Se Inamde Enyịn̄ Jehovah Edi Akpan N̄kpọ Ọnọ Jesus

1-2. (a) Okoneyo oro mbemiso ẹwotde Jesus, nso ke enye akanam? (b) Mme mbụme ewe ke idibọrọ ke ibuotikọ emi?

MBUBREYO Thursday Nisan 14 ke isua 33 eyo mme Jesus ke iyom nditịn̄ mban̄a emi. Ekpri ini, ẹmọn̄ ẹda Jesus ẹnọ mme asua, ẹyekpe ikpe ẹnọ enye, ẹbiere ke enye odot n̄kpa, ẹtụhọde enye, ẹnyụn̄ ẹwot enye. Idaha idaha-oro ke enye adia san̄asan̄a udia ama ke ubet enyọn̄ kiet ye mme apostle esie emi ẹkesọn̄ọde ẹda ye enye. Ke ẹma ẹkedia ẹma, Jesus ama etịn̄ ikọ ọsọn̄ọ mme apostle esie idem. Item unyọn̄ ekedi oro-o. Ndien ekpri ini mbemiso kpukpru mmọ ẹkpọn̄de ubet enyọn̄ oro, Jesus ama atuak ada ọbọn̄ akam emi ọdọn̄ọde akpan n̄kpọ eti-eti. Apostle John ama ewet akam oro. Akam oro odu ke John ibuot 17.

² Akam Jesus owụt nnyịn ke nso ikenen̄ede ifịna enye ini enye ọkọbọn̄de akam oro? Didie ke akam oro owụt se ikedide akpan n̄kpọ inọ enye ofụri ini emi enye okodude mi ke isọn̄? Ẹyak ineme ibọrọ mme mbụme oro.

‘AMI MMANAM MMỌ ẸFIỌK ENYỊN̄ FO’

3. Nso ke Jesus eketịn̄ aban̄a enyịn̄ Jehovah? Ikọ esie ọkọwọrọ nso? (John 17:6, 26)

³ Ke akam emi Jesus ọkọbọn̄de, enye ọkọdọhọ ete: “Ami [mmanam] mmọ ẹfiọk enyịn̄ fo.” Enye eketịn̄ ikaba ete ke imọ imanam mme mbet imọ ẹdiọn̄ọ enyịn̄ Jehovah. (Kot John 17:6, 26.) Ikọ esie ọkọwọrọ nso? Ndi enye akayarade enyịn̄ emi mmọ mîdiọn̄ọke akanam ọnọ mmọ? Mme mbet Jesus ẹkedi mme Jew, ntre mmọ ẹma ẹdọdiọn̄ọ ke Abasi ekere Jehovah. Enyịn̄ oro ama odu ekpere ndisịm utịm ike 7000 ke N̄wed Abasi Usem Hebrew. Ntre idịghe enyịn̄ emi Abasi ekekerede ke Jesus eketịn̄ aban̄a. Enye eketịn̄ aban̄a se enyịn̄ oro adade aban̄a, oro edi utọ Abasi emi Jehovah edide. Jesus ama anam ẹdiọn̄ọ utọ Owo emi Abasi emi ekerede Jehovah edide, mme n̄kpọ emi enye aduakde ndinam, se enye anamde, ye mme edu esie ke usụn̄ emi owo ndomokiet mînamke akanam, owo idinyụn̄ ikemeke ndinam n̄kan nte Jesus akanamde.

4-5. (a) Didie ke ikeme ndinam an̄wan̄a se ndidiọn̄ọ enyịn̄ owo ọwọrọde? (b) Didie ke mme mbet Jesus ẹkedidiọn̄ọ enyịn̄ Jehovah?

⁴ Yak inọ uwụtn̄kpọ yak an̄wan̄a. Yak idọhọ ke ebiowo emi ekerede David odu ke esop mbufo ndien enye onyụn̄ edi dọktọ emi esisiakde owo idem. Afo ọmọdiọn̄ọ brọda emi ke ediwak isua. Edi usen kiet udọn̄ọ abuat fi, enye edi se afo okụtde dọktọ idaha idaha-oro. Ẹfehe ẹmen fi ẹka ufọkibọk emi brọda oro anamde utom, enye akanyan̄a fi. Ke ama ọkọbọhọ n̄kpa, idaha-emi okpokop enyịn̄ brọda oro, n̄kọ ididịghe aba ikpîkpu enyịn̄ ke utọn̄ fo; eyekere n̄ko se enye akanamde ọnọ fi. Ntre ke edi! Udûdiọn̄ọke David aba nte ebiowo kpọt, ọyọdiọn̄ọ enye n̄ko nte dọktọ emi akanyan̄ade fi.

