Ndinọ Mme Owo eke Kpukpru Usem ye Ido Ukpono Ikọ Ntiense
1 Mme Christian ke akpa isua ikie ẹma ẹnọ mme owo ẹmi ẹkesemde mme usem eken ẹmi ẹkenyụn̄ ẹdọhọde nte ibuanade ke nsio nsio ido ukpono, ikọ ntiense. Nte utịp, “etisịm ọyọhọ isua 100 eyedi kpukpru mbahade obio ukara oro ẹdoride adan̄a ye Mediterranean ẹma ẹnyene otu mme Christian ke esịt esie.”—History of the Middle Ages.
2 Ke Nigeria, ediwak owo ẹsem ediwak usem ke ẹsiode Ikọmbakara ẹfep. Ata ediwak owo ẹtuak ibuot ke nsio nsio ido ukpono. Ke ntak nsio nsio usem ye ido ukpono ẹmi, enen̄ede edi n̄kpọ-ata ndifiọk nte ẹkpenyenede nneme ẹnyụn̄ ẹnọde kpukpru orụk owo ẹmi ikọ ntiense ke ini isobode ye mmọ. Ke nditịm ntịn̄, nnyịn imekeme ndinyene efakutom isụn̄utom ke n̄kann̄kụk nnyịn. Didie ke nnyịn ikeme nditiene mme ewụhọ Jesus ‘ndikwọrọ nnọ mbio obio, nnyụn̄ ndi ntiense’ nnọ mme owo eke kpukpru usem ye ido ukpono?—Utom 10:42.
Ndinọ Mme Owo Ẹmi Ẹsemde Usem En̄wen Ikọ Ntiense
3 Ndikan Ubiọn̄ọ Otode Usem: Eyịghe idụhe nte ke ediwak owo ẹsinen̄ede ẹsọp ẹkpep n̄kpọ ẹnyụn̄ ẹnyene ntotụn̄ọ ifiọk ke ini ẹnọde mmọ ukpep ke usem emana mmọ. “Kaban̄a gospel” ye man otodo mmọ ‘ẹnyene udeme ke esịt,’ ediwak nditọete iren ye iban ẹmekpep usem en̄wen. (1 Cor. 9:23) Okposụkedi n̄wan emi esemde Chinese okodude ke afan̄ magazine eyenete an̄wan emi esemde Ikọmbakara ke ediwak isua, n̄wan oro ama esịn ndinyịme ukpepn̄kpọ Bible tutu eyenete an̄wan efen, emi ekekpepde Chinese, ọnọ enye n̄wed ke usem oro. Ama ọbọ onyụn̄ enyịme ukpepn̄kpọ ye unana ubiat ini. Se ikanamde ofụri ukpụhọde emi ekedi ukeme udiana eyenete an̄wan oro nditịn̄ ikọ ifan̄ ke usem n̄wan oro.—Men Utom 22:2 domo.
4 Ye eti ntak Enyọn̄-Ukpeme, November 1, 1992, etịn̄ ikọ emi ete: “Ndikpep usem esenidụt . . . idikọrike udomo ukere n̄kpọ n̄kparawa owo ikpọn̄îkpọn̄ edi n̄ko eyenam mmọ ẹtịm ẹnyene ufọn ẹnọ esop Jehovah.” Ediwak mme andibuana ke mme ubon Bethel ke ediwak idụt ẹmenyịme utom edikpep obufa usem. Ke usụn̄ emi, nditọete ẹmedi n̄kpọ un̄wam akpan akpan ke mme esop ẹmi ẹyomde mmọ ẹda usụn̄. Edieke afo ọfiọkde usem efen m̀mê edieke afo enyịmede ndikpep, eyedi afo n̄ko emekeme ndinọ esop m̀mê otu emi esemde usem esenidụt un̄wam.—Matt. 9:37, 38.
