Fiaɖuƒea Ƒe Ŋugbedodowo​—Nuwo Katã Wɔwɔ Yeyee

ÈGBE atɔtɔŋuti lotoo aɖe si ɖi nyuie la le ati dzi. Ètsɔe ɖo ŋɔtinu hese eƒe ʋeʋẽ lililia sẽe hafi tsɔe de kusia me. Emawo ƒomevi sɔŋ yɔ kusia taŋ xoxo. Gaƒoƒo geɖee nye ema wò ŋku biã ɖe dɔ ma ŋu, gake ŋusẽ gale ŋuwò nèkpɔe be yeagate ŋu ayi dɔa dzi vie. Dawò kple ƒomea me tɔ bubuwo kpakple mia xɔlɔ̃ aɖewo siwo va be yewoakpe ɖe mia ŋu hã le dɔ dzi vevie le axawò, wole dze ɖom hele dɔa wɔm le dzidzɔ me. Èkpɔe be dawò gatrɔ zu ɖetugbui abe ale si wònɔ ƒe gbogbo aɖewo va yi esi nènye ɖevi dzaa ko le nuɖoanyi xoxoa me ene. Ewɔ nuku na wò be eya si nèkpɔ wòku nyagã le xexe ma si nu yi gbe aɖe gbe ʋĩi ke me lae nye ema gatrɔ nenema. Èɖo ŋku ɣemaɣi si wònɔ dɔbadzi nɔ kudɔ ƒom eye nèlé eƒe asi va se ɖe esime eƒe gbɔgbɔ nu tso la dzi. Èɖo ŋku ale si nèfa avi vevie le yɔdoa to le eɖigbe hã dzi. Gake fifia, eya kple ame bubu geɖe siwo ku va yi lae nye ema gbɔ agbe, eye wògaɖo lãmesẽ nyui me ake!

Míenya be ɣeyiɣi mawo ava godoo. Míeka ɖe esia dzi elabena Mawu ƒe ŋugbedodowo medoa kpo emevava gbeɖe o. Le akpa adrelia sia me la, míadzro ale si Fiaɖuƒea ƒe ŋugbedodo siwo ku ɖe nu siwo adzɔ va se ɖe Harmagedon me ŋu dometɔ aɖewo ava eme kpuie la me. Míadzro Fiaɖuƒea ƒe ŋugbedodo lédziname siwo ava eme le Harma- gedon megbe hã dometɔ aɖewo me. Dzidzɔ gã ka gbegbee nye esi wòanye be míanɔ agbe ɣemaɣi akpɔ ale si Mawu Fiaɖuƒea aɖu anyigba bliboa dzi ahawɔ nuwo katã yeyee la teƒe!