Akananam Nnyịn Inyeneke Akpakịp N̄kpọ eke Spirit Ntem!
1 Ọdọn̄ ata ediwak owo ndikụt usen oro mmọ ẹdikemede ndidọhọ ẹte, “Akananam nnyịn inyeneke akpakịp n̄kpọ ntem!” Ke esịt mmọ, usen oro edidi ke ini oro mmọ ẹnyenede akpakịp n̄kpọ obụkidem, ayakde mmọ ‘ẹda nduọkodudu, ẹdia, ẹnyụn̄ ẹn̄wọn̄, ẹnyụn̄ ẹdat esịt.’ (Luke 12:19) Ke edide isio, ata idahaemi nnyịn imekeme nditịn̄ ke usụn̄ifiọk eke spirit ite ke nnyịn inanake eti n̄kpọ ndomokiet. (Ps. 34:10) Didie ke oro ekeme ndidi ntre?
2 Mme N̄ke 10:22 ọdọhọ ete ke “ufọn Jehovah ofori owo.” Nnyịn ẹmi ikụtde utọ mfọn Abasi oro imekeme ndidọhọ ke akpanikọ ite ke Abasi ‘ọnọ nnyịn kpukpru n̄kpọ uwak-uwak, ete idara ke esịt.’ (1 Tim. 6:17) Emi anam nnyịn idi mbon ẹmi inyenede n̄kpọ ikan ke isọn̄!
3 Ndibat Mme Edidiọn̄ Nnyịn: Ibat ibat owo ke otu nnyịn ẹnyene akpakịp n̄kpọ obụkidem. Edi, nnyịn imenyene edidiọn̄ sia nnyịn mîtịmekede esịt ikaha iban̄a mme n̄kpọ oro nnyịn iyomde ke usen ke usen. Jehovah ọfiọk mme n̄kpọ oro nnyịn iyomde, enye onyụn̄ ọn̄wọn̄ọ ndinọ mmọ. (Matt. 6:31-33) Nsọn̄ọ oro enye ọnọde anam nnyịn inyene ifụre ekikere oro enen̄ede ọsọn̄ urua.
4 Nte ededi, mme edidiọn̄ eke spirit nnyịn ẹkam ẹnen̄ede ẹkpon ẹkan. Uwem nnyịn ọkọn̄ọ ke udia eke spirit emi otode Jehovah. (Matt. 4:4) Mbon oro ẹberide edem ke ererimbot kaban̄a udia eke spirit ẹsisan̄a biọn̄ ke adan̄aemi nnyịn idiade inyụn̄ in̄wọn̄de ikop uyụhọ. (Isa. 65:13) “Asan̄autom emi anamde akpanikọ” anam nnyịn inyene anana-utịt ifiọk oro adade osịm nsinsi uwem.—Matt. 24:45; John 17:3.
5 Ọsọn̄urua itie nditọete ofụri ererimbot nnyịn anam inyene ufiop ufiop ebuana eke ima ima nditọete iren ye iban ẹmi ẹdụn̄de ke kpukpru ikpehe isọn̄. (John 13:35) Esop n̄kann̄kụk edi ebiet emem, emi nnyịn ikemede ndikụt ndọn̄esịt ye nduọkodudu. Mbiowo ke ẹkpeme ẹyom ufọn ukpọn̄ nnyịn, ẹn̄wamde nnyịn ndise mban̄a ediwak orụk mfịna. (Heb. 13:17) Nnyịn ndisan̄a n̄kpere nditọete nnyịn esisụn̄ọ ke nsịnudọn̄ edem mbiba, ọsọn̄ọde nnyịn idem ndiyọ.—Rome 1:11, 12.
6 Idem utom oro nnyịn inamde edi edidiọn̄. Ediwak utom idịbi udia ẹfefek owo ẹnyụn̄ ẹdi ikpîkpu. Ndibuana eti mbụk ada idatesịt ọsọk mbon en̄wen onyụn̄ ada inemesịt ọsọk nnyịn. (Utom 20:35) Nnyịn ke akpanikọ imekeme ndikụt se ifọnde ke kpukpru ọkpọsọn̄ utom nnyịn.—Eccl. 2:24.
7 Akande kpukpru, nnyịn imenyene utịbe utịbe idotenyịn kaban̄a ini iso. (Rome 12:12) Nnyịn ke isak iso ise mfọnmma obufa ererimbot eke edinen ido, emi nnyịn ididude uwem ye mbonima nnyịn ke inemesịt ye emem ke nsinsi! Idotenyịn emi edi n̄kpọuto oro ọsọn̄de urua akan n̄kpọ ekededi oro ererimbot enyenede ndinọ.—1 Tim. 6:19.
8 Didie ke Nnyịn Ikeme Ndiwụt Esịtekọm Nnyịn? Nnyịn ikemeke tutu amama ndinọ Jehovah usiene ke se enye anamde ọnọ nnyịn. Nnyịn n̄kukụre ikeme ndiwụt esịtekọm nnyịn ebe ke (1) ndikọm enye kpukpru usen kaban̄a mfọnido esie oro owo mîdotke (Eph. 5:20), (2) ndiwụt ima nnyịn ebe ke ndinam item (1 John 5:3), (3) ndinam enyịn̄ esie asana ebe ke ndikwọrọ eti mbụk (Ps. 83:18), ye (4) ndinọ esop Christian ibetedem ebe ke edidianakiet ofụri esịt nnyịn.—1 Tim. 3:15.
9 Nnyịn imenyene kpukpru ntak ndidi mbon oro ikopde inemesịt ikan ke isọn̄. (Ps. 144:15b) Akpakam ido, eduuwem, ye utom nnyịn ẹwụt idatesịt oro nnyịn inyenede ke paradise eke spirit nnyịn. Akananam nnyịn inyeneke akpakịp n̄kpọ ntem!