⁵ Ukem oro n̄ko ke ekedi ye mme mbet Jesus, mmọ ẹma ẹdọdiọn̄ọ enyịn̄ Jehovah; edi se Jesus ekedinamde ke isọn̄ ama anam mmọ ẹnen̄ede ẹda enyịn̄ oro ke akpan n̄kpọ ẹkan nte ẹkesidade. Ntak ikemede ndidọhọ ntre? Ntak edi ke Jesus ama ekpebe Ete esie tutu kpukpru se enye ekpetetịn̄ ye se enye akpananam ẹdi ukem ukem se Ete esie ekpetịn̄de onyụn̄ anamde. Ntre, mme apostle ndikakpan̄ utọn̄ n̄kop nte Jesus ekekpepde n̄kpọ nnyụn̄ n̄kama enyịn nse nte enye akanamde n̄kpọ ye mbon en̄wen ama anam mmọ ẹtịm ‘ẹfiọk’ Jehovah.​—John 14:9; 17:3.

“ENYỊN̄ FO . . . EMI AFO ỌKỌNỌDE MI”

6. Didie ke Jehovah ọkọnọ Jesus enyịn̄ Esie? (John 17:11, 12)

⁶ Ke akam emi Jesus ọkọbọn̄de, enye ama ọbọn̄ akam aban̄a mme mbet esie onyụn̄ ọdọhọ Abasi ‘ada enyịn̄ esie emi enye ọkọnọde imọ’ ekpeme mmọ. (Kot John 17:11, 12.) Ndi oro ọwọrọ ke idaha-emi ẹdisikot Jesus, Jehovah? Ihih-o. Fiak kere se Jesus eketịn̄de ke akam oro aban̄a enyịn̄ Jehovah. Enye ọkọdọhọ “enyịn̄ fo.” Ntre Jesus ikọtọn̄ọke ndikere Jehovah. Edi ini Jesus ọkọdọhọde ke Abasi ọnọ imọ enyịn̄ Esie, ikọ esie ọkọwọrọ nso ndien? Akpa, Jehovah okosio Jesus ọdọn̄, Jesus eketịn̄ ikọ ke ibuot Jehovah. Enye ekedi ke enyịn̄ Ete esie okonyụn̄ ada enyịn̄ oro anam ikpọ utịben̄kpọ. (John 5:43; 10:25) N̄kpọ efen edi ke enyịn̄ oro, Jesus, ọwọrọ “Jehovah Edi Edinyan̄a.” Omokụt do ke enyịn̄ Jehovah esịne ke se enyịn̄ Jesus ọwọrọde?

7. Nam an̄wan̄a ise nte Jesus ekekemede nditịn̄ ikọ ke enyịn̄ Jehovah.

⁷ Se uwụtn̄kpọ mi. Isụn̄utom ekeme nditịn̄ ikọ nte ẹdọhọ ke ada-ibuot ukara idụt mmọ etịn̄ sia enye ada ke ibuot ada-ibuot ukara etịn̄ ikọ oro. Ntre se enye etịn̄de oyodobi nte ada-ibuot ukara etịn̄. Ukem oro n̄ko, Jesus akada ke ibuot Jehovah, enye okonyụn̄ etịn̄ ikọ ye mme owo ke enyịn̄ Jehovah.​—Matt. 21:9; Luke 13:35.

8. Didie ke enyịn̄ Jehovah ‘okodu’ Jesus ke idem mbemiso Jesus edide isọn̄? (Exodus 23:20, 21)

⁸ Bible okot Jesus “Ikọ” sia enye ke Jehovah ekesida ọdọhọ mme angel ye mme owo se Jehovah oyomde mmọ ẹdiọn̄ọ ye se Enye oyomde mmọ ẹnam. (John 1:1-3) Imekere ke Jesus edi angel emi Jehovah ọkọdọn̄de ekese aban̄a nditọ Israel ini mmọ ẹtode Egypt ẹka Isọn̄ Un̄wọn̄ọ. Ini Jehovah ọkọdọhọde nditọ Israel ẹkop uyo ẹnọ angel oro, ntak emi enye ọkọnọde mmọ edi emi: “Koro enyịn̄ mi odude enye ke idem.”a (Kot Exodus 23:20, 21.) Enyịn̄ Jehovah ‘okodu’ Jesus ke idem sia enye ada ke ibuot Jehovah, enye onyụn̄ edi akpan owo emi owụtde utọ Abasi emi Ete esie edide, enye onyụn̄ anam enyịn̄ Ete esie asana.

