Ame geɖe megadea sɔleme egbea o le esi womekpɔa ŋuɖoɖo na agbe me nyabiase veviwo loo alo kpɔa akɔfaname aɖeke o ta. Ke nu ka tae wòle be nàde Yehowa Ðasefowo ƒe kpekpewo ya? Vi kae Kristotɔ siawo ƒe kpekpewo dede aɖe na wò?

Àkpɔ dzidzɔ be yele ame siwo lɔ̃a ame hetsɔa ɖe le eme na ame la dome. Le ƒe alafa gbãtɔ me la, Kristotɔwo kpena dea ta agu na Mawu le hame vovovowo me, eye wosrɔ̃a Ŋɔŋlɔawo hedea dzi ƒo na wo nɔewo. (Hebritɔwo 10:24, 25) Esi lɔlɔ̃ le wo dome ta la, wosena le wo ɖokuiwo me be yewole xɔlɔ̃ vavã siwo nye yewo nɔvi Kristotɔwo dome. (2 Tesalonikatɔwo 1:3; 3 Yohanes 14) Míawo hã míezɔna ɖe ɖoɖo sia ke nu eye dzi dzɔa mí abe woawo ke ene.

Àkpɔ viɖe tso Biblia ƒe mɔfiamewo sɔsrɔ̃ kple wo dzi wɔwɔ me. Abe ale si wònɔ le Biblia ŋlɔɣi ene la, ŋutsuwo, nyɔnuwo kple ɖeviwo siaa kpea ta ɖekae. Nufiala bibiwo zãa Biblia tsɔ fiaa ale si míawɔ ɖe Biblia ƒe mɔfiamewo dzi le míaƒe agbe mee la mí. (5 Mose 31:12; Nexemiya 8:8) Ame sia ame ate ŋu akpɔ gome le nyaŋuɖoɖo kple hadzidzi me, eye míewɔa esia tsɔ ʋua míaƒe xɔse me.—Hebritɔwo 10:23.

Wò Mawu dzi xɔxɔ se me agasẽ ɖe edzi. Apostolo Paulo gblɔ na hame siwo nɔ anyi le eŋɔli la dometɔ ɖeka be: ‘Ele dzroyem vevie be makpɔ mi, be míade dzi ƒo na mía nɔewo; ame sia ame ƒe xɔse nado ŋusẽ nɔvia tɔ, mia tɔ kple tɔnye siaa.’ (Romatɔwo 1:11, 12) Hadede kple mía nɔvi xɔsetɔwo edziedzi le kpekpeawo me doa ŋusẽ míaƒe xɔse be míayi edzi anɔ agbe nɔm ɖe Biblia ƒe mɔfiamewo nu.

Nu ka tae màva míaƒe kpekpeawoenumake be wò ŋutɔ nàva kpɔ nu siawo teƒe o? Míaxɔ wò alɔ evee. Womexɔa ga aɖeke ɖe kpekpeawo vava ta o.

• Ame kawo ƒe kpɔɖeŋu srɔ̃mee míele le ale si míewɔa míaƒe kpekpewoe me?

• Vi kawoe Kristotɔwo ƒe kpekpewo dede aɖe na mí?

Ne ehiã be míazɔ to avetsu dodowo me, alo ne yame ƒe nɔnɔmewo mede ame dzi o hã, míedzea agbagba dea Kristotɔwo ƒe kpekpewo edziedzi. Togbɔ be agbemekuxiwo ɖea fu na Yehowa Ðasefowo eye ɖeɖi tea wo ŋu vevie le ŋkekea ƒe dɔwɔɖui wɔwɔ vɔ megbe abe ame bubuwo ke ene hã, nu ka tae wodzea agbagba ƒoa ƒu kple wo nɔvi Kristotɔwo?

Enana míeléa nɔvisi. Esi Paulo nɔ nu ƒom tso ame siwo míedea ha kplii le kpekpeawo me ŋu la, egblɔ na mí be “míanɔ mía nɔewo ŋu bum.” (Hebritɔwo 10:24) Nya sia fia be “míaƒe susu nanɔ mía nɔewo ŋu,” alo be míanya mía nɔewo nyuie. Eya ta apostolo Paulo ƒe nya siawo de dzi ƒo na mí be míatsɔ ɖe le eme na mía nɔewo. Ne míeva nya mía nɔvi Kristotɔwo nyuie la, míeva kpɔnɛ be wo dometɔ aɖewo do dzi to nɔnɔme sesẽ siwo me tom míawo hã míele la me, eye woate ŋu akpe ɖe mía ŋu be míado dzi.

