N̄kpọ Itiaba Oro Akpanamde man Ọbọ Ufọn Oto Edikot Bible

“Bible edi n̄wed oro anyamade akan ke ofụri emana, enye onyụn̄ edi nnyama-n̄kan n̄wed kpukpru isua.”—MAGAZINE TIME.

“Mmesikot Bible ndusụk ini, edi enye esinen̄ede efek mi.” —KEITH, ỌWỌRỌETOP EBRE IKWỌ EYEN ENGLAND.

IN̄WAN̄AKE owo ntak emi ediwak owo ẹnyenede Bible edi inen̄ekede ibọ ufọn ito edikot enye. Edi mbon en̄wen ẹda se mmọ ẹkotde ke Bible nte ata akpan n̄kpọ. Ke uwụtn̄kpọ, n̄wan kiet emi ekerede Nancy ọdọhọ ete: “Tọn̄ọ n̄kọtọn̄ọ ndisibak ndemede n̄kot nnyụn̄ ntie n̄kere se n̄kotde ke Bible kpukpru usenubọk, mmesiben̄e idem nnọ se ededi oro editịbede usen oro. Emi emenen̄ede an̄wam mi nyọ ọkpọsọn̄ mfụhọ mi akan n̄kpọ ekededi ke isua 35 idahaemi.”

Idem edieke edide akanam afo ukotke Bible, ndi enem fi ndifiọk ke enye esin̄wam ndusụk owo? Edieke edide emesikot Bible, ndi akpama ndinen̄ede mbọ ufọn edikot Bible? Edieke edide ntre, nam n̄kpọ itiaba oro inemede ke ibuotikọ emi.

Edinam 1 Kot ye eti ntak

◼ Afo emekeme ndikot Bible nte ikpîkpu edinem n̄wed m̀mê sia ẹdọhọde ẹkot m̀mê man enyene ndausụn̄ ke ererimbot afanikọn̄ emi. Edi afo edinen̄ede ọbọ ufọn edieke okotde man ọfiọk akpanikọ aban̄a Abasi. Ke adianade do, afo eyenen̄ede ọbọ ufọn edieke okotde man ese nte etop Bible otụkde fi.

N̄wed Abasi owụt ufọn edikot Bible ye eti ntak ke ndimen enye ndomo ye ukụtiso. Enye ọdọhọ ete: “Edieke owo ekededi edide andikokop ikọ, ndien mîdịghe andinanam, owo emi ebiet owo emi esede ndammana iso esie ke ukụtiso. Koro enye esede idemesie, ekem adaha ndien kpa idaha oro efre orụk owo eke enye edide. Edi owo eke owụkde enyịn ese mfọnmma ibet oro anamde owo ọwọrọ ufụn onyụn̄ ọsọn̄ọde eyịre ke enye, owo emi, sia enye mîdịghe andikokop eke efrede, edi edide andinanam, oyokop inemesịt ke ndinam enye.”—James 1:23-25.

Owo oro ẹtịn̄de ẹban̄a mi ama ese iso ke ukụtiso, edi inen̄ekede se mîkadaha ọfọn. Ekeme ndidi enye okonyụn̄ ototop enyịn ese nte itiede, mîdịghe edi ke enye ikenyeneke udọn̄ ndinam ukpụhọde. Kpasụk ntre, nnyịn idinen̄ekede ibọ ufọn edieke ikotde Bible ntre ntre, m̀mê edieke mîdaha se ikotde isịn ke edinam. Edi nnyịn imekeme ndikop ata inemesịt edieke ikotde Bible man ikabade idi mme “andinanam,” emi iyakde se Abasi etịn̄de enen̄ede ekikere ye mme edinam nnyịn.

Edinam 2 Mek Bible oro ẹkabarede ọfọn

◼ Ekeme ndidi ẹmenyene nsio nsio edikabade Bible ke usem mbufo. Okposụkedi emi afo ekemede ndibọ ufọn nto edikabade Ikọ Abasi ekededi, ẹda n̄kani m̀mê ata n̄kpọsọn̄ ikọ emi mîsọpke in̄wan̄a owo, ẹkabade ndusụk mmọ. (Utom 4:13) Ndusụk edikabade Bible ẹkam ẹkpụhọde etop Abasi sia ẹberide edem ke ido eset. Ke uwụtn̄kpọ, nte ikokụtde ke mme akpa ibuotikọ magazine emi, ndusụk edikabade ẹsio enyịn̄ Abasi, kpa Jehovah, ẹfep, ẹkabade ẹwet mme utọ udorienyịn̄ nte “Abasi” m̀mê “Ọbọn̄” ke itie esie. Mmọdo, ke ini emekde Bible, yom enye oro ẹkabarede ke usem emi ọsọpde an̄wan̄a owo, emi edinyụn̄ anamde enem owo ndika iso n̄kot.

