Kot Ikọ Abasi Nyụn̄ Nam N̄kpọ Esie Ke Akpanikọ
“Teme mi usụn̄ fo, O Jehovah; nyesan̄a ke akpanikọ fo.” —PSALM 86:11.
1. Ke nditịm ntịn̄, nso ke akpa nsiondi magazine emi eketịn̄ aban̄a akpanikọ?
JEHOVAH ọmọdọn̄ un̄wana ye akpanikọ utom. (Psalm 43:3) Enye n̄ko ọnọ nnyịn ukeme ndikot Ikọ esie, kpa Bible, nnyụn̄ n̄kpep akpanikọ. Akpa nsiondi n̄wedmbụk emi (Ikọmbakara)—July 1879—ọkọdọhọ ete: “Akpanikọ, ukem nte ekpri flawa ke wilderness uwem, edi se ikpọ nyanyan̄a nsu ẹkande ẹkụk ẹnyụn̄ ẹkperede ndibaba n̄wot. Edieke afo oyomde ndikụt enye ana afo etịn̄ enyịn kpukpru ini. Edieke afo oyomde ndikụt uyai esie ana afo ọkpọnọde nyanyan̄a nsu ye mbaraekpe ubiọn̄ọ onịm n̄kan̄ kiet. Edieke afo oyomde ndinyene enye ana afo osụhọde idem man enyene enye. Kûyụhọ ye flawa akpanikọ kiet. Edieke kiet ekpekemde owo ikpoyomke efen aba. Kaiso ndibọ, kaiso ndiyom.” Edikot ye edikpep Ikọ Abasi an̄wam nnyịn ndinyene nnennen ifiọk nnyụn̄ nsan̄a ke akpanikọ esie.—Psalm 86:11.
2. Nso ikedi utịp ke ini Ezra ye mbon eken ẹkekotde Ibet Abasi ẹnọ mme Jew ke Jerusalem eset?
2 Ke ẹma ẹkefiak ẹbọp ibibene Jerusalem ke 455 M.E.N., oku oro Ezra ye mmọ eken ẹma ẹkot Ibet Abasi ẹnọ mme Jew. Se iketienede emi ekedi idara idara Usọrọ Mme Ataya, ediyarade mme idiọkn̄kpọ, ye edidiomi “ediomi.” (Nehemiah 8:1–9:38) Nnyịn ikot ite: “Mmọ ẹtịm ẹkot n̄wed mbet Abasi, ẹnyụn̄ ẹsiak, ẹnyụn̄ ẹda se mmọ ẹkotde, ẹsian ẹnọ mmọ.” (Nehemiah 8:8) Ndusụk owo ẹkere ẹte ke mme Jew ikotịmke ifiọk usem Hebrew ye nte ke ẹma ẹsida usem Aramaic ẹtịn̄ ibio ibio ẹnam an̄wan̄a. Edi itien̄wed emi iwụtke sụk edinam mme ikọ eke usem ẹn̄wan̄a. Ezra ye mbon eken ẹma ẹnam Ibet an̄wan̄a man otodo mme owo ẹkeme ndifiọk mme edumbet esie nnyụn̄ nda mmọ nsịn ke edinam. Mme n̄wed ye mme mbonoesop Christian n̄ko ẹn̄wam ‘ndisiak’ Ikọ Abasi. Ntre n̄ko ye mbiowo ẹmi ẹmekde, ẹmi ‘ẹdotde ndikpep owo n̄kpọ.’—1 Timothy 3:1, 2; 2 Timothy 2:24.
Nsinsi Ufọn
3. Nso idi ndusụk ufọn ẹmi ẹnyenede ẹto edikot Bible?
3 Ke ini mme ubon Christian ẹkotde Bible ọtọkiet, etie nte mmọ ẹyenyene nsinsi ufọn. Mmọ ẹkabade ẹmehe ye mme ibet Abasi ẹnyụn̄ ẹkpep akpanikọ ẹban̄ade mme ukpepn̄kpọ ido ukpono, mme n̄kpọ ẹban̄ade prọfesi, ye mme ibuotikọ eken. Ke ẹma ẹkekot itie kiet ke Bible, ibuot ufọk ekeme ndibụp ete: Didie ke emi okpotụk nnyịn? Ke usụn̄ ewe ke emi enyene ebuana ye mme ukpepn̄kpọ Bible eken? Didie ke nnyịn ikeme ndikama mme akpan n̄kpọ ẹmi ke ndikwọrọ eti mbụk? Ubon enyene ifiọk oro okponde ke ini ẹkotde Bible edieke mmọ ẹnamde ndụn̄ọde ebe ke ndikama Watch Tower Publications Index m̀mê mme index eken. Ẹkeme ndida mme eboho Insight on the Scriptures mbiba nnam n̄kpọ nte ọnọde ufọn.