Enana míedzea xɔlɔ̃ vavãwo. Menye ame nyanyɛwo koe ame siwo míeƒoa ƒu kple le míaƒe kpekpewo me la nye o, ke boŋ xɔlɔ̃ veviwoe wonye na mí. Ɣeaɖewoɣi hã, mía kple mía xɔlɔ̃ siawo míeɖea modzaka siwo da sɔ. Vi kawoe hadede siawo ɖena na mí? Wonana míegakpɔa ŋudzedze ɖe mía nɔewo ŋu geɖe wu, eye esia nana lɔlɔ̃ si le mía dome la me gasẽna ɖe edzi. Eye ne mía nɔviwo le kuxiwo me tom la, míekpena ɖe wo ŋu enumake tso dzi me faa, elabena wonye mía xɔlɔ̃wo. (Lododowo 17:17) Esi míedea ha kple hamea me tɔwo katã ta la, míeɖenɛ fiana be míedea vovototo amewo me o, ke boŋ ‘míeléa be na mía nɔewo sɔsɔe.’—1 Korintotɔwo 12:25, 26.

Míele dzi dem ƒo na wò be nàtia ame siwo le Mawu ƒe lɔlɔ̃nu wɔm la be woanye xɔ̃wòwo. Àkpɔ xɔlɔ̃ vavã siawo le Yehowa Ðasefowo dome. Mègana naneke naxe mɔ na wò nàgbe hadede kpli mí o.

• Vi kae hadede kple mía nɔewo le kpekpewo me ɖena na mí?

• Ɣekaɣie nàdi be yeava srã mí kpɔ le míaƒe Fiaɖuƒe Akpata me?

Nu si Kristotɔ gbãtɔwo wɔna le woƒe kpekpewo mee nye be, wodzia ha, doa gbe ɖa, eye woxlẽa Ŋɔŋlɔawo hedzroa wo me—womewɔa kɔnu nyanyɛ aɖeke o. (1 Korintotɔwo 14:26) Aleae míawo hã míewɔa míaƒe kpekpewoe.

Biblia dzie míetua míaƒe nufiafiawo ɖo, eye wosɔ na agbenɔnɔ. Hame ɖe sia ɖe kpena le kwasiɖanuwuwuwo hesea miniti 30 ƒe Biblia me nuƒo, si fiaa ale si míawɔ ɖe Ŋɔŋlɔawo me nyawo dzii le agbe me kple ale si emenyawo le eme vam le míaƒe ŋkekea mee la mí. Kpekpea valawo kea woƒe Bibliawo nɔa edzi kpɔm ne nuƒolaa yɔ mawunyakpukpui aɖe hele exlẽm. Le dutoƒonuƒoa megbe la, míewɔa “Gbetakpɔxɔ” Nusɔsrɔ̃ gaƒoƒo ɖeka, eye wonaa mɔnukpɔkpɔ kpekpea valawo be woakpɔ gome le Gbetakpɔxɔ ƒe tata si míesrɔ̃na la ƒe biabiawo ŋu ɖoɖo me. Numedzodzro siawo kpena ɖe mía ŋu be míawɔ ɖe Biblia ƒe mɔfiamewo dzi le agbe me. Nyati ɖeka ma kee míesrɔ̃na le míaƒe hame siwo wu 110,000 siwo le xexea me godoo la me.

Ekpena ɖe mía ŋu be míanye nufiala nyuiwo. Míegakpena fiẽ aɖe le kwasiɖaa me hena kpekpe si woma ɖe akpa etɔ̃ me, si míeyɔna be Kristotɔwo Ƒe Agbenɔnɔ Kple Subɔsubɔdɔ. Agbalẽ si wotana ɣleti sia ɣleti si ƒe tanyae nye Agbenɔnɔ Kple Subɔsubɔdɔ Kpekpe Ƒe Nusrɔ̃gbalẽ ye míezãna le kpekpea me. Kpekpea ƒe akpa gbãtɔ, si nye Nu Xɔasi Siwo Le Mawu Ƒe Nya La Me, kpena ɖe mía ŋu míesea Biblia ƒe akpa aɖe si hamea xlẽ do ŋgɔ hafi va la gɔme ɖe edzi. Esi kplɔnɛ ɖoe nye Na Wò Subɔsubɔdɔa Nanyo Ðe Edzi; enye ale si míadzro Biblia me kple amewo la ƒe wɔwɔfiawo. Aɖaŋuɖola aɖe gblɔa nu siwo wòle be míawɔ be míagabi ɖe edzi le nuxexlẽ kple nufiafia me la na mí. (1 Timoteo 4:13) Akpa mamlɛtɔ, si nye Kristotɔwo Ƒe Agbenɔnɔ, la kuna ɖe ale si míawɔ Biblia ƒe mɔfiamewo dzi le míaƒe agbenɔnɔ me gbe sia gbe ŋu. Eƒe akpa aɖe nyea biabiawo kple ŋuɖoɖo ƒe numedzodzro si kpena ɖe mía ŋu míesea Biblia gɔme nyuie.

