Watchtower LIBRARY EKE INTANET
Watchtower
LIBRARY EKE INTANET
Efịk
Ẹ,Ê,Ị,Ọ,Ụ,Û,N̄
  • Ẹ
  • ẹ
  • Ê
  • ê
  • Ị
  • ị
  • Ọ
  • ọ
  • Ụ
  • ụ
  • Û
  • û
  • N̄
  • n̄
  • BIBLE
  • MME N̄WED
  • MBONO ESOP
  • w94 4/15 p. 19-21
  • Nte Enye Enen̄ede Edi Uyịpinọ?

Vidio ndomokiet idụhe mi.

Kûyat esịt, n̄kpọ anam vidio emi okûbre.

  • Nte Enye Enen̄ede Edi Uyịpinọ?
  • Enyọn̄-Ukpeme Ọnọ Ntọt Obio Ubọn̄ Jehovah—1994
  • N̄kpri Ibuotikọ
  • Ukem Ibuot Nneme
  • Okụk Anie ke Enye Edi?
  • Ebuọt m̀mê Inọ?
  • Ndibuọt Idem ke Abasi
  • Kûdede Ukabade Udi Inọ!
    Kpep N̄kpọ to Akwa Andikpep
  • Didie ke Ikpese Okụk?
    Ẹdemede!—2015
  • Ndi Okụk Edi Ntak Kpukpru Idiọkn̄kpọ Ererimbot Emi?
    Mme Mbụme Bible Oro Ẹbọrọde
  • Okụk
    Ẹdemede!—2014
Se En̄wen En̄wen
Enyọn̄-Ukpeme Ọnọ Ntọt Obio Ubọn̄ Jehovah—1994
w94 4/15 p. 19-21

Nte Enye Enen̄ede Edi Uyịpinọ?

ABIODUN ekedi adaibuot mme ọnọ udia ke akamba ufọkisen kiet ke Nigeria. Ke ini enye okosụk ọkọbide usụn̄ ufọkudia mbubịteyo usen kiet, enye ama okụt ekpatokụk emi esịnede okụk oro edide ukem ye $1,827, U.S. Ye unana ubiatini enye ama akayak okụk oro ọnọ, emi andinyene, kpa esenowo ke ufọkisen oro, ekedide edibọ ke ukperedem. Ese utom ufọkisen oro ama ọnọ Abiodun utịp ke ndimenede enye ke utom utịm ikaba n̄kosịm udiana esenyịn utom onyụn̄ ọnọ enye itoro nte “mfọnn̄kan anamutom ke isua oro.” Andinyene okụk oro ama onọ enye enọ n̄ko.

Quality, kpa magazine mbụk n̄kpọntịbe n̄kann̄kụk, ama akama mbụk oro, okotde Abiodun “Eti Owo Samaria.” Ke ini Quality okobụpde m̀mê enye ama oyom ndimen okụk oro nda, Abiodun ama ọbọrọ ete: ‘Ami ndi kiet ke otu Mme Ntiense Jehovah. Ntre edieke n̄kụtde n̄kpọ ekededi oro mînyeneke mi, nnyene ndiyak enye nnọ andinyene.’

Ediwak owo ke n̄kann̄kụk oro ẹma ẹdu ke n̄kpaidem ẹban̄a edinam akpanikọ Abiodun. Mme ufan Abiodun ẹdide Mme Ntiense ẹma ẹkop inemesịt ke se ikotịbede, edi mmọ ikodụhe ke n̄kpaidem. Ke ofụri isọn̄ ẹdiọn̄ọ Mme Ntiense Jehovah kaban̄a mme n̄kokon̄ edumbet mmọ. Ke otu mmọ owo isioho edinam akpanikọ ifep; enye edi mbet, akpan ikpehe ata Ido Ukpono Christ.