5 Eyenete kiet ke Florida, U.S.A., emi ekekpepde usem Vietnamese mbemiso odụkde akpanikọ enyene akwa idatesịt idahaemi ke ndibuana eti mbụk ye mme owo ẹsemde Vietnamese. Man enen̄ede odu ke idaha ndida ifiọk oro enyenede ke usem ndinọ ikọ ntiense, enye ama anam ubon esie ọwọrọ idụn̄ aka ebiet oro udọn̄ okponde akan ke an̄wautom ẹsemde Vietnamese. Toto nte ọkọwọrọ idụn̄, enye ke okụt ata unen ke ndikpep Bible ye ediwak mme owo ẹtode Vietnam.
6 Eyenete an̄wan kiet edide asiakusụn̄ ke California, U.S.A., ama osobo ekese mbon inan ke efakutom esie. Enye ama ọbọn̄ akam oyom un̄wam Jehovah ndikụt owo emi ekemede ndikpep imọ usem idiọn̄ọ man imọ ikeme ndikpep mmọ akpanikọ. Usen kiet ke adan̄aemi ekedepde n̄kpọ ke akwa ufọkurua odude ke mbọhọ oro, n̄kaiferi edide inan emi ekewetde n̄kpọ oyom un̄wam ndikụt n̄kpọ ama asan̄a ebịne enye. Ke ama akan̄wam enye okụt n̄kpọ oro, asiakusụn̄ oro ama ewet n̄kpọ ndiwụt udọn̄ esie ndikpep usem idiọn̄ọ man an̄wam mbon inan ke ikpehe oro. Do n̄wan edide inan do ama ewet, obụp ete, “Ntak emi oyomde ndin̄wam mbon inan?” Eyenete an̄wan oro ama afiak ewet ete: “Ami ndi kiet ke otu Mme Ntiense Jehovah, ndien nyom ndin̄wam mbon inan ẹfiọk Bible. Nyokop inemesịt ndikpep fi Bible edieke afo edikpepde mi usem idiọn̄ọ.” Eyenete an̄wan oro ọdọhọ ete: “Afo ukemeke ndifiọk nte n̄kokopde idatesịt ke ini enye ọkọdọhọde ‘ọfọn.’” Eyenete an̄wan oro ama esika ufọk n̄wan emi kpukpru mbubịteyo ke urua itiokiet. Enye ama ekpep usem idiọn̄ọ, ndien n̄wan inan oro ama ekpep akpanikọ onyụn̄ ana baptism! Oro eketịbe ke isua 30 ẹmi ẹkebede, ndien eyenete an̄wan edide asiakusụn̄ ke osụk ọnọnọ mbon inan ikọ ntiense ndien idahaemi abuana ye esop usem idiọn̄ọ.
7 Edieke afo esemde usem efen ọdọnọ onyụn̄ enyenede udọn̄ ndien ekemede ndiwọrọ idụn̄ n̄ka ebiet emi udọn̄ okponde akan ke efakutom oro, ntak mûnemeke n̄kpọ emi ye mbiowo ke esop. Edieke mmọ ẹkerede ke afo omodot utọ uwọrọ idụn̄ oro, bụp esenyịn circuit m̀mê ebiet odu ekpere emi afo ekemede ndinam utom. Edieke mîdụhe, afo emekeme ndiwet N̄ka, amakam edi mbiowo ẹwet leta ẹdian oro etịn̄de aban̄a se inamde afo odot ye usọ usem fo.—Se Enyọn̄-Ukpeme, August 15, 1988, page 21-23.
8 Ndida Mme N̄kpọutom Oro Ẹnọde Nnam N̄kpọ: Mme n̄wed nnyịn ẹdu ke ediwak usem Nigeria ye eke isenidụt. Ọkpọfọn ndikama mme tract m̀mê ediye uduot ekpri n̄wed Oyom ke mme usem oro ẹsemde ke efakutom fo. Edieke anade in̄wan̄în̄wan̄ nte ke Ikọmbakara idịghe akpa usem owo oro, bụp enye m̀mê ewe usem ke enye esikot. Emi ekeme ndinam fi ọfiọk m̀mê ewe n̄wed ke afo ekeme ndinọ. Ke uwụtn̄kpọ, owo emi esemde Urdu ekeme ndikot Arabic n̄ko.