“ETE, NỌ ENYỊN̄ FO UBỌN̄”

9. Enyịn̄ Jehovah ekedi akpan n̄kpọ didie ọnọ Jesus? Nam an̄wan̄a.

⁹ Imeneneme ke idem mbemiso Jesus ekedide isọn̄, ke enyịn̄ Jehovah ekedi ata akpan n̄kpọ ọnọ enye. Imosụk ise nte ekedide ini enye okodude ke isọn̄, kpukpru se enye akanamde okowụt adan̄a nte enyịn̄ oro edide akpan n̄kpọ ọnọ enye! Ekpri ini mbemiso enye okokụrede se ẹkedọn̄de enye mi ke isọn̄, Jesus ama ọdọhọ Jehovah ete: “Ete, nọ enyịn̄ fo ubọn̄.” Kpa idaha idaha-oro, Jehovah ama etie ke heaven ọbọrọ ke ọkpọsọn̄ uyo ete: “Mma nnọ enye ubọn̄, nyonyụn̄ ntọn̄ọ ntak nnọ enye ubọn̄.”​—John 12:28.

10-11. (a) Didie ke Jesus ọkọnọ enyịn̄ Jehovah ubọn̄? (Se ndise n̄ko.) (b) Ntak emi akanade ẹnam enyịn̄ Jehovah asana ẹnyụn̄ ẹbiat nsu emi ẹdoride enyịn̄ oro?

¹⁰ Jesus n̄ko ama ọnọ enyịn̄ Ete esie ubọn̄. Didie? Usụn̄ kiet emi enye akanamde oro ekedi enye ndikanam mme owo ẹdiọn̄ọ nti edu Ete esie ye mme utịbe utịbe n̄kpọ emi Ete esie esinamde. Edi ikokụreke ke oro. Akana ẹnam enyịn̄ Jehovah asana ẹnyụn̄ ẹbiat nsu emi ẹkesude ẹdori enyịn̄ oro.b Jesus ama owụt nte se itịn̄de oro edide akpan n̄kpọ ini enye ekekpepde mme mbet esie nte mmọ ẹkpebọn̄de akam. Enye ọkọdọhọ ete: “Ete nnyịn emi odude ke heaven, yak ẹnam enyịn̄ fo asana.”​—Matt. 6:9.

¹¹ Ntak emi akanade ẹnam enyịn̄ Jehovah asana ẹnyụn̄ ẹbiat nsu emi ẹkesude ẹdori enyịn̄ oro? Ntak edi ke In̄wan̄ Eden, Satan emi edide Devil ama ọsọn̄ọ Jehovah Abasi enyịn onyụn̄ abiat enye enyịn̄. Satan ọkọdọhọ ke Jehovah edi osu nsu, ke enye ọdiọn̄ọ se ikpọfọnde ye Adam ye Eve edi ke Enye iyakke mmọ ẹnyene n̄kpọ oro. (Gen. 3:1-5) Satan ndikanam ntre ọkọwọrọ n̄ko ke enye ọdọhọ ke nte Jehovah esinamde n̄kpọ inenke. Mme nsu Satan oro ẹma ẹbiat Jehovah enyịn̄ ẹnyụn̄ ẹnam ẹkere ke Jehovah edi idiọk owo. Aka ko ke eyo Job, Satan ama ọdọhọ ke mbon emi ẹnamde n̄kpọ ẹnọ Jehovah ẹnam ke ntak udori emi mmọ ẹdidiade ẹto enye, ikanke-kan oro. Ọbọn̄ edidọk oro ama osụk adian do ete ke idụhe owo ndomokiet ke isọn̄ emi, emi amade Jehovah ata ima, emi ekemede ndinam enye aka iso anam n̄kpọ ọnọ Jehovah ini afanikọn̄ esịmde utọ owo oro. (Job 1:9-11; 2:4) Akana ini ebe man ẹkeme ndikụt m̀mê anie ekedi osu nsu; m̀mê ekedi Jehovah m̀mê akakam edi Satan.

