Buana Ọyọhọ Ọyọhọ ke Idọk
1 Mme prọfet Jehovah eke eset ọkọrọ ye Jesus Christ ke idemesie ẹma ẹtịn̄ ẹban̄a utom editan̄ mbok. (Isa. 56:8; Ezek. 34:11; John 10:16) Ẹnam utọ utom emi idahaemi nte ẹkwọrọde eti mbụk Obio Ubọn̄ ke ofụri ererimbot. (Matt. 24:14) Ẹtịm ẹkụt nte mbon oro ẹnamde n̄kpọ Abasi ye mbon oro mînamke n̄kpọ esie ẹsan̄ade isio. (Mal. 3:18) Nso ke emi ọwọrọ ọnọ nnyịn?
2 Ọkpọkpọ Mbiomo: Nnyịn imekeme ndikpep n̄kpọ nto uwụtn̄kpọ Paul, oro akabuanade ọyọhọ ọyọhọ ke ndida usụn̄ ke utom ukwọrọikọ Christian. Enye ama ekere ke imenyene mbiomo ndikwọrọ ikọ man kpukpru owo ẹnyene ifet ndikop eti mbụk nnyụn̄ mbọ edinyan̄a. Emi ama onụk enye ndika iso nnam utom ke ibuot mmọ. (Rome 1:14-17) Ke ikerede iban̄a enyene-ndịk idaha oro ubonowo osobode mfịn, nte nnyịn ikam inen̄ekede inyene n̄kponn̄kan mbiomo ndikwọrọ ikọ nnọ mbon oro ẹdude ke efakutom emi ẹdemede ẹnọ nnyịn?—1 Cor. 9:16.
3 Ini Usọp Usọp Edinam: Ẹkeme ndimen utom ukwọrọikọ ndomo ye utom ediyom nnyụn̄ nnyan̄a uwem. Ẹnyene ndiyom mme owo nnyụn̄ n̄n̄wam mmọ ẹsịm edinyan̄a mbemiso ini ebede akaha. Ini ikponke. Uwem odu ke itiendịk! Eyịghe idụhe Jesus akakpakde mme mbet esie ete: “Ẹben̄e . . . Enyene-idọk ẹte, Enye osio mme anam-utom ọdọn̄ ẹdi ke idọk Esie.”—Matt. 9:38.
4 Ke ẹnyenede ifiọk ẹban̄a nte ini edide usọp usọp mfịn, ediwak mme anamutom Obio Ubọn̄ ẹmenam n̄kọri ke nte mmọ ẹbuanade ke utom unyan̄a uwem emi. Uyen kiet emi ekerede Hirohisa odụn̄ ke ufọk emi eka esie ikpọn̄ esede aban̄a ye n̄kpri nditọeka inan̄. Enye ama an̄wam ubon esie ke n̄kan̄ okụk ke ndidemede ke n̄kanika ita n̄kpọusen man ada mme n̄wedmbụk n̄kpọntịbe ọsọk mme owo. Kpa ye oro, Hirohisa okoyom ndinam ekese ke utom ukwọrọikọ, ntre enye ama ọtọn̄ọ utom usiakusụn̄ ofụri ini. Nte odu mme usụn̄ oro ekemede ndibuana ọyọhọ ọyọhọ ke utom emi owo mîdifiakke inam tutu amama mi?
5 “Ẹsịbe ini omụhọ.” (1 Corinth 7:29) Mmọdo, ẹyak nnyịn inam se ikemede ke ata akpan utom emi ẹnamde ke isọn̄ mfịn—edikwọrọ eti mbụk Obio Ubọn̄ ye edinam mme mbet. Jesus ekemen utom ukwọrọikọ emi odomo ye utom idọk. (Matt. 9:35-38) Ebede ke nnyịn ndibuana ọyọhọ ọyọhọ ke idọk emi, utịp utom nnyịn ekeme ndisịne edin̄wam owo ndikabade ndi ubak akwa otu mme andituak ibuot emi ẹtịn̄de ẹban̄a ke Ediyarade 7:9, 10.