Mme Ntọn̄ọikọ Ndida Nnam N̄kpọ ke An̄wautom

Ekikere Ẹnọde: Ke ndibiere orụk ntọn̄ọikọ oro edikamade ke ini afo abuanade ke an̄wautom, n̄kpọ ita ẹdot akpan ntịn̄enyịn: (1) Etop oro ẹdọn̄de nnyịn inọ edi “gospel Ubọn̄ Abasi emi.” (Matt. 24:14) Idem ke ini nnyịn mînemeke iban̄a enye nnennen nnennen, akpana nnyịn inyene ke ekikere ndin̄wam mme owo ẹkụt ufọn esie, m̀mê iso-ọfọn imende mme n̄kpọ ubiọn̄ọ oro ẹbiọn̄ọde mmọ ndinyịme ndikere mban̄a enye mfep. (2) Ata udọn̄ oro nnyịn inyenede iban̄a mfọnọn̄kpọ mme owo oro nnyịn isobode eyen̄wam nnyịn, nte akan̄wamde Jesus, ndisịm esịt. (Mark 6:34) Ẹkeme ndiwụt utọ ata udọn̄ oro ebe ke ufiop ufiop inua imam ye ufan ufan edu, unyịme ndikpan̄ utọn̄ ke ini mmọ ẹtịn̄de ikọ ndien ekem inamde ikọ nnyịn asan̄a ekekem nte odotde, n̄ko ebe ke nnyịn ndida mme mbụme oro ẹsịnde udọn̄ ẹnọ mmọ nditịn̄ ikọ man nnyịn ikeme nditịm mfiọk ekikere mmọ. (1 Cor. 9:19-23) (3) Ke ndusụk ikpehe ererimbot, ẹdori enyịn isenowo nditiene ndusụk ido edinam mbemiso ẹtịn̄de ntak mmọ ẹwahade. Ke ebiet efen enyeneufọk ekeme ndidori enyịn esenowo oro owo mîkọnọhọ ikot nditịn̄ akpan n̄kpọ usọp usọp.—Men Luke 10:5 domo.

Mme ntọn̄ọikọ ẹmi ẹtienede mi ẹwụt nte ndusụk Ntiense oro ẹnyenede ifiọk ẹsitọn̄ọde nneme. Afo nte eyịghe mîdụhe eyeyom ndisịn mmọ ke ikọ idemfo. N̄ko, afo eyekụt nte edide n̄kpọ un̄wam ndibọ mme ekikere nto Mme Ntiense efen oro ẹnyenede nti utịp ke esop mbufo.

ARMAGEDDON

● ‘Ediwak owo ẹtịmerede esịt ẹban̄a Armageddon. Mmọ ẹmekop nte mme adaiso ererimbot ẹdade ikọ oro ẹtịn̄ ẹban̄a ọyọhọ ekọn̄ nuclear. Afo onịm ete ke nso ke Armageddon ediwọrọ ọnọ ubonowo? . . . Ke akpanikọ, ẹda ikọ oro Armageddon ẹto Bible, ndien enye ọwọrọ ata isio isio n̄kpọ ye se ẹsiwakde ndida ikọ oro ntịn̄ mban̄a. (Edi. 16:14, 16) Bible owụt n̄ko ete ke mme n̄kpọ ẹdu ẹmi nnyịn ke idem nnyịn ikemede ndinam kaban̄a ubọhọ. (Zeph. 2:2, 3)’

BIBLE/ABASI

● ‘Mmọkọm-o. Ami n̄waha ke ekpri ibio ini ndibuana akpan etop ye afo. Mbọk tịmfiọk se enye etịn̄de mi ke Bible. (Kot itien̄wed Abasi, utọ nte Ediyarade 21:3, 4.) Nso ke afo ekere aban̄a oro? Nte afo amama oro?’

● ‘Nnyịn ineme ye mme mbọhọidụn̄ nnyịn iban̄a ebiet emi ẹkemede ndikụt ata un̄wam ke ndiyọ mme mfịna uwem. Ke ini edem, ediwak owo ẹma ẹsika ẹbịne Bible. Edi nnyịn idu uwem ke ini emi mme edu ẹkpụhọrede. Afo ekere didie aban̄a oro? Nte afo omonịm ke akpanikọ ete ke Bible edi Ikọ Abasi mîdịghe nte afo ekere ke enye akam edi eti n̄wed oro mme owo ẹkewetde? . . . Edieke enye otode Abasi, afo ekere ke owo ekeme ndisan̄a didie mfiọk oro?’