4. Didie ke Joshua ekenyene ndida item oro ẹwetde ke Joshua 1:8 nnam n̄kpọ?
4 Mme edumbet oro ẹdade ẹto N̄wed Abasi ẹkeme ndida nnyịn usụn̄ ke uwem. Akan oro, ndikot nnyụn̄ n̄kpep ‘edisana n̄wed Abasi ekeme ndinam nnyịn iwọrọ ọniọn̄ ibọ edinyan̄a.’ (2 Timothy 3:15) Edieke nnyịn iyakde Ikọ Abasi ada nnyịn usụn̄, nnyịn iyekaiso ndisan̄a ke akpanikọ esie ndien nnyịn iyenyene nti n̄kpọ oro nnyịn iyomde. (Psalm 119:130) Nte ededi, oyom nnyịn iyom ifiọk, nte Joshua, andida itie Moses okoyomde. Ikanaha “n̄wed mbet” ọwọrọ ọkpọn̄ inua esie, ndien enye ekenyene ndikot enye ke uwemeyo ye ke okoneyo. (Joshua 1:8) Nditre ndiyak “n̄wed mbet” ọwọrọ ọkpọn̄ inua esie ọkọwọrọ ke inaha Joshua etre nditịn̄ nti n̄kpọ ẹsịnede ke enye nnọ mbon en̄wen. Ndikot Ibet uwemeyo ye okoneyo ọkọwọrọ ke ana Joshua etie ekere enye, ekenyene ndikpep enye. Apostle Paul ke ukem usụn̄ oro ama akpak Timothy ete ‘etịn̄ enyịn’—etie ekere—eduuwem, utom ukwọrọikọ, ye ukpepn̄kpọ esie. Nte ebiowo Christian, ama oyom Timothy etịn̄ enyịn akpan akpan man uwem esie edi uwụtn̄kpọ enye onyụn̄ ekpep akpanikọ N̄wed Abasi.—1 Timothy 4:15.
5. Nso ke oyom edieke anade nnyịn ikụt akpanikọ Abasi?
5 Akpanikọ Abasi edi ọsọn̄urua n̄kpọuto. Ndikụt enye oyom edidọk, ediyịre ke ndidụn̄ọde N̄wed Abasi. Edi n̄kukụre ke ndikabade ntie nte n̄kpri nditọ ukpepn̄kpọ Akwa Anditeme ke nnyịn ikeme ndibọ ọniọn̄ nnyụn̄ nnyene mbak Jehovah oro asan̄ade ye uten̄e. (Mme N̄ke 1:7; Isaiah 30:20, 21) Nte ededi, ana nnyịn idụn̄ọde mme n̄kpọ ifiọk nte ekemde ye N̄wed Abasi. (1 Peter 2:1, 2) Mme Jew ke Beroea ẹkedi “mme enyene-ido ẹkan mme andidụn̄ Thessalonica; mmọ [ẹma ẹkop] ikọ ke edinyịme esịt, ẹnyụn̄ ẹdụn̄ọde n̄wed Abasi ke usen ke usen, ẹte ifiọk m̀mê mme ikọ oro [Paul eketịn̄de] ẹkem ntre.” Ẹma ẹtoro mbon Beroea ke ndinam ntre utu ke ndibiom mmọ ikpe.—Utom 17:10, 11.