Ke ini ke ini, nte ededi, mme idaha ẹkeme ndinam edi ọkpọsọn̄ n̄kpọ ndiwụt ukpụhọde oro odude ke ufọt se idide akpanikọ ye se mîdịghe. Kere ban̄a idaha enyeemi. Festus, emi ekesede aban̄a mme etịbe ye okụk ke esop Mme Ntiense Jehovah kiet ke Edem Usoputịn Africa, ama oyom okụk ke mbrenyịn.a N̄wan esie ama oyom akpan usiakidem oro mme dọkta esie ẹkedọhọde ke owo inyeneke ndibiat ini. Ufọkibọk ama oyom mbahade iba ke otu okụk oro mbemiso.

Festus ikenyeneke okụk oro. Ke enye ama akaka ebịne ediwak owo ndibuọt okụk, owo ikọnọhọ enye. Ekem enye ama ekere aban̄a okụk oro enye akakamade onyụn̄ ekere ete, ‘Nte enen ami ndiyak n̄wan mi akpa ke ini ami n̄kemede ndinam n̄kpọ ndikpan oro? Ntak “mmembuọtke” okụk esop? Mmekeme ndikpe nsịn ke ini ndusụk owo ẹnọde mi okụk oro mmọ ẹkamade mi.’

Festus ama ada okụk oro mîkedịghe eke esie do ndikpe okụk ufọkibọk. Nte ekikere esie ama enen? Nte mbabuat idaha oro enye okosobode ama anam edinam esie enen?

Okụk Anie ke Enye Edi?

Ke ndidụn̄ọde mme mbụme ẹmi, ẹyak isọp idụn̄ọde akpan n̄kpọ ifan̄ ẹmi ẹban̄ade ebiet emi okụk oro otode ye uduak utọ okụk oro Festus akadade anam n̄kpọ. Ẹkenyene okụk oro ẹto etịbe imaesịt oro mme andibuana ke esop, ẹmi ẹyomde ndinam edisana utuakibuot Jehovah akaiso, ẹketịpde. (2 Corinth 9:7) Owo idaha enye ndikpe okụkọfiọn̄, sia owo mîkpehe owo ndomokiet okụk ke se mmọ ẹnamde ke esop. Ke edide isio ye oro, ẹda okụk etịbe oro akpan akpan ndida mbọ nnyụn̄ nse mban̄a itie mbonoesop, awakde ndidi Ufọkmbono Obio Ubọn̄. Emi anam ẹnyene eti itie oro ọfọnde owo ke idem ke ebiet emi mme owo​—⁠n̄kpri ye ikpọ, imọ ye ubuene​—⁠ẹkemede ndisop idem kaban̄a item Bible.

Okụk anie ke enye edi? Enye enyene ofụri esop. Andibuana ndomokiet ibiereke nte ẹdade okụk oro ẹnam n̄kpọ. Ke adan̄aemi otu mbiowo ẹdade usụn̄ ke ndikpe okụk ke mme n̄kpọ oro esop abiatde okụk, ke ini oyomde ekpe okụk oro okponde, mbiowo ẹyeneme n̄kpọ oro ẹnọ ofụri esop kaban̄a unyịme.

Ebuọt m̀mê Inọ?

Ke ntak ekikere esie ndikpe okụk oro nsịn usọp usọp nte ekekeme, Festus akada edinam esie nte ebuọt. Nte ededi, Webster’s New Dictionary of Synonyms ada mme ikọ efen kaban̄a “edida ye edisio n̄kpọ owo en̄wen awakde ndidi ke ndịbe m̀mê ye unana enye ndifiọk ndien ediwak ini ye unana unyịme esie.” Mme ikọ oro ẹdi “uyịpinọ” ye “inọ.” Ye unana unyịme m̀mê odudu, Festus ama emen okụk oro enyenede esop. Ntre, ih, enye ama enyene ubiomikpe inọ. Enye ekedi inọ.