[● ‘Mmokop idatesịt ndikụt fi ke ufọk. Ami mbuana ikọ nsịnudọn̄ otode Bible (m̀mê, Edisana N̄wed Abasi) ye mme mbọhọidụn̄ mi. Nte akanam afo emeyịk: . . . ? (Bụp mbụme oro adade osịm ibuotikọ nneme fo.)’]

● ‘Nnyịn isịn udọn̄ inọ mme owo ndisikot Bible mmọ. Mme ibọrọ oro enye esinọde ke mme akpan mbụme ẹsiwak ndikpa mme owo idem. Ke uwụtn̄kpọ: . . . (Ps. 104:5; m̀mê Dan. 2:44; m̀mê itien̄wed efen).’

● ‘Nnyịn iwaha ise mme mbọhọidụn̄ nnyịn ke ekpri ibio ini mfịn. Ndusụk owo ẹmi nnyịn inyenede nneme ẹnyene mbuọtidem ke Abasi. Ọsọsọn̄ mbon en̄wen ndinịm enye ke akpanikọ. Afo ekere didie? . . . Bible esịn udọn̄ ọnọ nnyịn ndikere mban̄a etop oro ekondo emi ẹkụtde ke enyịn ọnọde. (Ps. 19:1) Enyeemi mme ibet esie ẹkarade udịmenyọn̄ ẹmi ọmọnọ nnyịn ndausụn̄ oro enyenede ufọn. (Ps. 19:7-9)’

EKỌN̄/EMEM

● ‘Ami nyom mme owo oro ẹkpamade ndidu uwem ke ererimbot oro ekọn̄ mîdidụhe. Ke isua ikie emi ikpọn̄ ẹn̄wana ekọn̄ ke mme itie ikie, esịnede ekọn̄ ererimbot iba. . . . Anie ekeme ndida emem emem ererimbot ndi? . . . (Mic. 4:2-4)’

● ‘Nnyịn imokụt ke akam ekpere ndidi kpukpru owo ẹdọhọ ke imoyom emem ofụri ererimbot. Ata ediwak mme adaiso ererimbot ẹdọhọ ntre n̄ko. Ntak, ndien, emi enye edide ọkpọsọn̄ n̄kpọ ndinyene-e? . . . (Edi. 12:7-12)’

IMA/MFỌNIDO

● ‘Nnyịn imokụt ite ke ediwak owo ẹnen̄ede ẹtịmede esịt ẹban̄a unana ata ima ndidu ke ererimbot. Nte etie fi ke idem ntre n̄ko? . . . Ntak emi afo ekerede ete ke emi edi ido oro odude? . . . Nte afo ama ọfiọk ete ke Bible ama ebemiso etịn̄ aban̄a idaha emi? (2 Tim. 3:1-4) Enye n̄ko anam ntak kaban̄a oro an̄wan̄a. (1 John 4:8)’

● ‘Ami n̄kere ․․․․․. Ndi kiet ke otu mme mbọhọidụn̄ fo. Ami n̄waha ke ekpri ibio ini man nneme n̄kpọ oro enen̄erede ebehe mi ye mme mbọhọidụn̄ mi, ndien ami mmonịm ke afo omokụt emi n̄ko. Mfọnido ikpaha n̄kpọ, edi etie nte enye anana etieti mfịn. Nte akanam afo emeyịk ntak oro idaha ntre odude? . . . (Matt. 24:12; 1 John 4:8)’

INI ISO/IFỤRE

● ‘Emesiere-o. Idem fo-o? . . . Nnyịn idomo ndibuana in̄wan̄în̄wan̄ ekikere aban̄ade ini iso ye mme mbọhọidụn̄ nnyịn. Nte afo omodomo ndise uwem ke usụn̄ oro? . . . Nte afo omokụt ete ke ndusụk idaha ẹsinam emi edi ọkpọsọn̄ n̄kpọ ndinam? . . . Mmokụt nte ke Bible enen̄ede an̄wam ke afan̄ emi. Emi nte owụtde ifiọk anam mme idaha ẹmi ẹdude ke eyo nnyịn an̄wan̄a, edi enye n̄ko anam se mmọ ẹwọrọde an̄wan̄a onyụn̄ asian nnyịn se utịp edidide. (Luke 21:28, 31)’

