Nte Afo Ọkpọbọrọde Mme Ikọ Utre Nneme
Ekikere Ẹnọde: Idotenyịn uwem mme owo ọkọn̄ọ ke edu mmọ kaban̄a Jehovah Abasi ye Obio Ubọn̄ esie ke ubọk Christ Jesus. Etop Obio Ubọn̄ Abasi etie inem inem, ndien enye anyan ubọk owụt n̄kukụre idotenyịn ubonowo oro ẹkemede ndiberi edem. Enye edi etop emi okpụhọrede uwem mme owo. Nnyịn iyom kpukpru owo ẹkop enye. Nnyịn imọfiọk ite ke esisịt ibat owo kpọt ẹdibọ enye ye esịtekọm, edi nnyịn imọfiọk ite ke oyom mme owo ke nsụhọde n̄kaha ẹkop enye edieke anade mmọ ẹnam eti edimek. Kpa ye oro idịghe kpukpru owo ẹnyịme ndikpan̄ utọn̄, nnyịn inyụn̄ idomoke ndinyịk mmọ. Edi ye mbufiọk ediwak ini ẹkeme ndiwọn̄ọde mme ikọ utre nneme nsịn ke mme ifet n̄kaiso nneme. Mme uwụtn̄kpọ ẹdu mi ke se ndusụk Mme Ntiense oro ẹnyenede ifiọk ẹkedade ẹnam n̄kpọ ke ukeme mmọ ndiyom mbon oro ẹdotde. (Matt. 10:11) Mụm ekikere oro sịn ke ibuot, sịn enye ke ikọ idemfo nyụn̄ tịn̄ enye ke ido oro owụtde ata udọn̄ oro afo enyenede ke idem owo oro afo etịn̄de ikọ ọnọ. Nte afo anamde ntre, afo emekeme ndinyene mbuọtidem nte ke mbon oro ẹnyenede eti esịt ẹyekpan̄ utọn̄ ẹnyụn̄ ẹnam n̄kpọ ye esịtekọm ẹban̄a se Jehovah anamde ndidụri mmọ n̄wụt ima ima ndutịm esie kaban̄a uwem.—John 6:44; Utom 16:14.
‘NNYENEKE UDỌN̄’
● ‘Yak mbụp fi ise, Ndi ikọ fo ọwọrọ ke afo unyeneke udọn̄ ke Bible, mîdịghe nte edi ido ukpono ke ofụri ofụri ke afo mûnyeneke udọn̄ uban̄a? Ami mbụp mbụme oro koro nnyịn imosobo ediwak owo ẹmi ini kiet ko ẹkedide mbon ido ukpono edi oro mîkaha aba ufọkabasi ke ntak mmọ ẹkụtde ekese mbubịk ke mme ufọkabasi (mîdịghe, mmọ ẹkere ẹte ke ido ukpono akam edi mbubehe efen ndida n̄n̄wana okụk; m̀mê, mmọ imaha nte ido ukpono esịnde idem ke mme mbre ukara; ye ntre ntre). Bible inọhọ mme utọ edinam oro unyịme ndien enye ọnọ n̄kukụre isọn̄ emi nnyịn ikemede ndisak iso nse ini iso ye mbuọtidem.’
● ‘Edieke ikọ fo ọwọrọde ke imọ inyeneke udọn̄ ke ido ukpono efen, oro an̄wan̄a mi. Edi anaedi afo emenen̄ede ẹnyene udọn̄ aban̄a orụk ini iso oro nnyịn ikemede ndidori enyịn ndikụt ke ikerede iban̄a se ekọn̄ anamde ye uwem nnyịn (mîdịghe, nte nnyịn ikemede ndikpeme nditọ nnyịn mbiọn̄ọ edida n̄kpọsọn̄ ibọk ke idiọk usụn̄; m̀mê, se ẹkemede ndinam mban̄a ubiatibet man nnyịn ikûkop ndịk ndisan̄a ke mme efak; ye ntre ntre). Nte afo emekeme ndikụt idotenyịn ndomokiet kaban̄a ata usọbọ?’
● ‘Nte oro edi koro afo emenyenyene ido ukpono? . . . Tịn̄ nọ mi, Nte afo emekere ke nnyịn tutu amama iyekụt ini emi ofụri owo ẹdibuanade ke ukem ido ukpono? . . . Nso itie nte n̄kpọ ubiọn̄ọ? . . . Man enye enyene se ọwọrọde, nso orụk itiat idakisọn̄ ke okpoyom?’
● ‘Oro an̄wan̄a mi. Ke isua ifan̄ ẹmi ẹkebede ekesitie mi ntre ke idem. Edi mma n̄kot n̄kpọ ke Bible oro akan̄wamde mi ndise n̄kpọ ke isio isio usụn̄. (Wụt owo oro se enye ekedide.)’
