Nte Ẹkpenọde N̄wed Bible Ekpep
Esịne-esịt emi esịne nsio nsio ekikere ke nte ẹkpenọde n̄wed Bible Ekpep. Man enen̄ede okụt unen, tịn̄ mmọ ke ikọ idem fo, nam nneme fo ekem ye mme owo oro ẹdude ke efakutom mbufo, nyụn̄ mehe ye mme akpan n̄kpọ oro ẹdude ke n̄wed oro. Emekeme n̄ko ndida usụn̄ nneme efen oro edifọnde ye efakutom mbufo.—Se Utom Obio Ubọn̄ Nnyịn eke January 2005, p. 8.
Armageddon
◼ “Ke ini mme owo ẹsikopde ikọ oro ‘Armageddon,’ ediwak mmọ ẹsikere ẹban̄a ọkwọkudịm nsobo. Ndi akpakpa fi idem ndifiọk nte ke Armageddon enen̄ede edi n̄kpọ oro akpanade ẹdori enyịn ẹban̄a? [Bet ibọrọ. Ekem kot Ediyarade 16:14, 16.] Kop nte ẹdọhọde nte uwem editiede ke Armageddon ama ekebe.” Kụbọde ka page 82-84, nyụn̄ kot ikpehe ekikere 21.
Bible
◼ “Mme owo ẹsida Bible nte Ikọ Abasi. Ndi akanam afo emekere ntak emi ẹkpemende n̄wed emi mme owo ẹkewetde ẹkot Ikọ Abasi? [Bet ibọrọ. Ekem kot 2 Peter 1:21, nyụn̄ kot ikpehe ekikere 5 oro odude ke page 19-20.] N̄wed emi ada Bible ọbọrọ mme mbụme emi.” Wụt mme mbụme oro ẹdude ke page 6.
◼ “Mfịn, mme owo ẹsibọ ekese ntọt ẹkan nte akanam edide. Edi afo ekere ke m̀mọ̀n̄ ke nnyịn ikeme ndinyene eti item oro ekemede ndin̄wam nnyịn ndidu uwem oro akamade inemesịt onyụn̄ okụtde unen? [Bet ibọrọ. Ekem kot 2 Timothy 3:16, 17, nyụn̄ kot ikpehe ekikere 12 oro odude ke page 23.] N̄wed emi anam an̄wan̄a nte nnyịn ikemede ndidu uwem ke usụn̄ oro enemde Abasi esịt onyụn̄ adade ufọn ọsọk nnyịn.” Wụt chart ye ndise oro ẹdude ke page 122-123.
N̄kpa/Ediset ke N̄kpa
◼ “Ediwak owo ẹsikere se isinen̄erede itịbe ke ini owo akpade. Nte afo emekere ke nnyịn imekeme ndifiọk? [Bet ibọrọ. Ekem kot Ecclesiastes 9:5, nyụn̄ kot ikpehe ekikere 5-6 oro odude ke page 58-59.] N̄wed emi n̄ko anam an̄wan̄a se ediset ke n̄kpa emi Bible ọn̄wọn̄ọde ediwọrọde ọnọ mbon oro ẹma ẹkekpan̄a.” Wụt ndise emi odude ke page 75.
◼ “Ke ini owo oro nnyịn imade akpade, esidi ndammana n̄kpọ ndiyom ndifiak n̄kụt owo oro. Nte idịghe ntre? [Bet ibọrọ.] Ediwak oro ẹmekop ndọn̄esịt ẹto un̄wọn̄ọ Bible aban̄ade ediset ke n̄kpa. [Kot John 5:28, 29, nyụn̄ kot ikpehe ekikere 16-17 oro odude ke page 72.] Ibuot emi ọbọrọ mme mbụme emi n̄ko.” Wụt mme mbụme oro ẹdude ke ntọn̄ọ ibuotikọ ke page 66.
Nsinsi Uwem
◼ “Ata ediwak owo ẹyom nsọn̄idem ye anyan isua uwem. Edieke owo ekpekemede ndidu uwem ke nsinsi, nte afo akpama ndidu? [Bet ibọrọ. Ekem kot Ediyarade 21:3, 4, nyụn̄ kot ikpehe ekikere 17 oro odude ke page 54.] N̄wed emi etịn̄ nte nnyịn ikemede ndinyene nsinsi uwem ye nte uwem editiede ke ini un̄wọn̄ọ oro osude.”
Ubon
◼ “Ọdọn̄ kpukpru nnyịn ndinyene inem inem uwem ubon. Nte idọn̄ke? [Bet ibọrọ.] Bible etịn̄ aban̄a n̄kpọ oro kpukpru owo ke ubon ẹkemede ndinam man ẹtịp n̄kpọ ẹsịn ke inemesịt ubon—ndikpebe Abasi ke ndiwụt ima.” Kot Ephesus 5:1, 2, nyụn̄ kot ikpehe ekikere 4 oro odude ke page 135.
Ufọk
◼ “Ke ediwak itie, enen̄ede ọsọn̄ ndikụt ediye itieidụn̄ oro ememde urua. Ndi emekere ke usen kiet, ufọk oyodu ekem ọnọ kpukpru owo? [Bet ibọrọ. Ekem kot Isaiah 65:21, 22, nyụn̄ kot ikpehe ekikere 20 oro odude ke page 34.] N̄wed emi anam an̄wan̄a nte un̄wọn̄ọ Abasi emi edisude.”
