Mfri Urụkikọt—Didie Ke Ẹyarade?
“Nyenyụn̄ nsịn usua ke ufọt fo ye n̄wan, ye ke ufọt [mfri, NW] fo ye [mfri, NW] esie.”—GENESIS 3:15.
1. (a) Ntak emi Jehovah edide Abasi inemesịt? (b) Nso ke enye anam man anam nnyịn itiene ibuana ke idatesịt esie?
JEHOVAH edi Abasi inemesịt ye eti ntak. Enye edi n̄kponn̄kan ye akakan Andinọ nti n̄kpọ, ndien idụhe n̄kpọ ndomokiet oro ekemede ndikụt unen ke ndibiọn̄ọ mme uduak esie ndisu. (Isaiah 55:10, 11; 1 Timothy 1:11; James 1:17) Enye oyom mme asan̄autom esie ẹtiene ẹbuana ke idatesịt esie, ndien enye ọnọ mmọ nti ntak ndinam oro. Ntem, ke kiet ke otu ndiọkn̄kan ini mfụhọ ke mbụk ubonowo—nsọn̄ibuot oro ke Eden—enye ama ọnọ nnyịn isọn̄ ndisak iso nse ini iso ye idotenyịn.—Rome 8:19-21.
2. Ke ini ebierede ikpe ọnọ mme ọsọn̄ibuot oro ke Eden, didie ke Jehovah ọkọnọ nditọ Adam ye Eve isọn̄ ndinyene idotenyịn?
2 Kiet ke otu nditọ Jehovah eke spirit, ebede ke ndibiọn̄ọ ye ke ndidọk Abasi edidọk, ama anam idemesie akabade edi Satan kpa Devil. Mme akpa owo oro, Eve ndien ekem Adam, ẹma ẹdidu ke idak odudu esie ẹma ẹnyụn̄ ẹbiat in̄wan̄în̄wan̄ ibet Jehovah. Ẹma ẹbiere ikpe n̄kpa ẹnọ mmọ nte enende. (Genesis 3:1-24) Edi, ke ini ebierede ikpe ọnọ mbon nsọn̄ibuot ẹmi, Jehovah ama ọnọ nditọ Adam ye Eve isọn̄ ndinyene idotenyịn. Ke nso usụn̄? Nte ẹwetde ke Genesis 3:15, Jehovah ọkọdọhọ ete: “Nyenyụn̄ nsịn usua ke ufọt fo ye n̄wan, ye ke ufọt [mfri, NW] fo ye [mfri, NW] esie: enye eyenuak fi ibuot, afo eyenyụn̄ anuak enye nditịn̄-ikpat.” Prọfesi oro edi n̄kpọ un̄wam ke ndidiọn̄ọ ofụri Bible ọkọrọ ye mme n̄kpọntịbe eke eset ye eke idahaemi ẹmi ẹbuanade ererimbot ye mme asan̄autom Jehovah.
Se Prọfesi Oro Ọwọrọde
3. Nte ẹtịn̄de ẹban̄a ke Genesis 3:15, nam ẹdiọn̄ọ (a) Urụkikọt, (b) “n̄wan,” (c) “mfri” Urụkikọt, (d) “mfri” n̄wan.
3 Man ọfiọk nte enye edide akpan n̄kpọ, kere ban̄a nsio nsio ikpehe prọfesi oro ke idemesie. Enyeoro ẹtịn̄de ẹban̄a ke Genesis 3:15 edi Urụkikọt—idịghe usụhọde urụkikọt edi enyeoro akadade enye etịn̄ ikọ. (Ediyarade 12:9) “N̄wan” idịghe Eve edi edi esop Jehovah eke heaven, kpa eka mme asan̄autom esie oro ẹyetde aran ke spirit ke isọn̄. (Galatia 4:26) “Mfri” Urụkikọt, edi mfri Satan, nditọ esie—mme demon ye mme owo ọkọrọ ye mme esop owo oro ẹnyenede edu Satan oro ẹnyụn̄ ẹsuade “mfri” n̄wan. (John 15:19; 17:15) “Mfri” n̄wan enen̄ede edi Jesus Christ, emi ẹkeyetde aran ke edisana spirit ke 29 E.N. Owo 144,000, ẹmi ‘ẹfiakde ẹmana ke mmọn̄ ye spirit’ ẹmi ẹnyụn̄ ẹdide mme ada udeme Obio Ubọn̄ heaven nnyene ye Christ, ẹdi udiana ubak mfri un̄wọn̄ọ oro. Ẹketọn̄ọ ndida mmọemi ndidian ye mfri n̄wan ọtọn̄ọde ke Pentecost 33 E.N. kaiso.—John 3:3, 5; Galatia 3:16, 29.