6. Ntak emi Jesus ọkọdọhọde ke ndusụk mme Jew idinyeneke ufọn ito edidụn̄ọde N̄wed Abasi?
6 Jesus ama ọdọhọ ndusụk mme Jew ete: “Mbufo ẹdụn̄ọde N̄wed Abasi, koro mbufo ẹsede ẹte mme imọ imenyene nsinsi uwem ke esịt; ndien edi enye edi ntiense ọnọ Mi. Ndien mbufo inyịmeke nditiene Mi, man ẹnyene uwem.” (John 5:39, 40) Mmọ ẹkedụn̄ọde N̄wed Abasi ye nnennen ekikere—man enye ọnọ mmọ ndausụn̄ ke uwem. Ke akpanikọ, N̄wed Abasi ama esịne mme prọfesi ẹban̄ade Messiah oro ẹkewụtde Jesus nte enyeemi ọnọde uwem. Edi mme Jew ẹma ẹsịn enye. Ndidụn̄ọde N̄wed Abasi, ke ntre, ikanamke ufọn inọ mmọ.
7. Nso ke oyom man ẹkọri ke ifiọk Bible, ndien ntak-a?
7 Man ikọri ke ifiọk Bible, nnyịn imoyom ndausụn̄ spirit, m̀mê anamutom odudu, Abasi. “Spirit odụn̄ọde kpukpru n̄kpọ, kpa nditụn̄ọ n̄kpọ Abasi” man anam ẹfiọk se mmọ ẹwọrọde. (1 Corinth 2:10) Akana mme Christian ke Thessalonica “ẹdomo kpukpru n̄kpọ ẹse” ke prọfesi ekededi oro mmọ ẹkekopde. (1 Thessalonica 5:20, 21) Ke ini Paul ekewetde n̄wed ọnọ ẹsọk mbon Thessalonica (ke n̄kpọ nte 50 E.N.), n̄kukụre ikpehe N̄wed Abasi Usem Greek oro ẹkewetde ekedi Gospel Matthew. Ntre mbon Thessalonica ye Beroea ẹkekeme ndidomo kpukpru n̄kpọ nse, iso-ọfọn ebe ke ndidụn̄ọde nsiondi Greek Septuagint eke N̄wed Abasi Usem Hebrew. Ama oyom mmọ ẹkot ẹnyụn̄ ẹkpep N̄wed Abasi, ndien ntre ke oyom nnyịn inam.
Edi Akpan N̄kpọ ọnọ Kpukpru Owo
8. Ntak emi mbiowo oro ẹmekde ẹkpenyenede ifiọk Bible ẹkan-a?
8 Ana mbiowo oro ẹmekde ẹnyene ifiọk Bible ẹkan. Ana mmọ ẹdot “ndikpep owo n̄kpọ” ndien ana ‘ẹsọn̄ọ ẹmụm ikọ akpanikọ’ ẹkama. Akana Timothy emi ekedide esenyịn ‘otịm asiak ikọ akpanikọ.’ (1 Timothy 3:2; Titus 1:9; 2 Timothy 2:15) Eka esie, Eunice, ye ekaeka esie Lois ẹma ẹkpep enye edisana n̄wed Abasi toto ke uyen, ẹsọn̄ọde ẹsịn “ata mbuọtidem” ke esịt esie, okposụkedi ete esie mîkedịghe andinịm ke akpanikọ. (2 Timothy 1:5; 3:15) Ana mme ete oro ẹnịmde ke akpanikọ ẹbọk nditọ mmọ “ke ntụnọ ye item Ọbọn̄,” ndien akpan akpan ana mbiowo ẹmi ẹdide mme ete ẹnyene ‘nditọ eke ẹnịmde ke akpanikọ oro owo mîdorike mmọ ikọ ite ẹdi mbon otịme otịme ido ye nsọn̄ibuot.’ (Ephesus 6:4; Titus 1:6) Inamke n̄kpọ m̀mê nso idi mme idaha nnyịn, do, nnyịn ikpenyene ndida ufọn odude ke nnyịn ndikot, ndikpep, nnyụn̄ nda Ikọ Abasi nsịn ke edinam ke akpan n̄kpọ.
