Didie ke Nnyịn Ikpese Mme Owo Nte Usen Jehovah Asan̄ade Ekpere?
“Ọbọn̄ iduọnke ke edinam un̄wọn̄ọ Esie, . . . Enye akam enyene anyan ime ye mbufo, inyụn̄ iyomke baba owo kiet atak, edi oyom kpukpru owo ẹtua n̄kpọfiọk ẹkabade esịt.”—2 PETER 3:9.
1, 2. (a) Didie ke Jehovah ese mme owo mfịn? (b) Mme mbụme ewe ke nnyịn ikpobụp idem nnyịn?
ẸNỌ mme asan̄autom Jehovah utom ‘edinam kpukpru mme idụt ẹdi mbet.’ (Matthew 28:19) Nte nnyịn inamde utom emi inyụn̄ itiede ibet “akwa usen Jehovah,” oyom nnyịn ise mme owo nte enye esede. (Zephaniah 1:14) Ndien didie ke Jehovah ese mme owo? Apostle Peter ọdọhọ ete: “Ọbọn̄ iduọnke ke edinam un̄wọn̄ọ Esie, ke ido nte ndusụk owo ẹkerede ẹte, Enye ọduọn; Enye akam enyene anyan ime ye mbufo, inyụn̄ iyomke baba owo kiet atak, edi oyom kpukpru owo ẹtua n̄kpọfiọk ẹkabade esịt.” (2 Peter 3:9) Abasi ese mme owo nte mbon oro ẹkemede ndikabade esịt. Enye ‘oyom kpukpru owo ẹnyene edinyan̄a, ẹnyụn̄ ẹsịm ifiọk akpanikọ.’ (1 Timothy 2:4) Kamse, Jehovah esikop inemesịt ke ini ‘idiọk owo akabarede ọkpọn̄ usụn̄ esie, ndien odu uwem’!—Ezekiel 33:11.
2 Nte nnyịn ke idem nnyịn imesise mme owo nte Jehovah esede? Ukem nte enye, nte nnyịn imesise mme owo eke kpukpru orụk ye idụt nte mbon oro ẹkemede ndikabade ndi “ufene emi enye ọbọkde”? (Psalm 100:3; Utom 10:34, 35) Ẹyak ikere iban̄a uwụtn̄kpọ iba oro ẹwụtde ufọn edinyene ekikere Abasi. Ke idaha mbiba, nsobo ama ekpere, ndien ẹma ẹnam mme asan̄autom Jehovah ẹbem iso ẹfiọk emi. Mme uwụtn̄kpọ emi ẹnen̄ede ẹdi akpan n̄kpọ nte nnyịn itiede ibet akwa usen Jehovah.
Abraham Ama Enyene Ekikere Jehovah
3. Nso ikedi ekikere Jehovah kaban̄a mme andidụn̄ Sodom ye Gomorrah?
3 Akpa uwụtn̄kpọ abuana anam-akpanikọ ete-ekpụk oro Abraham ye idiọk obio Sodom ye Gomorrah. Ke ini Jehovah okokopde “mfiori Sodom ye Gomorrah,” enye ikosoboke mme obio oro ye kpukpru mme andidụn̄ mmọ ke ndondo oro. Enye ekebem iso anam ndụn̄ọde. (Genesis 18:20, 21) Ẹma ẹdọn̄ angel iba ẹka Sodom, ndien mmọ ẹkedan̄ ke ufọk edinen owo oro Lot. Ke okoneyo oro mme angel oro ẹkedide ẹdisịm, “iren-owo obio oro . . . ọtọn̄ọde ke nditọwọn̄ esịm ke n̄kani iren, kpukpru owo ẹto ke utịt obio, ẹdikan ufọk ẹkụk,” ẹyom ndinam idan̄ ukem uduot ye mme angel oro. Nte an̄wan̄ade, oburobụt idaha mme andidụn̄ obio oro ama owụt ke mmọ ẹma ẹdot nsobo. Edi, mme angel oro ẹma ẹdọhọ Lot ẹte: “Anie owo fo efen odu mi? ukot, ye nditọ-iren fo, ye nditọ-iban fo, ye kpukpru se idide okuo ke obio emi, da mmọ wọrọ ke ọtọ emi.” Jehovah ama anam usụn̄ odu ndinyan̄a ndusụk mme andidụn̄ obio oro, edi ke akpatre, Lot kpọt ye nditọiban esie iba ẹkebọhọ nsobo oro.—Genesis 19:4, 5, 12, 16, 23-26.
