Kristotɔwo Ƒe Ƒomewo—‘Minɔ Ŋudzɔ’

“Mina míanɔ ŋudzɔ, eye míanɔ mo xexi.”—1 TES. 5:6.

1, 2. Hafi ƒome aɖe nate ŋu anɔ ŋudzɔ le gbɔgbɔ me dzidzedzetɔe la, nu kae wòle be ƒomea me tɔwo nawɔ?

ESI apostolo Paulo nɔ susu hem yi “Yehowa ƒe ŋkeke gã dziŋɔ la” dzi la, eŋlɔ na Kristotɔ siwo nɔ Tesalonika be: “Nɔviwo, miele viviti me o, bene ŋkeke ma naɖi ɖe mi abe ale si wòaɖi ɖe fiafitɔwo ene o, elabena mi katã mienye kekeli ƒe viwo kple ŋkeke ƒe viwo. Míenye zã alo viviti tɔ o.” Paulo gblɔ kpee be: “Eya ta migana míanɔ alɔ̃ dɔm abe ale si ame susɔeawo le alɔ̃ dɔm ene o, ke boŋ mina míanɔ ŋudzɔ, eye míanɔ mo xexi.”—Yoel 3:4; 1 Tes. 5:4-6.

² Aɖaŋu si Paulo ɖo na Tesalonikatɔwo la sɔ ɖe ɣeyiɣia dzi na Kristotɔ siwo le agbe le ‘nuwuɣia’ me ŋutɔ. (Dan. 12:4) Esi Satana ƒe nuɖoanyi vɔ̃ɖia ƒe nuwuwu le aƒe tum la, ele adeklo dzi be yeana nyateƒe tadeagula geɖe ale si nu yeate ŋui nadzudzɔ Mawu subɔsubɔ. Eya ta nunya le eme be míawɔ ɖe nuxlɔ̃ame si Paulo na be míayi edzi anɔ ŋudzɔ le gbɔgbɔ me la dzi. Hafi Kristotɔwo ƒe ƒome aɖe nate ŋu anɔ ŋudzɔ dzidzedzetɔe la, ele vevie be ƒomea me tɔ ɖe sia ɖe nawɔ akpa si Yehowa de esi abe ale si wòdze le Ŋɔŋlɔawo me ene. Ekema akpa kae srɔ̃ŋutsuwo, srɔ̃nyɔnuwo, kple ɖeviwo wɔna tsɔ kpea asi ɖe woƒe ƒomewo ŋu be ‘woanɔ ŋudzɔ’?

Srɔ̃ŋutsuwo—Misrɔ̃ “Alẽkplɔla Nyui La”

3. Le 1 Timoteo 5:8 ƒe nya nu la, nu kae agba si le ŋutsu dzi abe ƒomea ƒe ta ene la lɔ ɖe eme?

³ Biblia gblɔ be: ‘Nyɔnu ƒe tae nye ŋutsu.’ (1 Kor. 11:3) Nu kae agba si le ŋutsu dzi abe ƒomea ƒe ta ene la lɔ ɖe eme? Esi Ŋɔŋlɔawo nɔ susu hem yi nu siwo wòlɔ ɖe eme la dometɔ ɖeka dzi la, egblɔ be: “Ne ame aɖe mekpɔa ye ŋutɔ tɔwo ƒe nu hiahiãwo gbɔ, vevietɔ ye ŋutɔ ƒemetɔwo tɔwo gbɔ o la, egbe nu le xɔse la gbɔ, eye wòvɔ̃ɖi wu dzimaxɔsetɔ.” (1 Tim. 5:8) Nyateƒee, ele na srɔ̃ŋutsu be wòakpɔ eƒe ƒomea ƒe ŋutilãmenuhiahiãwo gbɔ. Gake ne edi be yeakpe ɖe yeƒe ƒomea ŋu woanɔ ŋudzɔ le gbɔgbɔ me la, ele be wòawɔ geɖe wu gadidi hena ƒomea dzi kpɔkpɔ ko. Ehiã be wòatu eƒe ƒomea ɖo le gbɔgbɔ me, eye wòakpe ɖe ƒomea me tɔwo katã ŋu be woa kple Mawu dome ƒomedodoa me nasẽ. (Lod. 24:3, 4) Aleke wòate ŋu awɔ esia?

