Ibuot 8
‘Obio Ubọn̄ Oro Emekpere’
1. Ntak emi mme ikọ John ke N̄wed Matthew 3:1-10 ẹkedide ke ekemini?
ẸYAK nnyịn itịm idụn̄ọde ọyọhọ ọyọhọ iban̄a utom “Messiah Ọbọn̄” ke ini akpa edidi esie. Ẹkekop aduai owo idem ntọt emi ke akpa ẹto inua John Baptist: “Mbufo ẹkabade esịt; koro Ubọn̄ Heaven ke ekpere.” (Matthew 3:2) Enyeemi edidide Edidem ke ekekpere ndiwụt idem! Nte ‘ọyọhọ urua ata ye duop,’ kpa “urua” akpan mfọn, akasan̄ade ekpere, ekedi edikem ini ke akpanikọ ọnọ mme Jew oro ndikabade esịt n̄kpọn̄ mme idiọkn̄kpọ oro mmọ ẹkenamde ẹdian otu ndinen mbet oro Abasi mmọ, Jehovah, ọkọnọde mmọ. Koro ke emi Israel ke okoyom ndidụk usen ikpe. Mmọdo, John ama akaiso ndidọhọ mbon mbubịk mme adaiso ido ukpono idụt emi ete: “Mbufo nditọ urụkikọt, anie eketeme mbufo ẹfen̄e ẹbọhọ iyatesịt eke edide? Ẹsion̄o nan̄a mfri eke ekemde ye edikabade esịt; edi kpa idahaemi ẹmonịm ekudi ke etak eto: ntre ke ẹkpi kpukpru eto eke mîn̄wụmke mfri eke eyede ẹduọk, ẹmen, ẹsịn ke ikan̄.”—Matthew 3:7, 8, 10.
2. (a) Ke nso usụn̄ ke baptism Jesus ekenyene ukpụhọde? (b) Nte enye ‘ọkọtọn̄ọde utom esie,’ nso en̄wan ke enye okosobo?
2 Edikem Jesus oto ke Galilee edi ke Jordan onyụn̄ ọdọhọ John ete onịm imọ baptism. John ama ọfiọk ete ke Jesus ikenyeneke idiọkn̄kpọ, ntre ama esịn ke akpa. Nte ededi, baptism Jesus ekenyene ndidi isio isio n̄kpọ. Enye edida aban̄a edinọ emi enye ọnọde Jehovah idemesie kaban̄a akpan utom emi Ete esie ekenyenede ọnọ enye ndinam ke isọn̄. Nte odotde, ndien, ẹma ẹnịm Jesus baptism ke mmọn̄.
“Edikem, ke ini Jesus . . . ọbọn̄de akam, enyọn̄ eberede, ndien Edisana Spirit osụhọde ke mbiet ibiom edidoro Enye ke idem: ndien uyo oto ke enyọn̄, ete, Afo edi edima eyen Mi; mmenem esịt etieti ye Afo. Ndien Jesus ke Idemesie edi n̄kpọ nte isua edịp ye duop ke ini ọtọn̄ọde ndikpep owo n̄kpọ.”
Ndondo oro, nte Messiah ye Edidem emi ẹmekde ẹnịm, enye ama akabade edi owo usua ọnọ akani Urụkikọt oro, Devil, ye mme adaiso ido ukpono mme Jew oro ke mbubịk ẹkedọhọde nte inamde n̄kpọ inọ Abasi.—Luke 3:21-23.
3. Didie ke usụn̄uwem Jesus ke ini okodude ke idomo ekedi isio ye eke Adam ye Eve?
3 “Edi Jesus ọyọhọ ye Edisana Spirit afiak ọkpọn̄ Jordan; Spirit onyụn̄ ada Enye asan̄a ke desert ke usen aba, ndien Satan odomo Enye.” (Luke 4:1, 2) Satan ama ọdiọn̄ọ Jesus nte “Mfri” un̄wọn̄ọ Abasi emi ke edikem ini edisọhide Devil ye ndiọi “mfri” esie efep. Nte Satan ekpekeme ndiṭimede uduak Abasi ebe ke ndinam Jesus otụt utọn̄ ye Enye? Jesus okodu ke utre udia ke usen 40. Ntem Devil ọdọhọ Jesus owo ọ-biọn̄ emi ete anam mme itiat ke anana mbun̄wụm desert oro ẹkabade uyo. Jesus ke emi ama enyene odudu ndinam mme utịben̄kpọ, edi, nte enende, enye ama okot oto edinen ibet Jehovah, ete:
“Ẹma ẹwet ẹte, Idịghe uyo ikpọn̄ ke owo edida idu uwem, edi edida kpukpru ikọ eke ẹwọrọde Abasi ke inua odu.” (Matthew 4:1-4; Deuteronomy 8:3)
Didie ke enye okokpụhọde ọkpọn̄ Eve ye Adam ebe esie ntem, emi ke ntụtutọn̄ ẹkediade mfri eto emi ẹkekpande okposụkedi mme udia efen ndida ndu uwem ẹkedude barasuene ẹkan mmọ ẹkụk!
