Nu Kae Nye “Nuwuwu La”?

“. . . eye ekema nuwuwu la ava.”—MATEO 24:14.

AMEWO ƒoa nu tso xexea ƒe nuwuwu ŋu le ŋkeke siawo me ŋutɔ. Agbalẽwo, television dzi fefewo, kple magazinewo, tso nukokoedonametɔwo dzi va ke ɖe esiwo wotu ɖe dzɔdzɔmeŋutinunya dzi, la ƒoa nu tso ale si xexea atsrɔ̃ ŋɔdzitɔe ŋu le mɔ vovovowo nu. Nukliaʋa, dɔlékui vɔ̃ɖi aɖe, yame ƒe nɔnɔme ƒe tɔtrɔ, kpe gã nyadri aɖe si age adze anyigba dzi, nu gbagbe aɖewo atso ɣletinyigba bubu dzi ava—nu siwo amewo gblɔna be woahe xexea ƒe tsɔtsrɔ̃ vae la dometɔ aɖewoe nye esiawo.

Mawudzixɔselawo hã ƒe susu le vovovo; wo dometɔ geɖe gblɔna be ‘nuwuwua’ ana nu gbagbewo katã natsrɔ̃ le anyigba dzi. Esi mawunyaŋununyala aɖe nɔ nu ƒom tso Mateo 24:14 ŋu la, egblɔ nya dovoɖiname sia be: “Mawunyakpukpui siwo le vevie wu le Mawu Nyaa me la dometɔ ɖekae nye esia . . . Tsɔtsrɔ̃ gbidii si ava dzidzime sia dzi la nu asẽ ale gbegbe be mía dometɔ geɖe medina be míabu etsɔme dziŋɔ sia ŋu o.”

Ame siwo bua nuwo ŋu alea la ŋlɔ nya vevi aɖe be: Yehowa Mawu ‘ɖo anyigba gɔme anyi sesĩe,’ eye “menye ɖe wòwɔe, be wòatsi ƒuƒlu o, ke boŋ ɖe wòmèe, be woanɔ edzi.” (Yesaya 45:18) Eya ta “nuwuwu” si ŋu Yesu ƒo nu tsoe la mefia be anyigba atsrɔ̃ o; eye mefia hã be ameƒomea atsrɔ̃ gbidii o. Nu si wòwɔnɛ ye nye be ame vɔ̃ɖiwo, alo ame siwo sẽa dzi me be yewomanɔ agbe ɖe mɔfiame siwo Yehowa nana mí lɔlɔ̃tɔe nu o la, atsrɔ̃.

Bu kpɔɖeŋu sia ŋu kpɔ. Tsɔe be aƒe nyui aɖe le asiwò, eye èɖe mɔ na amewo be woanɔ eme femaxee. Wo dometɔ aɖewo le ŋutifafa me kple wo nɔewo, eye woléa be na aƒea. Ke fu koe ame bubuawo ya ɖena, wowɔa dzre, eye wowɔa ŋlɔmi le ame nyui siwo le aƒea me ŋu. Wogblẽ nu le wò nunɔamesiwo ŋu, eye togbɔ be ègbea nya na wo hã la, gbeɖegbeɖea koe.

Aleke nàkpɔ nya sia gbɔe? Màgbã xɔa o ɖe, alo? Anɔ eme be ànyã ame gblẽkuawo ɖa le aƒea me ahaɖɔ nu siwo gblẽ la ɖo.

Nu sia tɔgbie Yehowa awɔ. Mawu ƒe gbɔgbɔ ʋã hakpalaa wòŋlɔ bena: ‘Woatsrɔ̃ ame vlowo, ke ame siwo kpɔa mɔ na Yehowa la, woanyi anyigba la dome. Ekpɔtɔ vie ko ame vɔ̃ɖi la maganɔ anyi o, eye ne èɖe ŋku ɖe eteƒe la, màgakpɔe o. Ke ame ɖihiãwo anyi anyigba la dome, eye dzi adzɔ wo ɖe ŋutifafa gbogbo la ŋuti.’—Psalmo 37:9-11.

Apostolo Petro hã ƒo nu tso nya sia ŋu. Gbɔgbɔ ʋãe wòŋlɔ bena: “Dziƒowo nɔ anyi tso blema, eye anyigba hã do tso tsi me, eye tsi ƒo xlãe; eye nu siawoe wotsɔ tsrɔ̃ xexe si nɔ anyi ɣemaɣi esime tsi ɖee.” (2 Petro 3:5, 6) Noa ŋɔli me Tsiɖɔɖɔa ŋue apostoloa nɔ nu ƒom tsoe. Ame mavɔ̃mawuwo ƒe xexe aɖee tsrɔ̃, ke menye anyigbae o. Xexea me katã ƒe Tsiɖɔɖɔ ma nye “nu siwo ava va la ƒe kpɔɖeŋu na ame mavɔ̃mawuwo.”—2 Petro 2:6.

Eyome Petro gblɔ kpee be: “Wodzra fifi dziƒo kple anyigba ɖo ɖi na dzo.” Ne míexlẽe se afi ma ko la, ɖewohĩ míase egɔme bubui. Gake de dzesii be kpukpui ma dzi yiyi he susu yi “ame mavɔ̃mawuwo ƒe ʋɔnudɔdrɔ̃ kple tsɔtsrɔ̃” dzi. Eya ta menye anyigbae atsrɔ̃ o, ke boŋ ame mavɔ̃mawuwoe. Nu kae adzɔ le ema megbe? Petro ŋlɔ bena: “Míele dziƒo yeye [Mawu ƒe Mesia Fiaɖuƒea] kple anyigba yeye [ame dzɔdzɔewo], siwo me dzɔdzɔenyenye anɔ la, lalam le eƒe ŋugbedodo la nu.”—2 Petro 3:7, 13.

Biblia me nyagblɔɖiwo hã ɖo kpe edzi be “nuwuwu la” gogo. Xlẽ Mateo 24:3-14 kple 2 Timoteo 3:1-5 be nàkpɔ nu siwo ɖo kpe edzi be egogo vavã.a

Ðe wòwɔ nuku na wò be ame geɖe mese Mateo 24:14 me nyawo, si gɔme ɖevi sue gɔ̃ hã ate ŋu ase la, gɔme oa? Susu aɖewo tae. Satana gbã ŋku na wo be womagase nyateƒenya vevi siwo le Mawu Nyaa me la gɔme o. (2 Korintotɔwo 4:4) Azɔ hã, Mawu ɣla eƒe tameɖoɖowo ɖe dadalawo, ke eɖe wo fia ɖokuibɔbɔlawo. Le ɖekawɔwɔ me kple esia la, Yesu gblɔ be: “Fofo, dziƒo kple anyigba ƒe Aƒetɔ, mekafu wò le dutoƒo, elabena èɣla nu siawo ɖe nunyalawo kple tagbɔɖaɖɛtɔwo, eye nèɖe wo fia vidzĩwo.” (Mateo 11:25) Bubu ka gbegbee nye esi wònye be míanɔ ɖokuibɔbɔla siwo se nu si Mawu Fiaɖuƒea nye ŋutɔŋutɔ gɔme la dome, ale be míate ŋu akpɔ mɔ na yayra siwo wòahe vae na ame siwo katã le eƒe akpa dzi la!

[Etenuŋɔŋlɔ]

[Nɔnɔmetata si le axa 9]

Ne Fiaɖuƒea va la, vɔ̃ɖinyenye katã ‘nu ayi’