9. Ntak emi ekpepde Bible ọtọkiet ye ekemmọ mme Christian?
9 Nnyịn n̄ko ikpenyene ndikpep Bible ọtọkiet ye ekemmọ mme andinịm ke akpanikọ. Paul ama oyom mme Christian ke Thessalonica ẹneme item esie ye kiet eken. (1 Thessalonica 4:18) Man inam ifiọk akpanikọ nnyịn ọsọp, idụhe n̄kpọ emi ọfọnde akan ndidiana ye ifịk ifịk nditọ ukpepn̄kpọ eken ke ndidụn̄ọde N̄wed Abasi. N̄ke oro edi akpanikọ: “Ukwak aban ukwak ọsọp: owo onyụn̄ anam iso ufan esie ọsọn̄.” (Mme N̄ke 27:17) N̄kpọutom emi ẹdade ukwak ẹnam ekeme ndita n̄karafan̄ edieke owo mîkamake inam n̄kpọ mînyụn̄ ibanke. Ukem ntre, oyom nnyịn isop idem kpukpru ini inyụn̄ iban kiet eken ebe ke ndibuana ifiọk oro nnyịn inyenede ito edikot, edikpep, ye edikere Ikọ akpanikọ Abasi. (Mme Hebrew 10:24, 25) Akan oro, emi edi usụn̄ kiet ndikụt nte ke nnyịn imọbọ ufọn ito un̄wana eke spirit oro ayamade.—Psalm 97:11; Mme N̄ke 4:18.
10. Nso ke ndisan̄a ke akpanikọ ọwọrọ?
10 Ke ikpepde N̄wed Abasi, nnyịn nte odotde imekeme ndibọn̄ akam nnọ Abasi nte andiwet psalm ọkọbọn̄de ete: “O dọn̄ un̄wana fo ye akpanikọ fo utom; mmọ ẹyeda mi usụn̄.” (Psalm 43:3) Edieke nnyịn iyomde ndinyene unyịme Abasi, ana nnyịn isan̄a ke akpanikọ esie. (3 John 3, 4) Emi esịne ndinam mme n̄kpọ oro enye oyomde nnyụn̄ nnam n̄kpọ esie ke edinam akpanikọ ye esịt akpanikọ. (Psalm 25:4, 5; John 4:23, 24) Ana nnyịn inam n̄kpọ Jehovah ke akpanikọ, nte ẹyararede ke Ikọ esie ẹnyụn̄ ẹnamde an̄wan̄a ke mme n̄wed “asan̄autom emi anamde akpanikọ, onyụn̄ enyenede ọniọn̄.” (Matthew 24:45-47) Emi oyom nnennen ifiọk N̄wed Abasi. Didie, ndien, ke nnyịn ikpokot inyụn̄ ikpep Ikọ Abasi? Nte nnyịn ikpenyene nditọn̄ọ ke Genesis ibuot 1, ufan̄ikọ 1, ikot ke adiana ke adiana tutu ikụre mme n̄wed 66 oro? Ih, Christian kiet kiet oro enyenede ofụri Bible ke usem esie ekpenyene ndikot enye tọn̄ọde ke Genesis tutu osịm Ediyarade. Ndien uduak nnyịn ke ndikot Bible ye mme n̄wed Christian ẹkpenyene ndidi man ikọri ifiọk oro nnyịn inyenede iban̄a ofụri akpanikọ eke N̄wed Abasi emi Abasi ọnọde ebe ke ‘ofụn anam-akpanikọ.’
Kot Ikọ Abasi Uyo Ọwọrọ
11, 12. Ntak emi ọnọde ufọn ndikot Bible uyo ọwọrọ ke mme mbonoesop?
11 Nnyịn imekeme ndikot n̄wed ke esịt ke ini idude ikpọn̄. Nte ededi, ke eset ẹma ẹsinam ọkpọkpọ edikot n̄wed uyo ọwọrọ. Nte eunuch Ethiopia akawatde ke chariot esie, ọkwọrọikọ oro Philip ama okop nte enye okotde prọfesi Isaiah. (Utom 8:27-30) Ikọ Hebrew oro ẹkabarede nte “kot” ke akpasarade ọwọrọ “fiori.” Ntre mbon oro ke akpa mîkekemeke ndikot n̄wed ke esịt nnyụn̄ mfiọk se ẹkotde ikpenyeneke ndikop mmemidem ke ndikot ikọ kiet kiet uyo ọwọrọ. Akpan n̄kpọ edi ndikpep akpanikọ ebe ke ndikot Ikọ Abasi oro ẹwetde-wet.