4, 5. Ntak emi Abraham akanamde n̄kpeubọk aban̄a mme andidụn̄ Sodom, ndien nte enye ama ese mme owo nte Jehovah ekesede?
4 Idahaemi, ẹyak nnyịn ifiak edem ika ini oro Jehovah akayararede uduak esie ndika n̄kodụn̄ọde obio Sodom ye Gomorrah. Ini oro ke Abraham ekekpe ubọk ete: “Ndusụk edinen owo aba ye duop ẹdu ke obio oro: nte afo oyonyụn̄ osobo, udunyụn̄ udahakedo unọ ebiet oro, uban̄a edinen owo aba ye duop eke ẹdude ke esịt? Nsa fo O! Ndinam ntem, ndiwot mmọ eke ẹnende ye mmọ eke mînenke: mmọ eke enende ndinyụn̄ ntie nte mmọ eke mînenke, nsa fo O! Nte Ebiereikpe ofụri ererimbot idinamke se inende?” Abraham akada ikọ oro “nsa fo O” utịm ikaba. Abraham ama ọfiọk oto ifiọk eyouwem esie nte ke Jehovah idisoboke ndinen owo ikọrọ ye ndiọi owo. Ke ini Jehovah ọkọdọhọde ete ke imọ idisoboke Sodom edieke ‘edinen owo aba ye duop ẹdude ke obio oro,’ Abraham ama osụhọde ibat oro ke adiana ke adiana tutu edisịm duop kpọt.—Genesis 18:22-33.
5 Ndi Jehovah okpokokop n̄kpeubọk Abraham edieke emi mîkpokodụhe ke n̄kemuyo ye ekikere esie? Baba. Nte “Ufan Abasi,” eyedi Abraham ekese n̄kpọ nte Jehovah ekesede. (James 2:23) Ke ini Jehovah okoyomde ndisobo Sodom ye Gomorrah, enye ama okop n̄kpeubọk Abraham. Ntak-a? Koro Ete nnyịn eke heaven “iyomke baba owo kiet atak, edi oyom kpukpru owo ẹtua n̄kpọfiọk ẹkabade esịt.”
Jonah Ekese Mme Owo ke Ata Isio Isio Usụn̄
6. Didie ke mbon Nineveh ẹkenam n̄kpọ ẹban̄a ntọt Jonah?
6 Idahaemi kere ban̄a ọyọhọ uwụtn̄kpọ iba—eke Jonah. Isan̄ enye emi obio oro ẹkeyomde ndisobo ekedi Nineveh. Ẹkedọhọ prọfet Jonah atan̄a nte ke idiọkido obio oro ama ‘ọdọk edi ke iso Jehovah.’ (Jonah 1:2) Nineveh, esịnede n̄kann̄kụk esie, ekedi akwa obio emi ‘ekemde isan̄ usen ita.’ Ke ini Jonah ke akpatre okokopde item onyụn̄ odụkde Nineveh, enye ama aka iso nditan̄a ete: “Osụk kan̄a usen aba, ndien Nineveh ayabiara.” Ke ẹkopde oro, “mbio-obio Nineveh ẹnịm uyo Abasi ke akpanikọ; ndien mmọ ẹwụk utreudia, ẹnyụn̄ ẹsịne ọfọn̄-ikpo.” Idem edidem Nineveh ama akabade esịt.—Jonah 3:1-6.