4. Nso ukpepn̄kpọ ke ikeme ndida nto usụn̄ emi Jesus akanamde n̄kpọ ye ọyọhọ idomo iba?
4 Jesus ama owụt nsụhọdeidem ye ọyọhọ ediberi edem ke Ete esie ke usụn̄ emi enye okosobode udiana idomo. Satan ama an̄wana ndinam Jesus ekere nte ke imọ, nte Eyen Abasi, imedi n̄kpọ ikan owo efen—ọwọrọetop owo. Ih, yak enye ye unana eti ntak ada ke edikon̄ ebiet temple osio idemesie ọduọk ke isọn̄, koro mme angel Abasi iditreke ndikpobi enye man enye okûda unan. Edi Jesus ama esịn utọ ndisịme ekikere oro, afiakde okot oto ibet Jehovah, onyụn̄ ọdọhọde ete:
“Ẹma ẹwet n̄ko ẹte, Kûdomo Jehovah Abasi fo.” (Matthew 4:5-7; Deuteronomy 6:16)
Edi mi ke ukpepn̄kpọ odu ọnọ kpukpru mbon oro ẹdọhọde ẹte idi mme asan̄autom Abasi tutu osịm mfịn: Yak owo baba kiet okûdedei ada itie esie ye Abasi ntre ntre. Abasi ndidiọn̄ nnyịn ikọn̄ọke ke utom oro nnyịn ikenamde ke ini emi ekebede m̀mê akamba itie oro nnyịn ikamade edi ọkọn̄ọ ke nnyịn ndikaiso n̄kop uyo esie ke ọyọhọ nsụhọdeidem, inyenede ntotụn̄ọ ukpono inọ mme ndutịm ye mbet esie.—Philippi 2:5-7.
5. (a) Kaban̄a nso n̄wọrọnda eneni ke ọyọhọ idomo ita ọkọkọn̄ọ? (b) Didie ke Jesus akafiak ada ibet Abasi anam n̄kpọ ke ndinọ ibọrọ? (c) Didie ke emi edi ediye uwụtn̄kpọ ọnọ nnyịn mfịn?
5 Idahaemi, akpatre idomo ye ini edinam ubiere! Oh, akpakam Satan osụk ekeme ndikpaha Jesus ukot man ọduọ ke n̄wọrọnda eneni oro, kaban̄a Obio Ubọn̄! Anam “Satan ada Enye aka ke ata edikon̄ obot, onyụn̄ owụt Enye kpukpru mme obio ererimbot ye ubọn̄ mmọ; onyụn̄ ọdọhọ Enye ete, Nyenọ Fi kpukpru n̄kpọ ẹmi, edieke ọduọde ke isọn̄ atuak ibuot ọnọ Mi.” Otode ke ekpri edikan̄ mbuọtidem emi, nte Satan okowụtde, Jesus ekpekeme ndikara ofụri ererimbot ubonowo ndondo oro, ye unana edibet ke ediwak isua ikie tutu edikem ini Jehovah. Edi Jesus ama afiak etịn̄ otụk ibet Jehovah, nte enye ọkọbọrọde ete:
“Daha Mi ke usụn̄ Satan: koro ẹma ẹwet ẹte, Tuak ibuot nọ Jehovah Abasi fo, nyụn̄ nam n̄kpọ nọ Enye ikpọn̄îkpọn̄.” (Matthew 4:8-10; Deuteronomy 6:13)
N̄wọrọnda uwụtn̄kpọ efen ọnọ mbon oro ẹnamde n̄kpọ ẹnọ Jehovah mfịn! Inamke n̄kpọ m̀mê etie nte ke usụn̄ oyom adan̄a didie, yak mbon oro ẹnamde edisana utom ẹnọ Jehovah ẹkûdedei, tutu amama, ẹtre ndinịm obio ubọn̄ Abasi nte akpa ke uwem mmọ. Mmọ ke nsinsi ẹkpekam ẹtre ndiwọn̄ọde ntọn̄ọ ndibọp n̄kpri “obio ubọn̄” eke idemmọ ke n̄ka uma inyene obụkidem ererimbot Satan emi.
