Nam ke Ofụri Esịt!
1 Nnyịn imenyene akpakịp ntak ndikọm Jehovah. Mmọemi ẹsịne mme n̄kpọ oro enye akanamde ke edem, anamde idahaemi, edinyụn̄ anamde ọnọ nnyịn ke ini iso. Nso ke esịtekọm oro nnyịn inyenede okponụk nnyịn ndinam? Psalm David kiet ọbọrọ ete: “Nyekọm Jehovah kpukpru ini: itoro esie eyesụk atak mi ke inua.”—Ps. 34:1.
2 Bible owụt in̄wan̄în̄wan̄ nte ke ẹnọ nnyịn ewụhọ ndikwọrọ ikọ. Edi utom emi ke nnyịn inam ke “ofụri esịt, nte n̄kpọ eke ẹnamde ẹnọ Ọbọn̄.” (Col. 3:23) Nnyịn idinam n̄kpọ okpon didie ke utom ukwọrọikọ edieke inen̄erede inam ke ofụri esịt? Ke ini ikerede iban̄a ima oro Jehovah owụtde nnyịn, esịt onụk nnyịn ke akpanikọ ndinyene ifịk ifịk udeme ke nditịn̄ mban̄a enye ye mme ọsọn̄urua uduak esie nnọ mbon en̄wen! Onụk nnyịn ndinam se nnyịn ikemede.
3 Ekpedi se iwụtde ifiọk ndidori enyịn nte ke owo emi anamde utom ke ofụri esịt oyom ndiwụk ntịn̄enyịn ke edisana utom. Nte an̄wan̄ade, andiwet psalm emi ekekerede n̄kpọ ke usụn̄ oro ọkọdọhọ ete: “Ntoro fi utịm ikatiaba ke usen.” (Ps. 119:164) Mbon oro ẹnyenede ukem ekikere andiwet psalm ẹsiyom ndida mme ifet oro ẹbererede ntoro Jehovah. Nte mme idaha mmọ ẹyakde, mmọ ẹnam utom ifịk ifịk ke udomo ẹkemede.
4 Mme Ifet Nditoro Jehovah Ẹkakan Nnyịn Ẹkụk: Inaha nnyịn ibet tutu nnyịn inyenyene ebuana ke utom eke enyịnusụn̄ ke enyịnusụn̄ ndien nnyịn ikwọrọ eti mbụk. Oyom mme nsan̄autom, nsan̄a ufọkn̄wed, iman, ye mme ọdiọn̄ọ nnyịn kpukpru ẹkop etop Obio Ubọn̄. Ke ini ikade isan̄, nnyịn imekeme nditọn̄ọ nneme oro ekemede ndida n̄kosịm edinọ ekemmọ mbonisan̄, mme anamutom ke ufọkisen, mme anamutom ke itie unyamudia, mme anamutom ke itie unyam aranuwat, m̀mê mme awat taksi ikọ ntiense. Ke ini idude ke ufọk, nnyịn imekeme ndinọ mme mbọhọidụn̄ m̀mê isenowo ikọ ntiense. Edieke inade ke nna udọn̄ọ ke ufọkibọk, mme nurse, mme dọkta, ye mbon udọn̄ọ eken ẹdu ẹmi nnyịn ikemede ndikwọrọ ikọ nnọ ke ido nneme.
5 Ikọ Ntiense Ido Nneme Esinyene Utịp: Ntiense iba ẹkesan̄a ke an̄wa mbre usen kiet ẹnyụn̄ ẹtọn̄ọ nneme ye akparawa kiet emi akanamde isan̄ ye eyen esie. Nte ini akade enye ye n̄wan esie ẹma ẹdidiọn̄ọ akpanikọ. Akparawa oro ke ukperedem ama ediyarade ete ke esisịt ini mbemiso imọ ikosobode ye Ntiense iba oro ke akpa ini, imọ ima ibọn̄ akam inọ Abasi, iben̄e ite, ‘Edieke afo odude, mbọk nam mi mfiọk fi.’ Enye ada n̄kpọntịbe an̄wa mbre emi nte ibọrọ emi Jehovah ọnọde ke akam esie.
6 Mbon oro ẹnyenede udọn̄ ofụri esịt ndin̄wam mbon en̄wen ke n̄kan̄ eke spirit ẹkop akwa idatesịt. Mmọ ẹdiọn̄ọ ẹte ke utọ utom oro ẹnamde ke “ofụri esịt” mi enem Jehovah esịt.—1 Chron. 28:9.