● ‘Nte afo ekpenyene udọn̄ edieke n̄kpowụtde fi ke Bible nte afo ekpekemede ndifiak n̄kụt mbonima fo ẹmi ẹkekpan̄ade (mîdịghe, se idide ata uduak ke uwem; m̀mê, nte enye ekemede ndin̄wam nnyịn ndinam ubon nnyịn ẹdiana kiet; ye ntre ntre)?’
● ‘Edieke ikọ fo ọwọrọde ke imọ inyeneke udọn̄ ke ndidep n̄kpọ, yak nnam ekikere osụhọde fi. Ami mbuanake ke utom unyamurua. Edi nte afo ekpenyene udọn̄ ke ifet ndidu uwem ke paradise isọn̄, oro ọbọhọde udọn̄ọ ye ubiatibet, enyenede mme mbọhọidụn̄ ẹmi ẹnen̄erede ẹma fi?’
[● ‘Nte oro esidi ibọrọ fo ke ini Mme Ntiense Jehovah ẹwahade? . . . Nte akanam afo emenen̄ede ekere ntak emi nnyịn isikade iso ndiwaha m̀mê se nnyịn inyenede nditịn̄? . . . Ke ibio ibio, ntak emi ami n̄kedide ndikụt fi edi nte ke mmọfiọk n̄kpọ emi afo ekpenyenede ndifiọk n̄ko. Ntak mûkam ukpan̄ke utọn̄ inikiet emi-e?’]
‘AMI NNYENEKE UDỌN̄ KE IDO UKPONO’
● ‘An̄wan̄a mi nte etiede fi ke idem. Ke nditịn̄ akpanikọ, mme ufọkabasi inamke ererimbot emi edi ebiet emi otịmde ọfọn ndidu uwem ke esịt, nte mmọ ẹnam? . . . Edi nte afo omonịm Abasi ke akpanikọ?’
● ‘Ediwak owo ẹdu ẹmi ẹnyenede ukem ekikere fo. Ido ukpono inen̄ekede in̄wam mmọ. Oro edi ntak kiet emi nnyịn iwahade—koro mme ufọkabasi itịn̄ke akpanikọ aban̄ade Abasi ye utịbe utịbe uduak esie kaban̄a ubonowo inọ mme owo.’
● ‘Edi mmonịm nte ke afo emenyene udọn̄ aban̄a ini iso fo. Nte afo ama ọfiọk ete ke Bible ama ebemiso etịn̄ aban̄a mme idaha oro ẹdude ke ererimbot mfịn? . . . Ndien enye owụt se utịp edidide.’
● ‘Nte afo esikere ntre kpukpru ini? . . . Didie ke afo ekere aban̄a ini iso?’
‘AMI NNYENEKE UDỌN̄ KE MME NTIENSE JEHOVAH’
● ‘Ediwak owo ẹsisian nnyịn oro. Nte akanam afo emekere ntak emi mme utọ owo nte ami ke unyịmesịt isiwahade idem okposụkedi nnyịn ifiọkde ite ke ekeme ndidi ata ediwak owo ke otu mme enyeneufọk ididarake nnyịn? (Tịn̄ ọkpọikọ oro odude ke Ezekiel 9:1-11, anamde an̄wan̄a nte ke, ọkọn̄ọde ke nte mme owo ẹnamde n̄kpọ ẹban̄a etop Obio Ubọn̄, ke ẹnịm kpukpru owo “idiọn̄ọ” ẹnọ Abasi ndinyan̄a mbe akwa ukụt m̀mê ẹnọ nsobo.)’
● ‘Oro an̄wan̄a mi, sia ami n̄kesikere ntre n̄ko. Edi, ke nditịm ntịn̄, mma mbiere ndikpan̄ utọn̄ nnọ kiet ke otu mmọ. Ndien mma n̄kụt nte ke owo iketịn̄ke akpanikọ inọ mi iban̄a mmọ. (Siak ọsọ nsunsu edori ikọ kiet ndien ekem nam se nnyịn inịmde ke akpanikọ an̄wan̄a.)’
● ‘Itịmke ibịghi ami n̄ketịn̄ ukem ikọ oro ye Ntiense kiet oro akawahade ke enyịnusụn̄ mi. Edi mbemiso enye ọkọnyọn̄de mma mbụp mbụme kiet oro ami n̄kọfiọkde ke enye idikemeke ndibọrọ. Nte afo akpama ndifiọk se mbụme oro ekedide? . . . (Nte uwụtn̄kpọ: M̀mọ̀n̄ ke Cain akada n̄wan esie?)’ (Mbon oro ẹkenen̄erede ẹnyene utọ ifiọkutom oro ẹdida emi ẹnam n̄kpọ.)