Ne ède míaƒe kpekpeawo la, nu nyui siwo nàsrɔ̃ tso Biblia me la alé dzi na wò godoo.—Yesaya 54:13.

• Nu kawoe nàkpɔ mɔ be yeasrɔ̃ ne ède Yehowa Ðasefowo ƒe kpekpewo?

• Kpekpe siwo míewɔna kwasiɖa sia kwasiɖa la dometɔ kae nàdi be yeade fifia?

Èkpɔ ale si Yehowa Ðasefowo dzrana ɖo nyuie hafi yia woƒe kpekpewo le foto siwo le afi sia mea? Nu ka tae awudodo kple dzadzraɖo le mɔ nyui nu nɔa vevie na mí?

Be míade bubu mía Mawu ŋu. Enye nyateƒe be menye míaƒe gotagome dzedzeme koe Mawu kpɔna o. (1 Samuel 16:7) Ke hã, ne míeva ƒo ƒu be míade ta agu nɛ la, míedina vevie be míawɔ nu si ade bubu Eyama kple mía nɔviwo ŋu. Hafi ame aɖe nado ɖe ʋɔnudrɔ̃la aɖe ŋkume la, adi be yeadzra ɖo nyuie be yeade bubu ʋɔnudrɔ̃laa ŋu le ɖoƒe si wòle la ta. Nenema kee ale si míedzrana ɖo hafi yia míaƒe kpekpewo la ɖenɛ fiana be míedea bubu gã Yehowa Mawu, si nye ‘xexea me katã ƒe ʋɔnudrɔ̃la’ la, kple míaƒe tadeaguƒewo hã ŋu.—1 Mose 18:25.

Be míaɖee afia be míenɔa agbe ɖe Biblia ƒe dzidzenuwo nu. Biblia de dzi ƒo na Kristotɔwo be woado awu “le ameŋububu kple ŋuɖɔɖo me” abe ale si dze ame siwo ‘vɔ̃a Mawu’ ene. (1 Timoteo 2:9, 10) Awudodo ‘le ameŋububu me’ fia be míatsri atsyɔ̃ɖoɖo kpeɖii, eye míatsri awu siwo nyɔa dzodzro ɖe ame me kple awu siwo me ametia dzena le la dodo be míagahe amewo ƒe susu ava mía ɖokuiwo dzi o. Nuwɔwɔ ‘le ŋuɖɔɖo me’ kpena ɖe mía ŋu be míatsri awudodo ɖewoɖewoe alo dzadzraɖo si gbɔ eme. Ke hã, Biblia ƒe mɔfiame siawo kpɔtɔ na ablɔɖe mí be míatia awudodo kple dzadzraɖo ƒomevi vovovo siwo sɔ. Míaƒe dzadzraɖo nyui si nya kpɔna la ‘ɖoa atsyɔ̃ na mía Xɔla ƒe nufiafia,’ eye wònyea ‘kafukafu na Mawu.’ (Tito 2:10; 1 Petro 2:12) Esi míedoa awu siwo sɔ hafi yia kpekpeawo ta la, ekpɔa ŋusẽ nyui ɖe ale si amewo bua tadedeagu na Yehowae dzi.

Mègagblɔ be awu siwo tɔgbi ame siwo le afi sia do la mele ye si o ta nàgbe Fiaɖuƒe Akpataa me yiyi o. Míate ŋu ado awu siwo sɔ, siwo le dzadzɛ, eye wole nɔnɔme nyui me, ke menye awu xɔasiwo alo esiwo le tsia dzi kokoko o.

• Alekee míaƒe dzadzraɖo le vevie ne míele ta dem agu na Mawu?

• Biblia ƒe mɔfiame kawoe kpena ɖe mía ŋu be míaƒe awudodo kple dzadzraɖo sɔna?

Ne Yehowa Ðasefowo le Biblia srɔ̃m kpli wò la, ke anɔ eme be èdzrana ɖo ɖe nu si miasrɔ̃ ŋu do ŋgɔ. Nenema kee wòanyo be nàdzra ɖo ɖe hamea ƒe kpekpewo hã ŋu do ŋgɔ be wòaɖe vi geɖe na wò. Ne esia wɔwɔ zu numame na wò la, àkpɔ viɖe geɖe tso eme.