4. Nu kae ate ŋu akpe ɖe ŋutsu aɖe ŋu wòatu eƒe ƒomea ɖo le gbɔgbɔ me dzidzedzetɔe?

⁴ Esi wònye be “ŋutsue nye ta na srɔ̃a, abe ale si Kristo la hã nye ta na hame la ene” ta la, ele be srɔ̃ŋutsu nasrɔ̃ nu tso ale si Yesu wɔa eƒe tanyenye ŋu dɔ le hamea me la ŋu eye wòadze eƒe kpɔɖeŋua yome. (Ef. 5:23) Kpɔ ale si Yesu ɖɔ ƒomedodo si nɔ eya kple eyomedzelawo dome la ɖa. (Mixlẽ Yohanes 10:14, 15.) Nu vevi kae akpe ɖe ŋutsu aɖe si di be yeatu yeƒe ƒomea ɖo le gbɔgbɔ me la ŋu be wòakpɔ dzidzedze? Eyae nye be, wòasrɔ̃ nu tso nu siwo Yesu, si nye “alẽkplɔla nyui la,” fia kple nu siwo wòwɔ la ŋu, eye “[wòadze eƒe] afɔɖoƒewo yome pɛpɛpɛ.”—1 Pet. 2:21.

5. Aleke gbegbe Alẽkplɔla Nyui la nya hame lae?

⁵ Le kpɔɖeŋunyagbɔgblɔ nu la, ƒomedodo si nɔa alẽkplɔla aɖe kple eƒe alẽwo dome la nɔa te ɖe ale si wònya eƒe alẽawo nyuie kple ale si eƒe alẽawo hã nyae nyuie heka ɖe edzi la dzi. Alẽawo dzea si eƒe gbe, eye woɖoa toe. Yesu gblɔ be: “Menya nye alẽawo, eye nye alẽawo nyam.” Menye nanewo koe Yesu nya tso hamea ŋu o. Helagbe me nya si gɔme woɖe le afi sia be “nya” la fia be “ame aɖe ŋutɔ nanya nane tsitotsito.” Ɛ̃, Alẽkplɔla Nyui la ŋutɔ nya eƒe alẽawo ɖekaɖeka. Enya wo dometɔ ɖe sia ɖe ƒe nuhiahiãwo, woƒe gbɔdzɔgbɔdzɔwo, kple woƒe ŋutetewo. Naneke mele alẽawo ŋu si míaƒe Kpɔɖeŋuɖola la menya o. Nenema kee alẽawo hã nya alẽkplɔla la nyuie, eye woka ɖe eƒe mɔfiafia dzi.

6. Aleke srɔ̃ŋutsuwo ate ŋu asrɔ̃ Alẽkplɔla Nyui la?

⁶ Be srɔ̃ŋutsu aɖe nawɔ eƒe tanyenye ŋu dɔ abe Kristo ene la, ele be wòabu eɖokui abe alẽkplɔla ene, eye wòabu ame siwo le eƒe kpɔkplɔ te la abe alẽwo ene. Ele be wòaku kutri anya nu sia nu tso eƒe ƒomea ŋu. Ðe sidzedze sia ate ŋu asu srɔ̃ŋutsu si nyateƒea? Ɛ̃, ate ŋu asu esi, ne eɖoa dze kple ƒomea me tɔ ɖe sia ɖe nyuie heɖoa to wo ne wole woƒe dzimaɖitsitsiwo gblɔm, ne exɔa ŋgɔ le ƒomea ƒe dɔwɔnawo me, eye wòwɔa eƒe ŋutete ɖe sia ɖe wɔa nyametsotso nyuiwo ku ɖe nuwo, abe ƒometadedeagu, kpekpewo dede, gbeadzidede, modzakaɖeɖe, kple dzidzɔdonameɖokuinuwo ene ŋu. Ne srɔ̃ŋutsu Kristotɔ aɖe srɔ̃a Mawu ƒe Nya la nyuie eye wòdze agbagba nya eƒe ƒomea me tɔwo nyuie ale be wòate ŋu aɖo kpɔɖeŋu nyui ɖi na wo la, eƒe ƒomea me tɔwo aka ɖe eƒe mɔfiafia dzi godoo, eye akpɔ eteƒe ƒomea nayi edzi awɔ ɖeka le tadedeagu vavãtɔa me, eye wòanye dzidzɔ nɛ.

