(1) Mbụme, (2) Itie N̄wed Abasi, ye (3) Ibuot
Mmemmem usụn̄ oro ikemede ndinọ n̄wed Nso ke Bible Enen̄ede Ekpep? edi (1) ndibụp mbụme oro ẹdade ẹfiọk ekikere owo, (2) ndikot itie N̄wed Abasi oro odotde, ye (3) ndiwụt ibuot oro enemede n̄kpọ oro ebe ke ndikot mme mbụme oro ẹdude ke ntọn̄ọ ibuotikọ. Edieke enyeneufọk owụtde udọn̄, afo emekeme ndiwụt enye nte ẹnịmde ukpepn̄kpọ Bible, adade se ẹwetde ke ntọn̄ọ ntọn̄ọ ikpehe ekikere ke ibuot oro. Ẹkeme ndida usụn̄ emi ntọn̄ọ ukpepn̄kpọ ke akpa ediwaha m̀mê ke ini ẹnamde mfiakn̄ka.
◼ “Nte ẹtịn̄de mi ke Bible, ndi afo emekere ke ikpîkpu owo ekeme ndifiọk Ata Ọkpọsọn̄ Andibot?” Kot Utom 17:26, 27, nyụn̄ bet ibọrọ. Ekem wụt ibuot 1.
◼ “Ke ikerede iban̄a mme mfịna oro isobode mfịn, ndi emekere ke imekeme ndinyene ndọn̄esịt ye idotenyịn oro ẹtịn̄de ẹban̄a mi?” Kot Rome 15:4, nyụn̄ bet ibọrọ. Ekem wụt ibuot 2.
◼ “Edieke ekpenyenede odudu, ndi akpanam mme ukpụhọde emi?” Kot Ediyarade 21:4, nyụn̄ bet ibọrọ. Ekem wụt ibuot 3.
◼ “Ndi emekere ke tutu amama nditọ nnyịn ẹyedara utọ mme idaha oro ẹtịn̄de ke ikwọ eset emi?” Kot Psalm 37:10, 11, nyụn̄ bet ibọrọ. Ekem wụt ibuot 3.
◼ “Ndi afo emekere ke ini ke edi oro mme ikọ emi ẹdisude?” Kot Isaiah 33:24, nyụn̄ bet ibọrọ. Ekem wụt ibuot 3.
◼ “Ndi akanam afo emekere m̀mê mme akpan̄kpa ẹfiọk se mme odu uwem ẹnamde?” Bet ibọrọ. Ekem kot Ecclesiastes 9:5, nyụn̄ wụt ibuot 6.
◼ “Ndi afo emekere ke usen kiet nnyịn iyekeme ndifiak n̄kụt mbonima nnyịn oro ẹma ẹkekpan̄a, nte Jesus etịn̄de ke mme ufan̄ikọ emi?” Kot John 5:28, 29, nyụn̄ bet ibọrọ. Ekem wụt ibuot 7.
◼ “Afo ekere ke ẹdisan̄a didie ẹnam uduak Abasi ke isọn̄ ukem nte ẹnamde ke heaven, nte ẹtịn̄de ke ọwọrọetop akam emi?” Kot Matthew 6:9, 10, nyụn̄ bet ibọrọ. Ekem wụt ibuot 8.
◼ “Ndi emekere ke nnyịn idu uwem ke ini oro ẹtịn̄de ẹban̄a ke ntịn̄nnịm ikọ emi?” Kot 2 Timothy 3:1-4, nyụn̄ bet ibọrọ. Ekem wụt ibuot 9.
◼ “Ediwak owo ẹkere m̀mê nso inam mme mfịna ubonowo ẹka iso ẹdiọk ntem. Ndi akanam emekere ke emi edi ntak?” Kot Ediyarade 12:9, nyụn̄ bet ibọrọ. Ekem wụt ibuot 10.
◼ “Ndi akanam afo omoyom ibọrọ ke utọ mbụme ntem?” Kot Job 21:7, nyụn̄ bet ibọrọ. Ekem wụt ibuot 11.
◼ “Ndi emekere ke ndida item Bible emi nsịn ke edinam ayan̄wam mme owo ẹdara uwem ubon oro enyenede inem?” Kot Ephesus 5:33, nyụn̄ bet ibọrọ. Ekem wụt ibuot 14.
Ke ama okowụt enyeneufọk nte ẹsinịmde ukpepn̄kpọ Bible, ekpepde enye n̄kpọ utịm ikaba, onyụn̄ enyenede eti ntak ndiwụt ke ukpepn̄kpọ emi ayaka iso, afo emekeme nditọt ukpepn̄kpọ oro nte ukpepn̄kpọ Bible.