IKPEHE ITA
Iyatesịt—Ke Ini Inyenede “Ntak Nditọhọ ye Owo”
“Eyenete an̄wan kiet ke esop nnyịn ama odori mi ikọ ete ke mmeyịp okụk imọ. Mbon eken ke esop ẹma ẹnịm se enye eketịn̄de. Ekem, enye ama edidọhọ mi ke ikanam ndudue, ke idịghe ami n̄keyịp okụk imọ. Kpa ye oro enye ekekpede mi ubọk, mma mbiere ke ndifenke nnọ enye ke ntak emi enye ekesuenede mi.”—Linda.
NDI akanam eyenete ke esop anam n̄kpọ oro enen̄erede ayat fi, nte ẹkenamde Linda? Ndusụk owo inamke n̄kpọ Abasi aba nte ẹkesinamde, sia esịt enen̄erede ayat mmọ ke ntak se nditọete ke esop ẹkenamde mmọ. Ndi akanam utọ n̄kpọ emi ọwọrọ fi?
Ndi Owo Ekededi Ekeme “Ndidian̄ade Nnyịn ke Ima Abasi”?
Ekeme ndisọn̄ nnyịn ndifen nnọ eyenete oro anamde se iyatde nnyịn esịt, koro akpana nditọete nnyịn ẹmama nnyịn nte Bible ọdọhọde. (John 13:34, 35) Ntak edi oro esinen̄erede abiak nnyịn ke ini eyenete ayatde nnyịn esịt.—Psalm 55:12.
Bible ọdọhọ ke enyene ini emi nditọete ẹsinyenede “ntak nditọhọ” ye kiet eken. (Colossae 3:13) Edi ke ini emi etịbede ọnọ nnyịn, ekeme ndinen̄ede mbiak nnyịn. Ndi enyene se ikpan̄wamde nnyịn? Yak ineme n̄kpọ ita oro Bible etịn̄de emi ẹkemede ndin̄wam nnyịn:
Ete nnyịn eke heaven ọfiọk kpukpru n̄kpọ. Jehovah okụt kpukpru n̄kpọ oro ẹtịbede, esịnede ufen oro ibọde ke ntak utụk. (Mme Hebrew 4:13) Akan oro, esibiak Jehovah ke ini ibọde ufen. (Isaiah 63:9) Enye iyomke ‘ukụt m̀mê nnanenyịn’ m̀mê nditọete nnyịn ke esop ‘adian̄ade nnyịn ke ima esie.’ (Rome 8:35, 38, 39) Nnyịn n̄ko ikponyụn̄ iyakke n̄kpọ ndomokiet m̀mê owo ndomokiet anam nnyịn itre ndima Jehovah.
Ndifen nnọ owo iwọrọke ke imenyịme idiọkn̄kpọ. Ke ini ifende inọ mbon oro ẹnamde se iyatde nnyịn esịt, iwọrọke ke imenyịme m̀mê ke imama idiọkn̄kpọ oro mmọ ẹkenamde. Ti ke akanam Jehovah inyịmeke idiọkn̄kpọ, edi enye esifen idiọkn̄kpọ edieke owo akabarede esịt. (Psalm 103:12, 13; Habakkuk 1:13) Jehovah oyom nnyịn ikpebe imọ ke ndifen nnọ mbon en̄wen. Enye ‘isiyatke esịt ke nsinsi.’—Psalm 103:9; Matthew 6:14.
Iyọbọ ufọn edieke ifende inọ mme owo. Didie? Ke uwụtn̄kpọ, edieke emende ekpri itiat akama ke enyọn̄, ekeme nditie fi nte ke idobike sia ukamake ubịghi. Edi edieke akamade enye ebịghi, ubọk ọyọtọn̄ọ ndibiak fi. Ntak? Idịghe nte ke itiat oro ododobi akan nte ekedide, edi ubọk abiak fi sia amakama enye enen̄ede ebịghi. Kpa ntre ke esidi edieke ikade iso ndiyat esịt ke ini owo eduede nnyịn. Edieke isịnde owo ke esịt ibịghi ọkpọkọm enye akanam nnyịn ata ekpri n̄kpọ, nte ini akade, ekpri n̄kpọ oro eyenen̄ede afịna nnyịn nte ekedi akamba n̄kpọ. Ntak edi oro Jehovah ọdọhọde nnyịn ikûyat esịt ibịghi. Ndifen nnọ owo ke ini owo ayatde nnyịn esịt edi ke ufọn nnyịn.—Mme N̄ke 11:17.
Iyọbọ ufọn edieke ifende inọ mme owo
“Eketie Nte N̄kpọ Eke Jehovah ke Idemesie Eketịn̄de Ikọ ye Ami”
Nso ikan̄wam Linda okûyat esịt aba ye eyenete oro okodoride enye ikọ? Kiet ke otu mme n̄kpọ oro akan̄wamde enye ekedi nditie n̄kere ntak emi N̄wed Abasi ọdọhọde ifen inọ kiet eken. (Psalm 130:3, 4) Ama enen̄ede otụk Linda ndifiọk ke edieke ifende inọ owo, ke Jehovah oyonyụn̄ efen ọnọ nnyịn. (Ephesus 4:32–5:2) Se Linda ekedide edifiọk emi ama otụk enye tutu enye ọdọhọ ete: “Eketie nte n̄kpọ eke Jehovah ke idemesie eketịn̄de ikọ ye ami.”
Nte ini akakade, Linda ama etre ndiyat esịt. Enye ama efen ọnọ eyenete an̄wan oro ke ofụri esịt, ndien idahaemi mmọ ẹdidi itai ye aban̄. Linda ke aka iso ndinam n̄kpọ Jehovah. Jehovah onyụn̄ oyom ndin̄wam fi efen ọnọ mme owo.