● ‘Mmọkọm-o. Ami n̄kere ․․․․․. Afo ekere didie? . . . Ami nsịn udọn̄ nnọ n̄kparawa owo nte afo ndikere mban̄a utịbe utịbe ini iso oro Bible akamade ọnọ nnyịn. (Kot itien̄wed Abasi, utọ nte Ediyarade 21:3, 4.) Nte afo amama oro?’

MME N̄KPỌNTỊBE NDONDO EMI

● ‘Mmọkọm-o. Ami n̄kere ․․․․․. Ami ndụn̄ mi ke (siak efak m̀mê ebiet). Nte afo ama okop mbụk n̄kpọntịbe TV okoneyo n̄kpọn̄? . . . Mbụk oro akaban̄ade (siak n̄kpọntịbe ndondo emi oro edide n̄kpọ udọn̄)—nso ke afo ekere aban̄a oro? . . . Idịghe esen n̄kpọ ndikop mme owo ẹbụpde ẹte, Ererimbot emi asasan̄a aka m̀mọ̀n̄? Nnyịn nte Mme Ntiense Jehovah inịm ke akpanikọ ite ke nnyịn idu uwem ke se Bible okotde “ukperedem ini.” Tịmfiọk ọyọhọ mbụk emi ke 2 Timothy 3:1-5.’ (Se n̄ko Reasoning From the Scriptures, page 234-243.)

● ‘Nte afo ama okot emi ke n̄wedmbụk n̄kpọntịbe urua emi? (Wụt ubak mbụk oro odotde.) Nso ke afo ekere . . . ?’

● ‘N̄kpama ndibụp fi mbụme kiet. Edieke afo ekpekemede ndimek, ewe ke otu ediwak mfịna oro ererimbot osobode idahaemi ke afo akpama ndikụt ẹbemde iso ẹkọk? (Ke ama ọkọfiọk se idide akakan n̄kpọ udọn̄ enyeneufọk, da emi nte isọn̄ nneme fo.)’

OBIO UBỌN̄

● ‘Ke nnyenede nneme ye mme mbọhọidụn̄ mi, mmokụt nte ke ediwak owo ẹyom ndidu uwem ke idak ukara oro ekemede ndinen̄ede n̄kọk ikpọ mfịna oro ẹsakde iso ẹse nnyịn mfịn—kpa ubiatibet ye nsọn̄urua n̄kpọ uduuwem (m̀mê se ededi n̄kpọ oro odude ke ekikere ediwak owo ke ini oro). Nte afo unyịmeke nte ke oro ekpedi se ẹmade? . . . Nte utọ ukara oro odu mfịn? . . . Ediwak owo ẹnen̄ede ẹbọn̄ akam ẹyom ukara oro ekemede ndinam mme n̄kpọ oro. Eyịghe idụhe nte ke afo ama ọbọn̄ akam oyom enye, edi ediwak owo ikereke iban̄a enye nte ukara. (Dan. 2:44; Ps. 67:6, 7; Mic. 4:4)’

● ‘Nnyịn ibụp mme mbọhọidụn̄ nnyịn mbụme kiet. Nnyịn iyedara ibọrọ fo ke mbụme emi. Idịghe ọmọfiọk, Jesus ama ekpep nnyịn ndibọn̄ akam mben̄e Obio Ubọn̄ Abasi ndidi ye edinam uduak Esie ke isọn̄ nte ẹnamde ke heaven. Nte afo emekere ke tutu amama ẹyebọrọ akam emi man ẹnen̄ede ẹnam uduak Abasi mi ke isọn̄? . . . (Isa. 55:10, 11; Edi. 21:3-5)’