7, 8. Le Alẽkplɔla Nyui la sɔsrɔ̃ me la, alekee srɔ̃ŋutsu ate ŋu aɖe lɔlɔ̃ afia ame siwo le eƒe kpɔkplɔ te?

⁷ Gakpe ɖe eŋu la, alẽkplɔla nyui melɔ̃a nu le eƒe alẽwo gbɔ o. Ne míesrɔ̃ Nya Nyui la me nuŋlɔɖi siwo ku ɖe Yesu ƒe agbenɔnɔ kple eƒe subɔsubɔdɔa ŋu la, ale si Yesu ɖe lɔlɔ̃ fia eƒe nusrɔ̃lawo la naa míaƒe dziwo yɔna fũu kple ŋudzedzekpɔkpɔ. ‘Etsɔ eƒe luʋɔ na ɖe eƒe alẽawo ta gɔ̃ hã.’ Ele be srɔ̃ŋutsuwo naɖe lɔlɔ̃ afia ame siwo le woƒe kpɔkplɔ te la abe ale si Yesu wɔe ene. Srɔ̃ŋutsu si di be Mawu nakpɔ ŋudzedze ɖe ye ŋu la yia edzi lɔ̃a srɔ̃a “abe ale si ko Kristo la hã lɔ̃ hame la” ene, tsɔ wu be wòanɔ ŋlɔmi wɔm le eŋu. (Ef. 5:25) Ele be wòaƒo nu na srɔ̃a le tufafa kple ameŋububu me, elabena srɔ̃anyɔnua dze na bubu.—1 Pet. 3:7.

⁸ Le ɖeviwo hehe me la, ele be ƒomea ƒe ta nalé Mawu ƒe gɔmeɖosewo me ɖe asi sesĩe. Ke hã, ele be wòaɖe lɔlɔ̃ deto afia viawo. Ne ehiã be wòahe to na wo la, ele be wòawɔe le lɔlɔ̃ me. Exɔa ɣeyiɣi didi hafi ɖevi aɖewo va sea nu si wodi tso wo si la gɔme. Le ɖevi siawo gome la, ele be vifofoa nagbɔ dzi ɖi na wo geɖe wu. Ne ŋutsuwo srɔ̃a Yesu ƒe kpɔɖeŋu ɣeawokatãɣi la, enana be woƒe aƒe me nyea dedienɔƒe si dzidzeme nɔna. Woƒe ƒomea me tɔwo sea vivi le gbɔgbɔmededienɔnɔ si ŋu hakpalaa ƒo nu tsoe la me.—Mixlẽ Psalmo 23:1-6.

9. Abe blemafofo Noa ene la, agba kae le srɔ̃ŋutsu Kristotɔwo dzi, eye nu kae akpe ɖe wo ŋu woatsɔ agba ma?

⁹ Blemafofo Noa nɔ agbe le xexe si nɔ anyi le eŋɔli la ƒe ŋkeke mamlɛawo me. Gake Yehowa ‘kpɔ eya kple ame adre bubuwo ta dedie esime wòhe tsiɖɔɖɔ va ame mavɔ̃mawuwo ƒe xexe ma dzi.’ (2 Pet. 2:5) Agba nɔ Noa dzi be wòakpe ɖe eƒe ƒomea ŋu woatsi agbe atso Tsiɖɔɖɔa. Agba ma kee le ƒome ƒe ta Kristotɔwo dzi le ŋkeke mamlɛ siawo me. (Mat. 24:37) Aleke gbegbe wòle vevie ye nye esi be woasrɔ̃ nu tso kpɔɖeŋu si “alẽkplɔla nyui la” ɖo ɖi ŋu ahadze agbagba asrɔ̃ eƒe kpɔɖeŋua!

