SE ITỊBEDE KE ERERIMBOT
Mme Ufan Ye Mme Ubon
Edieke oyomde ndifiọk nte akpanamde n̄kpọ ye mbonubon fo m̀mê ye mme ufan fo, ewe n̄wed ke ekpebem iso ese? Ndi Bible m̀mê n̄wed en̄wen? Men se Bible etịn̄de domo ye ndụn̄ọde oro ẹnamde ndondo emi.
India
Ndụn̄ọde oro ẹkenamde ke 2014 owụt ke se ibede mbahade iba ke otu uyen emi ẹdide isua 18 esịm 25 ẹkere ke idiọkke owo emi mîdọhọ ndọ ndinam idan̄. Abiausọbọ kiet emi odụn̄de ke Mumbai ọkọdọhọ mbon oro ẹsiwetde n̄wedmbụk n̄kpọntịbe India emi ẹkotde Hindustan Times ete ke imọ ikereke ke n̄wan nditọn̄ọ ufan ye erenowo ọwọrọ ke mmọ ẹmọn̄ ẹdọ ndọ. Edide mmọ ẹdi ndantie m̀mê ẹnam idan̄ okoneyo kiet kpọt, mmọ isikereke-kere iban̄a ndidọ ndọ.
KERE ISE: Ndi mbon oro ẹsinamde idan̄ ye ebe m̀mê n̄wan mmọ kpọt ẹsimen udọn̄ọ ẹnyụn̄ ẹkop mfụhọ m̀mê mbon oro ẹsinamde idan̄ mbemiso ẹdọde ndọ?—1 Corinth 6:18.
Denmark
Mbon emi ẹsiwakde nditọhọ ye mbonubon mmọ ẹkeme ndikpa ẹtisịm isua 50. Ufọkn̄wed Ntaifiọk Copenhagen ẹma ẹnam ndụn̄ọde ye n̄kpọ nte owo 10,000 emi ẹdide isua 35 esịm 50. Ndụn̄ọde emi akada mmọ isua 11. Ndien mmọ ẹma ẹkụt ke mbon emi ẹsiwakde nditọhọ ye mbonubon mmọ m̀mê mme ufan mmọ ẹsisọp ndikpa n̄kan mbon emi mîsiwakke nditọhọ. Owo emi ekewetde se ẹkekụtde ke ndụn̄ọde emi ọdọhọ ke edieke nnyịn isikọkde mfịna nnyịn inyụn̄ ibierede utọk, ke oro ekeme ndinam nnyịn ifiak idu uwem ibịghi.
SE BIBLE ỌDỌHỌDE: “Owo ekededi eke afarade ke ikọ esie enyene ifiọk, owo mbufiọk onyụn̄ enyene ifụre ifure edu.”—Mme N̄ke 17:27.
United States
Ke ndondo emi, ẹma ẹnam ndụn̄ọde ye mbufa mme ọdọ ndọ 564 ke Louisiana. Ndụn̄ọde emi owụt ke n̄kparawa ye n̄kaiferi emi ẹkesidide ekpri n̄kpọ ama etịbe mmọ ẹdian̄ade ekem ẹfiak ẹdi ufan, ẹsiwak ndidian̄ade n̄ko ke mmọ ẹma ẹkedọ ndọ, akpan akpan ke akpa isua ition emi mmọ ẹdọde ndọ. Mmọ ẹsinyụn̄ ẹwak nditọhọ, isinyụn̄ ikopke inem ndọ mmọ.
SE BIBLE ỌDỌHỌDE: “Se Abasi ama akadian yak baba owo kiet okûdian̄ade.”—Matthew 19:6.