Ndinọ Idem Nnyịn Unyịme Unyịme
1 David andiwet psalm ama etịn̄ prọfesi ete ke ikọt Jehovah “ẹyenọ idemmọ unyịme unyịme,” oro edi, nte “usọp usọp mme andinyịme.” (Ps. 110:3, ikọ idakisọn̄ NW) Ke akpanikọ emi ke osu ke ebuana nditọete ofụri ererimbot nnyịn. Ke isua kiet kiet ke ofụri isua utom inan̄ ẹmi ẹbede, ikọt Jehovah ẹsịn se ikande biliọn hour kiet ke ndisuan eti mbụk Obio Ubọn̄. Ndien ediwak usụn̄ ẹdu, ke adianade ye utom edikwọrọ ye edinam mbet, emi nnyịn ikemede ndinọ idem nnyịn unyịme unyịme ndin̄wam mbon en̄wen.
2 Mme Usụn̄ Ẹmi Nnyịn Ikemede Ndiwụt Unyịme Nnyịn: Ndusụk owo ke esop ẹkeme ndiyom un̄wam man ẹka mme mbonoesop. Ntak mûnọhọ idem unyịme unyịme ndinam mmọ ẹsan̄a ye afo? Mmọ eken ẹkeme ndidi mbon udọn̄ọ, mbon n̄kpọnnam, m̀mê ẹdu ke ufọkibọk. Nte afo emekeme ndinam usio-ukot ndika n̄kese mmọ m̀mê ndin̄wam ke ndusụk usụn̄? Owo m̀mê ubon ekeme ndidu emi oyomde nsịnudọn̄. Nte afo ama ekere aban̄a edinọ mme utọ owo oro ikot ndibuana ke ukpepn̄kpọ ubon mbufo ke ini ke ini? Asiakusụn̄ m̀mê asuanetop ekeme ndiyom nsan̄a ke utom ukwọrọikọ. Ntak mûdọhọke ke iyasan̄a ye enye ke an̄wautom? Mmọemi ẹdi ndusụk usụn̄ ẹmi nnyịn ikemede ndifọn ido unyịme unyịme ye mmọemi ẹtode ke ufọk mme andinịm ke akpanikọ.—Gal. 6:10.
3 Nditọete iren ẹkeme ndiwụt unyịme mmọ ndidi se ẹdade ẹnam n̄kpọ ke esop Jehovah ebe ke ndidomo ndida n̄kekem ye se inamde owo odot nte mbiowo ye mme asan̄autom unamutom. (1 Tim. 3:2-10, 12, 13; Titus 1:5-9) Nte nnyịn ikade iso ndiwak ke ibat, udọn̄ odu kaban̄a nditọete iren ẹmi ẹdotde ẹmi ẹnyịmede ndida iso ke ukwọrọikọ ye ukpepn̄kpọ ye ke ndibọk erọn̄ ke esop.—1 Tim. 3:1.
4 Eyedi ndusụk nnyịn imekeme ndinọ idem nnyịn ke utom Jehovah ke udomo etịmde okpon ebe ke ndisịn enyịn̄ nte mme asiakusụn̄ unọ un̄wam ke ini ke ini. Ndien ekem, ye mme ukpụhọde ifan̄ ẹmi ẹwụtde eti ibuot ke ndutịm nnyịn, nnyịn imekeme ndika iso nnam ntre mîdịghe ikam idụk utom usiakusụn̄ ofụri ini. Nte idaha nnyịn ẹdi utọ oro ẹkpeyakde nnyịn iwọrọ ika ebiet oro udọn̄ okponde akan kaban̄a un̄wam? Nte nnyịn imekeme ndinọ idem nnyịn ndinam utom ke Bethel ndien ke ntem itịpde n̄kpọ nnennen nnennen isịn kaban̄a n̄kọri utom ofụri ererimbot? Ẹnam ekese n̄ko ke edibọp mme Ufọkmbono Obio Ubọn̄, mme An̄wa Mbono, ye mme ufọkutom n̄kọk itieutom ke ofụri ererimbot, ẹmi ẹnen̄erede ẹyom unyịme ndinam utom. Ẹsinen̄ede ẹdara mbon oro ẹnọde idemmọ ndinam nti utom ẹmi, mmọ ẹnyụn̄ ẹbọ edidiọn̄ akamba akamba!—Luke 6:38.
5 Mmọemi ẹdi mme ini oro ẹduaide owo idem. Ebede ke spirit esie, Jehovah ke ada ikọt esie oro ẹnọde idem unyịme unyịme anam utịbe utịbe utom ke isọn̄! Ini ekededi oro Jehovah, ebede ke esop esie, ọnọde ikot ndibuana ke n̄kaiso utom Obio Ubọn̄, ọfọn ndibụp idem nnyịn, ‘Nte ami ke nsụk nnọnọ idemmi unyịme unyịme?’ Do nnyịn ikpenyene ndidụn̄ọde esịt ye mme idaha nnyịn ke akam. Uten̄e Abasi nnyịn oyonụk nnyịn ndinam kpukpru se nnyịn ikemede ndinam ke edisana utom, ntem inamde esịt Jehovah enen̄ede adat!—Zeph. 3:17.