12 Ọfọn ndikot Bible uyo ọwọrọ ke mme mbonoesop Christian. Apostle Paul ama akpak nsan̄autom esie Timothy ete: ‘Sịn ifịk ke edikot n̄wed nnọ owo, ye ke edikwọrọ ikọ, ye ke edikpep owo n̄kpọ.’ (1 Timothy 4:13) Paul ọkọdọhọ mbon Colossae ete: “Ke ẹma [ẹkekot] n̄wed emi ke otu mbufo, ẹnam ẹkot enye ke ufọk Abasi nditọ Laodicea n̄ko; ẹnyụn̄ ẹbọ n̄wed emi otode ke Laodicea n̄ko ẹkot.” (Colossae 4:16) Ndien Ediyarade 1:13 ọdọhọ ete: “Ọfọfọn ọnọ andikot n̄wed ye mmọ ẹmi ẹkopde ikọ prophecy emi, ẹnyụn̄ ẹnịmde mme n̄kpọ eke ẹwetde ke esịt: koro ini ke ekpere.” Ke ntre, ọnọ utịn̄ikọ an̄wa ekpenyene ndikot mme itien̄wed ke Bible ndisọn̄ọ se enye etịn̄de ọnọ esop.
Edida Mme Ibuotikọ N̄kpep N̄kpọ
13. Ewe edi usụn̄ emi enyenede uforo akan ndikpep akpanikọ Bible, ndien nso ikeme ndin̄wam nnyịn ndikụt mme itien̄wed Abasi?
13 Edida mme ibuotikọ n̄kpep n̄kpọ edi usụn̄ edikpep mme akpanikọ N̄wed Abasi oro enyenede uforo akan. Mme n̄wed enyịn̄ ikọ, oro ẹwetde mme ikọ Bible ẹtiene abisi udọn̄ikọ nte ekemde ye n̄wed, ibuotn̄wed, ye ufan̄ikọ emi mmọ ẹdude, anam edi mmemmem ndikụt itien̄wed emi enyenede ebuana ye akpan ibuotikọ. Ndien ẹkeme ndinam mme utọ itien̄wed oro ẹkem ye kiet eken koro Andiwet Bible ituahake ye idemesie. Ebede ke edisana spirit, enye ama ọnọ n̄kpọ nte irenowo 40 odudu spirit ndiwet Bible ke ufan̄ isua ikie 16, ndien edida mme ibuotikọ n̄kpep n̄kpọ edi usụn̄ edida n̄kpep akpanikọ oro enyenede ufọn emi ẹma ẹkedomo ẹse ke anyanini.
14. Ntak emi ekpepde N̄wed Abasi Usem Hebrew ye eke Christian Usem Greek ọtọkiet?
14 Esịtekọm oro inyenede inọ akpanikọ Bible ekpenyene ndinụk nnyịn ndikot nnyụn̄ n̄kpep N̄wed Abasi Christian Usem Greek ọkọrọ ye N̄wed Abasi Usem Hebrew. Emi eyewụt nte N̄wed Abasi Usem Greek enyenede ebuana ye uduak Abasi ndien eyesịn un̄wana ke mme prọfesi N̄wed Abasi Usem Hebrew. (Rome 16:25-27; Ephesus 3:4-6; Colossae 1:26) N̄kpọ oro enen̄erede an̄wam ke afan̄ emi edi New World Translation of the Holy Scriptures. Mme asan̄autom Abasi oro ẹma ẹkeyak idem ẹnọ, ẹmi ẹdade n̄kọri oro odude ke ifiọk aban̄ade akpasarade uwetn̄kpọ Bible ọkọrọ ye idaha oro ẹkewetde enye ye mme n̄ke esie ẹnam n̄kpọ ẹketịm enye. Mme un̄wam ukpep Bible oro Jehovah ọnọde ebe ke “asan̄autom oro anamde akpanikọ, onyụn̄ enyenede ọniọn̄” ẹdi n̄ko akpan n̄kpọ.