7. Didie ke Jehovah ekese edu edikabade esịt mbon Nineveh?
7 Oro ama enen̄ede okpụhọde ye nte mbon Sodom ẹkenamde n̄kpọ! Didie ke Jehovah ekese mbon Nineveh oro ẹkekabarede esịt? Jonah 3:10 ọdọhọ ete: “Abasi onyụn̄ akabade esịt ke idiọk-n̄kpọ oro enye ọkọdọhọde, ete ke imọ iyanam mmọ; ndien etre, inamke.” Jehovah ama “akabade esịt” ke usụn̄ifiọk oro nte ke enye ikanamke se enye akaduakde ndinam mbon Nineveh koro mmọ ẹma ẹkpụhọde usụn̄ mmọ. Idaha Abasi ikokpụhọkede, edi Jehovah ama okpụhọde se enye ekebierede ndinam ke okụtde ete ke mbon Nineveh ẹma ẹkabade esịt.—Malachi 3:6.
8. Ntak emi Jonah okofụhọde?
8 Ke ini Jonah ekedide edifiọk ke owo idisoboke Nineveh, nte enye ama ese n̄kpọ ke usụn̄ oro Jehovah ekesede? Baba, koro ẹsian nnyịn ẹte: “Ndien Jonah asua oro eti-eti, onyụn̄ ayat esịt.” Nso efen ke Jonah akanam? Mbụk oro ọdọhọ ete: “Enye ekpe Jehovah ubọk, onyụn̄ ọdọhọ, ete, O Jehovah, mbọk, nte emi idịghe uyo mi ke n̄kodude ke edem nnyịn? Oro ekesịn mi mfehe n̄ka ke Tarshish ke akpa: koro mfiọkde nte ke afo edi Abasi mbọm ye mfọn, usọpke iyatesịt, edi okpon ima, onyụn̄ akabade esịt ke idiọk-n̄kpọ.” (Jonah 4:1, 2) Jonah ama ọfiọk mme edu Jehovah. Nte ededi, ke ini oro prọfet oro ama ofụhọ ikonyụn̄ isehe mme andidụn̄ Nineveh oro ẹkekabarede esịt nte Abasi ekesede.
9, 10. (a) Nso ke Jehovah ekekpep Jonah? (b) Ntak emi nnyịn ikemede ndikere ke Jonah ke akpatre ama edise mbon Nineveh ke usụn̄ oro Jehovah ekesede mmọ?
9 Jonah ama ọwọrọ ke Nineveh, ọkọbọp ataya, onyụn̄ etie ke mfụt esie ete ibet ‘tutu imọ ikụt se ẹdinamde obio’ oro. Jehovah ama anam eto kiet ọkọri man ofụk Jonah. Nte ededi, ke ndan̄nsiere eto oro ama eyemede. Ke ini Jonah akayatde esịt aban̄a oro, Jehovah ama ọdọhọ ete: “Afo emenyene mbọm aban̄a eto oro . . . Nte ami ndien n̄kpenyeneke mbọm ye Nineveh, akwa obio emi tọsịn owo itie ikie ye edịp ye udori, emi mîdiọn̄ọke ubọk nnasia mmọ ye ufien mmọ, ye ediwak ufene n̄ko, ẹdude ke esịt?” (Jonah 4:5-11) Nso ukpepn̄kpọ aban̄ade nte Jehovah esede mme owo ke ẹkekpep Jonah ntem!
10 Owo iwetke nte Jonah akanamde n̄kpọ aban̄a ikọ Jehovah aban̄ade ediwụt mbon Nineveh mbọm. Edi, ana in̄wan̄-in̄wan̄ nte ke prọfet oro ama okpụhọde usụn̄ nte enye ekesede mbon Nineveh oro ẹkekabarede esịt. Nnyịn ibiere ntem ke ifiọkde ite ke Jehovah akada enye ndiwet mbụk eke odudu spirit emi.