‘MMAYAK UKPỌN̄ MI NNỌ’

12. Nso ke Jesus ekenyene ndinam ke ntak emi enye akamade enyịn̄ Jehovah?

¹² Ke ntak ima emi Jesus akamade Jehovah, enye ama oyom ndinam ofụri se enye ekekeme man anam enyịn̄ Jehovah asana onyụn̄ abiat nsu emi ẹkesude ẹdori enyịn̄ oro. Jesus ọkọdọhọ ete: “[Mmayak] ukpọn̄ mi nnọ.” (John 10:17, 18) Akpanikọ edi oro. Jesus ama akam eben̄e idem ndikpa ke ntak enyịn̄ Jehovah.c Adam ye Eve ẹkedi akpa owo iba ke isọn̄ emi, mmọ ẹma ẹnyụn̄ ẹfọn ẹma. Edi mmọ ẹma ẹkpọn̄ Jehovah ẹkabade ẹkeda ye Satan. Jesus iketiehe nte mmọ. Enye ama enyịme ndidi isọn̄ emi ndiwụt adan̄a nte imọ imade Jehovah iketre. Nte enye okowụtde oro ekedi enye ndikop uyo Jehovah ke kpukpru n̄kpọ. Kpukpru se enye akanamde ke enyịn̄ Jehovah ẹma ẹfọn ẹma. (Heb. 4:15; 5:7-10) Enye ama ọsọn̄ọ ada ye Jehovah tutu ẹkọn̄ enye ke eto ẹwot, enye onyụn̄ akpa utọ ubiak ubiak n̄kpa oro. (Heb. 12:2) Se enye akanamde man owụt ke imama Jehovah ye enyịn̄ Esie edi oro.

13. Nso ikanam Jesus edi akakan owo emi ekekemede ndiwụt ke Satan edi osu nsu? (Se ndise n̄ko.)

¹³ Kpukpru se Jesus akanamde ke isọn̄ emi okowụt ke Satan ekedi osu nsu, idịghe Jehovah! (John 8:44) Inyeneke n̄kpọ ndomokiet emi Jesus akanamde emi owo ekekemede ndidọhọ ete, ‘Se enye mi, enye anam enye emi edue.’ Idụhe owo ndomokiet ke eset m̀mê idaha-emi, emi ọdiọn̄ọde Jehovah akan Jesus, idinyụn̄ idụhe ke ini iso. Ekpedi akpanikọ ama esịne ke se Satan okodoride Jehovah, ekpededi ata mben̄e ntem, Jesus ọkpọkọdiọn̄ọ. Edi Jesus ama ọsọn̄ọ ada ebiere ndiwụt ke Jehovah idịghe utọ Owo emi Satan ọkọdọhọde ke Enye edi. Idem ke ini eketiede nte ke Jehovah osion̄o ubọk ọkpọn̄ Jesus, Jesus ama enyịme ndikpa utu ke enye ndikpọn̄ edima Ete esie.​—Matt. 27:46.d

‘MMOKỤRE UTOM EKE AFO ỌKỌNỌDE MI NNAM’

14. Didie ke Jehovah ọkọdiọn̄ Jesus nte Jesus ọkọsọn̄ọde ada ye Enye?

¹⁴ Ke akam emi Jesus ọkọbọn̄de okoneyo oro mbemiso ẹwotde enye, enye ama ekeme ndidọhọ ete: “[Mmokụre] utom eke afo ọkọnọde mi nnam.” Enye ama enịm ke Jehovah ọyọdiọn̄ imọ nte imọ isọn̄ọde ida ye enye. (John 17:4, 5) Jesus ikanamke ndudue ndinịm ke Ete imọ ọyọdiọn̄ imọ. Jehovah ikayakke Jesus atak ke udi. (Utom 2:23, 24) Enye ama anam Jesus eset onyụn̄ ọnọ enye akamba itie ke heaven, emi okponde akan se enye ama ekenyenyene. (Phil. 2:8, 9) Ekem Jesus ama ọtọn̄ọ ndikara nte Edidem ke Obio Ubọn̄ Abasi. Nso ke Obio Ubọn̄ oro edinam? N̄kpọ en̄wen emi Jesus eketịn̄de ke akam emi enye ekekpepde mme mbet esie ọbọrọ mbụme oro ntem: “Yak obio ubọn̄ fo edi. Yak uduak [Jehovah] ada itie, nte edide ke heaven, yak edi ke isọn̄ kpasụk ntre.”​—Matt. 6:10.

15. Nso en̄wen ke Jesus edinam?

¹⁵ Ekpri ini ke iso, Jesus ayan̄wana ekọn̄ ye mme asua Abasi onyụn̄ osobo ndiọi owo ke Armageddon. (Edi. 16:14, 16; 19:11-16) Ekpri ini ama ebe, enye oyotop Satan esịn ke “editụn̄ọ ukpe.” Editie nte Satan akpakpa sia enye idikemeke ndisịne ke itie oro nnam n̄kpọ ndomokiet. (Edi. 20:1-3) Ini Jesus edikarade isọn̄ emi ke isua tọsịn kiet, enye ayanam emem afiak odu ke isọn̄ oyonyụn̄ anam mme owo ẹfiak ẹfọn ẹma. Enye ayanam mme akpan̄kpa ẹset. Enye ayanam ofụri ererimbot akabade Paradise. Se Jehovah akaduakde eyetịbe n̄kpọ ndomokiet ntem isụhọke!​—Edi. 21:1-4.

