Emekeme nditọn̄ọ idahaemi mben̄e idem man etiene odụn̄ ke obufa ererimbot oro enen̄erede ekpere
Obufa Ererimbot Ekpere!
Abasi okobot isọn̄ man nti owo ẹdụn̄ ke nsinsi. (Psalm 37:29) Enye ekesịn akpa ete ye eka nnyịn, Adam ye Eve, ke ediye In̄wan̄ Eden, onyụn̄ ọnọ mmọ ye nditọ mmọ utom ndise mban̄a isọn̄ nnyụn̄ nnam ofụri itie akabade Paradise.—Genesis 1:28; 2:15.
Mfịn, isọn̄ idịghe Paradise nte Abasi okoyomde. Edi Abasi edisụk inanam se enye akaduakde aban̄a isọn̄. Didie ke enye edinam oro? Nte ikokụtde ke mme ibuotikọ eken, Abasi idisoboke isọn̄ emi. Utu ke oro, enye ayayak nti owo ẹka iso ẹdụn̄ ke isọn̄. N̄kpọ editie didie ke isọn̄ ke ini Abasi anamde se enye ọn̄wọn̄ọde?
Ukara kiet kpọt edikara ofụri isọn̄
Ibịghike, Obio Ubọn̄ Abasi kpọt edikara kpukpru owo ke isọn̄ emi, ndien uwem eyenem tutu ini oro. Mme owo ẹyediana kiet ẹnyụn̄ ẹnam utom emi mmọ ẹmade. Abasi emek Jesus Christ ndikara ofụri isọn̄. Ediwak mbon oro ẹkarade mfịn ikereke iban̄a mme owo. Edi Jesus itiehe ntre sia enye enen̄ede ama mme owo. Enye ọyọfọn ido ye mbon emi enye edikarade, atua mmọ mbọm, onyụn̄ anam n̄kpọ ye kpukpru owo ukem ukem.—Isaiah 11:4.
Kpukpru owo ke isọn̄ ẹyediana kiet
Mbon emi ẹdidụn̄de ke Paradise idisuaha owo ndomokiet ke ntak itie emi owo otode. Kpukpru owo ẹyediana kiet. (Ediyarade 7:9, 10) Kpukpru owo emi ẹdidụn̄de ke isọn̄ ini oro ẹyema Abasi ye mbọhọidụn̄ mmọ. Mmọ ẹyediana kiet ẹnam utom oro Abasi ọkọnọde owo toto ke editọn̄ọ, oro edi, ndise mban̄a isọn̄.—Psalm 115:16.
Oto-obot afanikọn̄ ididụhe aba
Ke ini Obio Ubọn̄ Abasi edikarade isọn̄ emi, Abasi idiyakke oto-obot afanikọn̄ etịbe aba. (Psalm 24:1, 2) Ke ini Jesus akanamde akwa oyobio odobo, enye okowụt se enye ekemede ndida odudu oro Abasi ọnọde enye nnam. (Mark 4:39, 41) Ini Jesus edikarade isọn̄ emi, oto-obot afanikọn̄ ndomokiet iditịbeke. Ini oro, owo ndomokiet idibiatke isọn̄, unam idinamke nnyịn n̄kpọ, nnyịn idinyụn̄ inamke mmọ n̄kpọ.—Hosea 2:18.
Idem ọyọsọn̄ kpukpru owo, udia onyụn̄ odu barasuene
Owo ndomokiet idibiomoke ndo, idọn̄ọke, isọn̄ke, inyụn̄ ikpaha. Idem ọyọsọn̄ kpukpru owo. (Isaiah 35:5, 6) Kpukpru ebiet ayasana onyụn̄ eye nte In̄wan̄ Eden oro Adam ye Eve ẹkedụn̄de. Ke obufa ererimbot, udia oyodu barasuene ọnọ kpukpru mbon emi ẹdidụn̄de do sia isọn̄ ọyọfọn n̄kpọ nte In̄wan̄ Eden eketiede. (Genesis 2:9) Kpa nte ekedide ye nditọ Israel, kpukpru owo ke Paradise ẹyedia n̄kpọ ẹyụhọ.—Leviticus 26:4, 5.