Ewe Idi Edu Fo?
11. Ekeme ndidi Abraham ekpese didie mme owo oro ẹdude uwem mfịn?
11 Mfịn, nnyịn isak iso ise nsobo efen—eke idiọk editịm n̄kpọ emi edidade itie ke akwa usen Jehovah. (Luke 17:26-30; Galatia 1:4; 2 Peter 3:10) Didie ke Abraham ekpese mme owo oro ẹdude uwem ke ererimbot emi ẹdisobode mi ke mîbịghike? Enen̄ede etie nte ke enye ekpekere aban̄a mbon oro mîkopke kan̄a “gospel Ubọn̄ Abasi emi.” (Matthew 24:14) Abraham ama ekpe Abasi ubọk ediwak ini aban̄a ndinen owo ke Sodom. Nte nnyịn ke idem nnyịn imesikere iban̄a mme owo oro ẹkemede ndisịn mme usụn̄ uwem ererimbot Satan emi edieke ẹnọde mmọ ifet ndikabade esịt nnam n̄kpọ Abasi?—1 John 5:19; Ediyarade 18:2-4.
12. Ntak edide mmemmem n̄kpọ ndikọri edu ebietde eke Jonah mban̄a mme owo oro nnyịn isobode ke utom ukwọrọikọ nnyịn, ndien nso ke nnyịn ikeme ndinam mban̄a emi?
12 Odot ndiyom idiọkido etre. (Habakkuk 1:2, 3) Edi, enen̄ede edi mmemmem n̄kpọ ndikọri edu ebietde eke Jonah, itrede ndikere mban̄a mfọnọn̄kpọ mme owo oro ẹkemede ndikabade esịt. Emi esinen̄ede edi ntre edieke nnyịn isobode mme owo oro ẹnanade udọn̄, etiede usua usua, m̀mê idem utọk utọk ke ini idade etop Obio Ubọn̄ ika ufọk mmọ. Nnyịn imekeme ndifre mban̄a mbon oro Jehovah edinyan̄ade osio ke idiọk editịm n̄kpọ emi. (Rome 2:4) Ke ima iketịm idụn̄ọde idem nnyịn, edieke ikụtde ke imenyene ọkpọkọm ata ekpri edu ebietde enye oro Jonah ekebemde iso enyene aban̄a mbon Nineveh, nnyịn imekeme ndibọn̄ akam mben̄e un̄wam ndise n̄kpọ nte Jehovah esede.
13. Ntak emi nnyịn ikemede ndidọhọ ke Jehovah ekere aban̄a mme owo mfịn?
13 Jehovah ekere aban̄a mbon oro mînamke n̄kpọ esie kan̄a, ndien enye esikpan̄ utọn̄ ke eben̄e ikọt esie oro ẹyakde idem ẹnọ. (Matthew 10:11) Ke uwụtn̄kpọ, ke ndibọrọ mme akam mmọ, “Enye ayawara osio usiene.” (Luke 18:7, 8) Akan oro, Jehovah oyosu kpukpru un̄wọn̄ọ ye uduak esie ke edikem ini esie. (Habakkuk 2:3) Emi eyesịne edisio kpukpru idiọkn̄kpọ ke isọn̄ mfep, idem kpa nte enye okosobode Nineveh ke mme andidụn̄ ẹma ẹkefiak ẹtọn̄ọ ndinam ndiọi n̄kpọ.—Nahum 3:5-7.
14. Nso ke nnyịn ikpanam ke adan̄aemi emi itiede ibet akwa usen Jehovah?
14 Tutu ẹsobo idiọk editịm n̄kpọ emi ẹfep ke akwa usen Jehovah, nte nnyịn iyebet ke ime, isịnde idem inam uduak Esie? Nnyịn ifiọkke udomo oro ẹdinamde utom ukwọrọikọ ẹkesịm mbemiso usen Jehovah edide, edi nnyịn imọfiọk ite ke ẹyekwọrọ gospel Ubọn̄ Abasi ke ofụri isọn̄ tutu Abasi ọdọhọ ke ekem mbemiso utịt edide. Ndien ke akpanikọ nnyịn ikpenyene ndikere mban̄a “ndiye n̄kpọ kpukpru mme idụt” oro ẹdisụk ẹdade ẹdi nte Jehovah akade iso ndisịn ubọn̄ ke ufọk esie nyọhọ.—Haggai 2:7, NW.
