7 Edidu Christ (Parousia)

Mt 24:3—Gr., τὸ σημεῖον τῆς σῆς παρουσίας (to se·meiʹon tes ses pa·rou·siʹas)

Ikọenyịn̄ usem Greek oro pa·rou·siʹa ke ata edikabade ọwọrọ “ndidu ke n̄kan̄,” ndien ẹda enye ẹto ndandiana ikọ oro pa·raʹ (ke n̄kan̄) ye ou·siʹa (“ndidu”). Ikọ oro pa·rou·siʹa odu utịm ike 24 ke N̄wed Abasi Christian Usem Greek, oro edi, ke Mt 24:3, 27, 37, 39; 1Co 15:23; 16:17; 2Co 7:6, 7; 10:10; Php 1:26; 2:12; 1Th 2:19; 3:13; 4:15; 5:23; 2Th 2:1, 8, 9; Jas 5:7, 8; 2Pe 1:16; 3:4, 12; 1Jo 2:28. Edikabade eke Obufa Ererimbot akabade pa·rou·siʹa nte “edidu” ke itie 21 ke otu itie 24 emi.

Ikọedinam oro enyenede ebuana ye emi, paʹrei·mi, ke ata edikabade ọwọrọ “du ke n̄kan̄.” Enye odu utịm ike 24 ke N̄wed Abasi Christian Usem Greek, oro edi, ke Mt 26:50; Lu 13:1; Joh 7:6; 11:28; Ut 10:21, 33; 12:20; 17:6; 24:19; 1Co 5:3, 3; 2Co 10:2, 11; 11:9; 13:2, 10; Ga 4:18, 20; Col 1:6; Heb 12:11; 13:5; 2Pe 1:9, 12; Edi 17:8. Ke ediwak ke otu mme itie emi, Edikabade eke Obufa Ererimbot akabade paʹrei·mi nte “du.”

Ẹkeme ndifiọk se pa·rou·siʹa ọwọrọde ke ndimen ukpụhọde oro odude ke ini emi Paul odude ndomo ye ini emi enye mîdụhe, emi ẹtịn̄de ke 2Co 10:10, 11 ye Php 2:12. N̄ko, ke ini ẹmende pa·rou·siʹa Eyen owo ẹdomo ye “mme usen Noah,” ke Mt 24:37-39, ana in̄wan̄-in̄wan̄ nte ke ikọ emi ọwọrọ “edidu.”

N̄wed oro A Greek-English Lexicon (LSJ), eke Liddell ye Scott, p. 1343 ọdọhọ ke akpa n̄kpọ oro pa·rou·siʹa ọwọrọde edi edidu. Kpasụk ntre n̄wed ukabadeikọ oro Theological Dictionary of the New Testament (TDNT), Eb. V, p 859, ọdọhọ ke idak ekpri ibuotikọ oro “Se Enye Ọwọrọde”: “παρουσία [pa·rou·siʹa] akpan akpan ọwọrọ edidu oro asan̄ade ye edinam.”

Ikọ oro pa·rou·siʹa, “edidu,” okpụhọde ye ikọ Greek oro eʹleu·sis, “edidi,” emi odude itie kiet ke uwetn̄kpọ usem Greek, ke Ut 7:52, nte e·leuʹse·os (Lat., ad·venʹtu). Owo ikemeke ndimen ikọ oro pa·rou·siʹa n̄kpụhọ ye eʹleu·sis. N̄wed ukabadeikọ oro TDNT, Eb. V, p. 865, ọdọhọ ke “akananam owo idaha ikọ oro [paʹrei·mi ye pa·rou·siʹa] itịn̄ iban̄a Christ ndidi ke obụkidem, ndien akananam παρουσία iwọrọke edifiak ndi. Ekikere oro nte ke parousia awak akan kiet ekebem iso odu ke Ufọkabasi eke ukperedem [idịghe mbemiso Justin, ọyọhọ isua ikie iba E.N.] . . . Akpan n̄kpọ oro ẹyomde man ifiọk ofụri ekikere akpa Ido Ukpono Christ edi nnyịn ndiduọk ekikere oro [nte ke parousia awak akan kiet].”

