“Ikọ Abasi . . . Enyene Odudu”
1 Apostle Paul ekewet ete: “Ikọ Abasi enyene uwem, onyụn̄ enyene odudu.” (Heb. 4:12, NW) Nso ke ikọ esie ọkọwọrọ? Ikọ Abasi, m̀mê etop oro ẹkụtde ke Bible, ekeme ndinyene ọkpọsọn̄ odudu ke idem mme owo. Ifiọk oro odude ke Bible enyene odudu ndikpụhọde uwem owo nnam ọfọn. Ndọn̄esịt ye idotenyịn oro enye ọnọde ẹdụri mme owo ẹnọ Andinọ-Uwem, kpa Jehovah Abasi. Etop esie ekeme ndinam mbon esịt akpanikọ ẹtọn̄ọ ndisan̄a ke usụn̄ oro adade esịm nsinsi uwem. Nte ededi, man ikụt mme utịp emi, ana nnyịn ida Bible inam n̄kpọ ke ini inọde mbon efen ikọ ntiense.
2 Kot Itien̄wed Abasi ke Kpukpru Ifet: Etie nte ediwak mme asuanetop inamke edi ido mmọ aba ndida Bible nnam n̄kpọ ke enyịnusụn̄. Nte edi ntre ye afo? Sia etiede nte ke ediwak owo inyeneke ini inọ anyan nneme, ndusụk afo amanam edi edinam ofụri ini ndinọ n̄wed kpọt m̀mê sụk nditịn̄ mban̄a itien̄wed Abasi. Nnyịn imesịn udọn̄ inọ kpukpru asuanetop ndisịn ọkpọsọn̄ ukeme ndikot ke nsụhọde n̄kaha ufan̄ikọ kiet ke Bible ke ini ẹnọde ikọ ntiense, ntem ẹyakde owo oro okụt ke etop nnyịn enen̄ede oto Ikọ Abasi.
3 Kpa ye oro edide ibat ibat owo ẹnam edi ido mmọ ndikot Bible, ẹsụk ẹkpokpono enye ke ofụri ofụri. Idem mbon oro ẹyọhọde ye utom ẹsiwak ndida minit kiet m̀mê iba n̄kpan̄ utọn̄ nnọ etop oro ikotde nnennen nnennen ito Ikọ Abasi. Ke ini ẹkotde itien̄wed Abasi emi odotde ufiop ufiop enyụn̄ ẹnamde an̄wan̄a ibio ibio, odudu ikọ Jehovah ekeme ndinyene eti utịp ke idem andikpan̄ utọn̄. Edi didie ke ekeme ndiyịri mme ntọn̄ọikọ fo ye edikot ufan̄ikọ kiet ke Bible?
4 Domo Emi ke Utom Magazine Se: Esenyịn oro asan̄ade-san̄a ama ada N̄wed Abasi anam n̄kpọ ke usụn̄ oro enyenede uforo ke adan̄aemi abuanade ke utom magazine. Enye ama esịn ekpri Bible ke ekpatọfọn̄ esie. Ke ama ọkọnọ magazine onyụn̄ etịn̄ ibio ibio aban̄a ibuotikọ kiet, enye okụbọde Bible ye unana edimen̄e onyụn̄ okot ufan̄ikọ kiet oro enyenede ebuana ye ibuotikọ oro. Emekeme ndinam emi n̄kukụre ke ndibụp, “Nso ke afo ekere aban̄a ọnọ-nsịnudọn̄ un̄wọn̄ọ emi?” ndien ekem aka iso ndikot itien̄wed Abasi kiet oro emekde.
5 Nam edi utịtmbuba fo ndibuana ufan̄ikọ Bible kiet m̀mê iba ye kpukpru mme andikpan̄ utọn̄. Odudu esie oro edemerede owo udọn̄ ekeme ndiberede usụn̄ nnọ mme owo efen efen ndidi se ẹdụride ẹnọ Abasi.—John 6:44.