Nu Ka Tae Amewo Doa Gbe Ða?

Ðe nèdoa gbe ɖa edziedzia? Ame geɖe doa gbe ɖa; mawudzimaxɔsela aɖewo gɔ̃ hã doa gbe ɖa. Gake nu ka tae amewo doa gbe ɖa ɖo? Numekuku aɖe si wowɔ le France la ɖee fia be dukɔa me tɔwo ƒe afã doa gbe ɖa alo dea ŋugble ɣeaɖewoɣi “ko be yewoƒe dzi nadze eme.” Abe ale si wòle le Europatɔ geɖewo gome ene la, menye mawusubɔsubɔ tae wodoa gbe ɖa ɖo o. Ke boŋ ale si woakpɔ “akɔfafa to gbedodoɖa dzi” ta koe wodoa gbe ɖa ɖo. Le xɔsetɔ aɖewo hã gome la, ne woɖo xaxa me ko hafi wodoa gbe ɖa henɔa mɔ kpɔm be Mawu nawɔ nu si dim yewole la na yewo enumake.​—Yesaya 26:16.

Ke wò ya ɖe? Ale si wò susu nadze akɔ anyi ta koe nèdoa gbe ɖa ɖoa? Ne èxɔ Mawu dzi se la, ɖe nèkpɔe be gbedodoɖa kpena ɖe ye ŋua? Alo ɖe wòwɔna na wò be Mawu meɖoa gbedodoɖawo ŋu na ye oa? Biblia ate ŋu akpe ɖe ŋuwò nàkpɔe be menye nu si ana wò dzi nadze eme koe gbedodoɖa nye o, ke enye mɔ vevi si dzi nàto ate ɖe Mawu ŋu.