4. Didie ke Genesis 3:15 enyene ebuana ye isọn̄ ndikabade ndi paradise, nyọhọ ye mme owo oro ẹbọhọde idiọkn̄kpọ ye n̄kpa?
4 Owo oro abian̄a esie akanamde ubonowo ataba Paradise akada ata urụkikọt ke Eden nte etịn̄ikọ. Genesis 3:15 ama anyan ubọk owụt ini emi ẹdisobode owo emi akadade urụkikọt oro etịn̄ ikọ. Adan̄aoro usụn̄ eyefiak eberede ọnọ mme asan̄autom Abasi ẹdide owo ndidụn̄ ke Paradise, ẹbọhọde idiọkn̄kpọ ye n̄kpa. Nso idara idara ini ke oro edidi ntem!—Ediyarade 20:1-3; 21:1-5.
5. Nso edu ke ẹda ẹdiọn̄ọ nditọ Devil eke spirit?
5 Ke etienede nsọn̄ibuot oro ke Eden, owo kiet kiet ye mme esop ẹma ẹtọn̄ọ ndiwọrọ ndi oro ẹkenyenede mme edu ẹbietde eke Satan kpa Devil—nsọn̄ibuot, nsu, edidọk, ye uwotowo, adianade ye edibiọn̄ọ uduak Jehovah ye mbon oro ẹtuakde ibuot ẹnọ Jehovah. Mme edu oro ẹma ẹnam ẹdiọn̄ọ nditọ Devil eke spirit. Ke otu mmọemi ekedi Cain, emi okowotde Abel ke ini Jehovah okonyịmede utuakibuot Abel utu ke eke Cain. (1 John 3:10-12) Nimrod akakam edi enyeemi enyịn̄ esie anamde ẹdiọn̄ọ enye nte ọsọn̄ ibuot emi okonyụn̄ akabarede edi okopodudu atautop ye andikara oro ọbiọn̄ọde Jehovah. (Genesis 10:9) Ke adianade do mme obio ubọn̄ eset ẹma ẹwọrọ ẹdi ke adiana ke adiana, ẹsịnede Babylon, ye mme ido ukpono mmọ oro ukara ọnọde ibetedem oro ẹkewụkde ke nsu, ndien mmọemi ẹma ẹfịk mme andituak ibuot nnọ Jehovah idiọk idiọk.—Jeremiah 50:29.
“Usua ke Ufọt Fo ye N̄wan”
6. Ke mme usụn̄ ewe ke Satan owụt usua oro enye asuade n̄wan Jehovah?
6 Ke ofụri ini emi, usua ama odu ke ufọt Urụkikọt ye n̄wan Jehovah, ke ufọt Satan kpa Devil ye esop Jehovah eke heaven eke mme enyene-nsọn̄ọnda edibotn̄kpọ eke spirit. Satan okowụt usua esie ke ini enye okosụn̄ide Jehovah onyụn̄ oyomde nditịmede esop Jehovah eke heaven, atapde mme angel ndikpọn̄ nnennen ebietidụn̄ mmọ. (Mme N̄ke 27:11; Jude 6) Emi ama owụt idem ke ini Satan akadade mme demon esie odomo ndibiọn̄ọ mme asan̄autom ẹdide angel ẹmi Jehovah okosiode ọdọn̄ utom. (Daniel 10:13, 14, 20, 21) Emi ama ana ata in̄wan̄în̄wan̄ ke ọyọhọ isua ikie 20 emi ke ini Satan okoyomde ndisobo Obio Ubọn̄ Messiah ke ini enye akamanade.—Ediyarade 12:1-4.