● ‘Edieke afo edide owo ido ukpono, oro an̄wan̄a mi. Ido ukpono fo nte eyịghe mîdụhe ọwọrọ ekese ọnọ fi. Edi ami n̄kere ke afo eyenyịme ete ke nnyịn mbiba imenyene udọn̄ ke (siak ibuotikọ oro odotde).’
[● ‘Do nte eyịghe mîdụhe afo emenyene ido ukpono. Yak mbụp fi ewe ido ukpono ke edi? . . . Nnyịn imesikop idatesịt ndinyene nneme ye mme owo oro ẹdude ke ido ukpono mbufo. Afo ekere didie aban̄a (siak ibuotikọ nneme fo)?’]
● ‘Ih, an̄wan̄a mi. Edi ntak emi nnyịn iwahade edi nte ke nnyịn idi ubon oro akpamade ndikụt mme owo ẹdude uwem ọtọkiet ke emem. Nnyịn imesikop itekesịt inyụn̄ ikpa mba iban̄a mme mbụk n̄kpọntịbe ofụri mbubịteyo oro ẹsinọde mme mbụk ẹban̄a en̄wan ye ndutụhọ. N̄kere ke edi ukem ntre ye afo. . . . Edi nso ikeme ndida ukpụhọde oro ẹyomde ndi? . . . Nnyịn imokụt ikọ nsịnudọn̄ ke mme un̄wọn̄ọ Bible.’
[● ‘Mmama nte afo anamde mi mfiọk ekikere fo. Nte afo akpama ndinam mi mfiọk se iban̄ade nnyịn oro afo mûmaha? Nte edi se nnyịn isiwụtde fi ke Bible, mîdịghe nte edi edidi oro nnyịn isiwahade ibịne fi?’]
‘MMENYENE IDO UKPONO OKỊMMỌ’
● ‘Nte afo akpama ndisian mi, Nte ido ukpono fo ekpep ete ke ini eyedi emi mme owo oro ẹmade se inende ẹdidude uwem ke isọn̄ ke nsinsi? . . . Nte oro idịghe ekikere oro aduaide owo idem? . . . Enye akam odu mi ke Bible. (Ps. 37:29; Matt. 5:5; Edi. 21:4)’
● ‘Mmonyịme nte ke ana owo kiet kiet anam ubiere idemesie ke n̄kpọ emi. Edi nte afo ama ọfiọk ete ke Abasi ke idemesie ke oyom ndusụk orụk owo ndidi mme ata andituak ibuot nnọ enye? Se mi ke John 4:23, 24. Nso ke ọkpọwọrọ ndituak ibuot nnọ Abasi “ke akpanikọ”? . . . Nso ke Abasi ọnọ nnyịn man an̄wam nnyịn ndifiọk se idide akpanikọ ye se mîdịghe? . . . (John 17:17) Ndien nyụn̄ tịmfiọk nte emi edide akpan n̄kpọ ọnọ nnyịn owo kiet kiet. (John 17:3)’
[● ‘Nte afo edi owo ido ukpono ke ofụri uwem fo? . . . Nte afo emekere ke ubonowo eyediana kiet ke ido ukpono kiet tutu amama? . . . Mma n̄kere ekese mban̄a oro ke ntak se ẹwetde mi ke Ediyarade 5:13. . . . Nso ke oyom man nnyịn ida ekekem ye se ẹtịn̄de emi?’]
● ‘Mma ndot enyịn ndikụt utọ owo nte afo oro enyenede udọn̄ ke mme n̄kpọ eke spirit. Ata ediwak owo mfịn inyeneke. Nte mmekeme ndibụp nte afo ekerede aban̄a un̄wọn̄ọ Bible oro nte ke Abasi eyesio kpukpru idiọkido efep onyụn̄ anam isọn̄ emi edi ebiet emi mme owo oro ẹmade edinen ido kpọt ẹdidụn̄de? Nte afo amama oro?’
● ‘Nte afo emenen̄ede esịn idem ke mme mbubehe ufọkabasi? . . . Nte ufọkabasi esinen̄ede awak owo kpukpru ini idahaemi kaban̄a mme edinam? . . . Nte afo omokụt ata ediwak mme andibuana ẹnen̄erede ẹwụt ata udọn̄ ndida Ikọ Abasi nsịn ke edinam ke uwem ofụri usen? (Mîdịghe, Nte afo omokụt ke edidianakiet ke ekikere odu ke otu mme andibuana aban̄a usọbọ ke mme mfịna oro ẹsakde iso ẹse ererimbot?) Nnyịn imokụt ite ke ọkpọkpọ ukpepn̄kpọ Bible an̄wam.’