● ‘Ami nneme ye mme mbọhọidụn̄ mi mban̄a mbụme oro anade kpukpru nnyịn isak iso ise: Nte nnyịn iyom ukara otode Abasi, mîdịghe nte nnyịn ima itie edikara eke owo? Ke ekerede aban̄a mme idaha oro ẹdude ke ererimbot mfịn, nte afo emekere ke nnyịn imoyom n̄kpọ efen ikan se mme owo ẹsion̄ode ẹdi? . . . (Matt. 6:9, 10; Ps. 146:3-5)’

UBIATIBET/IFỤRE

● ‘Mmọkọm-o. Nnyịn ineme ye mme owo iban̄a ifụre owo. Ekese ubiatibet ẹdu ẹkanade nnyịn ẹkụk, ndien enye omotụk uwem nnyịn. Nte afo emekere ke ini eyedi emi mme owo nte ami ye afo idikemede ndisan̄a ke mme efak ke okoneyo inyụn̄ inyene ifụre? (Mîdịghe, Nte afo emekere ke owo ekededi enyene ata usọbọ ọnọ mfịna emi?) . . . (N̄ke 15:3; Ps. 37:10, 11)’

[● ‘Ami n̄kere ․․․․․. Ndụn̄ ke n̄kann̄kụk emi. Nte n̄kasan̄ade ke usụn̄ usenubọk emi ndi, mma n̄kop kpukpru owo ẹtịn̄de ẹban̄a (siak ubiatibet ndondo emi ke n̄kann̄kụk m̀mê n̄kpọ efen oro edide n̄kpọ udọn̄ ke n̄kann̄kụk). Nso ke afo ekere aban̄a oro? . . . Nte odu n̄kpọ ekededi oro afo ekerede ke eyen̄wam ndinam uwem nnyịn enyene ifụre akan? . . . (N̄ke 1:33; 3:5, 6)’]

UBON/NDITỌ

● ‘Nnyịn ineme ye mme owo oro ẹnyenede udọn̄ ẹban̄a nte nnyịn ikemede nditịm ndyọ mme mfịna uwem ubon. Kpukpru nnyịn imesidomo ndisịn ofụri ukeme nnyịn, edi edieke n̄kpọ odude oro ekemede ndin̄wam nnyịn ndikụt unen oro okponde akan, nnyịn imesinyene udọn̄, nte nnyịn isinyeneke? . . . (Col. 3:12, 18-21) Bible onịm nnyịn ke iso idotenyịn oro ọnọde ubon nnyịn ata ini iso. (Edi. 21:3, 4)’

● ‘Kpukpru nnyịn imoyom nditọ nnyịn ẹdu inem inem uwem. Edi nte afo emekere ke eti ntak odu ndidori enyịn ndinyene eti utịp ke afanikọn̄ oro ererimbot odude mfịn? . . . Ntre, nso orụk ererimbot ke afo ekere ke nditọ nnyịn ẹdisak iso ẹse ke ini mmọ ẹkponde ẹwọrọ owo? . . . Bible owụt ete ke Abasi ọmọn̄ anam isọn̄ emi edi utịbe utịbe ebiet ndidụn̄ ke esịt. (Ps. 37:10, 11) Edi m̀mê nditọ nnyịn ẹyebuana ke enye ke akamba udomo ekeme ndikọn̄ọ ke edimek oro nnyịn inamde. (Deut. 30:19)’

UKPEPN̄KPỌ BIBLE

● ‘Ami n̄waha ndinọ fi ukpepn̄kpọ Bible mfọn. Ke n̄kemede, n̄kpama ndida minit ifan̄ nnam n̄wụt nte mme owo ke se iwakde ikan idụt 200 ẹsinemede ẹban̄a Bible ke ufọk nte mme otu ubon. Nnyịn imekeme ndida ekededi ke otu mme ibuotikọ ẹmi nte isọn̄ nneme. (Wụt se idude ke n̄wed ukpepn̄kpọ.) Ewe ke afo enen̄ede ama?’

● ‘Nnyịn iwụt mme mbọhọidụn̄ nnyịn un̄wam ukpep Bible emi. (Wụt enye.) Nte akanam afo omokụt enye? . . . Edieke afo akam enyenede minit ifan̄, n̄kpama ndinam n̄wụt nte ekemede ndikama enye ke ebuana ye Bible fo.’

