N̄wed Enyenede Fi?

“Edinam ediwak n̄wed inyeneke edikụre,” ntre ke Solomon eketịn̄ ke n̄kpọ nte isua 3,000 ẹmi ẹkebede. (Ecclesiastes 12:12) Ikọ oro odot mfịn ata ukem ukem. Ke adianade ye nti n̄wed eset, ke ẹmịn̄ ediwak tọsịn mbufa n̄wed ke isua ke isua. Ye ata ediwak n̄wed ẹdude ndimek nto, ntak emi afo okpokotde Bible?

EDIWAK owo ẹsikot n̄wed edide man ẹnyene inemesịt m̀mê ẹkpep n̄kpọ, mîdịghe kaban̄a ntak mbiba oro. Ukem oro ke ekeme ndidi ye edikot Bible. Enye ekeme ndidi edikot n̄wed oro oforide idaha, akam ọnọde inemesịt. Edi Bible akan oro. Enye edi n̄wọrọnda ebiet emi ifiọk otode.—Ecclesiastes 12:9, 10.

Bible ọbọrọ mme mbụme oro mme owo ke anyanini ẹkekerede ẹban̄a—mme mbụme ẹban̄ade ini edem nnyịn, idaha nnyịn kemi, ye ini iso nnyịn. Ediwak owo ẹsikere ẹte: Nnyịn ikoto m̀mọ̀n̄ idi? Nso idi uduak uwem? Nnyịn ikeme ndisan̄a didie nnyene inemesịt ke uwem? Ndi uwem oyodu ke isọn̄ kpukpru ini? Nso ke ini iso akama ọnọ nnyịn?

Ntan̄ndian odudu ofụri uyarade oro ẹnọde mi owụt in̄wan̄în̄wan̄ nte ke Bible enen onyụn̄ edi akpanikọ. Nnyịn imeneneme iban̄a nte eti item esie ekemede ndin̄wam nnyịn idu uwem oro ọwọrọde usụn̄ onyụn̄ edide inem inem mfịn. Sia mme ibọrọ esie ẹban̄ade idahaemi ẹnọde uyụhọ, ke akpanikọ mme ibọrọ esie ẹban̄ade eset ye mme prọfesi esie ẹban̄ade ini iso ẹdot ẹnen̄ede ẹnọ ntịn̄enyịn.

Nte Ẹkemede Ndinyene Akakan Ufọn

Ediwak owo ẹma ẹtọn̄ọ ndikot Bible edi ẹtre ke ini mmọ ẹkụtde nte ndusụk ikpehe esie ẹsọn̄de ndifiọk. Edieke ekedide ntre ye afo, odu ndusụk n̄kpọ oro ẹkemede ndidi n̄kpọ un̄wam.

Mek edikabade ke usem eyomfịn oro ẹkemede ndiberi edem. Ndusụk owo ẹsitọn̄ọ ke ndikot mme mbụk Gospel ẹban̄ade uwem Jesus, emi mme ọniọn̄ ọniọn̄ ukpepn̄kpọ esie, utọ nte mbon oro ẹkụtde ke Ukwọrọikọ oro ke Obot, ẹwụtde ọyọhọ ifiọk ẹban̄ade obot owo ẹnyụn̄ ẹwụtde nte ikemede ndifori idaha nnyịn ke uwem.—Se Matthew ibuot 5 esịm 7.

Ke adianade ye edikot Bible n̄kụre, edisio ibuotikọ kiet n̄kpep ekeme ndinen̄ede nsịne ifiọk. Emi abuana edidụn̄ọde se Bible etịn̄de ke akpan ibuot nneme. Ekeme ndikpa fi idem ndikpep mban̄a se Bible enen̄ede etịn̄ aban̄a mme utọ ibuotikọ nte ukpọn̄, heaven, isọn̄, uwem, ye n̄kpa, ọkọrọ ye Obio Ubọn̄ Abasi—se enye edide ye se enye edinamde.a Mme Ntiense Jehovah ẹnyene ndutịm edikpep ibuotikọ kiet kiet ke Bible, emi ẹnọde ke mfọn. Afo emekeme ndibụp mban̄a emi ebe ke ndiwet mme andimịn̄, adade nnennen adres ẹwetde ke page 2.

Ke ẹma ẹkedụn̄ọde uyarade, ediwak owo ẹmesịm ubiere nte ke Bible oto Abasi, emi N̄wed Abasi ọdọhọde ke edi “Jehovah.” (Psalm 83:18) Ekeme ndidi afo unịmke ke akpanikọ nte ke Bible oto Abasi. Edi ntak afo mûdụn̄ọkede enye ke idemfo? Nnyịn imenyene mbuọtidem nte ke afo ama ekekpep, etie ekere, iso-ọfọn onyụn̄ okụtde nti ufọn nsinsi ọniọn̄ esie ke idemfo, afo eyedi edikụt ete ke Bible ke akpanikọ edi n̄wed ofụri owo, onyụn̄ akande oro—n̄wed enyenede fi.

[Mme Ikọ idakisọn̄]