Edinam Nnyịn Owụt nte Nnyịn Isede Mme Owo
15. Nso ikeme ndinam nnyịn inen̄ede ikụt ufọn edibuana ke utom ukwọrọikọ?
15 Eyedi nnyịn idụn̄ ke n̄kann̄kụk oro mme owo mîsimaha ukwọrọikọ nnyịn, ndien idaha nnyịn iyakke nnyịn iwọrọ ika ebiet oro ẹnen̄erede ẹyom mme anditan̄a Obio Ubọn̄. Yak idọhọ ke ẹkeme ndikụt owo duop ke efakutom nnyịn mbemiso utịt edide. Nte nnyịn imekere ke owo duop oro ẹdot se ẹkpeyomde? Jesus ama ‘atua otu owo mbọm, koro mmọ ẹkedude ke nnanenyịn ẹnyụn̄ ẹsuanade, nte erọn̄ eke mînyeneke andikpeme.’ (Matthew 9:36) Ebede ke ndikpep Bible nnyụn̄ ntịn̄ enyịn n̄kot mme ibuotikọ Enyọn̄-Ukpeme ye Awake!, nnyịn imekeme ndinen̄ede nnyene ifiọk mban̄a idiọk idaha ererimbot emi. Nte utịp, emi ekeme ndinam nnyịn inen̄ede ikụt ufọn edikwọrọ eti mbụk. Akan oro, ndida Bible ye mme n̄wed ẹkọn̄ọde ke Bible oro ẹnọde ebe ke “asan̄autom emi anamde akpanikọ, onyụn̄ enyenede ọniọn̄” nnam n̄kpọ ye esịtekọm ekeme ndin̄wam nnyịn itịn̄ ikọ ye mbukpek ke mme efakutom oro ẹsinamde utom ndien ndien.—Matthew 24:45-47; 2 Timothy 3:14-17.
16. Didie ke nnyịn ikeme ndinam utom ukwọrọikọ nnyịn enen̄ede enyene uforo?
16 Nnyịn ndikere mban̄a mbon oro ẹsụk ẹkemede ndinam n̄kpọ mban̄a ọnọ-uwem etop Bible esinụk nnyịn ndiyom nsio nsio ini ye usụn̄ oro ikemede ndinyene nneme ye mme enyene-ufọk ke utom ukwọrọikọ nnyịn. Nte nnyịn imesikụt ke ediwak owo isidụhe ke ufọk ke ini iwahade? Ke edide ntre, nnyịn imekeme ndinam utom ukwọrọikọ nnyịn enen̄ede enyene uforo ebe ke ndikpụhọde mme ini ye itie oro inamde utom ukwọrọikọ. Mme ọkọiyak ẹsika ọkọ ke ini oro mmọ ẹdikemede ndimụm iyak. Nte nnyịn imekeme ndinam ukem oro ke utom ukọiyak nnyịn eke spirit? (Mark 1:16-18) Ntak mûdomoke unọ ikọ ntiense mbubịteyo ye eke urụk ukopikọ use, ke ebiet oro ibet enyịmede ẹnam oro? Ndusụk owo ẹmekụt nte ke mme itie ubon n̄kpọisan̄, itiembehe ubomisọn̄, itie unyam aranuwat, ye mme ufọkurua ẹdi nti ‘itie ukọ owo.’ Nnyịn iwụt n̄ko ke imenyene edu ebietde eke Abraham iban̄a mme owo ke ini idade mme ifet oro ẹbererede ndinọ ikọ ntiense ido nneme.