● ‘Nte an̄wan̄ade afo omoyụhọ ye ido ukpono fo. Edi ata ediwak owo ikopke uyụhọ iban̄a mme idaha ererimbot. Eyedi oro edi akpanikọ aban̄a fi n̄ko; ndi ntre? . . . Kpukpru ẹmi ẹdida ẹkesụn̄ọ ke nso?’
● ‘Nte afo edi owo emi esimade ndikot Bible? . . . Nte afo emesinyene ini ndikot enye kpukpru ini?’
● ‘Mmama nte afo asiande mi oro. Mmonịm nte ke afo eyenyịme ete ke, inamke n̄kpọ se idide idaha ido ukpono nnyịn, kpukpru nnyịn imenen̄ede inyene udọn̄ iban̄a emem ererimbot (m̀mê, mme usụn̄ ndikpeme nditọ nnyịn mbiọn̄ọ ndiọi odudu; mîdịghe, edinyene mbọhọidụn̄ emi mme owo ẹnen̄erede ẹma kiet eken; m̀mê, edinyene eti itie ebuana ye mbon efen, ndien oro ekeme ndinịm n̄kpọ-ata ke ini kpukpru owo ẹdude ke idak mfịghe).’
● ‘Mmokop idatesịt ndifiọk nte ke afo emenyene udọn̄ ke ido ukpono. Ediwak owo mfịn idaha ido ukpono ke akpan n̄kpọ. Ndusụk ẹkam ẹkere ke Abasi idụhe. Edi, nte ekemde ye se ẹkekpepde fi, nso orụk owo ke afo ekere ke Abasi edi? . . . Tịmfiọk ete ke Bible ọnọ nnyịn san̄asan̄a enyịn̄ esie. (Ex. 6:3; Ps. 83:18)’
[● ‘Ke ini Jesus okosiode mme mbet esie ọdọn̄ ẹka ẹkekwọrọ ikọ, enye ọkọdọhọ mmọ ẹka kpukpru ikpehe isọn̄, ntre mmọ ẹyesobo ediwak owo oro ido ukpono mmọ ẹkedide isio ye eke mmọ. (Utom 1:8) Edi enye ama ọfiọk ete ke mbon oro ẹkekopde biọn̄ ye nsatitọn̄ edinen ido ẹyekpan̄ utọn̄. Nso idi akpan etop oro enye ọkọdọhọde ke ẹyenọ ke eyo nnyịn? (Matt. 24:14) Nso ke Obio Ubọn̄ oro ọwọrọ ọnọ nnyịn?’]
‘NNYỊN MI IMA IDEDI MME CHRISTIAN’
● ‘Mmokop idatesịt ndifiọk oro. Do afo nte eyịghe mîdụhe ọmọfiọk ete ke Jesus ke idemesie ama anam ukem utom emi, awahade etiene mme owo ke ufọk mmọ, ndien enye ama ọdọn̄ mme mbet esie ndinam oro n̄ko. Nte afo ememehe ye ibuotikọ ukwọrọikọ oro mmọ ẹkekwọrọde? . . . Oro edi se nnyịn idide ndineme mban̄a mfịn. (Luke 8:1; Dan. 2:44)’
● ‘Do mmonịm nte ke afo ọmọdiọn̄ọ nte se Jesus eketịn̄de mi ke Ukwọrọikọ oro ke Obot edide akpan n̄kpọ. Enye eketịn̄ ata akpanikọ edi ama owụt ima n̄ko ke ini enye ọkọdọhọde ete . . . (Matt. 7:21-23) Mbụme oro oyomde nnyịn ibụp idem nnyịn, ndien, edi, Ami mfiọk uduak Ete eke heaven ọfọn adan̄a didie? (John 17:3)’
‘NNYENEKE INI’
● ‘Do nnyenam edi ibio ibio. N̄kawaha man mbuana akpan ekikere kiet kpọt ye afo. (Tịn̄ ọkpọikọ ibuotikọ nneme fo ke n̄kpọ nte udịmikọ iba.)’
● ‘Ọfọn. Nyekop idatesịt ndiwaha ini efen, ke ini ediferede fi ke idem akan. Edi mbemiso nnyọn̄de, n̄kpama ndikot itien̄wed Abasi kiet kpọt oro enen̄erede ọnọ nnyịn akpan n̄kpọ ndikere mban̄a.’