7. Ntak emi mme angel Jehovah oro ẹnyenede nsọn̄ọnda ẹsuade ndamban̄a Urụkikọt oro, ndien nso ukpeme ke mmọ ẹwụt?
7 Usua ama odu n̄ko ke n̄kan̄ n̄wan Jehovah, kpa otu mme angel oro ẹsọn̄ọde ẹda, aban̄a ndamban̄a Urụkikọt. Satan ama abiat eti enyịn̄ Abasi; enye n̄ko ama edemede eyịghe aban̄a nsọn̄ọnda kpukpru mme enyene-ifiọk edibotn̄kpọ Abasi, esịnede kpukpru mme angel, ndien enye ama odomo ọkpọsọn̄ ndibiat nsọn̄ọnda mmọ nnọ Abasi. (Ediyarade 12:4a) Mme angel, mme cherub, ye mme seraph oro ẹsọn̄ọde ẹda ikekemeke ndinam n̄kpọ efen ndomokiet n̄kan ndisua owo oro akanamde idemesie Devil ye Satan. Edi, mmọ ẹma ẹbet Jehovah ndise mban̄a mme n̄kpọ ke ini ye ke usụn̄ esie.—Men Jude 9 domo.
Usua Ẹnyenede ẹnọ Mfri N̄wan Abasi
8. Satan eketịn̄ enyịn oyom anie?
8 Kan̄a kemi, Satan ama etịn̄ enyịn ekpeme man ọkpọfiọk enyeemi edidide Mfri n̄wan oro ẹkebemde iso ẹtịn̄ ẹban̄a, kpa enyeemi Jehovah ọkọdọhọde ke eyenuak Urụkikọt ke ibuot. Ke ini angel otode heaven ọkọtọtde ete ke Jesus, emi akamanade ke Bethlehem, ekedi “Andinyan̄a, emi edide Christ Ọbọn̄,” emi ekedi okopodudu nsọn̄ọ nte ke enye eyekabade edi Mfri n̄wan oro ẹkebemde iso ẹtịn̄.—Luke 2:10, 11.
9. Ke Jesus ama akakpa, didie ke Satan okowụt idiọk usua?
9 Satan ama owụt idiọk usua esie ke ini enye akatapde mme asiak ntantaọfiọn̄ ẹdide mme okpono ndem ọdọn̄ utom oro ekebemde iso ada mmọ ebịne Edidem Herod ke Jerusalem ndien ekem ada aka ufọk ke Bethlehem emi mmọ ẹkekụtde ekpri eyeneren oro Jesus ye eka esie, Mary. Esisịt ini ke oro ebede Edidem Herod ama ọnọ uyo ete ẹwot kpukpru nditọiren ọtọn̄ọde ke isua iba ke emana sụhọde, ke Bethlehem ye ke n̄kann̄kụk esie. Ke emi, Herod ama owụt ukem usua oro Satan ekenyenede ọnọ Mfri oro. Nte an̄wan̄ade Herod ama otịm ọfiọk ete ke imọ ikodomo ndisọhi uwem owo oro edidide Messiah mfep. (Matthew 2:1-6, 16) Mbụk owụt ete ke Edidem Herod ekedi oburobụt owo, akari n̄kari, ye owot owo—enye ekenen̄ede edi kiet ke otu mfri Urụkikọt.
10. (a) Ke etienede baptism Jesus, didie ke Satan ke idemesie okodomo ndibiat uduak Jehovah kaban̄a Mfri oro ẹken̄wọn̄ọde? (b) Didie ke Satan akada mme adaiso ido ukpono mme Jew anam n̄kpọ ebịne uduak esie?