Ata ediwak mme andikot Bible ke ofụri ererimbot ẹkụt ke New World Translation etie ntre.a Da akanieren kiet ke Bulgaria ke uwụtn̄kpọ. Enye ama odụk mbono esop Mme Ntiense Jehovah ẹnyụn̄ ẹnọ enye New World Translation. Enye ọkọdọhọ ke oro ebede ete, “Mmokot Bible ke ediwak isua, edi akanam n̄kotke edikabade Bible emi ọsọpde an̄wan̄a owo onyụn̄ otụkde owo ntem.”

Edinam 3 Bọn̄ akam

◼ Bible ekeme ndinen̄ede n̄n̄wan̄a fi edieke eben̄ede Andinyene ete an̄wam fi, nte andiwet psalm ekeben̄ede ete: “Fụhọde mi enyịn, ndien nyokụt mme utịbe-n̄kpọ ke n̄wed ido [m̀mê, mbet] fo.” (Psalm 119:18) Bọn̄ akam nọ Abasi kpukpru ini oro okotde N̄wed Abasi ben̄e enye an̄wam fi ọfiọk Ikọ esie. Afo emekeme ndikọm enye n̄ko ke ndinọ nnyịn Bible, koro edieke Bible mîkpodụhe, nnyịn ikpọfiọkke Abasi.—Psalm 119:62.

Ndi Abasi esikop utọ akam oro? Kere ban̄a se iketịbede inọ n̄kpri nditọeka iba ke Uruguay. Se Bible etịn̄de ke Daniel 2:44 ikan̄wan̄ake mmọ, ntre mmọ ẹma ẹbọn̄ akam ẹnọ Abasi ẹte ọdọn̄ owo edinam an̄wan̄a mmimọ. Ke adan̄aemi mmọ mîkakam ikụbike kan̄a Bible mmọ, Mme Ntiense Jehovah iba ẹma ẹdi ufọk mmọ, ẹdikot kpasụk itien̄wed emi mmọ ẹkebọn̄de akam ẹban̄a, ẹnyụn̄ ẹnam an̄wan̄a ke Obio Ubọn̄ Abasi ayada itie ukara owo.b N̄kpri nditọeka iban emi ẹma ẹnen̄ede ẹnịm ke Abasi ama eyere akam mmimọ.

Edinam 4 Kot kpukpru usen

◼ Owo kiet emi esisiode n̄wed ama okụt ke “ata ediwak owo ẹma ẹbụmede ẹkedep Bible” ke edinam oyomonsia ama eketịbe ke United States ke September 11, 2001. Ediwak owo ẹsikot Ikọ Abasi ke ini afanikọn̄ kpọt. Edi Bible ke idem esiemmọ esịn udọn̄ ọnọ nnyịn ndikot Ikọ Abasi kpukpru usen, ete: “Kûyak n̄wed mbet emi ọwọrọ ọkpọn̄ inua fo; edi kere enye ke uwemeyo ye ke okoneyo, man afo ekpeme ndinam kpukpru se ẹwetde ke esịt: koro ntem ke afo edikụt unen ke usụn̄ fo, onyụn̄ etịm anam.”—Joshua 1:8.

Ẹkeme ndimen ufọn edikot Bible kpukpru usen ndomo ye owo emi ekenyenede ifehesịt, ndien ebiere ndisidia nti udia. Ndi ubiere emi ayanam ufọn ọnọ enye edieke enye esidiade nti udia n̄kukụre ke ini emi ikpanesịt abiakde enye? Baba. Ana enye esidia nti udia kpukpru ini edieke enye oyomde ndinen̄ede mbọ ufọn. Kpasụk ntre, ndikot Bible kpukpru usen ayan̄wam fi ‘okụt unen.’

Edinam 5 Kot ke nsio nsio usụn̄

◼ Idiọkke nditọn̄ọ ke Genesis n̄kot nsịm Ediyarade, edi ekeme ndinem ndikot enye ke usụn̄ en̄wen. Ẹnọ ekikere ifan̄ mi.

