Dzigbãnyae Wònyena

Nicolle nye nyɔnuvi dzaa aɖe si nɔ lãmesẽ me. Ke le fiẽsi aɖe me la, egblɔ be ta le ye ɖum, eya ta edzilawo kplɔe yi kɔdzi. Le ŋkeke si kplɔe ɖo ƒe fiẽ me esime woganɔ asi trɔm le eŋu la, dzidɔ sesẽ aɖe dze edzi. Esi wogawɔ dodokpɔ bubuwo nɛ la, wode dzesii be dɔléle aɖe si mebɔ o lae nɔ fu ɖem nɛ, eye be egblẽ nu le eƒe dzitodzitowo, ayikuwo kple, dzi ŋu. Mede ŋkeke eve hafi Nicolle ku o. Ƒe etɔ̃ koe wòxɔ.

NU SIWO nana ame ƒe dzi gbãna vevie wu la dometɔ ɖekae nye ame vevi aɖe ƒe ku. Ɣeaɖewoɣi la, adze abe ɖe vevesesea wu tsɔtsɔ ene. Isabelle, si nye nyɔnuvia dada, gblɔ be: “Mesusua Nicolle ŋutɔ. Egadzronam be wòakpla asi kɔ nam, mase eƒe ʋeʋẽ ahakpɔ eƒe nuwɔwɔ tufafatɔe teƒe. Eye meɖoa ŋku ale si wònanam seƒoƒo gbe sia gbe la hã dzi. Nicolle ƒe nu nɔa susu me nam ɣesiaɣi.”

Ðe ame vevi aɖe ku na wò hã? Ðe amea nye viwò, srɔ̃wò, nɔviwò, dziwòla, alo xɔ̃wò kplikplikpli aɖea? Ekema aleke nàwɔ anɔ te ɖe vevesesea nu?—g11-E 04.