Nam Ẹdiọn̄ọ Akpanikọ Aban̄ade Jesus
1 Mme Christian oro ẹyetde aran ọkọrọ ye nsan̄a mmọ ẹdide mme erọn̄ en̄wen, ‘ẹyịre ẹmụm ikọ-ntiense Jesus ẹkama.’ (Edi. 12:17) Emi edi akpan utom, sia edinyan̄a otode Jesus kpọt.—John 17:3; Utom 4:12.
2 ‘Usụn̄, Akpanikọ, ye Uwem’: Jesus ọkọdọhọ ete, “Ami ndi usụn̄ ye akpanikọ ye uwem: owo baba kiet itieneke Ete, ibọhọke ebe ke Ami.” (John 14:6) Nnyịn ikeme ndisan̄a n̄kpere Abasi ke akam nnyụn̄ nnyene eti itie ebuana ye Enye n̄kukụre ebe ke Jesus emi edide “usụn̄.” (John 15:16) Jesus edi “akpanikọ” koro mme ntịn̄nnịm ikọ ye mbukpọn̄ n̄kpọ oro ẹdude ke N̄wed Abasi Usem Hebrew ẹma ẹkabade ẹdi akpanikọ ke enye. (John 1:17; Col. 2:16, 17) Ke akpanikọ, akpan uduak ata ntịn̄nnịm ikọ edi ndinam akpan udeme oro Jesus enyenede ke edisu uduak Abasi an̄wan̄a. (Edi. 19:10) Ke adianade do, Jesus edi “uwem.” Man ibọ enọ nsinsi uwem, ana kpukpru owo ẹnyene mbuọtidem ke uwa ufak esie.—John 3:16, 36; Heb. 2:9.
3 Adaibuot ye Edidem Emi Adade Ubọn̄: Ana mme owo n̄ko ẹdiọn̄ọ ẹban̄a akwa ubom odudu oro Jehovah ọnọde Eyen esie. Ẹma ẹmenede Jesus ẹnịm nte Edidem Obio Ubọn̄ Abasi—‘mme idụt ẹnyụn̄ ẹkop uyo esie.’ (Gen. 49:10) Ke adianade do, Jehovah ama anam enye edi Ibuot ọnọ esop. (Eph. 1:22, 23) Oyom nnyịn in̄wam nditọ ukpepn̄kpọ Bible nnyịn ndikụt nte Jesus adade esop usụn̄ ye nte enye adade “asan̄autom emi anamde akpanikọ, onyụn̄ enyenede ọniọn̄” ndinọ ‘udia eke spirit ke edikem ini.’—Matt. 24:45-47.
4 Akwa Oku Oro Okopde Mbọm: Ke ama okosobo idomo ye ufen nte owo, Jesus “ekeme ndinyan̄a mmọ emi ẹdude ke idomo.” (Heb. 2:17, 18) Edi n̄kpọ inemesịt didie ntem ọnọ mme anana-mfọnmma owo ndikpep nte ke Jesus okop mbọm aban̄a mmeme mmimọ onyụn̄ ekpe ubọk ọnọ mmimọ ke mbọm! (Rome 8:34) Ebede ke uwa Jesus ye mme utom esie nte Akwa Oku, nnyịn imekeme ndisan̄a n̄kpere Jehovah ye “uko,” man ikeme ndibọ ‘un̄wam ke ini nnanenyịn.’—Heb. 4:15, 16.
5 Mme ukeme oro nnyịn isịnde ndinam mbon efen ẹdiọn̄ọ akpanikọ aban̄ade Jesus akpakam onụk mmọ ndikop item nnyụn̄ ndiana ye nnyịn nnam utom Ọbọn̄.—John 14:15, 21.