UKPEREDEM INI

● ‘Nnyịn iwaha man ineme se mme n̄kpọ oro ẹtịbede ẹkan nnyịn ẹkụk mfịn ke ererimbot ẹwọrọde. Udọn̄ ke Abasi ye mme idaha esie kaban̄a uwem nte ẹwụtde ke Bible omosụhọde ke otu ediwak owo. Emi enen̄ede otụk edu mme owo kaban̄a kiet eken. Mbọk yak mbuana ye afo se ẹnamde an̄wan̄a mi ke 2 Timothy 3:1-5 nyụn̄ sian mi m̀mê afo ekere ke enye ekem ye ererimbot mfịn. (Kot) . . . Nte eti ntak odu ndidori enyịn mban̄a nti idaha ke ini iso? (2 Pet. 3:13)’

● ‘Ediwak owo ẹnịm ẹte ke ini ererimbot emi ke okụre usọp usọp. Mmọ ẹtịn̄ ẹban̄a ini nnyịn nte edide “ukperedem ini.” Edi nte afo ama ọfiọk ete ke Bible asian nnyịn nte ikemede ndibọhọ utịt ererimbot oro odude kemi nnyụn̄ ndu uwem ke isọn̄ oro ẹdinamde edi paradise? (Zeph. 2:2, 3)’

[Se n̄ko “Mme N̄kpọntịbe Ndondo Emi” ke mme udịm ntọn̄ọikọ oro ẹnọde ekikere ẹban̄a.]

UKWAN̄IKPE/NDUTỤHỌ

● ‘Nte akanam afo emeyịk: Nte Abasi enen̄ede ekere aban̄a ukwan̄ikpe ye ndutụhọ oro mme owo ẹsobode? . . . (Eccl. 4:1; Ps. 72:12-14)’

USỌN̄/N̄KPA

● ‘Nte akanam afo emeyịk ntak emi nnyịn isikọride isọn̄ inyụn̄ ikpade? Ndusụk ikụt inyan̄ ẹsidu uwem ke ediwak isua ikie. Ndusụk eto ẹmedu uwem ke ediwak tọsịn isua. Edi mme owo ẹdu uwem ke isua 70 m̀mê 80 kpọt ndien ekem ẹkpa. Nte afo emeyịk ntak? . . . (Rome 5:12) Nte idaha ntre eyekpụhọde tutu amama? . . . (Edi. 21:3, 4)’

● ‘Nte akanam afo omobụp ete: Nte n̄kpa edi utịt kpukpru n̄kpọ? Mîdịghe nte n̄kpọ efen odu ke n̄kpa ebede? . . . Bible ọbọrọ mbụme ekededi oro nnyịn ikpobụpde iban̄a n̄kpa. (Eccl. 9:5, 10) Enye owụt n̄ko ke ata idotenyịn odu ọnọ mbon oro ẹnyenede mbuọtidem. (John 11:25)’

UTOM/UFỌK

● ‘Nnyịn ineme ye mme mbọhọidụn̄ fo iban̄a se ẹkemede ndinam man ẹkụt ẹte ke utom ye ufọk ẹyedu ẹnọ kpukpru owo. Nte afo omonịm ke akpanikọ ete ke owụt eti ibuot ndidori enyịn nte ke mme ukara owo ẹyenam emi? . . . Edi odu owo emi ọfiọkde nte ẹkemede ndikọk mme mfịna ẹmi; oro edi Andibot ubonowo. (Isa. 65:21-23)’

[● ‘Nnyịn ibuana ekikere aban̄ade eti ukara ye mme mbọhọidụn̄ nnyịn. Ata ediwak owo ẹkpema ndinyene orụk ukara oro ọbọhọde n̄wo, enyeoro ọnọde kpukpru owo utom ye eti ufọk. Orụk ukara ewe ke afo ekere ekeme ndinam kpukpru oro? . . . (Ps. 97:1, 2; Isa. 65:21-23)’]

UWEM/INEMESỊT

● ‘Nnyịn iwaha ise mme mbọhọidụn̄ nnyịn man iyom mme owo oro ẹnen̄erede ẹnyene udọn̄ ẹban̄a se uwem ọwọrọde. Ata ediwak owo ẹnyene ndusụk udomo inemesịt. Edi mmọ ẹsobo ekese mfịna n̄ko. Nte isua emana nnyịn ọdọkde, nnyịn imesidi idifiọk ite ke uwem omụhọ etieti. Nte emi edi ukụre se uwem ọwọrọde? Afo ekere didie aban̄a emi? . . . (Tịn̄ ban̄a akpa uduak Abasi nte okodude ke Eden; ekem John 17:3 ye Ediyarade 21:3, 4.)’