‘IDỊGHE EKE ERERIMBOT EMI’
6. (a) Ke nso usụn̄ ke Obio Ubọn̄ akasan̄a ekpere idahaemi? (b) Ke ndimen 1 Peter 2:21 nsịn ke edinam, nso uwụtn̄kpọ Jesus ke mme Christian ẹnyene nditiene?
6 Nso ke Jesus akanam ke ama ekesịn mme idomo Devil? Mbụk Bible etịn̄ ọnọ nnyịn ete:
“Toto ke inioro Jesus ọtọn̄ọ ndikwọrọ, ndinyụn̄ ndọhọ, ete, Ẹkabade esịt; koro Ubọn̄ Heaven ke ekpere.”
Ke nso usụn̄ ke Obio Ubọn̄ oro ekekpere? Koro enyeemi ẹkeyetde aran ndidi Edidem, kpa Jesus Christ ke idemesie, ke emi ke okodu do, “ekpep mme owo n̄kpọ . . . onyụn̄ ọkwọrọ gospel Ubọn̄ Heaven.” Akwa otu owo ẹma ẹtiene enye ẹka ke nsio nsio ebiet. (Matthew 4:17, 23-25) Jesus ama anam otịm an̄wan̄a nte ke mbon oro edinyịmede ukpepn̄kpọ imọ inyeneke ‘ndidi eke ererimbot, kpasụk nte enye mîkedịghe eke ererimbot.’ Mmọ ẹnyene ndibahade idemmọ nsio ke ererimbot ye mme obom obom, oburobụt usụn̄ esie. Kpukpru mbon oro ẹyomde nditiene Jesus mfịn ẹnyene ndinam kpasụk ntre.—John 17:14, 16; 1 Peter 2:21; se n̄ko N̄wed Matthew 5:27, 28; 26:52.
7. Ke ikerede iban̄a mme ikọ Jesus ke N̄wed John 8:44, ntak edide akpan n̄kpọ nte nnyịn mfịn idụn̄ọde mme ukpepn̄kpọ eke mme adaiso ido ukpono ke ebuana ye Bible?
7 Kaban̄a nsunsu utuakibuot, Jesus ama ọdọhọ mme adaiso ido ukpono eke usen esie ete: “Mbufo ẹdi nditọete mbufo, kpa Satan, ẹnyụn̄ ẹyom ndinam obukpo udọn̄ ete mbufo. Enye edi owot owo toto ke editọn̄ọ, ikonyụn̄ isọn̄ọke ida ke akpanikọ, koro enye mînyeneke akpanikọ ke esịt esie. Ke ini enye osude nsu, enye osio se idude ke esịt esie etịn̄: koro enye edi osu nsu, ye ete nsu.” (John 8:44) Ekedi ata akpan n̄kpọ ke ini edem oro nte kpukpru owo ẹbahade idemmọ ẹkpọn̄ mme nsunsu ukpepn̄kpọ (oro ke ukperedem ẹkemende ẹbuak ke Talmud [otu ibet mme Jew]) emi ẹkedemerede ke ido ukpono mme Jew. Ndien mfịn, kaban̄a mbon oro, nte mme Jew oro, ẹdude ofụri uwem mmọ ke ido ukpono mme eteete mmọ, edi akpan n̄kpọ nte mmọ ẹdụn̄ọde ẹfiọk mbak edidi ke mme adaiso ido ukpono mmọ ẹma ‘ẹkpọnọde’ ikọ Abasi ‘ẹnịm’ n̄kan̄ kiet man ẹkpep ikpîkpu item owo.—Mark 7:9-13.
8, 9. (a) Ntak emi Jesus ọkọdọhọde nte ke obio ubọn̄ esie “idịghe eke ererimbot emi”? (b) Ntak, ndien-e, emi ata mme anditiene Christ ẹsisobode ukọbọ? (c) Ntak akpanade mmọ ẹnyene uko?