Nte ededi, udomo nduduọhọ odu ke udọn̄esịt oro edide ntak uyịpinọ. Nnyịn imekeme ndikụt emi nto uwụtn̄kpọ Judas Iscariot, emi ẹkeyakde okụk emi Jesus ye mme anam-akpanikọ apostle ẹkenyenede esịn ke ubọk. Bible ọdọhọ ete: ‘Judas ekedi inọ, onyụn̄ akama ekpat okụk, onyụn̄ osio se isịnede ke esịt.’ (John 12:6) Ke idiọk ekikere ye ata idiọkitọn̄ onụkde, Judas ama ototịm ọdiọk akan. Ke akpatre enye ama ọduọ odụk editap Eyen Abasi​—⁠ke mbak silver 30.​—⁠Matthew 26:​14-⁠16.

Festus, nte ededi, ekenyene udọn̄ aban̄a n̄wan esie oro ọkọdọn̄ọde. Nte emi ọwọrọ ke enye ikenyeneke nduduọhọ? Baba. Kere ban̄a se Bible etịn̄de aban̄a uyịpinọ ke idaha efen oro etiede nte edi mbabuat: “Owo isueneke inọ, koro enye oyịpde man ukpọn̄ esie oyụhọ; koro biọn̄ ọdọn̄de enye; edi ẹma ẹmụm enye, enye eyesio usiene utịm ikatiaba; eyenọ kpukpru inyene ufọk esie.” (Mme N̄ke 6:​30, 31) Ke ikọ en̄wen, ke ini ẹmụmde, ana inọ ọbọ ufen ọyọhọ ọyọhọ nte ekemde ye ibet. Nte ekemde ye Ibet Moses, akana inọ ọnọ usiene ke ubiatibet esie. Ntre utu ke ndisịn udọn̄ nnọ m̀mê ndifen uyịpinọ, Bible ọnọ item ete idem ke mbabuat idaha, uyịpinọ ekeme ndisụn̄ọ ke nditaba mme inyene, esuene, ndien ke ọdiọkde akan oro, nditaba unyịme Abasi.

Nte Mme Ntiense Jehovah, ana kpukpru mme ata Christian, akpan akpan mbon oro ẹyakde mbiomo ẹsịn mmọ ke ubọk ke esịt esop, ẹdi uwụtn̄kpọ, “ẹbọhọde edori ikọ.” (1 Timothy 3:10, NW) Festus ikọbọhọ okụk oro enye okodoride enyịn aban̄a, ndien enye ke ntre ikekemeke ndifiak nsịn okụk oro enye okosiode. Ẹma ẹdifiọk se enye akanamde. Nso ikotịbe inọ enye? Ke enye ekpekedide inọ oro mîkakabakede esịt, ẹkpekesio enye ẹfep ke edisana esop Christian. (1 Peter 4:15) Edi enye ama ofụhọ aban̄a oro onyụn̄ atua n̄kpọfiọk. Ntre, enye ama ekeme ndisụk ndu ke esop, okposụkedi enye akatabade mme ifetutom esie.

Ndibuọt Idem ke Abasi

Apostle Paul ama odụri owo utọn̄ ete ke owo oro ọdọhọde ke inam n̄kpọ Jehovah ndiyịp inọ ekeme ndida esuene nsọk enyịn̄ Abasi ye ikọt enyịn̄ Esie. Paul ekewet ete: “Afo emi ekpepde owo efen, nte ukpepke idemfo? Afo emi ọkwọrọde ete owo okûyịp inọ, nte omoyịp ke idemfo? Koro ẹwet ẹte, Oto mbufo ke ẹsụn̄i enyịn̄ Abasi ke otu mme Gentile.”​—⁠Rome 2:​21, 24.

Agur, owo ọniọn̄ eke eset, ama etịn̄ ukem n̄kpọ oro. Ke akam esie enye ama eben̄e ete imọ ‘ikûdi ubuene, ndien iyịp inọ, inyụn̄ isuene enyịn̄ Abasi imọ.’ (Mme N̄ke 30:9) Fiọk ete ke owo ọniọn̄ oro ama ọfiọk ete ke ubuene ekeme ndida mme idaha oro ẹkemede ndidomo idem edinen owo ndiyịp inọ. Ih, n̄kpọsọn̄ ini ẹkeme ndidomo mbuọtidem Christian ke ukeme oro Jehovah enyenede ndise mban̄a se ikọt esie ẹyomde.