● ‘An̄wan̄a mi. Nte eka (m̀mê, anamutom; m̀mê, eyen ufọkn̄wed) mmenyene ndutịm awakde n̄ko. Ntre nnyenam edi ibio ibio. Kpukpru nnyịn isak iso ise ọkpọsọn̄ idaha. Bible owụt ete ke nnyịn imenen̄ede ikpere ini emi Abasi edisobode idiọk editịm n̄kpọ emi odude kemi ifep. Edi mme andibọhọ ẹyedu. Mbụme edi, Nso ke ana ami ye afo inam man idu ke otu mmọ? Bible ọbọrọ mbụme oro. (Zeph. 2:2, 3)’
● ‘Ọmọfiọk, oro edi akpan ntak oro anamde mi n̄waha. Kpukpru nnyịn inyeneke ini—imesinana ini tutu ndusụk ini imesifụmi me ata akpan n̄kpọ ke uwem, nte isidịghe ntre? . . . Nnyenam edi ata ibio ibio, edi mmonịm nte ke afo eyenyene udọn̄ ke itien̄wed kiet emi kpọt. (Luke 17:26, 27) Baba owo nnyịn kiet iyomke ndikụt idem nnyịn ke utọ idaha oro, ntre oyom nnyịn ifak ifet ke uwem unana ini nnyịn man ikere iban̄a se Bible ọdọhọde. (Nọ n̄wed.)’
m● ‘Nte eyetịm ọfọn edieke nnyịn ifiakde idi ke n̄kpọ nte minit edịp ye duop, ke ima ikaka ikosobo ndusụk mbọhọidụn̄ fo?’
[● ‘Do ami ndibiatke fi ini. Iso-ọfọn mmekeme ndiwaha usen efen. Edi mbemiso nnyọn̄de, n̄kpama ndinọ fi ifet ndibọ akpan enọ emi. (Wụt se ẹnọde ke ọfiọn̄ oro.) N̄wed emi esịne ukpepn̄kpọ oro edinamde fi emehe ye ibọrọ oro Bible ọnọde ke mme utọ mbụme nte (siak kiet m̀mê iba kpọt).’]
● ‘Mmeseme ndisobo fi ke idaha oro mîfereke fi ke idem. Nte afo ekemede ndifiọk, ami ndi kiet ke otu Mme Ntiense Jehovah. N̄koyom ndibuana akpan ekikere kiet emi otode Bible ye afo. Edi sia mûnyeneke ini ndikop idahaemi, n̄kpama ndinọ fi tract emi, emi enemede aban̄a (siak ibuotikọ). Ididaha anyanini ndikot enye, edi afo eyekụt ke enye enen̄ede enem.’
[● ‘Oro isọn̄ke ndin̄wan̄a mi. Etie nte ini idụhe ikem ndinam kpukpru n̄kpọ. Edi nte akanam afo emekere nte uwem ekpenyenede ukpụhọde edieke afo ekpekemede ndidu uwem ke nsinsi? Mmọfiọk nte ke oro ekeme nditie esen esen. Edi yak n̄wụt fi itie kiet kpọt ke Bible oro anamde an̄wan̄a nte utọ n̄kpọ oro ekemede nditịbe. (John 17:3) Ntre, se oyomde nnyịn inam idahaemi edi ndinyene ifiọk oro aban̄ade Abasi ye Eyen esie. Oro edi ntak emi nnyịn inọde n̄wed emi.’]
‘NTAK EMI MBUFO ẸSIDIDE NDIEN NDIEN?’
● ‘Koro nnyịn inịm ke akpanikọ ite ke nnyịn idu uwem ke ukperedem ini oro ẹtịn̄de ẹban̄a ke Bible. Nnyịn ikere ite ke edi akpan n̄kpọ kpukpru nnyịn ndikere mban̄a se ididide utịp mme idaha ẹmi ẹdude kemi. (Siak n̄kpọntịbe idahaemi kiet m̀mê iba m̀mê mme idaha ndondo emi.) Mbụme edi, Nso ke oyom nnyịn inam edieke anade nnyịn ibọhọ utịt editịm n̄kpọ emi?’
● ‘Koro nnyịn imade Abasi ye mbọhọidụn̄ nnyịn. Oro edi se kpukpru nnyịn ikpanamde, nte idịghe ntre?’
‘AMI MMEMEMEHE MFỌN MFỌN YE UTOM MBUFO’
● ‘Mmokop idatesịt etieti ndikop oro. Nte afo emenyene n̄kpet n̄kpet iman m̀mê ufan oro edide Ntiense? . . . Yak mbụp ise: Nte afo omonịm se nnyịn ikpepde ito Bible, oro edi, nte ke nnyịn idu uwem ke “ukperedem ini,” nte ke ibịghike Abasi ọmọn̄ osobo mme idiọkowo efep, ye nte ke isọn̄ emi eyekabade edi paradise emi mme owo ẹkemede ndidu uwem ke nsinsi ke mfọnmma nsọn̄idem ke otu mme mbọhọidụn̄ oro ẹnen̄erede ẹma kiet eken?’
‘NNYỊN INYENEKE OKỤK’
● ‘Nnyịn isan̄ake iben̄e okụk. Edi nnyịn inọ ukpepn̄kpọ Bible mfọn. Kiet ke otu ibuotikọ oro enye enemede edi (da ibuotikọ kiet emi otode n̄wed ndondo emi). Nte mmekeme ndida minit ifan̄ n̄wụt fi nte ẹdade enye ẹnam n̄kpọ? Enye idikpaha fi ndomo kobo kiet.’