8 Ke ini akadade ke ikpe kaban̄a uwem esie, Jesus ama ọdọhọ aban̄a mme ukara ukaraidem eke eyo esie ete:
“Obio Ubọn̄ Mi idịghe eke ererimbot emi: edieke Obio Ubọn̄ Mi ekpedide eke ererimbot emi, ikọt Mi ẹkpen̄wana, mbak ediyak Mi ẹsịn mme Jew ke ubọk: edi Obio Ubọn̄ Mi itoho do.”
Ebiet emi obio ubọn̄ Jesus otode edi heaven. Enye ọbọ odudu esie oto Akakan Andikara Ekondo, Jehovah Abasi, idịghe Satan. Nte ekemde, Satan ama ada “nditọ” esie eke isọn̄ ndikọbọ Jesus ye mme anditiene enye.—John 18:36.
9 Jesus ke ntre ama ọdọhọ mme mbet akpanikọ esie ete: “Mmowụk mbufo ntem nte, mbufo ẹma kiet eken. Edieke ererimbot asuade mbufo, mbufo ẹmọfiọk ẹte, enye ama ebemiso asua Mi, ndien edisua mbufo. Edieke mbufo ẹkpedide mbon ererimbot, ererimbot akpama ikọt esie: edi sia mbufo mîdịghe mbon ererimbot, edi Ami n̄kemekde mbufo nsio ke ererimbot, ke ntak oro ererimbot asua mbufo.” (John 15:17-19) Mme andituak ibuot nnọ Jehovah ẹmesobo ndotndot usua ye ukọbọ tutu osịm mfịn emi sia mmọ ẹbaharede idemmọ ẹkpọn̄ mbiara ukaraidem ye obom oro awakde mfịn. Edi uwak edidiọn̄ ke ẹbet mbon oro ke akpatre ẹkande ererimbot. Kpa nte Jesus ọkọsọn̄ọde ọdọhọ mme mbet esie: “Mbufo ẹyekụt ukụt ke ererimbot: edi ẹsọn̄ esịt; Ami n̄kakan ererimbot.”—John 16:33.
MME N̄KPỌ ẸNAMDE EDIDEM ODOT
10, 11. (a) Nso iwụt nte ke idịghe Abasi ọnọ mme andikara ererimbot unen ndikara? (b) Ke okpụhọrede ye oro, didie ke Jesus okowụt idemesie nte kiet emi odotde ke itie edidem?
10 Nso mme edu ke afo okpoyom ndikụt nte andikara ererimbot enyenede? Ekese mme andikara ke mbụk ẹkedi “n̄kpọsọn̄ owo,” mbon iseri, mbon n̄kohodeidem. Mmọ ẹsiwak ndinịm uforo eke idemmọ ebem udọn̄ eke mme ọsọ owo iso. Ndusụk mmọ ẹma ẹnam inua ẹban̄a ikpọ obio ukara oro mmọ ẹbọpde, edi nte ini akade ofụri ofụri obio ukara mmọ owụre, ndisọn̄ọ nte mme ikọ Edidem Sọlomon oro ẹdide akpanikọ: “Ke mîbọhọke Jehovah ọbọp ufọk, mmọ eke ẹbọpde ẹkpa utom ikpîkpu ke esịt.” (Psalm 127:1) “Ndidem” ẹmi ẹma ẹsọn̄ọ akpanikọ oro nte ke idịghe Abasi ọnọ mmọ unen ndikara. Itie edikara ererimbot mmọ itoho Jehovah Abasi.
11 Nte ededi, ẹtịn̄ ke ntịn̄nịmikọ ẹban̄a Edidem Abasi emi ẹyetde aran, kpa Jesus Christ, nte awatde aka ndin̄wana ye mme asua esie ‘kaban̄a akpanikọ, emem, ye edinen ido.’ Ẹtịn̄ ẹban̄a enye ẹte: “Afo ama se inende, onyụn̄ asua se ikwan̄ade; oro esịn Abasi, kpa Abasi fo, ada aran idara eyet fi, akan mme ufan fo”—ndidem eke udịm ubon David emi ẹkedude mbemiso enye. (Psalm 45:4, 7) Ke enye ndisua kpukpru n̄kpọ oro ẹsuenede edisana enyịn̄ Jehovah onyụn̄ abiatde ndinen edumbet esie, Edidem eke heaven ke edikem ini eyenam isọn̄ emi asana ọbọhọ kpukpru idiọkido, ke mben̄eidem ndida ukara emi edikarade ke edinen ido ndi. Nte Jesus ama owụt idemesie nte idotde ndidi utọ andikara oro? Ke akpanikọ ama owụt!
