Se Akpanamde Man Odu Uwem ke Obufa Ererimbot

Mme ibuotikọ oro ẹkụrede do ẹwụt ke Abasi ọmọn̄ ososobo ndiọi owo efep onyụn̄ anam mfịna ererimbot emi etre. Imenịm ke emi eyetịbe. Ntak inịmde? Sia Bible ọdọhọ ete:

“Ererimbot ke ebebe efep.”—1 JOHN 2:17.

Imenịm ke mme owo ẹyebọhọ utịt ererimbot emi sia itien̄wed emi ọdọhọ n̄ko ete:

“Owo eke anamde uduak Abasi ododu ke nsinsi.”

Ntre, edieke owo oyomde ndibọhọ, ana enye anam uduak Abasi. Edieke oyomde ndidiọn̄ọ se uduak Abasi edide, ana ebem iso ọdiọn̄ọ Abasi.

NEN̄EDE FIỌK ABASI MAN ỌBỌHỌ UTỊT ERERIMBOT EMI

Jesus ọkọdọhọ ete: “Nsinsi uwem ọwọrọ mmọ ndikọ ifiọk emi aban̄ade fi, ata Abasi kierakiet.” (John 17:3) Edieke iyomde ndibọhọ utịt ererimbot emi nnyụn̄ ndu uwem ke nsinsi, ana ifiọk Abasi. Emi ikụreke ke ndinịm ke Abasi odu m̀mê ndifiọk n̄kpọ ifan̄ mban̄a enye. Ana idi ufan esie. Imọdiọn̄ọ ke edieke iyomde ndinen̄ede n̄kpere ufan nnyịn, ke ana isidu ye enye. Kpasụk ntre ke edi ye ndidi ufan Abasi. Yak ineme ndusụk n̄kpọ emi Bible ekpepde nnyịn, emi ẹdin̄wamde nnyịn ika iso idi ufan Abasi.

SIKOT BIBLE KPUKPRU USEN

Imesidia udia kpukpru usen man ika iso idu uwem. Edi Jesus ọkọdọhọ ete: “Idịghe uyo ikpọn̄ ke owo edida odu uwem, edi edida kpukpru ikọ eke ẹwọrọde Jehovah ke inua odu.”—Matthew 4:4.

Mfịn, ikọ Jehovah odu ke Bible. Ke ini ekpepde Bible, oyokụt se Abasi akanamde ke ini edem, se enye anamde idahaemi, ye se enye edinamde ke ini iso.

BỌN̄ AKAM DỌHỌ ABASI AN̄WAM FI

Nso ke akpanam edieke oyomde ndikop uyo Abasi, edi ọsọn̄ fi nditre ndinam mme n̄kpọ emi Abasi ọdọhọde ke ọdiọk? Edieke edide ntre, afo ndifiọk Abasi eyenen̄ede an̄wam fi.

Yak ineme iban̄a mma kiet emi odụn̄de ke Asia. Enye ekesidu oburobụt uwem, edi ke ini enye ọkọtọn̄ọde ndikpep Bible, enye ama edikụt ke Abasi ọdọhọ yak ‘ifehe ikpọn̄ use.’ (1 Corinth 6:18) Enye ama ọbọn̄ akam eben̄e Abasi an̄wam imọ itre utọ idiọk uwem oro, ndien Abasi ama an̄wam enye. Edi enyene mme ini emi ekesidọn̄de enye ndifiak nnam use. Enye ọdọhọ ete: “Ini ekededi emi idiọkn̄kpọ odụkde mi esịt, mmesibọn̄ akam ke ofụri esịt nnọ Jehovah sia mmọfiọk ke n̄kemeke nditre idiọkn̄kpọ ke odudu idemmi. Akam anam nnen̄ede n̄kpere Jehovah.” Ata ediwak owo ẹdifiọk Abasi ukem nte mma emi ọfiọkde. Abasi anam mmọ ẹkeme ndikpụhọde nte mmọ ẹdude uwem, ẹnyụn̄ ẹnam se enye amade.—Philippi 4:13.

Edieke enen̄erede ọfiọk Abasi, Abasi n̄ko ọyọfiọk fi onyụn̄ ada fi nte edima ufan esie. (Galatia 4:9; Psalm 25:14) Oro ayanam ekeme ndidu uwem ke obufa ererimbot Abasi. Edi n̄kpọ editie didie ke obufa ererimbot oro? Ẹyebọrọ mbụme emi ke ibuotikọ oro etienede.