Nte Afo Emeti?

Nte afo ama adara ndikot mme nsiondi Enyọn̄-Ukpeme eke ndondo emi? Ọfọn, se m̀mê afo emekeme ndibọrọ mme mbụme ẹtienede mi:

◻ Nte mme ikọ Jesus oro, “Owo ekededi eke mbufo ẹfende mme idiọk-n̄kpọ, ẹmefen mmọ mme idiọk-n̄kpọ mmọ,” ẹwọrọ ẹte ke mme Christian ẹkeme ndifen mme idiọkn̄kpọ? (John 20:23)

Isọn̄ N̄wed Abasi ndomokiet idụhe ndibiere nte ke Abasi ọnọ mme Christian ke ofụri ofụri, m̀mê idem mbiowo oro ẹmekde ke esop, odudu ndifen mme idiọkn̄kpọ. Etie nte udọn̄ikọ eke mme ikọ Jesus ẹwụt ẹte ke ebede ke spirit ndidu ke edinam ke ẹma ẹnọ mme apostle san̄asan̄a odudu ndifen m̀mê ndimụm mme idiọkn̄kpọ nnịm. (Se Utom 5:1-11; 2 Corinth 12:12.)—4/15, page 28.

◻ Nso idi n̄wọrọnda n̄kpọ kaban̄a edikabade n̄wed Psalm eke J. J. Stewart Perowne, oro ẹkebemde iso ẹmịn̄ ke 1864?

Ke edikabade esie oro Perowne ama odomo ndisọn̄ọ nyịre “ketket ke uduot eke Hebrew, ke ebetọ ikọ esie ye ke nte ẹbonde ikọ ke usem.” Ke ndinam ntre enye ama onyịme ẹfiak ẹda enyịn̄ Abasi ẹdisịn ke itie nte “Jehovah.”—4/15, page 31.

◻ Nso ndausụn̄ ke Jesus ọkọnọ mme anditiene enye kaban̄a mme mbubehe mmọ ye ukara ererimbot?

Jesus ọkọdọhọ ete: “Ẹnọ Caesar ndien n̄kpọ eke ẹnyenede Caesar; ẹnyụn̄ ẹnọ Abasi n̄kpọ eke ẹnyenede Abasi.” (Matthew 22:21) Enye n̄ko ọkọdọhọ ete: “Owo ama onyụn̄ esịn fi asan̄a mile kiet, san̄a iba ye enye.” (Matthew 5:41) Jesus mi akanam an̄wan̄a edumbet eke edinyịme ndisụk ibuot nnọ mme nnennen n̄kpọ oro ẹyomde, edide ke itie ebuana owo m̀mê ke se ukara oyomde ẹmi ẹkemde ye ibet Abasi. (Luke 6:27-31; John 17:14, 15)—5/1, page 12.

◻ Nso ke ‘ndisan̄a ke akpanikọ’ ọwọrọ? (Psalm 86:11)

Emi esịne ndinam mme n̄kpọ oro Abasi oyomde nnyụn̄ nnam n̄kpọ esie ke edinam akpanikọ ye esịt akpanikọ. (Psalm 25:4, 5; John 4:23, 24)—5/15, page 18.

◻ Nso ke ẹkeyọhọ ebe ke Jehovah ndidọn̄ Jonah aka Nineveh?

Nte n̄kpọ ẹkebonode, utom ukwọrọikọ Jonah ke Nineveh ama owụt ukpụhọde oro odude ke ufọt mbon Nineveh oro ẹkekabarede esịt ye mme ọsọn̄-obotitọn̄ nditọ Israel, ẹmi ẹkenen̄erede ẹnana mbuọtidem ye nsụhọdeidem. (Men Deuteronomy 9:6, 13; Jonah 3:4-10 domo.)—5/15, page 28.

◻ Anie edi Urụkikọt, anie onyụn̄ edi “n̄wan” oro ẹtịn̄de ẹban̄a ke Genesis 3:15?

Urụkikọt oro idịghe usụhọde urụkikọt edi enyeoro akadade enye etịn̄ ikọ, Satan kpa Devil. (Ediyarade 12:9) “N̄wan” idịghe Eve edi edi esop Jehovah eke heaven, kpa eka mme asan̄autom esie oro ẹyetde aran ke spirit ke isọn̄. (Galatia 4:26)—6/1, page 9.