12. Nso uwụtn̄kpọ edisana utom ke Jesus okonịm ọnọ nnyịn?
12 Ke ini ekedide mfọnmma owo, Jesus ama onịm uwụtn̄kpọ ke ndiwụt ima Abasi ye eke mbọhọidụn̄. Nte andibuana ke idụt Israel Abasi, ayakde idem ọnọ Jehovah, Jesus ama onịm uwụtn̄kpọ ke ndinam n̄kpon n̄kan ibet iba oro. Enye ọkọdọhọ ete: “Ebeiso [ibet] edi, Ẹkop O Israel, Jehovah Abasi nnyịn, edi Jehovah kiet. Afo nyụn̄ ma Jehovah Abasi fo ke ofụri esịt fo, ye ke ofụri ukpọn̄ fo, ye ke ofụri ekikere fo, ye ke ofụri odudu fo. Udiana akpa edi emi, Ma mbọhọidụn̄ fo nte idemfo.” (Mark 12:29-31; Deuteronomy 6:4, 5) Jesus ama ayak idemesie ọnọ ke ntatubọk ke utom oro enye akanamde ọnọ Jehovah ye ke ndikpep mme Jew mme mbọhọidụn̄ esie n̄kpọ. Ke ini mmọemi ẹkeyomde ndimụm enye nnịm man ẹkop mme n̄kpọ awakde akan, enye ama ọdọhọ mmọ ete:
“Mmenyene ndikwọrọ eti mbụk Ubọn̄ Abasi nnọ mme obio en̄wen n̄ko: koro ẹkedọn̄ Mi ẹte ndinam oro.” (Luke 4:43)
Amaedi ndinam edisana utom, Jesus ekedi anamutom, onịmde uwụtn̄kpọ ọnọ kpukpru mme Christian akpanikọ nditiene.—Men N̄wed John 5:17 domo.
13, 14. (a) Didie ke Jesus ekekere aban̄a mme owo? (b) Ntak emi enye ọkọwọrọde asan̄a ọkwọrọ ikọ, ndien ntak emi enye okosiode mbon efen ọdọn̄? (c) Nso utọ edise mban̄a ke mme owo ẹkeme ndidori enyịn ndibọ ke idak Obio Ubọn̄ oro?
13 Jesus ama owụt idemesie nte owo emi enyenede ima onyụn̄ owụtde mbọm. Ke isọn̄ esịt esie, ama ọdọn̄ enye ndikụt nte ẹnamde ikọt esie ẹbọhọ ndodobi mbiomo emi mbon ufịk ido ukpono ẹkedoride mmọ. Ntem enye ama etịn̄ ọnọ mmọ aban̄a Obio Ubọn̄ oro, onyụn̄ osio mme mbet esie ọdọn̄, ete:
“Nte mbufo ẹkade, ẹkwọrọ ẹte, Ubọn̄ Heaven ke ekpere.”—Matthew 9:35–10:7.
14 Edidem emi ẹmekde ẹnịm mi ama ọnọ mme owo ikot, ete: “Ẹtiene Mi, kpukpru mbufo ẹmi ẹkpade mba ẹnyụn̄ ẹbiomde edidobi mbiomo, ndien Ami nyenọ mbufo nduọkodudu. Ẹmen ọkpọnọ Mi ẹkọn̄ọ ke itọn̄ mbufo, ẹnyụn̄ ẹkpebe Mi; koro mmenyene ifụre ifụre ido nnyụn̄ nsụhọde idem ke esịt; ndien mbufo ẹyekụt nduọkodudu ẹnọ ukpọn̄ mbufo. Koro ọkpọnọ Mi ememem, mbiomo Mi onyụn̄ efefere.” (Matthew 11:28-30) Jesus, nte Edidem Abasi eke heaven kaban̄a ofụri ubonowo, eyewụt kpa ukem mbọm oro, eyenyụn̄ okụt ete, kpasụk nte enye akanamde ke ini okodude ke isọn̄, ke ẹmetan̄ mme nsan̄a esie eke Obio Ubọn̄ ẹbok ndinọ ubọhọ ye ima ima ntịn̄enyịn oro mme owo ẹnen̄erede ẹyom. Kpukpru mbon oro ẹdude uwem ke isọn̄ ke idak ukara Obio Ubọn̄ Jesus ke akpanikọ ẹyekụt nduọkodudu ẹnọ ukpọn̄ mmọ.
