Nu Ka Tae Biblia Meyɔ Ame Siwo Ŋu Wòƒo Nu Tsoe La Dometɔ Aɖewo Ƒe Ŋkɔwo O?

Le Biblia-gbalẽ si nye Rut me la, woyɔ ŋutsu aɖe si gbe wɔwɔ ɖe nu si Mose ƒe Sea bia dzi la be xɔ̃ alo asimasi. (Rut 4:1-12) Ðe wòle be míaƒo nya ta be ame siwo ƒe ŋkɔ Biblia meyɔ o la nye ame baɖawo alo ame siwo mele bo aɖeke nu oa?

Ao. Bu kpɔɖeŋu bubu aɖe ŋu kpɔ. Yesu gblɔ na eƒe nusrɔ̃lawo be woayi “ɖe dua me le Asimasi [“ŋutsu aɖe,” Agbenya La] gbɔ” ahadzra nuwo ɖo le aƒea me hena eƒe Ŋutitotoŋkekenyui mamlɛtɔ ɖuɖu. (Mateo 26:18) Ðe wòle be míabui be esi ŋutsu si woyɔ le afi sia be “Asimasi” la nye ame baɖa alo ame si mele bo aɖeke nu o tae womeyɔ eŋkɔ oa? Gbeɖe; ɖikeke mele eme o be Yesu ƒe nusrɔ̃lae ame si woyɔ le afi sia be “ŋutsu aɖe” la nye. Esi eƒe ŋkɔ mehiã boo le nuŋlɔɖia me o tae womeyɔ eŋkɔ o ɖo.

Gawu la, woŋlɔ ame vɔ̃ɖi geɖewo ƒe ŋkɔwo ɖe Biblia me; eye Biblia ƒo nu tso nuteƒewɔla geɖewo hã ŋu siwo ƒe ŋkɔwo womeŋlɔ ɖi o. Le kpɔɖeŋu me, ame geɖe nya nyɔnu gbãtɔ, Xawa, ƒe ŋkɔ. Ke hã, eƒe ɖokuitɔdidi kple tomaɖomaɖo wɔe be Adam wɔ nu vɔ̃, eye emetsonuawo gblẽ nu le mí katã mía ŋu vevie. (Romatɔwo 5:12) Le go bubu me la, Noa srɔ̃ ŋkɔ medze le Biblia me o, gake ale si wòkpe asi ɖe srɔ̃a ŋu ɖokuitɔmadimaditɔe le dɔ vevi si wode asi nɛ la wɔwɔ me heɖo toe la ɖe vi geɖe na mí. Eme kɔ ƒãa be menye esi Noa srɔ̃ mele bo aɖeke nu o alo esi Mawu mekpɔ ŋudzedze ɖe eŋu o tae womeyɔ eŋkɔ o.

Ame aɖewo wɔ akpa veviwo alo wɔ kalẽ gɔ̃ hã le Yehowa ƒe tameɖoɖowo me vava me, gake womeyɔ woƒe ŋkɔwo le Biblia me o. Bu Israel-nyɔnuvi si nye kluvi le Siria-ʋafia Naeman ƒe aƒe me la ŋu kpɔ. Eƒo nu na eƒe aƒenɔ Naeman srɔ̃ tso Yehowa ƒe nyagblɔɖila aɖe si le Israel ŋu dzinɔameƒotɔe. Esia na nukunu gã aɖe dzɔ. (2 Fiawo 5:1-14) Israel ƒe ʋɔnudrɔ̃la Yefta ƒe vinyɔnu hã ɖo xɔse ƒe kpɔɖeŋu ɖedzesi aɖe ɖi. Elɔ̃ faa be srɔ̃ɖeɖe kple vidzidzi nato ye ŋu ale be yeate ŋu awɔ ɖe adzɔgbe si ye fofo ɖe la dzi. (Ʋɔnudrɔ̃lawo 11:30-40) Nenema kee womeŋlɔ ame siwo ŋlɔ psalmo siwo wu 40 kple nyagblɔɖila siwo wɔ dɔdeasi vevi siwo wode wo si la nuteƒewɔwɔtɔe la ƒe ŋkɔwo ɖe Biblia me o.​—1 Fiawo 20:37-43.

Ðewohĩ kpɔɖeŋu si ɖe dzesi wue nye mawudɔla wɔnuteƒe siwo ƒe ŋkɔwo medze le Biblia me o. Mawudɔla miliɔn alafa geɖewoe li, ke hã wo dometɔ eve siwo nye Gabriel kple Mixael pɛ ko ƒe ŋkɔwo woyɔ. (Daniel 7:10; Luka 1:19; Yuda 9) Susɔeawo ƒe ŋkɔwo medze le Biblia me o. Le kpɔɖeŋu me, Manoax, Simson fofo bia mawudɔla aɖe be: “Ŋkɔwò ɖe? Bena ne wò nya la va me la, ne míade bubu ŋuwò.” Aleke wòɖo eŋue? Ebiae boŋ be: “Nu ka ŋuti nèle nye ŋkɔ . . . ta biam?” Ðokuibɔbɔtɔe la, mawudɔlaa gbe be womegade bubu si wòle be woade Mawu ɖeɖe ko ŋu la ye ŋu o.​—Ʋɔnudrɔ̃lawo 13:17, 18.

Biblia megblɔ nu si tae woyɔ ame aɖewo ƒe ŋkɔwo, evɔ womeyɔ ame bubuwo ya ƒe ŋkɔwo na mí o. Gake míate ŋu asrɔ̃ nu geɖe tso nuteƒewɔla siawo siwo subɔ Mawu, evɔ womedi ŋkɔ gã xɔxɔ kple ɖoƒe gãwo o la ƒe kpɔɖeŋuwo me.