16. Nso ye nso iditịbe ke utịt isua tọsịn kiet emi Christ edikarade?

¹⁶ N̄kpọ editie didie ke utịt isua tọsịn kiet emi Christ edikarade? Idiọkn̄kpọ ididụhe aba, kpukpru owo ẹyefọn ẹma. Owo ndomokiet idiben̄eke Abasi ite ada ufak efen mme idiọkn̄kpọ imọ aba. Owo ndomokiet idiyomke Jesus anam se Akwa Oku akpanamde ọnọ enye, mîdịghe oyom owo 144,000 ẹnam se mme oku ẹkpenamde ẹnọ enye man ẹkeme ndin̄wam enye ekpere Jehovah. “Ẹyesobo n̄kpa [emi otode Adam] ẹfep nte akpatre asua.” Kpukpru udi ẹdina ukpọk. Mbon emi ẹkekpan̄ade ẹyeset. Kpukpru owo ke isọn̄ ẹyefọn ẹma.​—1 Cor. 15:25, 26.

17-18. (a) Nso iditịbe ke utịt isua tosịn kiet emi Christ edikarade? (b) Ama ekem ini emi ukara Jesus esịmde utịt, nso ke enye edinam? (1 Corinth 15:24, 28) (Se ndise n̄ko.)

¹⁷ Nso en̄wen iditịbe ke utịt isua tọsịn kiet emi Christ edikarade? Enyene ata akpan n̄kpọ kiet emi editịbede. Kpukpru mfan̄a ye eyịghe emi aban̄ade enyịn̄ Abasi, m̀mê enyịn̄ oro asana m̀mê isanake, m̀mê Abasi ọfọn m̀mê ifọnke ẹyetre. Didie? Ke In̄wan̄ Eden, Satan ọkọdọhọ ke Jehovah edi osu nsu, ke enye ikarake mme owo ke ntak emi enye amade mmọ. Tọn̄ọ oro, mbon emi ẹkponode enyịn̄ Jehovah mînyụn̄ idaha enyịn̄ oro ibre mbre, ẹnam enyịn̄ oro asana ediwak ini. Ntre, ke utịt isua tosịn kiet emi Christ edikarade, ẹyenen̄ede ẹwụt ke Jehovah idịghe utọ owo emi Satan ọkọdọhọde ke enye edi. Jehovah oyowụt ke kpukpru usụn̄ ke imọ idi Ete nnyịn emi odude ke heaven, emi amade nnyịn eti-eti.

¹⁸ Ke utịt isua tọsịn kiet emi Jesus edikarade, kpukpru owo ẹyekụt ke kpukpru se Satan eketịn̄de aban̄a Jehovah ẹkedi nsu. Ama esịm ini emi ukara Jesus okụrede, nso ke Jesus edinam? Ndi enye eyekpebe Satan, ọsọn̄ ibuot ye Jehovah? Nsa-o! (Kot 1 Corinth 15:24, 28.) Jesus ayafiak ọkpọn̄ ukara ọnọ Ete esie. Enye oyosụhọde idem esịne ke idak ukara Jehovah. Jesus ibietke Satan, enye eben̄e idem ndiyak kpukpru n̄kpọ nnọ Jehovah ke ntak emi enye amade Jehovah. Enye oro edi akpanikọ.

19. Nso ke ikpep ke ibuotikọ emi iban̄a Jesus?

¹⁹ Imosụk ise Jehovah ekenyịmede ndinọ Jesus enyịn̄ esie! Jesus owụt ke imọ imenen̄ede inam ẹkụt utọ Owo emi Ete imọ edide. Ntre, enyịn̄ Jehovah enen̄ede edi akpan n̄kpọ didie ọnọ Jesus? Edi akpan n̄kpọ akan n̄kpọ ekededi. Jesus ama enyịme ndikpa ke ntak enyịn̄ oro, enye oyonyụn̄ eben̄e idem ndiyak kpukpru n̄kpọ nnọ Jehovah ke utịt isua tọsịn kiet emi enye edikarade. Didie ke ikeme ndikpebe Jesus? Iyeneme ibọrọ mbụme oro ke ibuotikọ emi etienede.