ANANA NDO KE EDIMỤM NSỌN̄ỌNDA N̄KAMA
15. Didie ke Jesus ọkọnọ eneni Satan oro ọyọhọ ibọrọ?
15 Akande kpukpru n̄kpọ, Edidem ini iso oro ẹnọde ubonowo ama owụt anana ndo edimụm nsọn̄ọnda n̄kama ye n̄kopuyo nnọ Ete esie eke heaven, tutu osịm n̄kpa afai ke eto ndutụhọ. Nte ini n̄kpa oro akasan̄ade ekpere, Jesus ama ọbọn̄ akam ọnọ Jehovah, ete, “Ete, nọ enyịn̄ Fo ubọn̄.” Uyo Jehovah oto ke heaven ọbọrọ ete: “Mma n̄kọnọ enyịn̄ Mi ubọn̄, nyenyụn̄ ntọn̄ọ ntak nnọ enye ubọn̄.” Ke ndinam enyịn̄ Ete esie asana, Jesus ama ọnọ eneni Satan ọyọhọ ibọrọ. Enye ama anam owụt nte ke mfọnmma owo emekeme ndinam akpanikọ nnọ Abasi ke idak kpukpru orụk idomo oro andidiọk ekemede ndida ntiene enye. Ntem Jesus ama ekeme ndidọhọ ete: “Êkem ini ikpe ererimbot emi: ke emi ẹmọn̄ ẹdisio ọbọn̄ ererimbot emi [Satan] ẹduọk”—ẹsuene ọyọhọ ọyọhọ, ẹyarade nte osu nsu. Mme adaiso ido ukpono mme Jew oro, nte ‘mfri urụkikọt,’ ẹyenam ẹnọ “mfri” mbiet an̄wan esop Abasi ubiak ubiak unan ke “nditịn̄ ikpat,” edi Abasi eyenam eyen esie emi odotde eset enyene uwem eke spirit—Genesis 3:15; John 12:27-31.
16, 17. (a) Ntak emi nnyịn ikpenyenede ọkpọsọn̄ mbuọtidem ke Edidem ini iso eke isọn̄? (b) Didie ke N̄wed Abasi owụt nte ke idotenyịn kaban̄a paradise isọn̄ edi ata n̄kpọ emi editịbede? (c) Nte akpa usụn̄uwem fo ekpenyene ndikpan fi ndinyene idotenyịn oro?
16 Ima emi Jesus enyenede ọnọ se inende, enye ndisua se idiọkde, ọkpọsọn̄ ima esie kaban̄a ubonowo ye, ke akande kpukpru n̄kpọ, nsọn̄ọnda n̄kopuyo esie ke ndinam uduak Ete esie ndida ubọn̄ nnọ enyịn̄ Jehovah—kpukpru n̄kpọ ẹmi ẹwụt anam-akpanikọ Eyen emi nte andidot ndidi Edidem isọn̄ ke ini iso edifọn edifọn. Nte afo ukpamaha ndidụk ke nsinsi uwem nte idara idara andidu ke idak utọ edidem oro?
17 Inamke n̄kpọ m̀mê usụn̄uwem fo ọfọn m̀mê ọdiọk adan̄a didie tutu ke emi, afo emekeme ndinyene idotenyịn nsinsi uwem oro ke isọn̄ emi ẹnamde enyene ubọn̄. Sese, ẹma ẹnọ idem atua n̄kpọfiọk inọ oro ẹkewotde ye Jesus utọ idotenyịn ediset ke n̄kpa oro! Koro ke ini enye ọkọdọhọde Jesus ete, “Ọbọn̄, ti mi ke adan̄aemi Afo edide ndida ubọn̄,” Jesus ama ọbọrọ ete: “Ke akpanikọ ke ndọhọ fi mfịn emi, afo eyedu ye ami ke Paradise.” (Luke 23:42, 43, NW) Ibịghike, Paradise eyenen̄ede odu. Nte afo, nde, ke ọbọn̄ akam oyom ‘edidi’ Obio Ubọn̄ oro ye mme edidiọn̄ esie?
[Ndise ke page 77]
N̄KPON N̄KAN OWO EMI AKANAM ODUDE KE ISỌN̄
Nte Edidem emi ẹmekde, enye ama anam akpanikọ tutu osịm n̄kpa, ndien otode ke iyịp esie emi ẹkeduọkde, anyan̄a ubonowo osio ke idiọkn̄kpọ ye n̄kpa