15. Didie ke afo ekeme ndiwụt ete ke odot ndikot nto mi ye ko ke Bible?
15 Ndusụk owo ẹkeme ndidọhọ, ‘Mme n̄wed mbufo ẹsikot ediwak tọsịn n̄kpọ ẹto Bible, edi ntak emi mbufo ẹsidide ẹsio mi ẹsio ko-o?’ Ebede ke ndikot n̄kpọ nto mi ye ko ke mme n̄wed 66 eke Bible, mme n̄wed ẹmi ẹda n̄kpọ ẹto ediwak uyarade eke odudu spirit ndisọn̄ọ nte ukpepn̄kpọ edide akpanikọ. Jesus ke idemesie akada usụn̄ unọ ukpep emi. Ke ini enye ọkọnọde Ukwọrọikọ esie oro ke Obot, enye ama okot n̄kpọ ke itie 21 oto N̄wed Abasi Usem Hebrew. Utịn̄ikọ oro esịne n̄kpọ ita ẹkotde ẹto Exodus, iba ẹtode Leviticus, kiet otode Numbers, itiokiet ẹtode Deuteronomy, kiet otode Udiana Ndidem, inan̄ ẹtode Psalm, ita ẹtode Isaiah, ye kiet otode Jeremiah. Ke ndinam emi, nte Jesus ‘okodomo ndisọn̄ọ n̄kpọ ekededi’? Baba, koro ‘enye ekekpep n̄kpọ nte owo emi enyenede odudu, ikpepke nte mme scribe.’ Oro ekedi ntre sia Jesus akadade odudu Ikọ Abasi emi ẹwetde-wet ọsọn̄ọ ukpepn̄kpọ esie. (Matthew 7:29) Kpa ntre ke apostle Paul akanam.
16. Mme edikot nto N̄wed Abasi ewe ke Paul akanam ke Rome 15:7-13?
16 Ke ubak udịmikọ itien̄wed Abasi oro ẹkụtde ke Rome 15:7-13, Paul ama okot oto ikpehe ita ke N̄wed Abasi Usem Hebrew—Ibet, mme Prọfet, ye Psalm. Enye ama owụt ete ke mme Jew ye mme Gentile ẹyenọ Abasi ubọn̄, ndien mme Christian ke ntre ẹkpenyene ndidara mme owo ke kpukpru mme idụt. Paul ọkọdọhọ ete: “Ẹdara kiet eken kpa nte Christ akadarade mbufo, man Abasi enyene ubọn̄. Koro mmọdọhọ nte Christ amakabade edi asan̄a-utom ọnọ mme ana-mbobi kaban̄a akpanikọ Abasi, man anam se ẹken̄wọn̄ọde ẹnọ mme ete nnyịn ọsọn̄ọ ada, man mme Gentile ẹnyụn̄ ẹnọ Abasi ubọn̄ ẹban̄a mbọm Esie; nte ẹwetde [ke Psalm 18:49] ete, Ke ntak emi nyenọ Fi itoro ke otu mme Gentile, nyenyụn̄ n̄kwọ enyịn̄ Fo. Onyụn̄ ọdọhọ [ke Deuteronomy 32:43] ete, Mbufo mme Gentile, ẹdara ye ikọt Esie. Onyụn̄ ọdọhọ [ke Psalm 117:1] ete, Ẹtoro Ọbọn̄, kpukpru mme Gentile, yak kpukpru mme idụt ẹtoro Enye. Isaiah [11:1, 10] onyụn̄ ọdọhọ ete, Orụn̄ eyeto ke Jesse ọwọrọ, edi enye eyedaha da ndikara mme Gentile; mme Gentile ẹyenyụn̄ ẹdori Enye enyịn ke idem. Abasi idori-enyịn akpakam ọyọhọ mbufo ye kpukpru idaresịt ye emem ke mbuọtidem mbufo, man mbufo ẹnyene uwak idori-enyịn oto ke odudu Edisana Spirit.” Ke ndida edu ibuotikọ emi, Paul okowụt nte ẹkemede ndikot nto mme itien̄wed man ẹsọn̄ọ akpanikọ Bible.