Jehovah Abasi
◼ “Ediwak mbon oro ẹnịmde ke Abasi odu ẹkpema ndisan̄a n̄kpere enye. Ndi ama ọfiọk ke Bible ọdọhọ nnyịn isan̄a ikpere enye? [Bet ibọrọ. Ekem kot James 4:8a, nyụn̄ kot ikpehe ekikere 20 oro odude ke page 16.] Ẹtịm n̄wed emi man an̄wam mme owo ndida Bible mmọ n̄kpep ekese n̄kpọ mban̄a Abasi.” Wụt mme mbụme oro ẹdude ke ntọn̄ọ ibuotikọ ke page 8.
◼ “Ediwak owo ẹsibọn̄ akam ẹyom ẹnam enyịn̄ Abasi asana. Ndi akanam emekere se enyịn̄ oro edide? [Bet ibọrọ. Ekem kot Psalm 83:18, nyụn̄ kot ikpehe ekikere 2-3 oro odude ke page 195.] N̄wed emi anam an̄wan̄a se Bible enen̄erede ekpep aban̄a Jehovah Abasi ye se enye aduakde ndinam nnọ ubonowo.”
Jesus Christ
◼ “Mme owo ke ofụri ererimbot ẹkop n̄kpọ ẹban̄a Jesus Christ. Ndusụk owo ẹda enye n̄kukụre nte n̄wọrọnda owo. Mbon en̄wen ẹtuak ibuot ẹnọ enye nte Ata Ọkpọsọn̄ Abasi. Nte afo emekere ke se nnyịn inịmde iban̄a Jesus Christ anam n̄kpọ?” [Bet ibọrọ. Ekem kot John 17:3, nyụn̄ kot ikpehe ekikere 3 oro odude ke page 37-38. Dụri ntịn̄enyịn wụt mme mbụme oro ẹdude ke ntọn̄ọ ibuotikọ oro.
Akam
◼ “Ndi akanam emekere nte Abasi esibọrọde akam? [Bet ibọrọ. Ekem kot 1 John 5:14, 15, nyụn̄ kot ikpehe ekikere 16-18 oro odude ke page 170-172.] Ibuot emi n̄ko anam an̄wan̄a ntak emi nnyịn ikpọbọn̄de akam inọ Abasi ye se anade nnyịn inam man enye okop akam nnyịn.”
Ido Ukpono
◼ “Ediwak owo ke ẹtọn̄ọ ndise mme ido ukpono ererimbot nte ntak mme mfịna ubonowo utu ke ndidi usọbọ. Ndi afo emekere ke ido ukpono ke ọnọ mme owo nnennen ndausụn̄? [Bet ibọrọ. Ekem kot Matthew 7:13, 14, nyụn̄ kot ikpehe ekikere 5 oro odude ke page 145-146.] Ibuot emi odụn̄ọde n̄kpọ itiokiet oro anamde ẹfiọk utuakibuot oro Abasi enyịmede.” Wụt mme n̄kpọ itiokiet oro ke page 147.
N̄kpọ Mmọn̄eyet/Ndutụhọ
◼ “Ke ini n̄kpọ mmọn̄eyet etịbede, ediwak owo ẹsiyịk m̀mê Abasi enen̄ede ekere aban̄a mme owo onyụn̄ okụt ndutụhọ mmọ. Ndi akanam afo emenyene utọ ekikere oro? [Bet ibọrọ. Ekem kot 1 Peter 5:7, nyụn̄ kot ikpehe ekikere 11 oro odude ke page 11.] N̄wed emi anam an̄wan̄a nte Abasi edisiode ndutụhọ ubonowo efep ofụri ofụri.” Wụt mme mbụme oro ẹdude ke ntọn̄ọ ibuotikọ ke page 106.
Ekọn̄/Emem
◼ “Mme owo ke kpukpru ebiet ẹyom emem. Nte afo ekere ke edi ikpîkpu ndap ndikere nte ke emem oyodu ke isọn̄? [Bet ibọrọ. Ekem kot Psalm 46:8, 9.] N̄wed emi etịn̄ nte Abasi edisude uduak esie onyụn̄ ada emem edi ke ofụri ekondo.” Wụt ndise oro odude ke page 35, nyụn̄ neme ikpehe ekikere 17-21 ke page 33-34.
[Ekebe ke page 5]
Mme Usụn̄ Nditịn̄ Mban̄a Ndutịm Etịbe
“Edieke afo edimade nditịp ekpri n̄kpọ mfịn kaban̄a utom oro inamde ke ofụri ererimbot, nyama ndibọ.”
“Okposụkedi ẹnọde n̄wed nnyịn ye unana ekọmurua, nnyịn imesibọ esisịt n̄kpọ oro ẹtịpde kaban̄a utom oro nnyịn inamde ke ofụri ererimbot.”
“Ekeme ndikpa fi idem nte nnyịn isisan̄ade inam utom emi. Edi koro ẹsinọ utom oro inamde ke ofụri ererimbot ibetedem ebe ke ndinọ enọ imaesịt. Edieke afo amade nditịp ekpri n̄kpọ mfịn, nyama ndibọ.”