● ‘Nnyịn inyene udọn̄ ke idem mme owo, idịghe okụk mmọ. (Kaiso ke nneme. Wụt mmọ kiet ke otu mme n̄wed nyụn̄ nam an̄wan̄a nte enye ekemede ndinọ mmọ ufọn. Edieke mmọ ẹwụtde ata udọn̄ ẹnyụn̄ ẹn̄wọn̄ọde ndikot, kpọn̄ enye nọ mmọ. Edieke odotde, nam nte ẹdade okụk ẹse ẹban̄a utom ukwọrọikọ nnyịn eke ofụri ererimbot, an̄wan̄a.)’
KE INI OWO ỌDỌHỌDE ETE, ‘AMI NDI OWO BUDDHA’
● Kûbiere nte ke se owo emi onịmde ke akpanikọ ẹdi ukem ye se kpukpru mbon Buddha eken ẹnịmde. Ido Ukpono Buddha mbon Japan enen̄ede okpụhọde ye Ido Ukpono Buddha eke Ufọt Edem Usụk ye Edem Usiahautịn Asia. Mme owo, n̄ko, ẹnyene ukpụhọde ke se iban̄ade idaha ekikere mmọ. Nte ededi, ke ofụri ofụri, mme akpan n̄kpọ oro ẹtienede mi ẹkeme ndin̄wam: (1) Ido Ukpono Buddha ifiọkke Abasi emi mîtoho esịtidem, kpa ataata Andibot. Edi ediwak mbon Buddha ẹtuak ibuot ẹnọ mme mbiet ye mbak idem Buddha. (2) Ẹkedida Siddhartha Gautama, emi ẹkenọde udorienyịn̄ oro Buddha, nte mfọnmma uwụtn̄kpọ ido ukpono ọnọ mme anditiene enye, oro mmọ ẹnyenede ndikpebe. Enye ama esịn udọn̄ ọnọ edinyene ntatenyịn ebe ke edikpep n̄kpọ mban̄a ubonowo ke usụn̄ifiọk eke owo, n̄ko nditre ntak ndutụhọ ebe ke ndikara ekikere man otodo ẹbiat kpukpru udọn̄ n̄kpọ isọn̄ ẹfep. Enye ama ekpep ete ke edi ke usụn̄ emi ke owo ekeme ndisịm Nirvana, ọbọhọde edifiak mmana ke idem efen. (3) Mbon Buddha ẹtuak ibuot ẹnọ mme eteete mmọ, koro mmọ ẹsede mmọemi nte ebiet emi uwem mmọ otode.
Mme ekikere ndida nnyene nneme: (1) Ke ini enyenede nneme ye mbon Buddha, sọn̄ọ tịn̄ nte ke imọ idịghe ubak Christendom. (2) Mbon Buddha ẹwụt ukpono ẹnọ “ndisana n̄wed,” ndien ke ofụri ofụri mmọ ẹkpono Bible ke ntak oro. Utu ke ndiwụk ekikere ke ukpepn̄kpọ akwaifiọk mbon Buddha, neme in̄wan̄în̄wan̄ etop Bible. Nam mmọ ẹfiọk ẹte ke Bible idịghe ikpîkpu ukpepn̄kpọ akwaifiọk owo edi edi enyene-odudu Ikọ Andibot ubonowo, kpa Jehovah Abasi. Bụp ke mfọnido m̀mê emekeme ndiwụt mmọ inem inem akpan n̄kpọ ke edisana n̄wed emi, kpa Bible. (3) Ediwak mbon Buddha ẹnen̄ede ẹnyene udọn̄ ke emem ye uwem ubon ẹnyụn̄ ẹyom ndinyene nti ido uwem. (4) Wụt nte ke Bible anyan ubọk owụt edinen ukara eke heaven oro edikarade isọn̄ nte ata usọbọ ọnọ mme mfịna ẹmi ẹsakde iso ẹse ubonowo. Enye anam ini iso isọn̄ ye utịbe utịbe idotenyịn edidu uwem ke nsinsi ke paradise isọn̄ an̄wan̄a. (5) Afo emekeme ndisio n̄wụt nte ke Bible anam ntọn̄ọ uwem, se uwem ọwọrọde, idaha mme akpan̄kpa ye idotenyịn ediset ke n̄kpa, ntak emi idiọkido odude, an̄wan̄a. Edineme in̄wan̄în̄wan̄ akpanikọ Ikọ Abasi ke mfọnido eyedemede esịt mbon mbieterọn̄.