10 Ke ẹma ẹkeyet Jesus aran ke edisana spirit ke 29 E.N. Jehovah ama okonyụn̄ etie ke heaven onyịme Jesus nte Eyen esie, Satan ama odomo ndien ndien ndinam Jesus ọduọ odụk idomo, ntem oyomde usụn̄ ndibiat uduak Jehovah kaban̄a Eyen esie. (Matthew 4:1-10) Ke okpude ke oro, enye ama ọwọn̄ọde ebịne edika iso nda mme owo nte n̄kpọutom ndinam mme uduak esie. Mme adaiso ido ukpono oro ẹkedide mbon mbubịk ẹkedu ke otu mbon oro enye akadade ke ndidomo ndisụhọde Jesus itie. Mmọ ẹma ẹda nsu ye edidọk ẹnam n̄kpọ, kpa orụk usụn̄ edinam oro Satan ke idemesie akakamade. Ke ini Jesus ọkọdọhọde owo akpauben̄ ete, “Sọn̄ esịt; ẹmefen mme idiọk-n̄kpọ fo,” mme scribe, ye unana edibet n̄kụt m̀mê ẹma ẹkọk udọn̄ọ eren oro, ẹma ẹbiere ikpe ẹnọ Jesus ẹte edi owo isụn̄i. (Matthew 9:2-7) Ke ini Jesus akanamde udọn̄ọ okụre mme owo ke Sabbath, mme Pharisee ẹma ẹdori enye ikọ nte abiatde ibet Sabbath ẹnyụn̄ ẹdụk odu ndiwot enye. (Matthew 12:9-14; John 5:1-18) Ke ini Jesus ekebịnde mme demon efep, mme Pharisee ẹma ẹdori enye ikọ ẹte enye odụk nsan̄a ye “Beelzebub, ọbọn̄ mme demon.” (Matthew 12:22-24) Ke ẹma ẹkenam Lazarus eset ke n̄kpa, ediwak owo ẹma ẹbuọt idem ye Jesus, edi mbọn̄ oku ye mme Pharisee ẹma ẹfiak ẹdụk odu ndiwot enye.—John 11:47-53.
11. Usen ita mbemiso n̄kpa Jesus, anie ke enye akanam ẹdiọn̄ọ nte ubak mfri Urụkikọt, ndien ntak-a?
11 Ke Nisan 11, 33 E.N., Jesus, okposụkedi okotịmde ọfiọk se mmọ ẹkeduakde, ama ebe nnennen aka n̄kann̄kụk temple ke Jerusalem ye unana ndịk onyụn̄ ada do atan̄a ubiereikpe odori mmọ an̄wan̄wa. Nte otu, mme scribe ye mme Pharisee ẹma ẹka iso ndiwụt mme utọ owo oro mmọ ẹkedide; ntre Jesus ama ọdọhọ ete: “Eyedọdiọk ọnọ mbufo, mme scribe ye mme Pharisee, mbon mbubịk! koro mbufo ẹberi Obio Ubọn̄ Heaven ẹbaha owo: koro mbufo idụkke ke idem mbufo, inyụn̄ iyakke mmọ ẹmi ẹyomde ndidụk ẹbe ẹdụk.” Jesus ama etịn̄ ata nnennen ete ke mmọ ẹkedi ubak mfri Urụkikọt, ọdọhọde ete: “Mbufo mme urụkikọt, mbufo nditọ ibọm, ẹdisan̄a didie ẹbọhọ ikpe [Gehenna, NW]?” (Matthew 23:13, 14, 33) Ikọ esie anam ẹti prọfesi oro ke Genesis 3:15.
12, 13. (a) Didie ke ikpọ oku ye mme scribe ẹkenọ n̄kaiso uyarade kaban̄a enyeemi edide ete mmọ eke spirit? (b) Mmanie ẹkediana ye mmọ? (c) Ke ndisu Genesis 3:15, didie ke ẹkenuak Mfri n̄wan ke nditịn̄ikpat?
12 Ke ẹkopde mme ikọ Jesus, ndi esịt ama amia mmọ ufen, anamde mmọ ẹkpe ubọk ẹyom mbọm Abasi? Nte mmọ ẹma ẹkabade esịt ẹkpọn̄ idiọkn̄kpọ mmọ? Baba! Mark 14:1 ọtọt ete kpa ke edem usen oro, ke mbono oro ẹkedụkde ke okụre akwa oku, “ikpọ oku ye mme scribe . . . ẹyom usụn̄ nte mmọ ẹdimụmde [Jesus] ke n̄kari ẹwot.” Mmọ ẹma ẹka iso ndiwụt edu uwot owo Satan oro, emi Jesus ekebemde iso etịn̄ nte edide owotowo. (John 8:44) Ikebịghike Judas Iscariot, emi Satan akanamde akabade edi owo nsọn̄ibuot, ama adiana ye mmọ. Judas ama adianade ọkpọn̄ Mfri n̄wan Abasi oro mîkenyeneke ndo onyụn̄ akadiana ye mfri Urụkikọt.