17. Ke mme usụn̄ ewe ke nnyịn ikeme ndisịn udọn̄ nnọ mme isụn̄utom ye mbon eken oro ẹnamde utom ke esenidụt?
17 Ediwak miliọn owo ikopke etop Obio Ubọn̄ kan̄a. Ke adianade ye ukwọrọikọ nnyịn, nte nnyịn imekeme ndiwụt mme utọ owo oro edikere mban̄a idem ye unana edikpọkpọn̄ ufọk nnyịn? Ọfọn, nte nnyịn imọdiọn̄ọ mme isụn̄utom m̀mê mme asan̄autom uyọhọ ini oro ẹnamde utom ke esenidụt? Ke edide ntre, nnyịn imekeme ndiwet mmọ leta oro owụtde ke imowụt esịtekọm iban̄a utom mmọ. Didie ke oro ekeme ndiwụt ke imekere iban̄a mme owo ke ofụri ofụri? Leta nsịnudọn̄ ye itoro oro nnyịn iwetde ekeme ndisọn̄ọ mme isụn̄utom oro idem ndisọn̄ọ ndu ke utom mmọ, ntem ẹn̄wamde ediwak owo efen efen ndidi ndinyene ifiọk akpanikọ. (Judges 11:40, NW) Nnyịn imekeme n̄ko ndibọn̄ akam mban̄a mme isụn̄utom ye mbon oro ẹkopde biọn̄ akpanikọ ke mme idụt en̄wen. (Ephesus 6:18-20) Usụn̄ efen ndiwụt edikere mban̄a edi ke nditịp okụk kaban̄a utom ofụri ererimbot eke Mme Ntiense Jehovah.—2 Corinth 8:13, 14; 9:6, 7.
Nte Afo Ekpekeme Ndiwọrọ Idụn̄?
18. Nso ke ndusụk Christian ẹnam man ẹnam mme ufọn n̄kpọ Obio Ubọn̄ ẹkọri ke idụt oro mmọ ẹdụn̄de?
18 Ẹsidiọn̄ mbon oro ẹnamde n̄waidem ndiwọrọ n̄ka mme ebiet oro ẹnen̄erede ẹyom mme anditan̄a Obio Ubọn̄. Nte ededi, ke adan̄aemi ẹdude ke obio emana mmọ, Mme Ntiense Jehovah eken ẹmekpep usem efen man ẹkeme ndinọ mme odudụn̄ un̄wam eke spirit. Ke akpanikọ, ẹsinọ utọ ukeme oro utịp. Ke uwụtn̄kpọ, Mme Ntiense itiaba oro ẹn̄wamde mbon China ke obio Texas, U.S.A., ẹma ẹnyene owo 114 ke usọrọ Udia Mbubịteyo Ọbọn̄ ke 2001. Mbon oro ẹn̄wamde mme utọ otu oro ẹkụt ke in̄wan̄ mmimọ adat se ẹkpen̄ede.—Matthew 9:37, 38.