Srɔ̃nyɔnuwo—‘Mitu Miaƒe Aƒe Ðo’

10. Nu kae ɖokuibɔbɔ ɖe srɔ̃ŋutsu te bia tso srɔ̃nyɔnu si?

¹⁰ Apostolo Paulo ŋlɔ bena: “Srɔ̃nyɔnuwo nebɔbɔ wo ɖokuiwo na wo srɔ̃wo, abe ale si woabɔbɔ na Aƒetɔ la ene.” (Ef. 5:22) Menye ɖoƒe aɖe si ŋu bubu mele o la ŋu nya gblɔm wòle le afi sia kura o. Hafi Mawu vavã la nawɔ nyɔnu gbãtɔ, Xawa, la, egblɔ be: “Menyo bena ame la natsi akogo o; mawɔ kpeɖeŋutɔ, si asɔ ɖe eŋu la nɛ.” (1 Mose 2:18) “Kpeɖeŋutɔ” si “asɔ ɖe eŋu” nyenye nye ɖoƒe si ŋu bubu le vavã—ebia be wòakpe asi ɖe srɔ̃aŋutsua ŋu esi wòle eƒe ƒomegbanɔamedziawo gbɔ kpɔm.

11. Aleke srɔ̃nyɔnu kpɔɖeŋu nyui ɖola ‘tua eƒe aƒe ɖo’?

¹¹ Srɔ̃nyɔnu kpɔɖeŋu nyui ɖola wɔa nu siwo aɖe vi na eƒe ƒomea. Lododowo 14:1 (NW) gblɔ be: “Nyɔnu si nye nunyala ŋutɔŋutɔ la tua eƒe xɔ, ke nyɔnu tsibome tsɔa ye ŋutɔ ƒe asi gbãnɛ ƒua anyi.” To vovo na nyɔnu tsibome, si medea bubu tanyenye ƒe ɖoɖoa ŋu o la, nyɔnu nyanu ya dea bubu deto ɖoɖo sia ŋu. Meɖea tomaɖomaɖo kple nuwɔwɔ le ame ɖokui si ƒe gbɔgbɔ si bɔ ɖe xexea me la fiana o, ke boŋ ebɔbɔa eɖokui na srɔ̃a. (Ef. 2:2) Srɔ̃nyɔnu si tsi bome la gblɔa nya manyomanyowo tso srɔ̃a ŋu kabakaba, ke srɔ̃nyɔnu nyanu ya dzea agbagba be yeana ɖeviawo kple ame bubuwo nagade bubu ye srɔ̃a ŋu geɖe wu. Srɔ̃nyɔnu sia tɔgbi ɖɔa ŋu ɖo be yemanɔ vodada dim le ye srɔ̃a ŋu ɣesiaɣi alo anɔ nya hem kplii ahato esia dzi aɖi gbɔ eƒe tanyenye o. Beléle na ga ƒe nya hã li. Srɔ̃nyɔnu tsibome tea ŋu gblẽa nu siwo ƒomea wɔ dɔ sesĩe kpɔ la dome yakayaka. Srɔ̃nyɔnu si kpea asi ɖe srɔ̃a ŋu ya mele nenema o. Ewɔa nu kple srɔ̃aŋutsua aduadu le ganyawo gome. Eɖɔa ŋu ɖo eye wòléa be na ga. Meƒoa nya ɖe srɔ̃a nu be wòawɔ dɔ ɖe dɔ dzi le kpakpã vɔ megbe o.

12. Nu kae srɔ̃nyɔnu ate ŋu awɔ atsɔ akpe ɖe eƒe ƒomea ŋu ‘woanɔ ŋudzɔ’?

¹² Srɔ̃nyɔnu kpɔɖeŋu nyui ɖola kpena ɖe ƒomea ŋu be ‘woanɔ ŋudzɔ’ to asikpekpe ɖe srɔ̃a ŋu le nufiafia ɖeviawo tso Mawu ŋu me. (Lod. 1:8) Ekpea asi ɖe Ƒometadedeagu ƒe ɖoɖoa ŋu veviedodotɔe. Gakpe ɖe eŋu la, ekpea asi ɖe srɔ̃a ŋu ne ele aɖaŋu ɖom na wo viawo, alo ne ele to hem na wo. Aleke gbegbe wòto vovo na srɔ̃nyɔnu si mewɔa nu aduadu kple srɔ̃a o, si ƒe viwo kpea fu le ŋutilã kple gbɔgbɔ me siaa ye nye esi!