Kaban̄a se ikọ emi ọwọrọde, Israel P. Warren, D.D., ekewet ke n̄wed esie oro The Parousia, Portland, Maine (1879), pp. 12-15 ete: “Nnyịn imesiwak nditịn̄ mban̄a ‘edibiọn̄ọde ọyọhọ ikaba,’ ‘edidi ọyọhọ ikaba,’ ye ntre ntre eken, edi akananam N̄wed Abasi itịn̄ke iban̄a ‘Parousia ọyọhọ ikaba.’ Se ededi oro enye ekenyenede ndidi, enye ekenyene ndidi n̄kpọ oro mînyeneke mbiet, emi akanam mîtịbeke, emi mîdinyụn̄ itịbeke aba. Enye ekenyene ndidi edidu oro okpụhọrede onyụn̄ akande kpukpru mme ediyarade eken oro enye akayararede idem owụt mme owo, man ikọ emi ekpekeme ndida ke idemesie, inyụn̄ iyomke ẹdian ikọ efen ekededi ndinam enye an̄wan̄a ibọhọke ikọ emi,—EDIDU.

“Ke isede ikọ emi ke usụn̄ emi, ami n̄kere ke ana in̄wan̄-in̄wan̄ nte ke Ikọmbakara oro ẹkabarede ‘edidi’ m̀mê ikọ Latin oro ẹkabarede ‘edibiọn̄ọde’ itịmke ifọn ndida ntịn̄ mban̄a akpasarade ikọ oro. Mmọ idụhe ke n̄kemuyo ye ntọn̄ọ esie; mmọ n̄ko idụhe ke n̄kemuyo ye ekikere oro ikọedinam emi ẹdade enye ẹto ọnọde; inyụn̄ idotke ndida mmọ n̄kpụhọ ye ata nnennen ikọ oro, ‘edidu,’ ke mme itie emi mme akabade n̄wed ẹkesịnde edidu. Ikọ oro ẹdade mmọ ẹto inyụn̄ inọhọ ukem ekikere. ‘Edidi’ ye ‘edibiọn̄ọde’ ẹnen̄ede ẹnọ ekikere edidi mbịne nnyịn, edisan̄a mbịne nnyịn; ‘edidu’ ọnọ ekikere edidu ye nnyịn, ye unana editịn̄ nte enye ọkọtọn̄ọde. ‘Edidi’ etre ke ini owo edide edisịm; ‘edidu’ akam ọtọtọn̄ọ ke owo ama ekedisịm. ‘Edidi’ ye ‘edibiọn̄ọde’ ẹdi mme ikọ ẹwụtde ke n̄kpọ idopke-dop ida; ‘edidu’ owụt ke n̄kpọ odop ada. Ufan̄ ini emi edinam eke akpa oro adade itie enyene adan̄a, ekeme ndidi ke ibio ini; eke ukperedem inyeneke adan̄a . . . .

“Edieke mme akabade n̄wed nnyịn ẹkpekenamde ye ‘parousia’ nte mmọ ẹkenamde ye ‘baptisma,’—ẹdade enye ẹdisịn ye unana ẹdikpụhọ enye,—mîdịghe ẹkabarede enye nte edidu, emi ọwọrọde ata ukem n̄kpọ ye akpasarade ikọ oro, n̄ko edieke enye ekpeketịmde an̄wan̄a owo, nte akpakanade an̄wan̄a ini oro, nte ke utọ n̄kpọ nte ‘Edidu ọyọhọ ikaba’ idụhe, mmenịm nte ofụri ukpepn̄kpọ okpokpụhọde ye se idude idahaemi. Tutu amama owo ikpokopke mme utọ ikọ nte, ‘edibiọn̄ọde ọyọhọ ikaba,’ ye ‘edidi ọyọhọ ikaba.’ Ẹkpekekpep ufọkabasi nditịn̄ mban̄a EDIDU ỌBỌN̄, nte se idinamde idotenyịn esie osu, edide ke n̄kpet n̄kpet ini iso m̀mê ke ata nsannsan ini iso,—ini emi ẹdinamde ererimbot edi obufa, ẹdinyenede ediset ke n̄kpa eke spirit ye eke obụkidem, ẹdinyụn̄ ẹnọde unenikpe ye nsinsi utịp.”

N̄ko, n̄wed oro, A Greek-English Lexicon of the New Testament and Other Early Christian Literature, eke Bauer, p. 630, ọdọhọ ete ke pa·rou·siʹa “ama akabade edi ikọ emi ẹdade ẹtịn̄ ikọ ke ini akwa owo ukara, akpan akpan ndidem ye ikpọ ndidem ẹkade ẹkese ikpehe obio ukara.” Ke Mt 24:3, ye ke mme itien̄wed eken utọ nte 1Th 3:13 ye 2Th 2:1, ikọ oro pa·rou·siʹa aban̄a edidu Jesus Christ ke ubọn̄ tọn̄ọ nte ẹkedori enye ke ebekpo nte Edidem ke mme akpatre usen eke editịm n̄kpọ emi.