Tia ɣeyiɣi kple teƒe si nàsrɔ̃ nua le. Ɣekaɣie nàte ŋu asrɔ̃ nu be wòatsi susu me na wò nyuie wu? Fɔŋli me hafi nàdze ŋkekea ƒe dɔwo gome ye loo, alo fiẽ me esi ɖeviawo mlɔ anyi yea? Ne màte ŋu asrɔ̃ nu ɣeyiɣi didi o gɔ̃ hã la, anyo be nàɖo ɣeyiɣi si nàtsɔ asrɔ̃ nui la na ɖokuiwò, eye mègana naneke nagblẽ eme o. Srɔ̃ nua le teƒe si ɖoɖoezizi le, eye nàtsi radio, television, kple wò telefon be woagahe wò susu o. Ne èdo gbe ɖa hafi dze nusɔsrɔ̃a gɔme la, esia akpe ɖe ŋuwò nàɖe susu ɖa le ŋkekea ƒe dzimaɖitsitsiwo ŋu be wòanɔ Mawu ƒe Nya la ŋu bliboe.—Filipitɔwo 4:6, 7.

De dzesi nya veviawo, eye nàɖoe be yeaɖo nya ŋu. Hafi nàdze ɖokuisinusɔsrɔ̃a gɔme la, anyo be nàna nu si ŋu nyati bliboa ku ɖo la nanɔ susu me na wò gbã. Ale si nàwɔ esiae nye esi: de ŋugble le tanyaa ŋu, bu ale si tanya sueawo de nu nyatia mee ŋu, lé ŋku ɖe nɔnɔmetata siwo anɔ nusɔsrɔ̃a me ŋu, eye nàde ŋugble le numetotobiabia siwo he susu yi nya veviawo dzii la ŋuti. Azɔ xlẽ memamawo dometɔ ɖe sia ɖe, eye nàdi biabia ɖe sia ɖe ƒe ŋuɖoɖo. Xlẽ mawunyakpukpui siwo me nyawo womeŋlɔ ɖe agbalẽa me o, eye nàde ŋugble le ale si wode nu nyatia mee ŋu. (Dɔwɔwɔwo 17:11) Ne èkpɔ biabiawo ƒe ŋuɖoɖowo la, te fli ɖe nya ʋɛ aɖewo siwo akpe ɖe ŋuwò nàɖo ŋku ŋuɖoɖoa dzi la te. Le kpekpeawo me la, àte ŋu ado asi ɖe dzi faa aɖo nya ŋu kpuie abe ale si nèse egɔmee ene.

Ne èdzrana ɖo ɖe nyati vovovo siwo me míedzrona kwasiɖa sia kwasiɖa le kpekpeawo me ŋu la, Biblia me nunya adzi ɖe edzi na wò le wò “nu xɔasiwo dzraɖoƒe.”—Mateo 13:51, 52.

• Nu kawoe wòle be nànɔ wɔwɔm ne èdi be yeadzra ɖo ɖe kpekpeawo ŋu?

• Nu kae ana wòanɔ bɔbɔe na wò be nàɖo nya ŋu le kpekpeawo me?

Tso blema ke la, Yehowa di be ƒomewo nanɔ anyi ɖekae asrɔ̃ nu bene ƒomedodo si le woa kple ye dome la naganyo ɖe edzi, eye wòana ɖekawɔwɔ si le ƒomea me tɔwo dome hã me nagasẽ ɖe edzi. (5 Mose 6:6, 7) Susu sia tae Yehowa Ðasefowo ɖo ɣeyiɣi aɖe ɖi koŋ na ƒomea ƒe tadedeagu kwasiɖa sia kwasiɖa. Wowɔa ɖeka dzroa Biblia me nya siwo ŋu wotrɔ asi le koŋ be wòakpɔ ƒomea ƒe hiahiãwo gbɔ la me le dziɖeɖi me. Ne wò ɖeka koe li hã, àte ŋu azã ɣeyiɣi sia atsɔ anɔ Biblia srɔ̃m be wòado ŋusẽ ƒomedodo si le mia kple Mawu dome.