9 Idem edieke afo mûsemke usem owo emi afo osobode ke utom edinọ ikọ ntiense, afo osụk ekekeme ndinọ enye ikọ ntiense. Didie? Ebe ke ndida ekpri n̄wed Good News for All Nations nnam n̄kpọ. Enye ọdọn̄ọ ibio ibio etop oro ẹmịn̄de-mịn̄ ke usem 59. Nte mme item ẹdude ke page 2 ke ekpri n̄wed oro ẹnamde an̄wan̄a, ke afo ama ọkọfiọk usem enyeneufọk, nam enye okot ntọt oro ẹmịn̄de-mịn̄ ke nnennen page ke ekpri n̄wed oro. Ke enye ama okokot, wụt enye n̄wed ke usem esie. Edieke afo mûnyeneke, wụt enye n̄wed oro ke Ikọmbakara. Dọhọ ete ke imọ iyodomo ndida n̄wed oro ke usem esie mfiak ndi. Bụp enyịn̄ esie, nyụn̄ wet nịm ọkọrọ ye adres. Ndusụk afo emekeme ndinọ esop m̀mê otu oro odude ekpere emi esemde usem oro ntọt emi. Edieke owo ndomokiet emi esemde usem oro mîdụhe emi ediwahade, eyedi afo emekeme ndinyịme n̄kpọ-ata oro, ndusụk ndikam n̄kpep n̄kpọ ye owo oro ebe ke nditiene nse n̄wed oro ke Ikọmbakara.—1 Cor. 9:19-23.
Ndinọ Mme Owo Ẹmi Mîdịghe Mbon Ido Ukpono Christ Ikọ Ntiense
10 Ndinyene ndusụk ifiọk mban̄a idaha ido ukpono owo an̄wam nnyịn ndinọ ikọ ntiense enyenede uforo mban̄a Obio Ubọn̄. N̄wed oro Mankind’s Search for God ọnọ nnyịn ikike ke mme akpan ido ukpono ererimbot man otodo se mme owo ẹnịmde ke akpanikọ an̄wan̄a nnyịn mfọn mfọn ekem ndin̄wam mmọ ẹdisịm ifiọk akpanikọ.
11 Ekebe oro ke akpatre page esịne-esịt emi ọnọ udịm enyịn̄ n̄wed eke idahaemi emi oro esop Jehovah ọnọde man ẹkama ke ndinọ mme owo ẹmi mîdịghe Christian ikọ ntiense. Ke ndikot mme n̄wed ẹmi, nnyịn ifiọk nte ẹdade eti mbụk ẹsobo ye mme owo. Se mînaha ẹfre nte n̄kpọutom oro enyenede ufọn edi n̄wed Reasoning. Page 21-24 ke n̄wed oro ọnọ nti ekikere ke nte ẹkpenamde n̄kpọ ye mbon Buddha, mbon Hindu, mme Jew, ye mbon Muslim.
12 Ndikpeme Se Afo Etịn̄de: Nnyịn ikpenyene ndikpeme mbak idinyene ekikere kiet iban̄a mme owo akpan ido ukpono kiet ebe ke ndibiere nte ke mme ọkpọkpọ edinịm ke akpanikọ mmọ ẹdi ukem ye eke mbon eken oro ẹdude ke ido ukpono oro. Utu ke oro, domo ndifiọk nte owo emi afo adade enyene nneme ekerede n̄kpọ. (Utom 10:24-35) Nte owo Muslim, ẹkebọk Salimoon ndifiọk nte ke Koran edi ikọ Abasi. Edi enye akananam ikekemeke ndinyịme ukpepn̄kpọ Muslim oro ọyọhọ ọyọhọ nte ke awak-mbọm Abasi oyotụhọde mme owo ke hell asakde ikan̄. Usen kiet, Mme Ntiense Jehovah ẹma ẹnọ enye ikot edidụk mbonoesop. Ke ọdiọn̄ọde akpanikọ inikiet inikiet, enye idahaemi anam utom nte ebiowo ke esop Christian.