13 Ntọn̄ọ ntọn̄ọ ke usenubọk Nisan 14, mbon esop ido ukpono mme Jew ẹma ẹda Jesus nte owo n̄kpọkọbi ẹsọk andikara Rome. Mi edi ikpọ oku ẹkeda iso ke ndifiori nte yak ẹwot enye ke eto. Ke ini Pilate okobụpde ete, “Nte n̄wot Edidem mbufo ke [eto, NW]?” edi ikpọ oku ẹkebọrọ ẹte, “Nnyịn inyeneke edidem efen ibe Caesar.” (John 19:6, 15) Ke akpanikọ, mmọ ẹma ẹwụt ke kpukpru usụn̄ ẹte ke mmimọ ikedi ubak mfri Urụkikọt. Edi ke akpanikọ ikokụreke ke mmọ. N̄wetnnịm n̄kpọ eke odudu spirit ke Matthew 27:24, 25 ọnọ ntọt emi ete: “Pilate . . . ada mmọn̄ eyet ubọk ke iso otu owo.” Ekem kpukpru owo ẹdọhọ ẹte: “Iyịp Esie akpakam ọkọbọ nnyịn ye nditọ nnyịn.” Ntem ediwak mme Jew eke emana oro ẹma ẹwụt idem nte idide ubak mfri Urụkikọt. Mbemiso utịt usen oro, Jesus ama akpa. Ebede ke ndida mfri esie emi ẹkụtde ke enyịn nnam n̄kpọ, Satan ama anuak Mfri n̄wan Abasi ke nditịn̄ikpat.
14. Ntak emi edinuak Mfri n̄wan nditịn̄ikpat mîkọwọrọke ke Satan akan-a?
14 Ndi Satan ama akan? Baba-o! Jesus Christ ama akan ererimbot onyụn̄ akan andikara esie. (John 14:30, 31; 16:33) Enye ama omụm nsọn̄ọnda esie ye Jehovah akama tutu osịm n̄kpa. N̄kpa esie nte mfọnmma owo ama ọnọ ekọmurua ufak oro ẹkeyomde man ẹfiak ẹdep unen uwem oro Adam ọkọduọkde. Ntre enye ama eberede usụn̄ nsinsi uwem ọnọ mbon oro ẹdibuọtde idem ke ndutịm oro ẹnyụn̄ ẹnịm mme ibet Abasi. (Matthew 20:28; John 3:16) Jehovah ama anam Jesus eset ke n̄kpa enyene uwem oro mîkemeke ndikpa ke heaven. Ke edikem ini Jehovah, Jesus eyesobo Satan efep. Ke Genesis 22:16-18, ẹbem iso ẹtịn̄ ẹte ke Jehovah eyefọn mfọn ye ofụri ubon ke isọn̄ ẹmi ẹdinamde se ẹyomde ẹnam man ẹdiọn̄ idemmọ ebe ke Mfri oro enyenede nsọn̄ọnda.
15. (a) Ke Jesus ama akakpa, didie ke mme apostle ẹkeka iso ndiyarade mfri Urụkikọt? (b) Nso n̄kaiso usua ke mfri Urụkikọt owụt tutu osịm usen nnyịn?
15 Ke n̄kpa Jesus ebede, mme Christian oro ẹyetde aran ke spirit ẹma ẹka iso ndiyarade mfri Urụkikọt, nte Ọbọn̄ mmọ akanamde. Ke edisana spirit onụkde, apostle Paul ama odụri owo utọn̄ aban̄a “owo eke edide ata abiat-ibet” emi edidu esie edidide ‘nte ekemde ye ubọkutom Satan.’ (2 Thessalonica 2:3-10) Mme ọkwọrọ ederi Christendom ẹwụt idem nte idide otu “owo” emi. Ekem mfri Urụkikọt ama ọkọbọ mme anditiene Jesus Christ ikan̄îkan̄. Ke prọfesi oro ẹwetde ke Ediyarade 12:17, apostle John ama ebem iso etịn̄ ete ke Satan eyeka iso ndin̄wana ekọn̄ ye nsụhọ mfri n̄wan Abasi tutu osịm usen nnyịn. Oro edi nnennen se itịbede. Ke ediwak idụt, Mme Ntiense Jehovah ẹmekụt ukpan, ntịme, n̄kpọkọbi, mîdịghe ẹtomo ẹdọn̄ ke mme itienna ekikere ke ntak emi mmọ ẹsọn̄ọde ẹda ẹnọ Obio Ubọn̄ Abasi ye ndinen usụn̄ esie.
