“Dzikpɔla Wɔnuku Kple Xɔlɔ̃ Vevi Aɖe”

JOHN (JACK) BARR, si subɔ abe Yehowa Ðasefowo ƒe Dziɖuha la me tɔ ene la, wu eƒe anyigba dzi subɔsubɔdɔa nu le Memleɖa ŋdi, December 4, 2010 dzi. Exɔ ƒe 97. Amewo ɖɔe be enye “dzikpɔla wɔnuku kple xɔlɔ̃ vevi aɖe.”

Wodzi Nɔviŋutsu Jack Barr le Aberdeen, Scotland, eye eyae nye vi etɔ̃ siwo wo dzilawo dzi la ƒe dɔmlɔea. Edzila evea siaa nye amesiaminawo. Nɔviŋutsu Barr tsɔa dzidzɔ ƒoa nu tso eƒe ɖevimegbenɔnɔ ŋu; ekpɔa ŋudzedze ɖe kpɔɖeŋu nyui si fofoa kple dadaa ɖo ɖi nɛ la ŋu.

Esi Jack ɖo eƒe ƒewuiwo me la, eva kpɔe be enɔ sesẽm na ye ŋutɔ be yeaƒo nu na ame siwo yemedze si o. Ke hã, eku kutri ɖu kuxi ma dzi, eye le Kwasiɖagbe ŋdɔ aɖe me, le ƒe 1927 me, esi wòxɔ ƒe 14 la, egblɔ na fofoa be yele klalo azɔ be yeawɔ ɖeka kplii le tso aƒe me yi aƒe me gbeƒãɖeɖedɔa me. Esia nye ƒe gbogbo siwo wòtsɔ wɔ subɔsubɔdɔ na Yehowa la ƒe gɔmedzedze. Tso gbe ma gbe dzi va se ɖe eƒe kugbe la, Nɔviŋutsu Barr yi edzi nye nya nyui gbeƒãɖela si me dzo nɔ.

Afɔku aɖe si me Jack dada ku le kloe la na Jack, ɖekakpuivi la, de ŋugbe le tameɖoɖo si le agbe ŋu la ŋu vevie, eye le ƒe 1929 me la, etsɔ eɖokui ɖe adzɔgbe na Yehowa; esi mɔnukpɔkpɔa nya ʋu ɖi nɛ ko la, exɔ nyɔnyrɔ tsɔ ɖo kpe eƒe adzɔgbeɖeɖea dzi le ƒe 1934 me. Emegbe le ƒe 1939 me la, ezu Betel ƒomea me tɔ le London, England. Ale wòdze ɣeyiɣiawo katã ƒe subɔsubɔdɔ si wòwɔ ƒe 71 sɔŋ la gɔme.

Le October 29, 1960, dzi la, Nɔviŋutsu Barr ge ɖe kadodo aɖe si wòyɔ be “ƒomedodo xɔasi tɔxɛ aɖe” la me esi wòɖe Mildred Willett, si nye mɔɖela kple dutanyanyuigblɔla veviedola hena ƒe geɖe. Amewo nya Nɔviŋutsu kple Nɔvinyɔnu Barr nyuie be wonye atsu kple asi dovevienu siwo nye kpɔɖeŋu nyui ɖolawo, eye wo ame evea woyi edzi lé nɔnɔme nyui sia me ɖe asi va se ɖe esime Mildred wu eƒe anyigba dzi subɔsubɔdɔa nu le October 2004 me. Tso esime Nɔviŋutsu kple Nɔvinyɔnu Barr woɖe wo nɔewo la, woxlẽa Biblia ɖekae gbe sia gbe va se ɖe nyɔnua ƒe kugbe.

Ɣesiaɣi si Jack Barr ƒe nu ava susu me na ame siwo nyae la, woaɖo ŋku edzi be enye ame si ɖoa aɖaŋu tuameɖowo—ame si dana sɔna ɣesiaɣi, nyoa dɔme ɣesiaɣi, eye wònya Ŋɔŋlɔawo nyuie. Enye dɔ sesẽ wɔla kple dzikpɔla lɔ̃ame si sea nu gɔme na ame, eye wòganye xɔlɔ̃ wɔnuteƒe hã. Eƒe nyaŋuɖoɖowo, eƒe nuƒowo, kple eƒe gbedodoɖawo ɖea ale si gbegbe wòlɔ̃ nyateƒea kple ale si gbegbe eya kple Yehowa dome le kplikplikpli la fiana.

Togbɔ be míasusu mía nɔviŋutsu lɔlɔ̃ Barr vevie hã la, míele dzidzɔ kpɔm kplii le makumakunyenye ƒe nunana si wòxɔ la ta—esia nye mɔnukpɔkpɔ aɖe si wònɔ mɔ kpɔm na vevie, eye eƒoa nu tso eŋu zi geɖe. Nu sia koe wòdi vevie be wòasu ye si.—1 Kor. 15:53, 54.a

[Etenuŋɔŋlɔ]