13 Ke ini inọde mbon oro mînyeneke edinịm ke akpanikọ mme Christian ikọ ntiense, oyom nnyịn ikpeme idem mbak ikọ nnyịn edinam nnyịn itaba ifet edinyene nneme ye mmọ mban̄a eti mbụk. (Utom 24:16) Mme anditiene ndusụk ido ukpono ẹsinen̄ede ẹnyene ifiọk ẹban̄a ukeme ekededi ẹsịnde ndikabade mmọ esịt n̄kpọn̄ mbuọtidem mmọ. Ntre du ke edidemede man okụt mme n̄kpọ ndida nnyene unyịme edem mbiba man otodo edemede mmọ udọn̄ ọnọ ofụri akpanikọ Ikọ Abasi. Mbon mbieterọn̄ ẹyenam n̄kpọ ẹban̄a edisobo eke mfọnido ye in̄wan̄în̄wan̄ edineme akpanikọ.
14 Ikọ oro imekde n̄ko edi akpan n̄kpọ ndikere mban̄a, mbak nnyịn ididianarede mme owo ikpọn̄ etop nnyịn nte mîdotke. Ke uwụtn̄kpọ, edieke ọsọpde-sọp owụt idem nte Christian, andikpan̄ utọn̄ nnọ fi ekeme ke ebe oro ndibuan fi ye mme ufọkabasi Christendom, emi ekemede ndidemede n̄kpọ ubiọn̄ọ. Ufọn ekeme ndidu n̄ko nditịn̄ mban̄a Bible nte “N̄wed Abasi” (NW) m̀mê “Edisana N̄wed Abasi.”—Matt. 21:42; 2 Tim. 3:15.
15 Edieke afo osobode ye owo emi ido ukpono esie mîdịghe eke mme Christian ndien ekere ke imọ itịmke idem ọfọn ndinọ ikọ ntiense ke ebe oro, da ifet oro ndikam mmehe, nọ tract, ẹnyụn̄ ẹsiak enyịn̄ ẹnọ kiet eken. Ekem fiak ka ke usen kiet m̀mê iba ebede, ke ama eketịm idem mfọn mfọn ndinọ ikọ ntiense.—1 Tim. 4:16; 2 Tim. 3:17.
16 Ndinọ Mbon Buddha Ikọ Ntiense: (Se ibuot 6 ke Mankind’s Search for God.) Ukpepn̄kpọ mbon Buddha ẹkpụhọrede akamba akamba to ke anditiene kiet sịm en̄wen. Utu ke ndikwọrọ edidu ata Andibot, Ido Ukpono Buddha ada owo India oro Buddha Gautama, eke ọyọhọ isua ikie itiokiet M.E.N., nte uwụtn̄kpọ ido ukpono. Ke ini enye ke akpa ini okokụtde owo udọn̄ọ, akani eren, ye okpo owo, Gautama ama etịmede esịt aban̄a se uwem ọwọrọde. ‘Nte mme owo ẹkemana n̄kukụre man ẹbọ ufen, ẹkọri ẹsọn̄, ẹnyụn̄ ẹkpan̄a?’ ntre ke enye ekekere. Nte ededi, nnyịn imekeme ndibọrọ mme mbụme oro nnọ mme enyene esịt akpanikọ mbon Buddha ẹmi ẹyomde ndidiọn̄ọ mme ibọrọ.