Ƒometadedeagu ana nàte ɖe Yehowa ŋu kplikplikpli. Biblia gblɔ be: “Mite ɖe Mawu ŋu, eye ate ɖe mia ŋu.” (Yakobo 4:8) Ne míesrɔ̃ nu geɖe tso Yehowa ƒe nɔnɔmewo kple nuwɔnawo ŋu le eƒe Nya, Biblia me la, míeva dzea si eyama nyuie wu. Mɔ bɔbɔe si dzi míato adze ƒometadedeagu gɔmee nye be míazã ɣeyiɣia ƒe akpa aɖe atsɔ axlẽ Biblia ɖekae, eye míate ŋu azɔ ɖe Biblia xexlẽ ƒe ɖoɖo si wowɔ na Teokrasi Subɔsubɔ Sukua dzi. Miate ŋu ade nuxexlẽa ƒe akpa aɖe asi na ƒomea me tɔ ɖe sia ɖe, eyome miadzro nu yeye siwo miesrɔ̃ le Biblia ƒe akpa ma me ɖekae.

Ƒometadedeagu akpe ɖe ƒomea me tɔwo ŋu be woawɔ ɖeka. Ne srɔ̃ŋutsuwo kple srɔ̃nyɔnuwo, alo dzilawo kple wo viwo srɔ̃ Biblia ɖekae la, enana ɖekawɔwɔ si le ƒomea me tɔwo dome la me gasẽna ɖe edzi. Ele be wòanye dzidzɔɣi kple ɣeyiɣi si ƒomea me tɔwo katã aɖe dzi ɖi ahanɔ mɔ kpɔm na vevie. Dzilawo ate ŋu atia nyati siwo asɔ na ɖeviawo ɖe woƒe ƒexɔxɔ nu, ɖewohĩ le Gbetakpɔxɔ alo Nyɔ! me alo le míaƒe Internet nyatakakadzraɖoƒe, jw.org. Miate ŋu aƒo nu tso kuxi aɖe si ɖeviawo do goe le suku kple ale si woakpɔ egbɔe ŋu. Ðe manyo be miakpɔ television dzi wɔna aɖe le JW Nyakakadɔwɔƒe (tv.jw.org) eye miadzro eme oa? Adzɔ dzi na ƒomea ne miate ŋu ato ha siwo míadzi le kpekpeawo me la me, alo awɔ ɖoɖo ɖe numeɖenu aɖewo ŋu ɣeaɖewoɣi le ƒometadedeagua wɔwɔ vɔ megbe.

Ne miezãa ɣeyiɣi tɔxɛ sia tsɔ dea ta agu na Yehowa kwasiɖa sia kwasiɖa la, ana Mawu ƒe Nya la sɔsrɔ̃ nagado dzidzɔ na ƒome bliboa geɖe wu, eye wòahe yayra geɖe vɛ na mi.—Psalmo 1:1-3.

• Susu kawo tae míeɖoa ɣeyiɣi aɖe ɖi koŋ na ƒometadedeagu?

• Nu kawoe dzilawo ate ŋu awɔ be ɣeyiɣi siawo nado dzidzɔ na ƒomea me tɔwo katã?

Nu kae na ame siwo le afi sia le dzidzɔ kpɔm alea gbegbe? Míaƒe takpekpe gãwo dometɔ ɖeka mee wole. Mawu gblɔ na esubɔla siwo nɔ anyi le blema be woakpe ta zi etɔ̃ ƒe sia ƒe. Nenema kee míawo hã míekpɔa mɔ na kpekpe siwo míewɔna le ƒuƒoƒo gãwo me. (5 Mose 16:16) Míewɔa takpekpe etɔ̃ ƒe sia ƒe, siwo nye: ŋkeke ɖeka nutome sue takpekpe si míewɔna zi eve, kple ŋkeke etɔ̃ nutome gã takpekpe. Aleke takpekpe siawo ɖea vi na míi?

Wodoa ŋusẽ míaƒe Kristotɔwo ƒe nɔviwo ƒe habɔbɔa. Ale si wòdzɔa dzi na Israel viwo be yewoakafu Yehowa ‘le ameha gãwo dome’ la, nenema kee wòdzɔa dzi na míawo hã be míade ta agu na Mawu le wɔna tɔxɛ siawo me. (Psalmo 26:12; 111:1) Takpekpe siawo nana mɔnukpɔkpɔ mí be míade ha kple mía nɔvi Ðasefo siwo tso hame bubuwo me alo tso dukɔ bubuwo me. Le ŋdɔ me ɖiɖiɖemeɣia la, míenɔa takpekpewɔƒea ɖua nu ɖekae kple mía nɔviwo le tadedeagu wɔna siawo me. (Dɔwɔwɔwo 2:42) Míegakpɔa lɔlɔ̃ deto si na mía “nɔviwo ƒe habɔbɔ blibo la katã” wɔ ɖeka le xexea me godoo la teƒe le takpekpe siawo me.—1 Petro 2:17.