Ẹketịm ekpri n̄wed oro In Search of a Father akpan akpan ke ufọn mbon Buddha oro ẹnyenede esịt akpanikọ.
KE INI OWO ỌDỌHỌDE ETE, ‘AMI NDI OWO HINDU’
● Ana afo ọfiọk ete ke ukpepn̄kpọ akwaifiọk Hindu enen̄ede awak n̄kukọhọ inyụn̄ ikemke ye ndammana ekikere. Afo emekeme ndikụt nte edide n̄kpọ un̄wam ndinyene mme akpan n̄kpọ oro ẹtienede mi ke ekikere: (1) Ido Ukpono Hindu ekpep ete ke abasi oro Brahman esịne uduot ita—Brahma Andibot, Vishnu Andinịm Uwem, ye Siva Andisobo. Edi mbon Hindu ikereke iban̄a ata abasi emi odude uwem nte owo. (2) Mbon Hindu ẹnịm ke akpanikọ ẹte ke kpukpru oto-obot n̄kpọ ẹnyene ukpọn̄ oro mîkpaha tutu amama, nte ke ukpọn̄ ekpere ndisifiak mmana ke usụn̄ oro mînyeneke utịt, nte ke mme edinam (Karma) ẹsibiere mme uduot emi enye afiakde amana, nte ke ẹkeme ndibọhọ “anana-utịt isan̄” emi n̄kukụre ke ndiwot kpukpru udọn̄ obụkidem, ndien nte ke edieke ẹnamde emi, ukpon̄ eyediana kiet ye spirit ekondo. (3) Ke ofụri ofụri, mbon Hindu ẹwụt ukpono ẹnọ mme ido ukpono efen. Mbon Hindu ẹnịm ke akpanikọ ẹte ke, kpa ye akpanikọ oro nte ke mmimọ ikpep ukpepn̄kpọ oro mîsan̄ake kiet, kpukpru ido ukpono ẹda ẹkesịm ukem akpanikọ.
Utu ke ndidomo ndiyịre ke awak n̄kukọhọ ukpepn̄kpọ akwaifiọk mbon Hindu, neme mme akpanikọ ẹmi ẹnọde uyụhọ oro ẹdude ke Edisana Bible. Ima ima enọ Jehovah kaban̄a uwem ẹberede ẹnọ kpukpru orụk owo, ndien mme in̄wan̄în̄wan̄ akpanikọ oro ẹdude ke Ikọ esie ẹyesịm esịt mbon oro ẹkopde biọn̄ ye nsatitọn̄ edinen ido. Bible ikpọn̄ ọnọ ata idotenyịn oro enyenede isọn̄ kaban̄a ini iso; Bible ikpọn̄ ọnọ mme ibọrọ oro ẹnen̄erede ẹnọ uyụhọ ke mme akpan mbụme ẹmi ẹsakde iso ẹse ofụri ubonowo. Nọ mmọ ifet ndikop mme ibọrọ oro. Edi n̄kpọ udọn̄ nte ke ẹkot ikwọ Rig-Veda, 10. 121 eke mbon Hindu, “Emi Enyene Abasi Emi Owo Mîfiọkke.” Ke ndusụk idaha afo emekeme ndikụt nte odotde nditịn̄ ntụk emi. (Men Utom Mme Apostle 17:22, 23 domo.) Ke edide n̄kpọ udọn̄, enyịn̄ abasi mbon Hindu oro Vishnu, ye unana abasi iba eken ndidiana, edi Ish-nuh, emi ke usem Chaldee ọwọrọde “eren oro Noah.” Sio se Bible etịn̄de aban̄a se Ukwọ ofụri ererimbot ke eyo Noah ọwọrọde wụt.
N̄kpri n̄wed oro The Path of Divine Truth Leading to Liberation ye From Kurukshetra to Armageddon—And Your Survival ọkọrọ ye ekpri n̄wed oro Our Problems—Who Will Help Us Solve Them? ẹdọn̄ọ ntọt oro ẹdinen̄erede ẹnyene ufọn ẹnọ mbon Hindu ẹmi ẹnyenede esịt akpanikọ.
KE INI OWO ỌDỌHỌDE ETE, ‘AMI NDI OWO JEW’
● Akpa kan̄a, dụn̄ọde fiọk usụn̄ emi owo oro esede idemesie nte owo Jew. Ibat ibat ẹdi mbon ido ukpono. Ye ediwak owo, ndidi owo Jew akam edi idiọn̄ọ orụk.