13. Nu ka tae wòle vevie be srɔ̃nyɔnu nakpe asi ɖe srɔ̃a ŋu ne ewɔa akpa vevi aɖe le teokrasidɔwo me?

¹³ Ne srɔ̃nyɔnu si kpea asi ɖe srɔ̃a ŋu la kpɔ srɔ̃a wòle akpa vevi aɖe wɔm le Kristo hamea me la, aleke wòsena le eɖokui me? Ekpɔa dzidzɔ ale gbegbe! Srɔ̃aŋutsua ɖanye subɔsubɔdɔwɔla, hamemetsitsi, alo ɖewohĩ enye Kɔdzi Kadododzikpɔkɔmiti me tɔ loo, alo Nuto Me Xɔtukɔmiti me tɔ o, nyɔnua kpɔa dzidzɔ le mɔnukpɔkpɔ si su srɔ̃a si la ta. Asikpekpe ɖe srɔ̃a ŋu veviedodotɔe to nyagbɔgblɔ kple nuwɔna me abia tso esi godoo be wòatsɔ nanewo asa vɔe. Gake enyae be ye srɔ̃ ƒe gomekpɔkpɔ le teokrasidɔwo me kpena ɖe ƒome bliboa ŋu woyia edzi nɔa ŋudzɔ le gbɔgbɔ me.

14. (a) Nu ka wɔwɔe ate ŋu asesẽ na srɔ̃nyɔnu si kpea asi ɖe srɔ̃a ŋu, eye aleke wòate ŋu akpɔ nya sia gbɔ? (b) Aleke srɔ̃nyɔnu ƒe nuwɔna ate ŋu aɖe vi na ƒome bliboa?

¹⁴ Ate ŋu asesẽ ŋutɔ be srɔ̃nyɔnu nayi edzi anye kpɔɖeŋu nyui ɖola le asikpekpe ɖe srɔ̃a ŋu me ne srɔ̃a wɔ nyametsotso aɖe si mesɔ na eya o. Le go sia me gɔ̃ hã la, eɖea “gbɔgbɔ fatu si nɔa anyi kpoo” fiana, eye wòwɔa nu aduadu kple srɔ̃a be nyametsotso si wòwɔ la nadze edzi nyuie. (1 Pet. 3:4) Srɔ̃nyɔnu nyui dzea agbagba srɔ̃a kpɔɖeŋu nyui si nyɔnu mawuvɔ̃la siwo nɔ anyi le blema, abe Sara, Rut, Abigail, kple Yesu dada, Maria ene, ɖo ɖi la. (1 Pet. 3:5, 6) Egasrɔ̃a nyɔnu tsitsi siwo li egbea, siwo ‘wɔa nu le mawuvɔvɔ̃ me’ la hã ƒe kpɔɖeŋu. (Tito 2:3, 4) Ne srɔ̃nyɔnu kpɔɖeŋu nyui ɖola ɖea lɔlɔ̃ fiaa srɔ̃a eye wòdea bubu eŋu la, esia wɔa akpa vevi aɖe le woƒe srɔ̃ɖeɖea ƒe dzidzedzekpɔkpɔ me, eye wòɖea vi na ƒome bliboa. Eƒe aƒe me nyea dziɖeɖiteƒe kple dedienɔƒe. Srɔ̃ŋutsu si tsi le gbɔgbɔ me la dea asixɔxɔ gã aɖe srɔ̃nyɔnu sia tɔgbi ŋu!—Lod. 18:22.