Kot ban̄a akpan owo ke Bible. Kot kpukpru ibuot n̄wed m̀mê mme n̄wed Bible emi ẹtịn̄de n̄kpọ ẹban̄a akpan owo kiet emi akatuakde ibuot ọnọ Abasi, utọ nte:

• Joseph: Genesis 37-50.

• Ruth: Ruth 1-3.

• Jesus: Matthew 1-28; Mark 1-16; Luke 1-24; John 1-21.c

Kot ban̄a akpan n̄kpọ kiet. Kot mme itie N̄wed Abasi oro ẹban̄ade n̄kpọ oro. Ke uwụtn̄kpọ, nam ndụn̄ọde ban̄a akam, ndien ekem kot item oro Bible ọnọde aban̄a akam, ọkọrọ ye ediwak akam oro ẹdude ke Bible.d

Kot uyo ọwọrọ. Afo emekeme ndinen̄ede mbọ ufọn edieke okotde Bible uyo ọwọrọ. (Ediyarade 1:3) Ẹmekam ẹkeme nditie nte ubon n̄kot uyo ọwọrọ, ẹdeme mme ufan̄ikọ mîdịghe ẹdọhọ nsio nsio owo ke ubon ẹkot se nsio nsio owo oro ẹkotde ẹban̄a ẹtịn̄de. Ndusụk owo ẹsima ndikpan̄ utọn̄ n̄kop edikot Bible oro ẹmụmde ẹdọn̄ ke usan m̀mê ke ọkpọ umụmikọ. N̄wan kiet ọdọhọ ete: “Ama ọsọn̄ mi nditọn̄ọ ndikot Bible, ntre mma ntọn̄ọ ndikpan̄ utọn̄ nnọ edikot Bible oro ẹmụmde ẹdọn̄ ke usan m̀mê ọkpọ umụmikọ. Idahaemi, mmedikụt ke Bible enem akan edinem n̄wed mbụk.”

Edinam 6 Tie kere

◼ Nte uwem etiede itọk itọk mfịn, ọkọrọ ye mme n̄kpọ oro ẹtịmerede mme owo, iyakke mme owo ẹsitie ẹkere n̄kpọ. Edi ukem nte anade udia oro idiade ataha man ọnọ nnyịn nsọn̄idem, ana isitie ikere se ikotde ke Bible man ibọ ufọn. Nnyịn inam emi ke ndibụp idem nnyịn mme mbụme nte: ‘Nso ke emi ekpep mi aban̄a Jehovah Abasi? Didie ke ebehe mi? Didie ke n̄keme ndida se n̄kpepde n̄n̄wam mbon en̄wen?’

Ndikere n̄kpọ ntre ayanam etop Bible osụhọde odụk nnyịn esịt onyụn̄ anam inen̄ede ikop idatesịt edikot Ikọ Abasi. Psalm 119:97 ọdọhọ ete: “Mmama ido [m̀mê, mbet] fo didie! enye ke ntie n̄kere ofụri usen.” Andiwet psalm nditie n̄kere n̄kpọ ama anam enye eti se enye okokotde ke N̄wed Abasi ofụri usen. Emi ama anam enye enen̄ede ama se enye ekekpepde.

Edinam 7 Dọhọ owo anam Bible an̄wan̄a fi

◼ Abasi idorike enyịn ke nnyịn iyọfiọk ikọ esie ọyọhọ ọyọhọ ke idem nnyịn. Bible ke idemesie enyịme ke “ndusụk n̄kpọ ẹdu [ke Bible] eke ẹsọn̄de owo ndifiọk.” (2 Peter 3:16) N̄wed Utom etịn̄ aban̄a akwa owo ukara Ethiopia emi mîkọfiọkke se itie emi enye okokotde ke Bible ọwọrọde. Abasi ama ọdọn̄ asan̄autom Esie akan̄wam enye, ndien emi ama anam owo Ethiopia oro “[ọnyọn̄] esie ke idatesịt.”—Utom 8:26-39.

Afo n̄ko emekeme ndinen̄ede mbọ ufọn nto edikot Bible edieke ọdọhọde owo anam se afo okotde an̄wan̄a fi. Edieke oyomde ẹdikpep fi Bible ke mfọn, dọhọ Mme Ntiense Jehovah ke edem mbufo mîdịghe wet leta nọ ẹsọk kiet ke otu mme adres oro ẹdude ke page 4 ke magazine emi.

[Mme Ikọ Idakisọn̄]