Mme Ini Ẹkpụhọde
1 Bible asian nnyịn ete ke “ido ererimbot emi ke ebebe efep.” (1 Cor. 7:32) Oro edi akpanikọ didie ntem mfịn! Idem ke eyouwem nnyịn, nnyịn imokụt ikpọ ukpụhọde ke ekikere ye ido mme owo ke kpukpru ikpehe n̄kaowo. Edieke nnyịn iyomde ndikụt unen ke ndida etop Obio Ubọn̄ nsịm mmọ, usụn̄ unyene nneme nnyịn ana asan̄a ekekem ye mme ini oro ẹkade-ka iso ndikpụhọde. Nnyịn iyom nditịn̄ eti mbụk ke usụn̄ oro edemerede mme owo udọn̄ onyụn̄ osịmde mmọ esịt.
2 Ke mme isua ẹmi ẹkebede, ke ediwak idụt utom unọ ikọ ntiense ama okpụhọde koro, ke ata ekese idaha, mme owo ẹkedu uwem emi okotịmde etie emem emem, ẹma ẹnyụn̄ ẹnyene ifụre. Ido ukpono ama enyene edisana itie ke uwem mmọ. Ẹma ẹnen̄ede ẹnyene ukpono ẹnọ Bible. Ke mme ini oro edinọ ikọ ntiense ekpere ndidi kpukpru ini ekesibuana edifan̄a mme n̄kpọ ẹban̄ade ukpepn̄kpọ. Mfịn, uwem mme owo ẹdu ke ndutịme. Ido ukpono edidi n̄kpọ nsahi ke ndusụk idụt. Ibat ibat owo ẹnyene mbuọtidem ke Bible. Ke mme ebiet ẹmi, ukpepn̄kpọ edito ke unam mforo owo amabiat mbuọtidem ke Abasi.
3 Esenyịn kiet oro asan̄ade-san̄a ọkọdọhọ ete: “Idahaemi, etie nte mme owo ẹsobo ata ediwak mfịna ye nsọn̄ọn̄kpọ ke uwem anam nnyịn inyene ndikpep mmọ nte ẹdude uwem.” Nte ido edide mme n̄kpọ oro mme owo ẹsọpde ndikere mban̄a edi idemmọ, ubon mmọ, ye mme editịmede esịt mmọ. Mme n̄kpọ ẹmi ke mmọ ẹsiwak nditịn̄ n̄kan ke ini mmọ ẹsopde idem ọtọkiet. Oyom nnyịn inyene oro ke ekikere ke utom unọ ikọ ntiense nnyịn.
4 Obio Ubọn̄ Abasi Edi N̄kukụre Idotenyịn Akpanikọ Kaban̄a Ini Iso: Ata ediwak owo ẹnyene esisịt mbuọtidem ke ukara owo. Mmọ ẹkere ke idotenyịn idụhe kaban̄a edikụt ererimbot oro ọfọnde akan ke eyouwem mmimọ. Nsunsu ido ukpono omokpu ndinọ mmọ isọn̄ ekededi kaban̄a idotenyịn. Oro edi ntak emi n̄kponn̄kan udọn̄ ubonowo edide ndikop eti mbụk aban̄ade Obio Ubọn̄ Abasi. Wụt nte enye ke akpatre edidade usọbọ ọsọk kpukpru mfịna oro ubonowo osobode.
5 Bible Edi N̄kukụre Ebiet Ndausụn̄ Oro Ẹkemede Ndiberi Edem: Mfịn mme adausụn̄ ẹmi ẹberide edem ke ọniọn̄ owo ye akwa ifiọk ererimbot ẹda ediwak owo ẹtụn usụn̄. Mme owo ifiọkke kan̄a ite ke “owo eke asan̄ade inyụn̄ ikemeke ndinen̄ede ikpat esiemmọ.” (Jer. 10:23) Ata eti ukpepn̄kpọ oro mmọ ẹkemede ndikpep edi nte ke ana mmọ ‘ẹbuọt idem ye Jehovah ke ofụri esịt; inyụn̄ iberike edem ke asian mmọ.’ (N̄ke 3:5) Ke adan̄aemi mme ini ẹkpụhọrede, Bible ikpụhọkede. Ntem, nnyịn ikpenyene ndikama Ikọ Abasi kpukpru ini ke utom ukwọrọikọ nnyịn, ikpep mbon en̄wen ndiwụt esịtekọm ke ndausụn̄ esie eke odudu spirit Abasi. (2 Tim. 3:16, 17) Man iyọhọ uduak oro, ana nnyịn inam mme owo ẹkụt nte Bible edide akpan n̄kpọ ebe ke nditịn̄ mban̄a enye ke nneme nnyịn, idade enye ibọrọ mme mbụme mmọ, inyụn̄ itịn̄ ufọn oro odude ke ndikpep enye nnyụn̄ nda ataata ọniọn̄ esie nsịn ke edinam.
6 Idem ye mme ini ẹkpụhọrede mfịn, uduak nnyịn ke utom ukwọrọikọ osụk edi ukem. Nnyịn inyene ndikwọrọ eti mbụk Obio Ubọn̄, ibọp mbuọtidem ke Ikọ Abasi, inyụn̄ in̄wam mbon en̄wen ẹkụt ufọn edikpep Bible ye nnyịn. Ana se nnyịn itịn̄de enyene n̄kpọ ndinam ye udọn̄ eke ndondo emi eke mbon oro nnyịn inọde ikọ ntiense. Ke ndinam emi, nnyịn imekeme ndidi mme andibuana eti mbụk ye mbon en̄wen ndien ke ntem ikọ ediwak owo.—1 Cor. 9:19, 23.