Ðeviwo—‘Miaƒe Ŋku Nenɔ Nu Siwo Womekpɔna O La Dzi’

15. Aleke ɖeviwo ate ŋu awɔ nu aduadu kple wo dzilawo ale be woƒe ƒome bliboa ‘nanɔ ŋudzɔ’?

¹⁵ Alekee mi ɖeviwo miate ŋu awɔ nu aduadu kple mia dzilawo ale be ƒomea bliboa ‘nanɔ ŋudzɔ’ le gbɔgbɔ me? Mibu fetu si Yehowa tsɔ ɖo mia ŋkume ŋu kpɔ. Ðewohĩ tso miaƒe ɖevime ke la, mia dzilawo tsɔ nɔnɔmetata siwo ɖe ale si agbenɔnɔ anɔ le Paradisoa me fia la fia mi. Esi miele tsitsim la, anɔ eme be wozã Biblia kple Kristotɔwo ƒe agbalẽwo tsɔ kpe ɖe mia ŋu miekpɔ ale si agbe mavɔ nɔnɔ anɔ le xexe yeyea me. Ne miena miaƒe susu le subɔsubɔdɔwɔwɔ na Yehowa dzi eye miewɔ ɖoɖo ɖe miaƒe agbe ŋu le ɖekawɔwɔ me kple taɖodzinu sia la, akpe ɖe mia ŋu ‘mianɔ ŋudzɔ.’

16, 17. Nu kawoe ɖeviwo ate ŋu awɔ be woaƒu agbedua awu enu dzidzedzetɔe?

¹⁶ Mina aɖaŋu si apostolo Paulo ɖo le 1 Korintotɔwo 9:24 nade dzi gbɔ na mi. (Mixlẽe.) Miƒu agbedua kple taɖodzinu be miaɖu dzi. Mitia agbenɔnɔmɔ si ana miaƒe asi nasu agbe mavɔ fetu la dzi. Ame geɖe ɖe mɔ ŋutilãmenudidiwo yome titi he woƒe susu ale be woƒe ŋku dzo le fetu la dzi. Bometsinu ka gbegbee nye ema! Agbagbadzedze le agbea me be ga geɖe nasu ye si menaa ame kpɔa dzidzɔ vavãtɔ o. Nu siwo ga ate ŋu aƒle menɔa anyi ɖaa o. Gake miawo ya, mina miaƒe ŋku nanɔ “nu siwo womekpɔna o” la dzi. Nu ka tae? Elabena “nu siwo womekpɔna o [la] nɔa anyi tegbee.”—2 Kor. 4:18.

¹⁷ “Nu siwo womekpɔna o la” lɔ Fiaɖuƒea ƒe yayrawo hã ɖe eme. Wɔ ɖoɖo be nànɔ agbe le mɔ si ana wò asi nasu yayra mawo dzi la nu. Ne èsubɔ Yehowa le wò agbe me la, esia ana nàkpɔ dzidzɔ vavãtɔ. Mawu vavã la subɔsubɔ naa mɔnukpɔkpɔ sua ame si be wòaminya taɖodzinu siwo gbɔ wòate ŋu aɖo kaba kpakple taɖodzinu siwo gbɔ ɖoɖo xɔa ɣeyiɣi didi la siaa.a Gbɔgbɔmetaɖodzinu siwo gbɔ nàte ŋu aɖo bɔbɔe la ɖoɖo na ɖokuiwò akpe ɖe ŋuwò be wò susu nanɔ Mawu subɔsubɔ ŋu ale be wò asi nasu agbe mavɔ fetu la dzi.—1 Yoh. 2:17.

18, 19. Aleke sɔhɛ aɖe ate ŋu anya ne ewɔ nyateƒea etɔe?