17. Nte ekemde ye uwụtn̄kpọ ewe ke mme Christian ẹsikot ẹto mi ye ko ke ofụri Bible?
17 Akpa leta apostle Peter eke odudu spirit esịne itie 34 oro okotde oto n̄wed duop ke Ibet, mme Prọfet, ye Psalm. Ke udiana leta esie, Peter ama okot utịm ikotiokiet oto n̄wed ita. Gospel Matthew okot itie 122 oto Genesis osịm Malachi. Ke n̄wed 27 ke N̄wed Abasi Usem Greek, ẹkot mme n̄kpọ 320 nnennen ẹto Genesis osịm Malachi ọkọrọ ye editịn̄ ntụk eken oro ẹtịn̄de ẹtụk N̄wed Abasi Usem Hebrew ke mme itie ikie. Ke n̄kemuyo ye uwụtn̄kpọ oro Jesus okonịmde, emi mme apostle esie ẹkenyụn̄ ẹtienede, ke ini mme Christian eyomfịn ẹdade ẹdu ukpepn̄kpọ ibuotikọ ẹkpep n̄kpọ ke N̄wed Abasi, mmọ ẹsikot ẹto mi ye ko ke ofụri Bible. Emi enen̄ede odot ke “ukperedem ini” emi, kemi ata ediwak N̄wed Abasi Usem Hebrew ye eke Usem Greek ẹsude. (2 Timothy 3:1) ‘Ofụn anam-akpanikọ’ ada Bible anam n̄kpọ ke utọ usụn̄ oro ke mme n̄wed esie, edi akananam enye isioho n̄kpọ ifep ke Ikọ Abasi m̀mê ndidian n̄kpọ ke esịt.—Mme N̄ke 30:5, 6; Ediyarade 22:18, 19.
San̄a ke Akpanikọ Kpukpru Ini
18. Ntak emi nnyịn ‘ikpasan̄ade ke akpanikọ’?
18 Inaha nnyịn isio n̄kpọ ndomokiet ifep ke Bible, koro ofụri ukpepn̄kpọ Christian ke Ikọ Abasi edi “akpanikọ” m̀mê “akpanikọ gospel.” Ndisọn̄ọ nyịre ke akpanikọ emi—‘ndisan̄a’ ke enye—edi akpan n̄kpọ ọnọ edinyan̄a. (Galatia 2:5; 2 John 4; 1 Timothy 2:3, 4) Sia Ido Ukpono Christ edide “usụn̄ akpanikọ,” ke ndin̄wam mmọ en̄wen ẹnam ufọn esie akaka iso, nnyịn imakabade idi “nsan̄a mbonutom ke akpanikọ.”—2 Peter 2:2; 3 John 8, NW.
19. Didie ke nnyịn ikeme ‘ndika iso nsan̄a ke akpanikọ’?
19 Edieke anade nnyịn ‘ikaiso isan̄a ke akpanikọ,’ ana nnyịn ikot Bible inyụn̄ ibọ ufọn ke idem nnyịn ito un̄wam eke spirit oro Abasi ọnọde ebe ke ‘ofụn anam-akpanikọ.’ (3 John 4) Akpakam nnyịn inam emi kaban̄a ufọn idem nnyịn man otodo idu ke idaha ndikpep mbon efen mban̄a Jehovah Abasi, Jesus Christ, ye uduak Abasi. Ndien ẹyak nnyịn iwụt esịtekọm kemi spirit Jehovah an̄wamde nnyịn ndifiọk Ikọ esie nnyụn̄ n̄kụt unen ke ndinam n̄kpọ nnọ enye ke akpanikọ.
Nso Idi Ibọrọ Fo?
◻ Ewe ẹdi ndusụk nsinsi ufọn eke edikot Bible?
◻ Ntak ekpepde Bible ọtọkiet ye ekemmọ mme andinịm ke akpanikọ?
◻ Ntak odotde ndikot nto nsio nsio itie ke ofụri Bible?
◻ Nso ke ‘ndisan̄a ke akpanikọ’ ọwọrọ, ndien didie ke nnyịn ikeme ndinam ntre?
[Ndise ke page 17]
Mme ete ye eka, ẹkpep nditọ mbufo N̄wed Abasi
[Ndise ke page 18]
Ke Ukwọrọikọ esie oro ke Obot, Jesus ama okot oto nsio nsio ikpehe N̄wed Abasi Usem Hebrew