Wonana míegawɔa ŋgɔyiyi geɖe le Mawu ƒe Nya la gɔmesese me. Woɖe Ŋɔŋlɔawo me na Israel viwo le takpekpewo me, “wose nya si wogblɔ na wo la gɔme,” eye wòɖe vi geɖe na wo. (Nexemiya 8:8, 12) Míawo hã míedea asixɔxɔ Biblia me nufiame siwo míexɔna le míaƒe takpekpewo me ŋu. Ŋɔŋlɔawo dzie wotua takpekpea ƒe ɖoɖowɔɖi ɖe sia ɖe ɖo. Wotoa nuƒo tuameɖo vovovowo kple wɔwɔfiawo dzi fiaa ale si míawɔ Mawu ƒe lɔlɔ̃nu le míaƒe agbe mee la mí. Ame siwo le dzi dom le nɔnɔme sesẽwo me esi wole agbe nɔm ɖe Kristotɔwo ƒe nudidiwo nu le ɣeyiɣi sesẽ siawo me la ƒe nuteƒekpɔkpɔwo sese dea dzi ƒo na mí geɖe. Wowɔa drama, si me dramawɔlawo dzrana ɖo wòsɔna ɖe ɣeyiɣi si ƒe nudzɔdzɔ wònye la nu, le nutome gã takpekpewo me, siwo fiaa ale si míawɔ ɖe nufiame siwo le Biblia me ŋutinyawo me dzii la mí. Le takpekpe ɖe sia ɖe me la, wowɔa ɖoɖo na ame siwo di be yewoatsɔ nyɔnyrɔxɔxɔ ɖe tsi me aɖo kpe yewoƒe adzɔgbeɖeɖe na Mawu dzii la be woaxɔ nyɔnyrɔ.

• Nu ka tae takpekpe gãwo nyea dzidzɔɣiwo?

• Vi kae takpekpe siawo dede aɖe na wò?

Ɣeyiɣi kpui aɖe do ŋgɔ na Yesu ƒe ku la, egblɔ be: “Woaɖe gbeƒã fiaɖuƒe ŋuti nya nyui sia le anyigba blibo la katã dzi, be wòanye ɖaseɖiɖi na dukɔwo katã, eye ekema nuwuwu la ava.” (Mateo 24:14) Gake mɔ ka dzie woato aɖe gbeƒã le xexe bliboa katã me? Eyae nye to kpɔɖeŋu si Yesu ɖo esi wònɔ anyigba dzi la sɔsrɔ̃ me.—Luka 8:1.

Míeyia amewo gbɔ le woƒe aƒewo me. Yesu na hehe eƒe nusrɔ̃lawo be woaɖe gbeƒã nya nyuia tso aƒe me yi aƒe me. (Mateo 10:11-13; Dɔwɔwɔwo 5:42; 20:20) Le ƒe alafa gbãtɔ me la, wofia teƒe si koŋ nyanyuigblɔlawo aɖe gbeƒã le la wo. (Mateo 10:5, 6; 2 Korintotɔwo 10:13) Nenema kee egbea hã míewɔ ɖoɖo aɖe koŋ ɖe gbeƒãɖeɖedɔa ŋu, eye wonaa anyigbamama hame ɖe sia ɖe be woaɖi ɖase le eme. Esia kpena ɖe mía ŋu míewɔna ɖe se si Yesu de be “míaɖe gbeƒã na amewo, eye míaɖi ɖase tsitotsito” la dzi.—Dɔwɔwɔwo 10:42.

Míegblɔa nya nyuia na amewo le afi sia afi si míakpɔ wo le. Yesu gaɖo esia hã ƒe kpɔɖeŋu ɖi na mí esi wòɖe gbeƒã le afi sia afi si wòakpɔ amewo le, eɖanye ƒuta loo alo vudo to o. (Marko 4:1; Yohanes 4:5-15) Míawo hã míegblɔa Biblia me nyawo na amewo le afi sia afi si wòanya wɔ le—le ablɔwo dzi, le dɔwɔƒewo, le tsaɖibɔwo me, alo le telefon dzi. Azɔ hã, míeɖea gbeƒã na míaƒe aƒelikawo, dɔwɔhatiwo, sukuhatiwo, kple ƒometɔwo ɣesiaɣi si wòanya wɔ. Míetoa mɔ vovovo siawo katã dzi nana ‘xɔname ŋuti nya nyui’ la ɖoa ame miliɔn geɖewo gbɔ le xexea me godoo.—Psalmo 96:2.