Mi edi ibat ibat akpan n̄kpọ oro ọfọnde ndinyene ke ekikere: (1) Mme Jew oro ẹdide mbon ido ukpono ẹda edikot enyịn̄ Abasi nte ibet. (2) Ediwak mme Jew ẹda “Bible” nte n̄wed Christian, edi edieke afo etịn̄de aban̄a “N̄wed Abasi Usem Hebrew,” “N̄wed Abasi,” m̀mê “Torah,” mfịna oro ididemekede. (3) Item owo edi akpan ubak ukpepn̄kpọ mmọ ndien ediwak mme Jew oro ẹdide mbon ido ukpono ẹdọhọ ke enyene ukem odudu ye N̄wed Abasi. (4) Mmọ ẹkeme ndibuan Jesus Christ ye ibak ibak ukọbọ oro mme Jew ẹsobode ke ubọk Christendom ke enyịn̄ Jesus. (5) Mmọ ẹnịm ke akpanikọ kpukpru ini ẹte ke Abasi oyom mme Jew ẹnịm Sabbath, kpa edinịm ke akpanikọ emi esịnede editre ndikama okụk ke usen oro.
Man ẹnyene unyịme edem mbiba, afo emekeme ndidọhọ ete: (1) ‘Afo nte eyịghe mîdụhe eyenyịme ete ke, inamke n̄kpọ m̀mê nso idi idaha nnyịn ke uwem, kpukpru nnyịn imosobo ukem n̄kpọsọn̄ idaha ke ererimbot mfịn. Nte afo omonịm ke akpanikọ ete ke nsinsi usọbọ eyenen̄ede odu ọnọ ikpọ mfịna oro emana emi osobode? (Ps. 37:10, 11, 29; 146:3-5; Dan. 2:44)’ (2) ‘Nnyịn idịghe ubak Christendom inyụn̄ inịmke Abasi-Ita-ke-Kiet ke akpanikọ edi ituak ibuọt inọ Abasi Abraham. Nnyịn inyene udọn̄ akpan akpan ke n̄kpọ aban̄ade akpanikọ ido ukpono. Yak mbụp fi ise, didie ke afo esibiere se idide akpanikọ, akpan akpan ke ekerede aban̄a akpanikọ oro nte ke ediwak nsio nsio edinịm ke akpanikọ ẹdu ke otu mme owo ẹdide mme Jew? . . . (Deut. 4:2; Isa. 29:13, 14; Ps. 119:160)’ (3) ‘Nnyịn inen̄ede inyene udọn̄ ke un̄wọn̄ọ oro Abasi ọkọn̄wọn̄ọde ọnọ Abraham nte ke ebede ke mfri esie ẹyediọn̄ mme owo ẹtode kpukpru idụt. (Gen. 22:18)’
Edieke owo oro owụtde ke imọ inyeneke mbuọtidem ke Abasi, bụp m̀mê nte esitiede enye ke idem kpukpru ini edi oro. Ndien iso-ọfọn eneme ntak emi Abasi ayakde idiọkido ye ndutụhọ ẹdu. Nditi nsobo oro Nazi okosobode mme Jew amanam ediwak mme Jew ẹnyene udọn̄ ẹban̄a emi.
Edieke afo enemede aban̄a nte edida enyịn̄ Abasi edide akpan n̄kpọ, bemiso dụn̄ọde fiọk nte owo enye eken ekerede aban̄a emi. Wụt nte ke Exodus 20:7 akpan edida enyịn̄ Abasi ke usụn̄ oro mîdotke, edi ke enye ikpanke edida enyịn̄ oro ke usụn̄ oro owụtde ukpono. Ekem kọk ibuot ke mme utọ itien̄wed nte Exodus 3:15 (m̀mê Psalm 135:13); 1 Ndidem 8:41-43; Isaiah 12:4; Jeremiah 10:25; Malachi 3:16.
Ke ini afo enemede aban̄a Messiah: (1) Bemiso tịn̄ ban̄a mme edidiọn̄ ini iso ke idak ukara esie, utu ke se ẹdade ẹdiọn̄ọ enye. (2) Ekem kọk ibuot ke mme itien̄wed oro anyande ubọk owụt ataata Messiah. (Gen. 22:17, 18; Zech. 9:9, 10; Dan. 7:13, 14) (3) Ekeme ndiyom afo eneme aban̄a edidi oro Messiah edide ikaba. (Wụt ukpụhọde Daniel 7:13, 14 ye Daniel 9:24-26.) (4) Ke ini etịn̄de aban̄a Jesus, nam ntre ke udọn̄ikọ oro ọsọn̄ọde owụt n̄kọri ke uduot uduak Abasi. Tịn̄ nte ke ini Jesus ekekpepde owo n̄kpọ, ini ama ekpere emi Abasi akayakde ẹsobo udiana temple, oro owo mîdifiakke ibọp tutu amama. Edi Jesus ama ọsọn̄ọ etịn̄ aban̄a Ibet ye Mme Prọfet ye ubọn̄ ubọn̄ ini iso ndisu emi mmọ ẹdidade mme owo ẹmi ẹnyenede mbuọtidem ẹkesịm.