Mme Mbụme Oro Mme Andikot Ẹbụpde
Ke Jesus ama akamana, nso ikanam Joseph ye Mary ẹsụhọde ẹtie ke Bethlehem utu ke ndifiak nnyọn̄ Nazareth?
Bible itịn̄ke. Edi enye etịn̄ mme n̄kpọ emi etiede nte oro akanam mmọ ẹbiere ndisụhọde ntie do.
Angel ama ọdọhọ Mary ke enye oyoyomo onyụn̄ aman eyen. Ini angel okotobode enye etop oro, enye ye Joseph ẹkedụn̄ ke Nazareth ke Galilee, obio emana Joseph. (Luke 1:26-31; 2:4) Aka ko ke mmọ ẹma ẹketo Egypt ẹdi, mmọ ẹkefiak ẹnyọn̄ Nazareth. Do ke Jesus okokpon onyụn̄ akabade eyen Nazareth. (Matt. 2:19-23) Nazareth esisọp odụk nnyịn ekikere ima ikop mme enyịn̄ emi, Jesus, Joseph, ye Mary.
Mary ama enyene iman ke Judah emi ekekerede Elizabeth. Zechariah ebe Elizabeth ekedi oku. Elizabeth ekedidi eka John Andinịm Owo Baptism. (Luke 1:5, 9, 13, 36) Mary ama ekese Elizabeth ke Judah onyụn̄ odu do ye enye ọfiọn̄ ita, ekem afiak ọnyọn̄ Nazareth. (Luke 1:39, 40, 56) Ntre, Mary ama ọdiọn̄ọ ndusụk obio ke Judah.
Nte ini akakade, ukara ẹma ẹdọhọ ‘ẹkesịn enyịn̄ ke n̄wed.’ Joseph ama onyụn̄ aka. Oro akanam enye ọkpọn̄ Nazareth aka Bethlehem emi ekedide “obio David.” Prọfesi ọkọdọhọ ke Messiah edimana do. (Luke 2:3, 4; 1 Sam. 17:15; 20:6; Mic. 5:2) Ke Mary ama akaman Jesus ke Bethlehem, Joseph ikoyomke ndimen Mary ye utọ nsekeyen oro mfiak nnyọn̄ Nazareth sia ama oyom usụn̄ akaha. Mmọ ẹma ẹsụhọde ẹtie ke Bethlehem. To do sịm Jerusalem ekedi n̄kpọ nte kilomita usụkkiet. Enye oro ama afiak ọfọn ye mmọ sia eyemem mmọ utom ndimen nsekeyen oro n̄ka temple n̄kawa se Ibet ọkọdọhọde ẹwa.—Lev. 12:2, 6-8; Luke 2:22-24.
Angel Abasi ama ọdọdọhọ Mary ke ẹyenọ eyen esie ‘ebekpo David,’ ke enye ‘ayakara nte edidem.’ Ndi oro ama anam Joseph ye Mary ẹnịm ke Jesus ndimana ke obio David idịghe ikpîkpu? (Luke 1:32, 33; 2:11, 17) Ekeme ndidi mmọ ẹma ẹkere ke ọfọn isụhọde itie do man ise ise m̀mê enyene n̄kpọ en̄wen emi Abasi oyomde mmimọ inam.
Nnyịn idiọn̄ọke m̀mê mmọ ẹkedu ke Bethlehem ẹbịghi didie ini mme asiak ntantaọfiọn̄ ẹkedide ẹdise mmọ. Edi ini mmọ ẹdide, mme Joseph ẹkedidụn̄ ke ufọk, Jesus okonyụn̄ edi “ekpri eyen,” idịghe aba nsekeyen. (Matt. 2:11) Etie nte utu ke mmọ ndikafiak nnyọn̄ Nazareth, mmọ ẹkesụhọde ẹtie ke Bethlehem ẹtọn̄ọ uwem.
Herod ama ọnọ ewụhọ ete ẹwot “kpukpru nditọiren ke Bethlehem . . . ọtọn̄ọde ke eyeneren isua iba sụhọde.” (Matt. 2:16) Ke ẹma ẹkedụri Joseph utọn̄, enye ye Mary ẹma ẹmen Jesus ẹfehe ẹka Egypt ẹkedu do tutu Herod akpa. Nte in akade, Joseph ama emen ubon esie aka Nazareth. Ntak emi mmọ mîkafiakke ika Bethlehem? Mmọ ẹkefehe Archelaus eyen Herod emi akakarade Judea. Archelaus ekedi ata ibak. Abasi ama ododụri Joseph utọn̄ n̄ko ke ndap. Ke Nazareth ke Joseph ọkọbọk Jesus tutu Jesus okpon, n̄kpọ inamke enye, enye onyụn̄ akabade edi ata asan̄autom Abasi.—Matt. 2:19-22; 13:55; Luke 2:39, 52.
Etie nte Joseph ama akpakpa mbemiso Jesus akpa anam mme owo ẹkeme ndika heaven. Ntre, Joseph eyeset edidu uwem mi ke isọn̄. Enye ama eset edi, ediwak owo ẹyekeme ndikobụp enye ntak emi enye ye Mary ẹkesụhọrede ẹtie ke Bethlehem ke Jesus ama akamana.