Nte Afo ‘Emenyịme’ Ndin̄wam Mbon En̄wen?
1 Jesus ama enen̄ede ekere aban̄a mme owo. Ke ini owo akpamfia ekekpede enye ubọk ete an̄wam imọ, Jesus ama anyanade ubọk otụk enye ete, “mmenyịme, sana.” (Mark 1:40-42; sịghisịghi ubọkn̄wed edi eke nnyịn.) Ke mme usụn̄ ewe ke nnyịn ikeme ndikpebe edu Jesus ndin̄wam mbon en̄wen?
2 Mbon Oro Ẹnyenede Udọn̄: Mme andibuana kiet kiet ke esop ẹnyene udeme ke ndin̄wam mbon oro ẹnyenede udọn̄ ndikabade ndi mme andituak ibuot nnọ Jehovah. Ke ini mbufa owo ẹdide mbono esop, kọm mmọ nyụn̄ mehe ye mmọ. Yom mme usụn̄ ndisịn udọn̄ nnọ mmọ. Toro mmọ ke ibọrọ oro mmọ ẹnọde. Toro mmọ ke ukeme oro mmọ ẹsịnde ke ndida mme edumbet Bible nsịn ke edinam ke uwem mmọ. N̄wam mmọ ẹkụt nte mmọ ẹdinyenede mme ufan akpanikọ ke esịt esop.
3 Ekemmọ Mme Andinịm ke Akpanikọ: “Mmọ emi ẹtode ke ufọk mme andinịm ke akpanikọ” ẹnen̄ede ẹdot ndibọ un̄wam nto nnyịn ke nsio nsio usụn̄. (Gal. 6:10) Ediwak owo ẹyọ mme mfịna unana nsọn̄idem. Ebede ke edika n̄kese oro ọnọde nsịnudọn̄, afo emekeme ndinam mmọ ẹnyene itie ebuana ẹyomde ndien ndusụk an̄wamde mmọ n̄ko ke ata ata usụn̄. Ndusụk owo ẹkeme ndisobo mme mfịna eken ke uwem mmọ. Wụt udọn̄ ebe ke ndida ini n̄kpan̄ utọn̄ nnọ mmọ nnyụn̄ nsọn̄ọ mmọ idem. (1 Thess. 5:14) Mbiowo n̄ko ẹyom edidianakiet nnyịn nte mmọ ẹsede ẹban̄a mme mbiomo mmọ. (Heb. 13:17) Ebede ke ndiwụt edu unyịme ye un̄wam, nnyịn imekeme ndinam ekemmọ mme andinịm ke akpanikọ ‘ẹkop ndọn̄esịt.’—Col. 4:11.
4 Mbonubon: Ke esịt ubon, nnyịn n̄ko ikpodomo ndikpebe edikere mban̄a oro Jesus ekenyenede ọnọ mme owo. Ọkpọsọn̄ edikere mban̄a esinụk mme ete ye eka ‘ndikama nditọ mmọ ke ntụnọ ye item Ọbọn̄.’ (Eph. 6:4) Nditọwọn̄ ẹkeme ndinam udeme mmọ ebe ke ndisọp mben̄eidem ke ekemde ini ukpepn̄kpọ ubon, ini mbono esop m̀mê utom an̄wautom. Nditọ oro ẹkponide ẹkeme ndiwụt esịtmbọm nte Jesus ebe ke ndida ima n̄n̄wam mme ete ye eka mmọ ẹyọ n̄kpọsọn̄ idaha oro usọn̄ adade edi. Ebede ke emi ye ke mme usụn̄ efen, kpukpru nnyịn imekeme ‘ndikpep ndinam se idotde ye mbon ufọk nnyịn.’—1 Tim. 5:4.
5 Nte nnyịn ikpebede Jesus ke ndin̄wam mbon efen, nnyịn imekeme ndisụhọde mme mfịna nnyụn̄ ndụri ubon nnyịn ye esop ndian ọtọkiet. Ke edide akpan n̄kpọ akan, nnyịn inọ Jehovah, “Ete mbọm ye Abasi kpukpru ndọn̄esịt,” ukpono.—2 Cor. 1:3.