Lɛta Si Tso Mexico

“Ðe Yehowa Lɔ̃ Mí Indiatɔwo Hã?”

MELESIO, si nye ŋutsu aɖe si doa O’damgbe la, tsoa toawo dzi va dia dɔ wɔna ɣeaɖewoɣi. Edea Kristotɔwo ƒe kpekpewo, eye wòxɔa Biblia srɔ̃gbalẽ siwo me wòadzro kple edetɔwo la ɖe asi dzonae. Eɖe kuku be woana ame aɖe nava srã yewo kpɔ afia nu geɖe yewo tso Biblia me.

O’damtɔwo nye to aɖe me tɔ siwo sa ɖe aga ŋutɔ, wole tonuto aɖe si woyɔna be Sierras, si le Mexico ƒe dziehetitina, afi si didi tso Yehowa Ðasefowo ƒe hame si te ɖe afi ma ŋu la anɔ abe kilometa 240 ene. Mía dometɔ geɖe ɖoe be míayi aɖasrã wo kpɔ.

Míedi agbatsɔʋu, avɔgbadɔwo, nu siwo dzi míamlɔ, nuɖuɖu, kple mɔmemi si asu na mí ŋkeke etɔ̃, eye míedze mɔ tso dugã si nye Durango. Míedze mɔ fɔŋli ga ene heku ʋu gaƒoƒo enyi sɔŋ le todzimɔ si dzi ʋuʋu le la dzi va se ɖe mɔa ƒe seƒe. Afi siae wotona gena ɖe O’dam nutoa me. Esi míeɖo afi sia la, míekpɔe be bali globo aɖe kple to bubu aɖe le mía ŋgɔ.

Míegblẽ agbatsɔʋua ɖe ranchito (alo kɔƒe tsoabo) aɖe me, eye le gaƒoƒo etɔ̃ siwo kplɔe ɖo me la, míetsɔ míaƒe agbawo ɖe asi heɖi abu yi ɖe balia me. Le afi ma la, míefɔ nake tsɔ do dzo gã aɖe si ana be lã wɔadãwo magogo mí o, eye gaƒoƒo etɔ̃ sia gaƒoƒo etɔ̃ la, mía dometɔ ɖeka nɔa ŋu bene wòanɔ dzoa tum ɖo.

Le ŋufɔke la, míete toa lialia. Afɔmɔawo sɔ gbɔ, eya ta míebu zi geɖe. Mía dometɔ ɖeka se O’damgbe vie, eya ta míegblɔ Biblia me gbedeasi kpui aɖe na ame siwo ƒe aƒe le mɔawo to. Ewɔ nuku na mí be amewo nɔ gbɔgblɔm na mí be ame aɖewo, siwo yɔa wo ɖokui be Yehowa Ðasefowo, le Los Arenales, afi si yim míele, eye be woƒoa ƒu srɔ̃a Biblia le afi ma. Nya sia wɔ nuku na mí, eye wògade dzi ƒo na mí hã.

Kaka míaɖo Los Arenales la, míaƒe afɔwo ɖo loholoho. Anyixɔ siwo sa ɖe aga tso wo nɔewo gbɔe le nutoa me, eye wotsɔ agbalẽgowo gba woe—suku kple elektrikkaɖi hã meli o. Esi ame siawo tso abo ŋutɔ ta la, woda ahe kolikoli, eye blinuɖuɖu si woyɔna be tortillas la koŋ nue wonɔa agbe ɖo. Míeke ɖe Melesio ŋu, enye ɖekakpui tsralɛ aɖe, eye dzi dzɔe ŋutɔ esi wòkpɔ mí. Ekplɔ mí va eƒe aƒe kpokploe la me, eye wògblɔ na mí be yedoa gbe ɖa na Yehowa gbe sia gbe be wòaɖo Eƒe Ðasefowo ɖa bene woava fia Biblia yeƒe ƒomea kple ye nɔvi O’damtɔwo. Ekpɔe be yemetea ŋu ɖoa woƒe biabiawo katã ŋu na wo o.