● ‘Mfịn nnyịn ibụp mme mbọhọidụn̄ nnyịn se mmọ ẹkerede ke ini mmọ ẹkotde ikọ oro “nsinsi uwem” ke Bible mmọ. Emi edi akpan n̄kpọ udọn̄ koro ikọ oro odu ke Bible n̄kpọ nte utịm ike-40. Nso ke utọ uwem oro ọkpọwọrọ ọnọ nnyịn? . . . Didie ke nnyịn ikeme ndinyene enye? (John 17:3; Edi. 21:4)’

● ‘Nnyịn inyene nneme ye mme owo oro ẹnen̄erede ẹnyene udọn̄ ẹban̄a orụk uwem mfịn. Ata ediwak nnyịn imokop idatesịt ndidu uwem, edi ediwak owo ẹsiyịk ẹte, Nte ata uwem inemesịt ekeme ndidu? Afo ekere didie aban̄a oro? . . . Afo ọkpọdọhọ ke nso idi n̄kponn̄kan n̄kpọ kiet oro ọbiọn̄ọde inemesịt mfịn? . . . (Ps. 1:1, 2; mme itien̄wed Abasi efen efen ndikem ye se ibehede enyeneufọk)’

KE INI EDIWAK OWO ẸDỌHỌDE ẸTE: ‘MMENYENE IDO UKPONO OKỊMMỌ’

● ‘Emesiere-o. Nnyịn iwaha itiene kpukpru ubon ke okụre mbufo (m̀mê, ke ebiet emi), ndien nnyịn imokụt nte ke ediwak mmọ ẹnyene ido ukpono mmọ. Eyịghe idụhe nte ke afo n̄ko emenyene. . . . Edi, inamke n̄kpọ m̀mê ewe edi ido ukpono nnyịn, ukem ediwak mfịna ẹtụk nnyịn—nsọn̄urua n̄kpọ uduuwem, ubiatibet, udọn̄ọ—nte idịghe ntre? . . . Nte afo emekere ke ata usọbọ ekededi odu ọnọ mme n̄kpọ ẹmi? . . . (2 Pet. 3:13; ye ntre ntre)’

KE INI EDIWAK OWO ẸDỌHỌDE ẸTE: ‘NNYENEKE INI’

● ‘Mmọkọm-o. Nnyịn ida akpan etop iwaha itiene kpukpru owo ke mbọhọ emi. Eyịghe idụhe nte ke afo unyeneke ini, ntre nnyenam edi ibio ibio.’

● ‘Ekọm do-o. Ami n̄kere ․․․․․. Uduak edidi mi edi ndineme mme edidiọn̄ Obio Ubọn̄ Abasi ye afo ye nte nnyịn ikemede ndibuana ke mmọ. Edi mmekeme ndikụt ke afo unyeneke ini (m̀mê, oyom ndiwọwọrọ). Nte mmekeme ndikpọn̄ ibio ibio ekikere kiet kpọt ye afo?’

KE EFAKUTOM ORO ẸSINAMDE UTOM NDIEN NDIEN

● ‘Mmokop idatesịt ndikụt fi ke ufọk. Nnyịn inam ediwaha nnyịn eke urua ke urua ke mbọhọ emi, ndien nnyịn imenyene n̄kpọ efen efen ndibuana ye afo mban̄a mme utịbe utịbe n̄kpọ oro Obio Ubọn̄ Abasi edinamde ọnọ ubonowo.’

● ‘Mmọkọm-o. Edi n̄kpọ inemesịt ndifiak n̄kụt fi. . . . Nte idem ọsọn̄ kpukpru owo ke ubon? . . . N̄kawaha man mbuana ekikere aban̄ade . . . ye afo.’

[● ‘Emesiere-o. Idem fo-o? . . . Ami ke n̄koyom ifet efen ndinyene nneme ye afo. (Ekem siak akpan ibuotikọ oro afo oyomde ndineme.)’]