19. Nso ke owụt eti ibuot ndinam edieke afo ekerede ndiwọrọ n̄ka esenidụt n̄katat utom ukwọrọikọ Obio Ubọn̄?
19 Ekeme ndidi afo ye ubon fo ẹmekụt ke idaha mmimọ ayayak iwọrọ ika ebiet oro ẹnen̄erede ẹyom mme ọkwọrọ Obio Ubọn̄. Nte ededi, owụt eti ibuot ndibem iso ‘ntie mbat se iditakde.’ (Luke 14:28) Enen̄ede oyom ẹnam emi akpan akpan ke ini owo ekerede ndiwọrọ n̄ka esenidụt. Owo ekededi oro ekerede ndinam utọ uwọrọidụn̄ oro ekeme ndibụp idemesie mme utọ mbụme nte mmọemi: ‘Nte nyekeme ndise mban̄a ubon mi? Nte nyekeme ndinyene n̄wed unen ukaisan̄ oro odotde? Nte mmekeme ndisem usem idụt oro, mîdịghe nte mmenyịme ndikpep enye? Nte mmekere mban̄a idaha eyo ye ido unam n̄kpọ? Nte mmekeme ndinen̄ede ndi “andin̄wam emi ọsọn̄ọde [mme owo] idem” utu ke ndidi mbiomo nnọ ekemmọ mme andinịm ke akpanikọ ke idụt oro?’ (Colossae 4:10, 11, NW) Man ọfiọk nte udọn̄ okponde ke idụt oro afo ekerede ndiwọrọ n̄ka, edi se idotde kpukpru ini ndiwet mbụp ọfis n̄kọk itieutom Mme Ntiense Jehovah oro esede aban̄a utom ukwọrọikọ ke idụt oro.a
20. Didie ke akparawa Christian kiet ọkọnọ idemesie ke ufọn ekemmọ mme andinịm ke akpanikọ ye mbon en̄wen ke esenidụt?
20 Christian kiet oro abuanade ke utom edibọp mme Ufọkmbono Obio Ubọn̄ ke Japan ama okop ke ẹyom mbonutom oro ẹnyenede usọ ẹdibọp itie utuakibuot ke Paraguay. Sia mîkọdọhọ ndọ okonyụn̄ enyenede odudu uyen, enye ama ọwọrọ aka idụt oro akanam utom ọfiọn̄ itiaita nte n̄kukụre anamutom uyọhọ ini. Ke adan̄aemi odude do, enye ama ekpep usem Spanish onyụn̄ enịm mme ukpepn̄kpọ Bible. Enye ama ekeme ndikụt ke ẹyom mme anditan̄a Obio Ubọn̄ ke idụt oro. Okposụkedi enye akafiakde ọnyọn̄ Japan, ikebịghike enye ama afiak aka Paraguay akan̄wam ndikot mme owo ẹdi kpa Ufọkmbono Obio Ubọn̄ oro enye ọkọbọpde.
21. Nso ikpenen̄ede ibehe nnyịn, ikponyụn̄ ise mme owo didie nte nnyịn itiede ibet akwa usen Jehovah?
21 Abasi oyokụt ete ke ẹnam utom ukwọrọikọ ọyọhọ ọyọhọ nte ekemde ye uduak esie. Mfịn, enye ke anam akpatre idọk eke spirit emi awara. (Isaiah 60:22) Do, nte nnyịn itiede ibet usen Jehovah, ẹyak nnyịn ibuana ifịk ifịk ke utom idọk inyụn̄ ise mme owo nte ima ima Abasi nnyịn esede mmọ.
[Ikọ idakisọn̄]
a Ndusụk ini afo ndiwọrọ ke idemfo n̄ka idụt oro ẹdoride ukpan ke utom ukwọrọikọ idin̄wamke. Ndinam ntre ekeme ndikam nda mfịna nsọk mme asuanetop Obio Ubọn̄ oro ẹnamde utom ke ndịbe ke mme utọ idaha oro.
Nte Afo Emeti?
• Nte nnyịn itiede ibet usen Jehovah, didie ke nnyịn ikpese mme owo?
• Didie ke Abraham ekese ndinen owo oro ẹkedụn̄ọde ke Sodom?
• Didie ke Jonah ekese mbon Nineveh oro ẹkekabarede esịt?
• Didie ke nnyịn ikeme ndiwụt nte ke imese mbon oro mîkopke eti mbụk kan̄a nte Jehovah esede?
[Ndise ke page 16]
Abraham ekese mme owo nte Jehovah esede
[Ndise ke page 17]
Jonah ama edi edise mbon Nineveh oro ẹkekabarede esịt nte Jehovah ekesede
[Mme ndise ke page 18]
Edikere mban̄a mme owo esinụk nnyịn ndiyom nsio nsio ini ye usụn̄ ndikwọrọ eti mbụk