◻ Didie ke owo ekeme ndiwọrọ ke Akwa Babylon nnyụn̄ nnyene ubọhọ? (Ediyarade 18:4)

Ana enye adianade idemesie ofụri ofụri ọkpọn̄ mme esop nsunsu ido ukpono onyụn̄ ọkpọn̄ n̄ko mme edinam mmọ ye mme edu oro mmọ ẹnyenede, ndien ekem enye ekpenyene ndiyom ubọhọ ke esop ukara Jehovah. (Ephesus 5:7-11)—6/1, page 18.

◻ Ntak emi ẹsitịn̄de n̄kpọ ndien ndien ẹban̄a ntrukpom ke N̄wed Abasi?

Mme andiwet Bible ẹma ẹtịn̄ n̄kpọ ẹtụk mme edu ntrukpom ndida mban̄a mme utọ n̄kpọ nte ọniọn̄, ukpeme Abasi, ye usọp.—6/15, page 8.

◻ Nte mme asan̄autom Abasi mfịn ẹmi ẹnyenede idotenyịn uwem eke isọn̄ ẹnyene ukem spirit Abasi nte mme Christian ẹmi ẹyetde aran ke spirit ẹnyenede?

Nte ata akpan n̄kpọ, ibọrọ edi ih. Spirit Abasi odu ke ukem udomo ọnọ otu mbiba ẹmi, ndien mbiba ẹkeme ndinyene ifiọk ye mbufiọk ukem ukem.—6/15, page 31.

◻ Ntak emi ọfọnde nnyịn mfịn ndidụn̄ọde edisana utom oro mme oku Israel ẹkesinamde ke temple ke Jerusalem?

Ke ndinam ntre nnyịn imekeme ndidi nditịm mfiọk ọyọhọ ọyọhọ mban̄a mbọm mbọm ndutịm oro ẹnamde man mme anam idiọkn̄kpọ ẹkabade ẹdu mfịn ke emem ye Abasi. (Mme Hebrew 10:1-7)—7/1, page 8.

◻ Didie ke ọyọhọ temple iba oro ẹkebọpde ke Jerusalem ekenyene ubọn̄ oro okokponde akan enyeoro Solomon ọkọbọpde?

Ọyọhọ temple iba oro ekebịghi ke isua 164 akan temple Solomon. Ata ediwak mme andituak ibuot ẹtode ata ediwak idụt ẹma ẹbụn̄ọ ẹdụk ke okụre esie. Ke edide akpan n̄kpọ akan, ọyọhọ temple iba emi ama enyene akwa ukpono ndinyene Eyen Abasi, Jesus Christ, ekpepde n̄kpọ ke esịt okụre esie.—7/1, page 12, 13.

◻ Ini ewe ke Abasi akanam temple esie eke spirit edidu?

Emi ekedi ke 29 E.N. ke ini Abasi ọkọbọrọde akam oro Jesus ọkọbọn̄de ke ini baptism. (Matthew 3:16, 17) Abasi ndinyịme edinọ oro Jesus ọkọnọde ikpọkidem esie nte uwa ọkọwọrọ ete, ke usụn̄ eke spirit, itieuwa oro okponde akan temple Jerusalem ama ọtọn̄ọ edinam.—7/1, page 14, 15.

◻ Ntak emi nnyịn ikpenyenede ndifen nnọ?

Ndifen nnọ andidue emi ekpede ubọk edi akpan n̄kpọ edieke anade nnyịn imụm edidianakiet Christian ikama. Usua ye edikama udu eyebọ nnyịn emem eke ekikere. Edieke nnyịn mîdahakedo inọ owo, n̄kpọndịk odu nte ke usen kiet Jehovah idifenke idiọkn̄kpọ nnyịn aba. (Matthew 6:14, 15)—7/15, page 18.

◻ Didie ke nditọ Israel ẹkpekekeme ndikabade ndi edisana?

Ẹkpekekeme ndinyene edisana idaha n̄kukụre ebe ke mmọ ndinyene n̄kpet n̄kpet itie ebuana ye Jehovah, kpa edisana Abasi, onyụn̄ ebe ke edisana utuakibuot mmọ nnọ enye. Ama oyom mmọ ẹnyene nnennen ifiọk ẹban̄a “Ata Edisana” man ẹtuak ibuot ẹnọ enye ke edisana idaha, ke edisana idaha eke ikpọkidem ye eke spirit. (Mme N̄ke 2:1-6; 9:10)—8/1, page 11.