Emem oyodu ke kpukpru itie
Ke ini Obio Ubọn̄ Abasi edikarade ofụri isọn̄, kpukpru owo ẹyedu ke emem, ẹnyụn̄ ẹfọn ido ye kiet eken. Ekọn̄ ididụhe aba, owo ifịkke owo, owo idinyụn̄ inanake n̄kpọ ndomokiet. Bible ọdọhọ ete: “Mmọ ẹyetie ke idak vine mmọ ye ke idak eto fig mmọ, ndien ididụhe owo eke edinamde mmọ ẹdịghe.”—Micah 4:3, 4.
Ufọk ye utom oyodu ọnọ kpukpru owo
Ufọk ididịghe aba mfịna sia kpukpru ubon ẹyenyene ufọk idemmọ. Kpukpru owo ẹyenam utom emi enemde-nem mmọ. Bible ọdọhọ ke mbon emi ẹdidụn̄de ke obufa ererimbot Abasi “idikpaha utom ke ikpîkpu.”—Isaiah 65:21-23.
Ifiọk Abasi ọyọyọhọ ofụri isọn̄
Bible ọdọhọ ete: “Ifiọk Jehovah ọyọyọhọ isọn̄.” (Isaiah 11:9) Jehovah emi okobotde kpukpru n̄kpọ onyụn̄ enyenede ọniọn̄ akan kpukpru owo eyekpep mbon emi ẹdidụn̄de ke obufa ererimbot n̄kpọ. Mme owo ẹyekpep n̄kpọ ẹban̄a ndiye n̄kpọ emi Abasi okobotde. Mmọ ididaha ifiọk mmọ ibot n̄kpọ-ekọn̄ m̀mê ndida mbak ibak. (Isaiah 2:4) Utu ke oro, mmọ ẹdidụn̄ ke emem ye kiet eken ẹnyụn̄ ẹse ẹban̄a isọn̄.—Psalm 37:11.
Mme owo ẹyedu uwem ke nsinsi
Abasi ama enen̄ede ada ini obot isọn̄ emi man uwem esinenem nnyịn kpukpru usen. Enye oyom mme owo ẹdụn̄ ke isọn̄ ke nsinsi. (Psalm 37:29; Isaiah 45:18) Ntre, Abasi “eyemen n̄kpa emen ke nsinsi” man uduak esie emi osu. (Isaiah 25:8) Bible ọdọhọ ke ‘n̄kpa ididụhe aba, mfụhọ m̀mê ntuan̄a m̀mê ubiak idinyụn̄ idụhe aba.’ (Ediyarade 21:4) Abasi ọyọnọ kpukpru owo ifet ndidu uwem ke nsinsi—emi esịne mbon oro enye edinyan̄ade ke ini enye osobode idiọk ererimbot emi ye mbon oro enye edinamde ẹset ke obufa ererimbot.—John 5:28, 29; Utom 24:15.
Ata ediwak owo ke ẹben̄e idem idahaemi man ẹtiene ẹdu uwem ke Obio Ubọn̄ Abasi. Kpa ye oro mmọ mîfọnke ima, mmọ ke ẹdomo ndidu uwem nte Abasi ediyomde mme owo ẹdu ke obufa ererimbot esie. Didie ke mmọ ẹnam emi? Mmọ ẹkpep n̄kpọ ẹban̄a Jehovah Abasi ye Jesus Christ emi enye okosiode ọdọn̄.—John 17:3.
Edieke oyomde ndibọhọ utịt ererimbot emi nnyụn̄ ntiene ndụn̄ ke obufa ererimbot emi enen̄erede ekpere, enyene mme n̄kpọ en̄wen emi anade ọdiọn̄ọ. Dọhọ Ntiense Jehovah ada n̄wed Du Ata Uwem ke Nsinsi! ekpep fi Bible ke mfọn.