17 Ke ini enyenede nneme ye owo Buddha, sọn̄ọ yịre ke in̄wan̄în̄wan̄ etop ye in̄wan̄în̄wan̄ akpanikọ oro ẹdude ke akakan ke otu kpukpru ndisana n̄wed, kpa Bible. Ukem nte ata ekese owo eken, mbon Buddha ẹtịm ẹnyene udọn̄ ẹban̄a emem, eti ido uwem, ye uwem ubon, ndien mmọ ẹsiwak ndima nneme ke mme ibuotikọ ẹmi. Emi ekeme ndida n̄kesịm afo ndiwụt Obio Ubọn̄ nte ata usọbọ ke mme mfịna ubonowo.
18 Ke ndusụk ikpehe ikpọ obio ke United States, ediwak mbon China ẹmi ẹnịmde Ido Ukpono Buddha ye mme ukpepn̄kpọ akwaifiọk mbon Edem Usiahautịn ke akpanikọ ẹmebụn̄ọ ẹdụk. Ediwak ẹdi nditọ ufọkn̄wed ẹmi ẹkade ufọkn̄wed ntaifiọk ke United States. Ke ini eyenete an̄wan ke Montana okokụtde eren China kiet ke ufọkurua n̄kpọudia, enye ama ọnọ enye tract ke usem esie onyụn̄ ọdọhọ ke iyekpep Bible ye enye. Eren oro ọkọdọhọ ete: “Ndi afo ọdọhọ Edisana Bible? Ami mmoyom enye ke ofụri uwem mi!” Enye ama ọtọn̄ọ ndikpep n̄kpọ urua oro onyụn̄ odụk mme mbono esop.
19 Ke se ibede isua duop, asiakusụn̄ eyenete an̄wan kiet ke Nevada emekpep nditọ ufọkn̄wed ẹtode China akpanikọ. Ke ini akanamde utom ke ufọkidụn̄ kiet emi enyenede ubet itiaita emi nditọ ufọkn̄wed ẹmi ẹdụn̄ọde, enye ama ọbọn̄ akam ọnọ Jehovah ete an̄wam imọ itọn̄ọ ukpepn̄kpọ ke ubet kiet kiet. Ke ufan̄ urua iba enye ama esikpep n̄kpọ ke nsụhọde n̄kaha ye eyen ufọkn̄wed kiet ke ubet kiet kiet. Usụn̄ edika mbịne oro etịmde ọfọn ye enye edi ndidọhọ ke imọ ima ikụt ọsọ udọn̄ ke otu nditọ ufọkn̄wed—kpukpru mmọ ẹyom emem ye inemesịt. Do enye oyobụp m̀mê udọn̄ mmọ edi oro n̄ko. Mmọ ẹsinyịme kpukpru ini. Enye oyodụri ntịn̄enyịn mmọ owụt ediye uduot ekpri n̄wed Lasting Peace and Happiness—How to Find Them, emi ẹtịmde ẹnọ mbon China. Ke ama ekenịm ukpepn̄kpọ ikotion kpọt, eyen ufọkn̄wed kiet ama asian enye ete ke imọ ima iyom akpanikọ ke anyan ini ndien ke imokụt enye idahaemi.
20 Ndinọ Mbon Hindu Ikọ Ntiense: (Se ibuot 5 ke Mankind’s Search for God.) Ido Ukpono Hindu inyeneke san̄asan̄a ikọ mbuọtidem. Ukpepn̄kpọ akwaifiọk esie etịm awak n̄kukụhọ. Mbon Hindu enyene ekikere abasi-ita-ke-kiet ẹban̄a akpan abasi mmọ Brahman (Brahma Andibot, Vishnu Andinịm Uwem, ye Siva Andisobo). Edinịm ukpọn̄ eke mîkemeke ndikpa ke akpanikọ edi akpan n̄kpọ kaban̄a ukpepn̄kpọ edifiak mmana, emi etiede nte ke ọnọ mbon Hindu ekikere uwem aban̄ade akan̄a. (Se n̄wed Reasoning, page 317-321, ye Enyọn̄-Ukpeme eke May 15, 1997, page 3-8.) Ido Ukpono Hindu ekpep ediyọ n̄kpọ, nte ke kpukpru ido ukpono ẹda ẹsịm ukem akpanikọ.
