Obufa Ererimbot Oro Abasi Ọn̄wọn̄ọde

BIBLE, kpa Ikọ Abasi oro ẹwetde-wet, ọnọ nnyịn idotenyịn ke ini enye ọdọhọde ete: “Nnyịn itie ibet obufa enyọn̄ ye obufa isọn̄ nte un̄wọn̄ọ Esie edide; ndien edi do ke edinen ido edidụn̄.”—2 Peter 3:13.

Nso idi “obufa enyọn̄”? Bible abuan obufa enyọn̄ ye itie ukara. (Utom 7:49) “Obufa enyọn̄” edi obufa ukara oro edikarade isọn̄. Enye edi obufa koro enye edidade itie ndutịm ukara eke editịm n̄kpọ emi; enye n̄ko edi obufa ndutịm oro edisude uduak Abasi. Enye edi Obio Ubọn̄ emi Jesus ekekpepde mme mbet esie ndibọn̄ akam mben̄e. (Matthew 6:10) Sia enye otode Abasi emi odụn̄de ke heaven, ẹkot ukara emi “Obio Ubọn̄ Heaven.”—Matthew 7:21.

Nso idi “obufa isọn̄”? Enye idịghe obufa ekondo, koro Bible etịn̄ in̄wan̄-in̄wan̄ nte ke mme owo ẹyedụn̄ ke isọn̄ emi ke nsinsi. “Obufa isọn̄” edi obufa n̄kaowo. Enye edidi obufa koro ẹyesobo mme idiọkowo ẹfep. (Mme N̄ke 2:21, 22) Kpukpru mbon emi ẹdidude uwem ini oro ẹyekpono ẹnyụn̄ ẹsụk ibuot ẹnọ Andibot, ẹyenyụn̄ ẹdu uwem ẹkekem ye mme idaha esie. (Psalm 22:27) Ke ẹnọ mme owo ẹtode kpukpru idụt ikot ẹte mmọ ẹdikpep mme n̄kpọ oro enye oyomde mi ẹnyụn̄ ẹdu uwem ẹkekem ye mme n̄kpọ oro idahaemi. Ndi afo ke anam oro?

Ke obufa ererimbot Abasi, kpukpru owo ẹyekpono itie ukara Esie. Nte ima emi afo amade Abasi onụk fi ndisụk ibuot nnọ enye? (1 John 5:3) Ndi ẹkụt oro ke ufọk fo? ke itieutom m̀mê ke ufọkn̄wed? ke usụn̄ oro afo adade uwem fo anam n̄kpọ?

Ke obufa ererimbot oro, n̄kaowo ayadiana kiet ke utuakibuot ata Abasi. Nte afo ke atuak ibuot ọnọ Andibot enyọn̄ ye isọn̄? Ndi utuakibuot fo anam fi enen̄ede adiana kiet ye ekemmọ mme andituak ibuot ẹtode kpukpru idụt, orụk, ye usem?—Psalm 86:9, 10; Isaiah 2:2-4; Zephaniah 3:9.

[Ekebe ke page 17]

Abasi Emi Ọn̄wọn̄ọde Mme N̄kpọ Emi

Enye edi Andibot ata enyọn̄ ye ekondo Isọn̄. Jesus Christ akanam ẹdiọn̄ọ Enye nte “ata Abasi kierakiet.”—John 17:3.

N̄wakn̄kan ke otu ubonowo ẹkpono mme abasi oro mmọ ẹnamde. Ediwak miliọn owo ke ẹnụhọ ẹnọ anana-uwem ndisọi mbiet. Mbon en̄wen ke ẹkpono mme esop n̄kaowo, ekikere uma inyene, m̀mê udọn̄ idemmọ. Idem mbon oro ẹdọhọde ke utuakibuot mmimọ ọkọn̄ọ ke Bible ikponoke enyịn̄ owo oro Bible anamde ẹdiọn̄ọ nte edide ‘ata Abasi.’—Deuteronomy 4:35.

Andibot etịn̄ aban̄a idemesie ete: “Ami ndi Jehovah; enyịn̄ mi edi oro.” (Isaiah 42:5, 8) Enyịn̄ emi odu ke Bible ke n̄kpọ nte utịm ike 7,000 ke mme akpasarade usem. Jesus Christ ama ekpep mme anditiene enye ndibọn̄ akam nte: “Ete nnyịn emi odude ke heaven, yak ikpono enyịn̄ Fo.”—Matthew 6:9.

Nso orụk owo ke ata Abasi edi? Enye etịn̄ aban̄a idemesie nte idide ‘Abasi mbọm, ye mfọn, ye anyan ime, iwakde ima ye akpanikọ’ inyụn̄ idide enye emi mîyakke mbon oro ẹkoide-koi ẹbiat mme ibet imọ ẹbọhọ ufen. (Exodus 34:6, 7) Mbụk aban̄ade nte enye anamde n̄kpọ ye ubonowo ọsọn̄ọ ke se enye etịn̄de emi edi akpanikọ.

Ẹnyene ndikpono Abasi ye enyịn̄ esie. Nte Andibot ye Andikara Ekondo, odot nnyịn ndisụk ibuot, nnyụn̄ ntuak ibuot nnọ enye. Ndi afo ke idemfo amanam emi?

[Ekebe/Ndise ke page 18]

Mme Ukpụhọde Ewe ke “Obufa Enyọn̄ ye Obufa Isọn̄” Ẹdida Ẹdi?

Ẹnam isọn̄ akabade edi Paradise Luke 23:43

Utom emi ọnọde uyụhọ, akpakịp udia Isaiah 25:6; 65:17, 21-23

[Ekebe/Mme ndise ke page 19]

Nte Afo Ọyọbọ Ufọn?

Abasi ikemeke ndisu nsu!—Titus 1:2.

Jehovah ọdọhọ ete: “Ikọ mi . . . idifiakke itiene mi ubọk-ubọk, tutu enye anam se mmade, onyụn̄ okụt unen ke utom emi ndọn̄de enye.”—Isaiah 55:11.

Jehovah ke obobot “obufa enyọn̄ ye obufa isọn̄.” Ukara eke heaven ọtọtọn̄ọ edinam. Ẹsesịn itiat idakisọn̄ “obufa isọn̄.”

Ke ama eketịn̄ aban̄a ndusụk utịbe utịbe n̄kpọ emi “obufa enyọn̄ ye obufa isọn̄” ẹdinamde ẹnọ ubonowo, Ediyarade etịn̄ nte Abasi ke idemesie, kpa Andikara Ekondo, ọdọhọde ete: “Sese, mmanam kpukpru n̄kpọ ẹdi mbufa.” Enye onyụn̄ ọdọhọ ete: “Wet: koro mme ikọ emi ẹdi akpanikọ ye se owo ekpenịmde.”—Ediyarade 21:1, 5.

Akpan mbụme edi, Ndi nnyịn ke inam mme ukpụhọde oro ẹyomde man ẹbat ke nnyịn imodot ndidi ubak “obufa isọn̄” emi edidude ke idak “obufa enyọn̄”?