Mme Mbụme Ẹtode Mme Andikot
Ndi urụkikọt oro ekenemede nneme ye Eve ama enyene ukot?
Nte ẹwetde ke Genesis 3:14, Jehovah Abasi ama osụn̄i urụkikọt emi akabian̄ade Eve ke In̄wan̄ Eden. Abasi ọkọdọhọ ete: “Koro afo anamde n̄kpọ emi, osụk ọdiọk ọnọ fi akan kpukpru ufene, ye kpukpru unam ikọt: afo ayasan̄a ke idịbi fo, oyonyụn̄ adia ntọn̄ ke ofụri ini uwem fo.” Bible idọhọke ke urụkikọt oro ẹkedade ẹbian̄a Eve ama enyene ukot ndien ekem inyeneke aba. Okposụkedi nte ẹwetde Genesis 3:14 ekemede ndinam ndusụk owo ẹkere ntre, nnyịn ikpenyeneke ndidọhọ ke urụkikọt ama esinyene ukot mbemiso ẹkesụn̄ide enye. Ntak emi nnyịn mîkpekereke ntre?
Akpan ntak edi nte ke Jehovah okobiom Satan ikpe, kpa spirit oro akadade urụkikọt etịn̄ ikọ. Bible okot Satan “ete nsu” ye “akani urụkikọt.” Nte an̄wan̄ade, enyịn̄ mbiba emi ẹwụt nte Satan akadade urụkikọt atap Eve abiat ibet Abasi.—John 8:44; Ediyarade 20:2.
Abasi okobot urụkikọt, ndien etie nte Adam ama osio enye enyịn̄ mbemiso Satan akadade enye abian̄a Eve. Owo ikpọduọhọke urụkikọt emi eketịn̄de ikọ ọnọ Eve sia enye mîkemeke ndikere n̄kpọ. Etie nte enye ikọfiọkke ite ke Satan akada imọ etịn̄ ikọ, enye n̄ko ikọfiọkke ikpe oro Abasi okobiomde mbon nsọn̄ibuot oro.
Edi ntak emi Abasi eketịn̄de aban̄a edisụhọde urụkikọt itie? Nte urụkikọt esinamde n̄kpọ—oro edi, ndinyọni ke idịbi nnyụn̄ mfịbe edeme nte n̄kpọ eke adiade ntọn̄—enen̄ede owụt nte ẹsụhọrede Satan itie. Satan ama enyene akwa itie nte kiet ke otu mme angel Abasi, edi idahaemi ẹsụhọde enye itie ẹsịm se Bible okotde Tartarus.—2 Peter 2:4.
Ke adianade do, kpa nte ata urụkikọt ekemede ndinọ owo unan ke nditịn̄-ikpat, Satan oro ẹkesụhọrede itie ekenyene ‘ndinuak’ mfri Abasi ke “nditịn̄-ikpat.” (Genesis 3:15) Jesus Christ ekedi akpan mfri oro, emi ọkọbọde ufen ke ubọk isụn̄utom Satan ke ekpri ibio ini. Edi Christ ye mme nsan̄a esie oro ẹyetde aran ẹnyụn̄ ẹnamde ẹset ke n̄kpa ẹyenuak ndamban̄a urụkikọt emi ibuot ke ini ama ekem. (Rome 16:20) Ke ntem, Abasi ndikosụn̄i urụkikọt oro akada aban̄a edisụhọde “akani urụkikọt” oro enyịn mîkwe, Satan kpa Devil, itie, ye edisobo enye ke akpatre.