Ame kawoe nàdi be yeagblɔ Mawu ƒe Fiaɖuƒe ŋuti nya nyuia na, eye vi kae nèsusu be esia aɖe na wo le etsɔme? Mègagbe nya nyui si naa mɔkpɔkpɔ ame la gbɔgblɔ na amewo o. Dze agbagba nàgblɔe na wo kaba!

• “Nya nyui” kae wòle be míaɖe gbeƒãe?

• Mɔ kawo nue Yehowa Ðasefowo srɔ̃a gbeƒãɖeɖe ƒe kpɔɖeŋu si Yesu ɖo ɖi le?

Ame siwo doa ŋgɔ yia teƒe aɖe va ʋua mɔ na ame bubuwo be woadze wo yome lae woyɔna zi geɖe be “mɔɖelawo.” Míate ŋu ayɔ Yesu be mɔɖela, elabena wodɔe ɖo ɖe anyigba dzi wòva wɔ subɔsubɔdɔ aɖe si ʋu mɔ na amewo be woakpɔ xɔxɔ. (Mateo 20:28) Egbea, eyomedzelawo le eƒe kpɔɖeŋua srɔ̃m esi wole ɣeyiɣi geɖe ale si woate ŋui la zãm be yewoatsɔ awɔ amewo woanye “nusrɔ̃lawo.” (Mateo 28:19, 20) Ame aɖewo ƒo wo ɖokuiwo ɖe dɔ si míeyɔna be mɔɖeɖedɔa me.

Mɔɖelawo nye ame siwo zãa woƒe ɣeyiɣi akpa gãtɔ ɖe gbeƒãɖeɖedɔa ŋu. Yehowa Ðasefowo katã nye nya nyui gbeƒãɖelawo. Ke hã, wo dometɔ aɖewo trɔ asi le woƒe ɖoɖowo ŋu hezu gbesiagbe mɔɖelawo. Wozãa gaƒoƒo 70 ɣleti sia ɣleti ɖe gbeƒãɖeɖedɔa ŋu. Wo dometɔ geɖe ɖe ɣeyiɣi si wozãna ɖe woƒe dɔwɔɖuiwo ŋu dzi kpɔtɔ be yewoate ŋu awɔ mɔɖeɖedɔa. Wotiaa wo dometɔ aɖewo be woazu mɔɖela veviwo. Woɖoa wo ɖe teƒe siwo Fiaɖuƒegbeƒãɖelawo hiã le wu, eye wozãa gaƒoƒo 130 ya teti ɣleti sia ɣleti tsɔ ɖea gbeƒãe. Mɔɖelawo lɔ̃na faa be yewoanɔ agbe tsɛ, eye woka ɖe Yehowa dzi bliboe be ana agbemenuhiahiã veviwo nasu yewo si. (Mateo 6:31-33; 1 Timoteo 6:6-8) Gbeƒãɖela siwo mate ŋu awɔ ɣeyiɣiawo katã ƒe subɔsubɔdɔa o la te ŋu wɔa kpekpeɖeŋu mɔɖeɖedɔa ɣesiaɣi si wòanya wɔ, eye wodzia woƒe gbeƒãɖeɖedɔa ɖe edzi wòɖoa gaƒoƒo 30 alo 50 le ɣletia me.

Lɔlɔ̃ na Mawu kple amewo ye ʋãa mɔɖelawo wowɔa dɔ sia. Míekpɔe be ehiã vevie be amewo nasrɔ̃ nu tso Mawu kple eƒe tameɖoɖowo ŋu, abe ale si tututu Yesu hã kpɔe ene. (Marko 6:34) Sidzedze su mía si, eye míenya be sidzedze sia aɖe vi na amewo fifia, eye wòana mɔkpɔkpɔ vavã wo. Esia tae lɔlɔ̃ ʋãa mɔɖelawo be woatsɔ woƒe ɣeyiɣi kple ŋutete akpe ɖe amewo ŋu be woase nya nyuia. (Mateo 22:39; 1 Tesalonikatɔwo 2:8) Dɔ nyui sia wɔwɔ doa ŋusẽ mɔɖelawo ƒe xɔse, enana wotena ɖe Mawu ŋu kplikplikpli, eye wònana wokpɔa dzidzɔ geɖe.—Dɔwɔwɔwo 20:35.

• Ame kae nye mɔɖela?

• Nu kae ʋãa ame aɖewo be woawɔ ɣeyiɣiawo katã ƒe subɔsubɔdɔa?