O’damtɔwo nye trɔ̃subɔlawo. Wozãa hɔ̃ ƒe fu kple eƒe ƒuwo wɔa atiblɛ, wosubɔa dzɔdzɔmeŋusẽwo, eye wovɔ̃na na trɔ̃nuawo, siwo tafaa wo la. Melesio gblɔ be esi yeva srɔ̃e le dugã me be Yehowa ye nye Mawu vavãa la, yegblẽ nu siwo katã yezãna tsɔ subɔa trɔ̃ la dome. Nutoa me tɔwo nɔ mɔ kpɔm be yewoƒe trɔ̃wo awui ɖe esia ta. Gake esi naneke mewɔe o ta la, wokpɔe be ŋusẽ le Yehowa si wu yewoƒe mawuwo. Eya ta wote gomekpɔkpɔ le Biblia nusɔsrɔ̃ si Melesio zãa míaƒe agbalẽwo tsɔ wɔna kple eƒe ƒomea la me.

Melesio gblɔ be: “Megblɔ na wo be gbã la, ele be woatɔ dzo woƒe tilawo kple legbawo katã.” Wo dometɔ geɖe ɖe asi le woƒe alakpadzixɔse siwo nana wovɔ̃na la ŋu, eye kpekpea valawo ƒe xexlẽme va wu 80. Esi nya sia wɔ dɔ ɖe mía dzi ŋutɔ ta la, míewɔ ɖoɖo be míawɔ kpekpe ŋdɔ ma ke. Eya ta míeɖo du ɖe ame siwo dea kpekpe le Melesio ƒe me edziedzi la to duxɔla sɔdolawo dzi. Togbɔ be enye kwasiɖa ƒe domedome, eye wòlili wo hã la, ame 25 va, ɖewo to afɔ, eye ɖewo hã do tedzi.

Míeɖo woƒe Biblia me nyabiasewo ŋu, eye Melesio nɔ gbea gɔme ɖem na wo. Wobia nyawo abe: “Ðe Yehowa lɔ̃ mí Indiatɔwo hã?” “Ðe wòsea gbe siwo míedona ɖa nɛ le O’damgbe mea?” “Ne Harmagedon va la, ɖe Yehowa aɖo ŋku mí ame siwo sa ɖe aga tso dugãwo gbɔ hã dzia?” Edzɔ dzi na mí be míezã Biblia tsɔ ka ɖe edzi na ɖokuibɔbɔla siawo be Yehowa tsɔa ɖe le eme na ame fafawo, metsɔ le eme gbe si wodona alo afi si wole o. Woɖe kuku na mí be míaɖo ame ɖa be wòava fia nu geɖe yewo.

Esi míekpã la, míema nuɖuɖu si míetsɔ ɖe asi la kple mía xɔlɔ̃ yeye siawo. Fifia zã do, eye vuvɔ nɔ wɔwɔm le esi wònye to dzie míele ta, eya ta edzɔ dzi na mí be wotsɔ xɔ aɖe si nu womewu o la na mí míemlɔ eme. Le ŋufɔke la, wokplɔ mí to mɔ kpui aɖe míeva do ɖe afi si míegblẽ míaƒe agbatsɔʋua ɖo, eye míetrɔ yi Durango. Ðeɖi te mía ŋu, gake dzi nɔ mía dzɔm.

Míebui be enye mɔnukpɔkpɔ gã be míedo go dzianukwaretɔ siawo, siwo dometɔ akpa gãtɔ mexlẽa Spaingbe alo ŋlɔnɛ alo donɛ o, evɔ wodi be yewoadze si Mawu vavã la ahasubɔe! Tso esime míeyi ɖasrã wo kpɔ la, Ðasefo ade trɔ yi nuto ma me, eye wonɔ afi ma kwasiɖa etɔ̃. Wokpe ɖe ame 45, siwo di tso dzi me be yewoasubɔ Yehowa la ŋu be wova dze si eyama, eye wo katã wodea kpekpeawo edziedzi.

Egasusɔ nya ɖeka. Womegadzraa atama le fiase sue ɖeka kolia si le Los Arenales la me azɔ o, elabena ame geɖe va te Biblia sɔsrɔ̃, eye womeganoa atama o. Wo dometɔ geɖe hã ɖe wo srɔ̃wo ɖe se nu.

[Nɔnɔmetata si le axa 24]

Melesio, srɔ̃a kple vianyɔnuvi eneawo, kpakple lɔ̃xoa

[Nɔnɔmetata siwo le axa 25]

Biblia sɔsrɔ̃ kple ame aɖe, kpakple Kristotɔwo ƒe kpekpe si le edzi yim le Los Arenales

[Nɔnɔmetata Tsoƒe si le axa 25]

Servicio Postal Mexicano, Correos de Mexico