Ndiyarade Mfri Urụkikọt ke Eyomfịn
16. Ke eyomfịn, mmanie ke ẹyarade nte ẹdide ubak mfri Urụkikọt, ndien didie?
16 Ke ndikpebe Jesus Christ, mme ata Christian ikpaha mba ke mmọ ndiyarade Urụkikọt ye mfri esie ye unana ndịk. Ke 1917 Nditọ Ukpepn̄kpọ Bible, nte ẹkediọn̄ọde Mme Ntiense Jehovah ini oro, ẹma ẹsio n̄wed oro The Finished Mystery, emi mmọ ẹkeyararede mbubịk ido mme ọkwọrọ ederi Christendom. Se iketienede emi, ke 1924, ekedi ubiere oro ẹmịn̄de-mịn̄ emi ẹkekotde Ecclesiastics Indicted. Ẹma ẹsuan idem miliọn 50 ke ofụri ererimbot. Ke 1937, J. F. Rutherford, etieibuot Watch Tower Society ini oro, ama ọnọ okopodudu uyarade aban̄a mfri Satan ke mme utịn̄ikọ oro ẹkedọhọde “Ẹyarade” ye “Ido Ukpono ye Ido Ukpono Christ.” Ke isua oro eketienede, ke adan̄aemi mme andidụk mbono 50 ke nsio nsio idụt ẹkenọde n̄kpan̄utọn̄, enye ama odu ke London, England ọnọ utịn̄ikọ oro “Sak Iso Se Akpanikọ” ke radio oro ẹyịride ye ndutịm urụk ukopikọ. Ọfiọn̄ kiet ke ukperedem, ntatara ndutịm usuanetop radio ke United States ama asuan utịn̄ikọ oro “Ukara Ufịk m̀mê Ubọhọ-Ufụn.” Mme okopodudu uyarade oro ẹkedude ke mme utọ n̄wed nte Enemies ye Religion ye n̄ko ke ekpri n̄wed oro Uncovered ẹma ẹtiene mmọemi. Ke n̄kemuyo ye se ẹkemịn̄de toto ke iduọk isua 1920, n̄wed oro Ediyarade—Ubọn̄ Ubọn̄ Ata-Utịt Esie Emekpere!,a emi ẹmịn̄de idahaemi ke usem 65, anam ẹdiọn̄ọ idiọk mme akara ukaraidem ye mme ọdiọk-itọn̄, oburobụt ikpọ mbonurua nte ẹdude ke otu mme andibuana ke mfri Urụkikọt oro ẹkụtde ke enyịn. Ke ini mme akara ukaraidem ẹnamde edi ido ndida nsu ntụn mme andidu ke idak mmọ usụn̄, ndiwụt unana ukpono nnọ edisana idaha eke iyịp, nnyụn̄ mfịk mme asan̄autom Jehovah (ntem ẹwụtde usua oro mmọ ẹsuade mfri n̄wan Abasi), mmọ ke akpanikọ ẹwụt idemmọ nte idide mfri Urụkikọt. Ukem oro ke edi ye ikpọ mbonurua emi, ye unana esịt ndifịna mmọ, ẹsude nsu man ẹdia udori, ẹmi ẹnyụn̄ ẹbotde m̀mê ẹnyamde mme n̄kpọ oro ẹdiọn̄ọde nte ẹkemede ndinọ owo udọn̄ọ.