Teokrasi ƒe hehe si xɔm Yehowa Ðasefowo le ɣeyiɣi didi aɖee nye esia la ɖe dzesi ŋutɔ. Woɖo suku tɔxɛwo na ame siwo tsɔ woƒe ɣeyiɣiawo katã ɖo anyi na Fiaɖuƒegbeƒãɖeɖedɔa wɔwɔ, ale be woakpe ɖe wo ŋu woawɔ woƒe “subɔsubɔdɔ la de goe bliboe.”—2 Timoteo 4:5.

Mɔɖelawo Ƒe Subɔsubɔ Suku. Ne ame aɖe wɔ gbesiagbe mɔɖeɖedɔa ƒe ɖeka la, wokpenɛ be wòade suku sia ŋkeke ade le Fiaɖuƒe Akpata aɖe me le woƒe nutoa me. Sukua ƒe taɖodzinue nye be wòakpe ɖe mɔɖelaa ŋu wòate ɖe Yehowa ŋu geɖe wu, wòagabi ɖe ɖaseɖiɖidɔa ƒe akpa vovovoawo katã me, eye wòayi eƒe subɔsubɔdɔa dzi nuteƒewɔwɔtɔe.

Fiaɖuƒe Nyanyuigblɔlawo Ƒe Suku. Woɖo suku sia si xɔa ɣleti eve be woatsɔ ana hehe mɔɖela bibi siwo di be yewoaʋu ayi aɖasubɔ le afi sia afi si wohiã woƒe kpekpeɖeŋu le la. Ame siawo gblɔna be, “Nyee nye esi, dɔm!” eye woƒe nɔnɔme nyui sia nye Yesu Kristo, ame si nye Nyanyuigblɔla gãtɔ si nɔ anyigba dzi kpɔ la, ƒe kpɔɖeŋu sɔsrɔ̃. (Yesaya 6:8; Yohanes 7:29) Be woaʋu ayi aɖanɔ nuto bubu me biana be woanɔ agbe tsɛ. Ele be woatrɔ ɖe amewo ƒe agbenɔnɔ, yame ƒe nɔnɔme kple nuɖuɖu yeyewo ŋu. Ehiãna be woasrɔ̃ gbe yeyewo gɔ̃ hã. Suku sia le kpekpem ɖe nɔviŋutsu kple nɔvinyɔnu trewo kpakple srɔ̃tɔwo siaa, siwo xɔ tso ƒe 23 va se ɖe ƒe 65, ŋu be woasrɔ̃ nɔnɔme nyui siwo dzea Mawu ŋu, siwo akpe ɖe wo ŋu le woƒe dɔdeasia wɔwɔ me. Egakpena ɖe wo ŋu hã be woatu ŋutete siwo ana Yehowa kple eƒe habɔbɔa nazã wo geɖe wu la ɖo.

Gbetakpɔxɔ Habɔbɔa Ƒe Gilead Biblia Suku. Le Hebrigbe me la, “Gilead” gɔmee nye “Ðaseɖiɖikpekɔ.” Tso esime woɖo Gilead sukua le ƒe 1943 me la, wona hehe dutanyanyuigblɔla siwo wu 8,000 be woayi aɖaɖi ɖase “va se ɖe anyigba ƒe seƒe ke,” eye wole dzidzedze geɖe kpɔm. (Dɔwɔwɔwo 13:47) Hafi suku sia nuwulawo naɖo Peru la, hame aɖeke menɔ dukɔa me o. Fifia hame siwo le afi ma sɔ gbɔ wu 1,000. Esi míaƒe dutanyanyuigblɔlawo ɖo Japan teti la, Ðasefo siwo nɔ dukɔa me mede ewo gɔ̃ hã o. Fifia wosɔ gbɔ wu 200,000. Gilead suku si xɔa ɣleti atɔ̃ la delawo srɔ̃a Mawu ƒe Nya la tsitotsito. Wokpea mɔɖela veviwo alo ame siwo le nya nyuia gblɔm le duta, ame siwo le subɔsubɔm le alɔdzedɔwɔƒewo, alo nutome sue dzikpɔlawo be woade suku sia. Woxɔa hehe deto si nana woagabina nyuie, ale be woana xexea me katã ƒe dɔa nali ke ahakpɔ dzidzedze.

• Nu kae nye Mɔɖelawo Ƒe Subɔsubɔ Sukua ƒe taɖodzinu?

• Ame kawoe woɖo Fiaɖuƒe Nyanyuigblɔlawo Ƒe Sukua na?