21 Usụn̄ kiet ke ndinọ owo Hindu ikọ ntiense edi ndinam idotenyịn nnyịn oro ọkọn̄ọde ke Bible emi aban̄ade edidu uwem ke nsinsi ke mfọnmma eke owo ke isọn̄ an̄wan̄a ọkọrọ ye mme ọnọ-uyụhọ ibọrọ ẹmi Bible ọnọde mme akpan mbụme oro ẹsakde iso ẹse ubonowo.
22 Ndinọ Mme Jew Ikọ Ntiense: (Se ibuot 9 ke Mankind’s Search for God.) Ke mîbietke mme ido ukpono eken oro mîdịghe eke mme Christian, Ido Ukpono Mme Jew ọkọn̄ọ ke mbụkeset, idịghe ke n̄ke. Ebede ke N̄wed Abasi Usem Hebrew eke odudu spirit, akpan ebuana odu ke ediyom oro ubonowo oyomde ata Abasi. Ndien kpa ye oro, ke edide isio ye Ikọ Abasi, akpan ukpepn̄kpọ Ido Ukpono Mme Jew eke eyomfịn edi edinịm ukpọn̄ owo eke mîkemeke ndikpa ke akpanikọ. Ẹkeme ndinyene unyịme edem mbiba ebe ke ndisọn̄ọ nte ke nnyịn ituak ibuot inọ Abasi Abraham ye ke ndinyịme nte ke nnyịn isobo mme ukem mfịna ke ererimbot mfịn.
23 Edieke afo osobode owo Jew oro mînyeneke mbuọtidem ke Abasi, ndibụp m̀mê enye ekesikere ntre kpukpru ini ayan̄wam fi ọfiọk n̄kpọ emi edidemede enye udọn̄. Ke uwụtn̄kpọ, eyedi akananam enye ikopke edinam an̄wan̄a oro ọnọde uyụhọ kaban̄a ntak emi Abasi ayakde ndutụhọ odu. Ẹkeme ndisịn udọn̄ nnọ mme Jew oro ẹnyenede esịt akpanikọ ndifiak ndụn̄ọde idaha Jesus nte Messiah, itoho ke ukwan̄ usụn̄ oro Christendom owụtde enye, edi ke usụn̄ oro mme andiwet N̄wed Abasi Usem Greek ẹdide mme Jew ẹwụtde enye.
24 Ndinọ Mbon Muslim Ikọ Ntiense: (Se ibuot 12 ke Mankind’s Search for God.) Mbon Muslim (m̀mê, mbon Moslem) ẹdi mme anditiene Islam (m̀mê, Ido Ukpono Muhammad), emi esịnede edinịm Allah nte akpan abasi mmọ ye edinịm Muhammad (570-632 C.E.) nte akpatre ye ata akpan prọfet esie. Sia mmọ mînịmke ke Abasi enyene eyen, Muslim ẹdiọn̄ọ Jesus Christ nte usụhọde prọfet Abasi, edi ikanke oro. Koran, emi mîsịmke isua 1,400, etịn̄ aban̄a N̄wed Abasi Usem Hebrew ye N̄wed Abasi Usem Greek. Ikpọ mbiet ẹdu ke ufọt Islam ye Ido Ukpono Catholic. Ido ukpono mbiba ẹkpep ukpọn̄ owo eke mîkemeke ndikpa, idaha ndutụhọ ibio ini, ye edidu eke ikan̄ hell.