Edi, mme anam-akpanikọ Mme Ntiense Jehovah, ẹsịnede mbon oro ẹdide ubuene, ẹnyene mbuọtidem nte ke Abasi “edi Andinọ mmọemi ẹyomde Enye utịp.” (Mme Hebrew 11:6) Mmọ ẹfiọk ẹte ke Jehovah esinọ mme anam-akpanikọ ikọt esie utịp ebe ke ndin̄wam mmọ ndise mban̄a se mmọ ẹyomde. Jesus ama anam oro an̄wan̄a ke Ukwọrọikọ esie oro ke Obot, ọdọhọde ete: “Ẹkûtịmede esịt ẹbụp ẹte, Nso ke nnyịn ididia? Nso ke nnyịn idin̄wọn̄? Nso ke nnyịn idisịne? . . . koro Ete mbufo ke heaven ọmọfiọk ete kpukpru n̄kpọ ẹmi ẹnana mbufo. Ẹkam ẹbemiso ẹyom Obio Ubọn̄ Esie ye edinen ido Esie; ndien ẹyedian kpukpru n̄kpọ ẹmi ẹnọ mbufo.”​—⁠Matthew 6:​31-⁠33.

Didie ke Abasi ọnọ mbon unana n̄kpọ ke esop Christian? Ke ediwak usụn̄. Usụn̄ kiet ebe ke ekemmọ mme andinịm ke akpanikọ. Ikọt Abasi ẹsiwụt ata ima ẹnọ kiet eken. Mmọ ẹsida item Bible emi ke akpan n̄kpọ: “Owo eke enyenede inyene ererimbot emi, onyụn̄ okụtde eyenete esie ke unana, onyụn̄ eberide mbọm abaha enye, ima Abasi ekeme didie ndidụn̄ owo oro ke esịt? N̄kpri nditọ mi, ẹyak nnyịn ikûma ke ikọinua ye ke edeme, ẹdi ẹyak nnyịn ima ke edinanam ye ke akpanikọ.”​—⁠1 John 3:​17, 18.

Ke ofụri ererimbot, ke se ibede esop 73,000, Mme Ntiense Jehovah ẹwakde ẹbe miliọn inan̄ ye ubak ke esịn ifịk ẹdomo ndinam n̄kpọ Abasi nte ekemde ye ndinen edumbet esie. Mmọ ẹfiọk ẹte ke Abasi idikpọn̄ke mme anam akpanikọ ikọt esie tutu amama. Mbon oro ẹnamde n̄kpọ Jehovah ke ediwak isua ẹmenede uyo mmọ ke ndinyịme ye Edidem David, emi ekewetde ete: “N̄kedi eyenọwọn̄, ndien ndi ebiowo n̄ko; n̄kanam n̄kwe nte ẹkpọn̄de eti owo, nte ubon esie ẹnyụn̄ ẹsan̄ade inọk.”​—⁠Psalm 37:25.

Otịm ọfọn didie ntem ndikọn̄ mbuọtidem ke Abasi emi ọkọnọde odudu ndinam ẹwet mme ikọ oro, utu ke ndidede nyak idem nnọ idomo ndiyịp inọ nnyụn̄ ntaba mfọn Abasi ke nsinsi!​—⁠1 Corinth 6:​9, 10.

[Mme Ikọ idakisọn̄]

a Ẹmekpụhọ enyịn̄.

    Mme N̄wed Ikọ Efịk (1982-2025)
    Wọrọ
    Dụk
    • Efịk
    • Share
    • Mek nte amade
    • Copyright © 2025 Watch Tower Bible and Tract Society of Pennsylvania
    • Nte Ẹkpedade Ikpehe Intanet Emi Ẹnam N̄kpọ
    • Ediomi
    • Privacy Settings
    • JW.ORG
    • Dụk
    Share