17. Nso ifet isụk iberede inọ mme ọwọrọiso owo oro ẹkemede ndiwọrọ ke ndutịm ererimbot emi?
17 Idịghe kpukpru owo oro ido ukpono ererimbot, mbre ukara, m̀mê unyamurua ẹsabarede ke ẹdisụk ẹda ke akpatre nte ubak mfri Urụkikọt. Ndusụk ke otu irenowo ye iban ẹmi ẹmedi ẹdima Mme Ntiense Jehovah. Mmọ ẹda odudu mmọ ndin̄wam mmọ ndien nte ini akade ẹnyịme utuakibuot akpanikọ. (Men Utom 13:7, 12; 17:32-34 domo.) Ye kpukpru utọ mbon oro, ẹmenọ eben̄e emi ẹte: “Mbufo ndidem ẹdi ọniọn̄, ndien: mbufo, mme ebierikpe ererimbot, ẹkop item. Ẹnam n̄kpọ Jehovah ke ndịk, ẹnyụn̄ ẹdara ke unyek-idem. Ẹtịm Eyen inua, mbak Enye ediyat esịt, ndien mbufo ẹbiara ke usụn̄, koro ke ini esisịt iyatesịt esie eyesak. Ọfọfọn ọnọ kpukpru mmọ eke ẹbuọtde idem ye Enye.” (Psalm 2:10-12) Ke akpanikọ, edi akpan n̄kpọ kpukpru mbon oro ẹyomde mfọn Jehovah ndinam n̄kpọ idahaemi, mbemiso Ebiereikpe eke heaven eberide usụn̄!
18. Okposụkedi mîdịghe ubak mfri n̄wan, mmanie nte ededi ẹdi mme andituak ibuot nnọ Jehovah?
18 Edi sụk mbon oro ẹdinamde Obio Ubọn̄ eke heaven ẹdi ubak mfri n̄wan. Mmọemi ẹdi esisịt ke ibat. (Ediyarade 7:4, 9) Edi, akwa otu mbon efen odu, ih, ediwak miliọn mmọ, emi nte mme andituak ibuot nnọ Jehovah ẹsakde iso ẹse nsinsi uwem ke paradise isọn̄. Ebede ke ikọ ye ke edinam, mmọ ẹdọhọ mbon oro Jehovah eyetde aran ẹte: “Nnyịn [iyeka] ye mbufo: koro nnyịn imokop ite ke Abasi odu ye mbufo.”—Zechariah 8:23.
19. (a) Edimek ewe ke ana kpukpru owo ẹnam? (b) Mmanie akpan akpan ke ẹsịn eben̄e esịt akpanikọ ẹnọ ndinam n̄kpọ ọniọn̄ ọniọn̄ ke adan̄aemi ifet osụk odude?
19 Idahaemi edi ini oro anade ofụri ubonowo ẹnam edimek. Nte mmọ ẹyom ndituak ibuot nnọ Jehovah nnyụn̄ mmụm itie edikara esie n̄kama, mîdịghe nte mmọ ẹyeyak Satan edi andikara mmọ ebe ke ndinam mme n̄kpọ oro enemde enye esịt? N̄kpọ nte owo miliọn ition ẹtode kpukpru idụt ẹmeda ke n̄kan̄ Jehovah ke ebuana ye nsụhọ ke otu mfri n̄wan, kpa mme ada udeme Obio Ubọn̄ nnyene. Owo miliọn itiaita en̄wen ẹmewụt udọn̄ ke ndikpep Bible ye mmọ m̀mê ndidụk mme mbonoesop mmọ. Mme Ntiense Jehovah ẹdọhọ kpukpru mmọemi ẹte: Usụn̄ ke osụk eberede. Ẹda in̄wan̄în̄wan̄ ke n̄kan̄ Jehovah. Ẹdiọn̄ọ Christ Jesus nte Mfri oro ẹken̄wọn̄ọde. Ẹbuana idara idara ye esop Jehovah oro ẹkụtde ke enyịn. Akpakam mbufo ẹtiene ẹnyene udeme ke kpukpru edidiọn̄ oro Enye edinọde ebe ke ukara Edidem oro, Christ Jesus.
[Mme Ikọ idakisọn̄]
a Watchtower Bible and Tract Society of New York, Inc., emịn̄.
Nte Afo Emeti?
◻ Anie edi Urụkikọt oro ẹtịn̄de ẹban̄a ke Genesis 3:15? Ndien anie edi n̄wan?
◻ Mme edu ewe ke ẹda ẹdiọn̄ọ mfri Urụkikọt?
◻ Didie ke Jesus akayarade mfri Urụkikọt?
◻ Mmanie ke ẹkeyarade nte ubak mfri Urụkikọt ke eyomfịn?
◻ Nso usọp usọp edinam ke oyom man ẹkûbat nnyịn ẹsịn ke otu mfri Urụkikọt?
[Ndise ke page 10]
Jesus ama ayarade mbon mbubịk mme adaiso ido ukpono nte ẹdide ubak mfri Urụkikọt