɔgbɔmenuwɔwɔwo ƒe Aglãdzedze
8, 9. (a) Aleke aglãdzedze dze egɔme le gbɔgbɔmenutowo mee? (b) Amekawo hã dzie Satana kpɔ ŋusẽ ɖo kpe ɖe Adam kple Xawa ŋu?
8 Nya la ƒe akpa bubu hã li si ŋu wòle be míabu. Menye mía dzila gbãtɔwo ɖeɖekoe dze aglã ɖe Mawu ƒe dziɖuɖu ŋu o. Gake amekawo hãe nɔ anyi ɣemaɣi? Gbɔgbɔmenuwɔwɔwoe. Hafi Mawu nawɔ amegbetɔwo la, ewɔ agbe ƒomevi siwo kɔkɔ wu siwo nye mawudɔlawo le agbɔsɔsɔ gã aɖe me be woanɔ dziƒonutowo me. Wowɔ woawo hã kple lɔlɔ̃nu faa ƒe tiatiawɔwɔblɔɖe kpakple nuhiahiã si nye woabɔbɔ wo ɖokui ɖe Mawu ƒe dziɖulanyenye te hã.—Hiob 38:7; Psalmo 104:4; Nyaɖeɖefia 5:11.
9 Biblia ɖee fia be aglãdzedze dze egɔme gbã le gbɔgbɔmenutowo me. Gbɔgbɔmenuwɔwɔ aɖe di be woaɖe mɔ ɖe ablɔɖe ɖesiaɖe ŋu na ye. Edi be amegbetɔwo nade ta agu na ye gɔ̃. (Mateo 4:8, 9) Gbɔgbɔ dzeaglã sia koŋ ye na Adam kple Xawa dze aglã, eye wòka aʋatso be Mawu le nu nyui aɖe tem wo. (Mose I, 3:1-5) Eyata woyɔe be Abosam (Ameŋugblẽla alo Amegɔmezɔla) kple Satana (Tsitretsiɖeŋula). Emegbe eble gbɔgbɔmenuwɔwɔ bubuwo hã be wodze aglã. Wova yɔ wo emegbe be gbɔgbɔ vɔ̃wo.—Mose V, 32:17; Nyaɖeɖefia 12:9; 16:14.
10. Nukae do tso amegbetɔwo kple gbɔgbɔmenuwɔwɔwo ƒe aglãdzedzea me?
10 Esi amegbetɔwo dze aglã ɖe Mawu ŋu ta la, woɖe mɔ le wo ɖokui ŋu na Satana kple eƒe gbɔgbɔ vɔ̃wo ƒe ŋusẽkpɔɖeamedzi. Eyatae Biblia yɔ Satana be “xexe sia me mawu,” amesi “gbã ŋku na dzimaxɔsetɔwo ƒe tamesusu.” Esia ta Mawu ƒe Nya la gblɔ be “xexeme blibo la katã le vɔ̃ɖitɔ la [si] me.” Yesu ŋutɔ yɔ Satana be “xexe sia me fia.”—Korintotɔwo II, 4:4; Yohanes I, 5:19; Yohanes 12:31.
Nyaʋiʋli Eve Aɖewo
11. Nya bubu ka hã mee Satana tɔ gbe Mawu le?
11 Satana do nya bubu hã ɖa si nye gbe tɔtɔ Mawu. Nusi eƒe nyagbɔgblɔwo fiae nye be ebu fɔ Mawu be vodada le alesi Wòwɔ amegbetɔe ŋu eye ame aɖeke madi be yeawɔ nyui ne wona wòle amemiamiã te o. Le nyateƒe me la, egblɔ be kura gɔ̃ hã, ameawo aƒo fi ade Mawu. (Hiob 2:1-5) Le esia wɔwɔ me la, Satana tɔ gbe nuwɔwɔ siwo nye amegbetɔwo ƒe nuteƒewɔwɔ.
12-14. Aleke ɣeyiɣiawo ava aɖe nusi nye nyateƒea le nyaʋiʋli eve siwo Satana do ɖa la me afiae?
12 Eyata Mawu ɖe mɔ ɖe ɣeyiɣi si sɔ gbɔ nyuie ŋu be nuwɔwɔ siwo katã si nunya le la nakpɔ alesi woakpɔ nya sia kpakple Mawu ƒe dziɖulanyenye ƒe nyaʋiʋlia gbɔe. (Tsɔe sɔ kple Mose II, 9:16.) Amegbetɔ ƒe ŋutinya me nudzɔdzɔwo ana akpa si nye nyateƒe le nyaʋiʋli eve siawo me la nadze.
13 Gbãgbiagbã la, nukae ɣeyiɣiawo aɖe afia ku ɖe xexeame katã ƒe dziɖulanyenye si nye Mawu ƒe dziɖuɖu ƒe dzedze la ƒe nyaʋiʋlia ŋu? Ðe amegbetɔwo ate ŋu aɖu wo ɖokui dzi wòanyo wu Mawu tɔa? Ðe amegbetɔ ƒe dziɖuɖu Mawu manɔmee ƒomevi aɖe ana xexe si me aʋawɔwɔ, nuvlowɔwɔ, kple madzɔmadzɔnyenye mele o la nanɔ anyia? Ðe wo dometɔ aɖe ate ŋu aɖe ahedada ɖa eye wòana nu nyuiwo nanɔ anyi na amesiamea? Ðe wo dometɔ aɖe aɖu dɔléle, tsitsi, kple ku dzia? Woɖo Mawu ƒe dziɖuɖua be wòawɔ nu mawo katã.—Mose I, 1:26-31.
14 Ku ɖe nyaʋiʋli evelia ŋu la, nukae ɣeyiɣiwo ƒe yiyi aɖe afia ku ɖe nuwɔwɔ siwo nye amegbetɔwo ƒe wɔwɔme ƒe nyonyo ŋu? Ðe vodada aɖe le alesi Mawu wɔ amee ŋua? Ðe wo dometɔ aɖe awɔ nu nyui le dodokpɔ mea? Ðe wo dometɔ aɖewo aɖee fia be Mawu ƒe dziɖuɖu dzɔ dzi na yewo wu amegbetɔ ƒe ɖokuisinɔnɔdziɖuɖua?
[Nɔnɔmetata si le axa 13]
Mawu ɖe mɔ ɖe ɣeyiɣi gbogbo aɖe ŋube amegbetɔwo naɖo woƒe nuwɔwɔŋutetewo ƒe kɔkɔƒe kekeake
[Afi Si Míexɔ Mɔɖeɖe Tso]
Yamenutomeyiʋua: Wotui ɖe NASA photo dzi