Editọ ke Ntatubọk Ada Uwak Edidiọn̄ Edi
1 Kpukpru nnyịn imodori enyịn ndikụt ikpọ un̄wọn̄ọ oro ẹdude ke Ikọ Abasi ẹsude. Idem idahaemi, Jehovah ọnọ uwak edidiọn̄ oro anamde nnyịn inyene idatesịt ke uwem. Nte ededi, udomo ufọn oro nnyịn ibọde enen̄ede ọkọn̄ọ ke ukeme oro nnyịn isịnde. Nte Apostle Paul ekesịnde enye, “owo eke ọtọde ke ntatubọk, uwak-uwak ke enye oyonyụn̄ ọdọk.” (2 Cor. 9:6) Kere ban̄a ikpehe iba oro ẹkemede ndida edumbet emi nsịn ke edinam.
2 Ọkpọkpọ Utom Ukwọrọikọ Nnyịn: Ndibuana eti mbụk ye mme owo ke ini inyenede ukeme ndinọ ikọ ntiense ada uwak utịp edi. (N̄ke 3:27, 28) Nte odotde itoro, ediwak owo ke ẹtọ ke ntatubọk ebe ke nditat ebuana mmọ ke utom ukwọrọikọ, esịnede usiakusụn̄ unọ un̄wam m̀mê usiakusụn̄ ofụri ini. Kpukpru nnyịn imekeme nditọ ke ntatubọk ebe ke ndinọ ntịn̄enyịn ke ini ifiakde ika man ikanam kpukpru udọn̄ oro ikokụtde ẹkọri ye ke nditọn̄ọ ukpepn̄kpọ Bible ke ini ekededi oro ifet ebererede. (Rome 12:11) Ndisịn̄ede idem nnyịn ke mme usụn̄ emi osụn̄ọ ke edinyene mme ifiọkutom oro ọnọde nsịnudọn̄ onyụn̄ anam idatesịt oro inyenede ke utom ukwọrọikọ nnyịn ọkọri.
3 Ndinọ Mme Ufọn N̄kpọ Obio Ubọn̄ Ibetedem: Paul eketịn̄ ikọ esie aban̄a ‘editọ ke ntatubọk’ ke ebuana ye edinọ n̄kpọ eke obụk. (2 Cor. 9:6, 7, 11, 13) Mfịn, nnyịn imekeme ndida odudu ye inyene nnyịn nnam ekese man inọ mme ufọn n̄kpọ Obio Ubọn̄ ibetedem. Nnyịn imekeme ndin̄wam ke ndibọp mme Ufọkmbono Obio Ubọn̄ ye mme Ufọk Mbono. Nnyịn imekeme n̄ko ndinọ idem nnyịn unyịme unyịme ndibuana ke ndidiọn̄ mme itie utuakibuot akpanikọ emi nnyụn̄ nnam mmọ ẹsana. Ke adianade do, nnyịn imekeme nditịp n̄kpọ kaban̄a ubiatokụk esop n̄kann̄kụk ọkọrọ ye utom edikwọrọ Obio Ubọn̄ ye edinam mbet eke ofụri ererimbot. Nte kpukpru nnyịn inamde udeme nnyịn, nnyịn ikop inemesịt didie ntem ndikụt akpakịp edidiọn̄ Jehovah ke utom emi Abasi ọnọde!—Mal. 3:10; Luke 6:38.
4 Ikọ Abasi eteme nnyịn ete ‘ifọn ido, inyụn̄ inam nti utom uwak-uwak, inyụn̄ itat ubọk, inyịme ndinọ owo n̄kpọ.’ Nte nnyịn inamde item oro, nnyịn imenyene uwak edidiọn̄ idahaemi. Ke ukem ini oro, nnyịn ‘in̄wana iyom eti isọn̄ inọ idem nnyịn ke ini iso ye uwem eke edide ata uwem’ oro edidide.—1 Tim. 6:18, 19.