¹⁸ Ðeviwo, afɔ gbãtɔ si miaɖe le agbemɔa dzi ye nye be miawɔ nyateƒea mia tɔe. Ðe nèwɔ afɔɖeɖe ma xoxoa? Bia ɖokuiwò be: ‘Ðe mewɔ ŋgɔyiyi le gbɔgbɔ mea, alo dzinyelawoe ƒonɛ ɖe nunye mekpɔa gome le Mawu subɔsubɔdɔwo mea? Ðe mele nɔnɔme nyui siwo ana nye nu nadze Mawu ŋu la tum ɖoa? Ðe medzea agbagba zɔna ɖe ɖoɖowɔɖi aɖe koŋ dzi le gomekpɔkpɔ le dɔwɔna siwo do ƒome kple tadedeagu vavãtɔ, abe gbedodoɖa, nusɔsrɔ̃, kpekpewo dede, kple gbeadziyiyi edziedzi ene, mea? Ðe mele agbagba dzem be mate ŋu ate ɖe eŋu Mawu be ƒomedodo kplikplikplia nanɔ mía kplii domea?’—Yak. 4:8.

¹⁹ De ŋugble le Mose ƒe kpɔɖeŋua ŋu kpɔ. Togbɔ be Egiptetɔwo ƒe dekɔnuwoe wotsɔ nyii hã la, etiae be amewo nanya ye be Yehowa subɔlae yenye, tsɔ wu be woanya be Farao vinyɔnua ƒe vie yenye. (Mixlẽ Hebritɔwo 11:24-27.) Kristotɔ sɔhɛwo, ele be miawo hã miaɖoe kplikpaa be yewoasubɔ Yehowa nuteƒewɔwɔtɔe. Ne miewɔe alea la, miakpɔ dzidzɔ vavãtɔ, agbe adze edzi na mi fifia, eye mɔkpɔkpɔ asu mia si be ‘miaƒe asi asu agbe vavã la dzi sesĩe.’—1 Tim. 6:19.

20. Le agbedua ƒuƒu me la, ame kawoe xɔa fetua?

²⁰ Le duɖime siwo wokena le blema me la, duƒula ɖeka koe ɖua dzi. Gake menye nenemae wòle le agbedua ya ƒuƒu me o. Mawu ƒe lɔlɔ̃nue wònye “be woaɖe ame ƒomeviwo katã, eye nyateƒe ƒe sidzedze vavãtɔ la nasu wo si.” (1 Tim. 2:3, 4) Ame geɖe ƒu dua hewu enu dzidzedzetɔe do ŋgɔ na wò, eye ame geɖe gale dua ƒum kpli wò. (Heb. 12:1, 2) Ame sia ame si mena ta o la axɔ fetu la. Eya ta ɖoe kplikpaa be yeaɖu dzi!

21. Nu kawo mee míadzro le nyati si kplɔe ɖo me?

²¹ “Yehowa ƒe ŋkeke gã dziŋɔ la” ava godoo. (Mal. 3:23) Mele be ŋkeke ma nava lili Kristotɔwo ƒe ƒomewo abe mɔ̃ ene o. Ele vevie be ƒomea me tɔwo katã nawɔ akpa si Mawu de wo si le ƒomea me le Ŋɔŋlɔawo nu la. Nu bubu kawoe miagate ŋu awɔ be miakpɔtɔ anɔ ŋudzɔ le gbɔgbɔ me eye miana ƒomedodo si le mia kple Mawu dome la me nagasẽ ɖe edzi? Nyati si kplɔe ɖo adzro nu vevi etɔ̃ aɖewo siwo nana ƒome bliboa nɔa dedie le gbɔgbɔ me la me.

[Etenuŋɔŋlɔ]

Nu Kae Nèsrɔ̃?

• Nu ka tae wòle vevie be Kristotɔwo ƒe ƒomewo ‘nanɔ ŋudzɔ’?

• Alekee srɔ̃ŋutsu ate ŋu asrɔ̃ Alẽkplɔla Nyui la?

• Nu kawoe srɔ̃nyɔnu kpɔɖeŋu nyui ɖola ate ŋu awɔ atsɔ akpe asi ɖe srɔ̃a ŋu?

• Nu kawoe ɖeviwo ate ŋu awɔ atsɔ akpe ɖe woƒe ƒomewo ŋu woanɔ ŋudzɔ le gbɔgbɔ me?

[Nɔnɔmetata si le axa 9]

Srɔ̃ŋutsu si tsi le gbɔgbɔ me dea asixɔxɔ gã aɖe srɔ̃nyɔnu nyui ŋu