25 In̄wan̄în̄wan̄ unyịme edem mbiba edi edinịm oro nnyịn inịmde ke akpanikọ nte ke ata Abasi kierakiet odu ye nte ke enye ọkọnọ odudu spirit ẹda ẹwet Bible. Owo emi okotde Koran ye ntịn̄enyịn okụt mme editịn̄ oro ẹtịn̄de ẹban̄a Torah, Mme Psalm, ye Mme Gospel nte ke ẹdi Ikọ Abasi onyụn̄ okot ete ke ẹkpenyene ndida mmọ ntre ẹnyụn̄ ẹkop uyo mmọ. Ntre, afo emekeme ndidọhọ ke imọ iyekpep mmọ ẹmi ye owo oro.
26 Nneme Enye emi ekeme ndifọn ye owo emi ọdọhọde ke idi owo Muslim: “Ami nnyeneke nneme ye ediwak mbon Muslim, edi mmokot n̄kpọ mban̄a ibat ibat ukpepn̄kpọ ido ukpono fo ke n̄wed emi. [Kụbọde ka page 24 ke n̄wed Reasoning.] Enye ọdọhọ ke mbufo ẹnịm ẹte ke Jesus ekedi prọfet edi Muhammad ekedi akpatre ye ata akpan prọfet. Ndi afo emenịm n̄ko ke akpanikọ ete ke Moses ekedi prọfet akpanikọ? [Bet ibọrọ.] Ndi mmekeme ndiwụt fi se Moses ekekpepde oto Abasi aban̄a ọkpọkpọ enyịn̄ Esie?” Ekem kot Exodus 6:2, 3. Ke mfiakn̄ka, afo emekeme ndineme ekpri ibuotikọ oro “One God, One Religion” (Abasi Kiet, Ido Ukpono Kiet), ke page 13 ke ekpri n̄wed The Time for True Submission to God.
27 Mfịn, ediwak owo ẹnam n̄kpọ ke n̄kemuyo ye mme ikọ Isaiah 55:6, emi okotde ete: “Mbufo ẹyom Jehovah, ke ini ẹkemede ndikụt enye, ẹseme ẹkot enye, ke ini enye ekperede.” Emi abuana kpukpru mbon esịt akpanikọ, inamke n̄kpọ m̀mê ewe usem ke mmọ ẹsem m̀mê nso idi idaha ido ukpono mmọ. Nnyịn imekeme ndinịm ke akpanikọ nte ke Jehovah ọyọdiọn̄ mme ukeme nnyịn nte idomode ndika nnyụn̄ “[nnam] kpukpru mme idụt ẹdi mbet.”—Matt. 28:19.
[Ekebe ke page 6]
Mme N̄wed Oro Ẹtịmde Ẹnọ Mbon Oro Mîdịghe Mme Christian
Ido Ukpono Buddha
In Search of a Father (Ekpri n̄wed)
“Sese! Mmanam Kpukpru N̄kpọ Ẹdi Mbufa” (Ediye uduot ekpri n̄wed)
Mbon China
Lasting Peace and Happiness—How to Find Them (Ediye uduot ekpri n̄wed)
Mbon Hindu
From Kurukshetra to Armageddon—And Your Survival (Ekpri n̄wed)
Our Problems—Who Will Help Us Solve Them? (Ediye uduot ekpri n̄wed)
The Path of Divine Truth Leading to Liberation (Ekpri n̄wed)
Victory Over Death—Is It Possible for You? (Ekpri n̄wed)
Why Should We Worship God in Love and Truth? (Ediye uduot ekpri n̄wed)
Mme Jew
A Peaceful New World—Will It Come? (Tract Nọ. 17)
Jehovah’s Witnesses—What Do They Believe? (Tract Nọ. 18)
Will There Ever Be a World Without War? (Ediye uduot ekpri n̄wed)
Mbon Muslim
How to Find the Road to Paradise (Tract)
The Time for True Submission to God (Ekpri n̄wed)