Ibuot 10
Obio Ubọn̄ ‘eke Mîdibiarake’
1, 2. (a) Ewe akpanikọ ke mme n̄kpọntịbe ererimbot ẹdori nsọn̄uyo ke usen kiet kiet, ndien didie? (b) Nso idi n̄kukụre usọbọ?
MME n̄kpọntịbe ererimbot ke usen kiet kiet ẹsọn̄ọ akpanikọ oro nte ke ubonowo ikwe inemesịt ke ndisịn itie edikara Jehovah ndien, utu ke oro, ẹdomode ndikara idemmọ. Idụhe ndutịm ukara owo oro adade mme edidiọn̄ ọsọk ubonowo ye unana asari. Okposụkedi oro mme owo ẹkọride ke usụn̄ unam n̄kpọ ifiọk ntaifiọk mmọ ẹkesịm udomo oro akanam mîsịmke, mmọ ikemeke ndisio idiọkn̄kpọ mfep, ndikan udọn̄ọ nnyụn̄ nda utịt nsọk n̄kpa, idem eke owo kiet ke otu mbon oro ẹdude ke idak ukara mmọ. Ke edide isio, mme idụt ẹkaiso ndision̄o mbufa ye mme enyene-ndịk n̄kpọekọn̄ ndi. Afai afai ubiatibet ke ọkọri. Ifiọk ubotn̄kpọ, idiọkitọn̄ ye unana ifiọk ẹdiana kiet ke ndisabade isọn̄, mmọn̄ ye ofụm. Ekọmurua n̄kpọ ndidọk usọp usọp ye unana utom ẹnam ototịm edi ọkpọsọn̄ n̄kpọ ọnọ ediwak owo ndinyene n̄kpọ udu uwem. Mme owo ke ẹyom usụn̄ ubọhọ ke mbrenyịn.—Eccl. 8:9.
2 Nso idi usọbọ? Obio Ubọn̄ Abasi, emi Jesus ekekpepde mme anditiene enye ndibọn̄ akam mben̄e. (Matt. 6:9, 10) Nnyịn ikpowụt esịtekọm didie ntem nte ke ubọhọ oro enye edidade edi otịm ekpere idahaemi!
3. (a) Ke ebuana ye Obio Ubọn̄ emi, nso ikada itie ke heaven ke 1914 E.N.? (b) Ntak oro edide akpan n̄kpọ ọnọ nnyịn-e?
3 Toto ke 1914 E.N., Obio Ubọn̄ Abasi ke ubọk Jesus Christ ama ọtọtọn̄ọ edinam.a Ke isua oro mme n̄kpọntịbe oro Daniel okokụtde ke ntịn̄nnịm n̄kukụt ke akpanikọ ama ada itie ke heaven. “Andisọn̄ọ usen,” kpa Jehovah Abasi, ama ọnọ Eyen owo, kpa Jesus Christ, “ubọn̄, ye ukpono, ye itie edidem, ete kpukpru mme idụt ye obio ye usem ẹnam n̄kpọ ẹnọ enye.” Ke obụkde aban̄a n̄kukụt emi, Daniel ekewet ete: “Ubọn̄ esie edi nsinsi ubọn̄ eke mîdikụreke, itie edidem esie idinyụn̄ ibiarake.” (Dan. 7:13, 14) Ebede ke Obio Ubọn̄ emi ke Abasi edinam mme andima edinen ido ẹkeme ndidara anana-ibat nti n̄kpọ oro enye akaduakde ke ini enye okonịmde akpa ete ye eka nnyịn ke Paradise.
4. Mme ọyọhọ ntọt ewe ẹban̄ade Obio Ubọn̄ ẹnen̄ede ẹdi akpan n̄kpọ udọn̄ ẹnọ nnyịn, ndien ntak-a?
4 Mme andidu ke idak Obio Ubọn̄ ẹmi ẹnamde akpanikọ ẹnen̄ede ẹnyene udọn̄ ke ndutịm ye edinam ukara emi. Mmọ ẹyom ndidiọn̄ọ se enye anamde idahaemi, se enye edinamde ke ini iso ye se enye oyomde oto mmọ. Mmọ ẹdụn̄ọde enye ye ntịn̄enyịn, ndien nte mmọ ẹnamde, esịtekọm mmọ kaban̄a emi ọkọri mmọ ẹnyụn̄ ẹtịm idemmọ nditịn̄ nnọ mbon efen mban̄a enye.—Ps. 48:12, 13.
AKAMA-IDATESỊT NDỤN̄ỌDE
5. (a) Didie ke N̄wed Abasi owụt m̀mê itie edikara anie ke Obio Ubọn̄ Messiah owụt? (b) Ntre didie ke se nnyịn ikpepde iban̄a Obio Ubọn̄ otụk nnyịn?
5 Kiet ke otu mme akpa n̄kpọ oro utọ ndụn̄ọde oro ayararede edi nte ke Obio Ubọn̄ Messiah emi edi ediwụt itie edikara eke Jehovah. Enye edi enyeemi ọkọnọde Eyen esie “ubọn̄, ye ukpono, ye itie edidem.” Ntem, ke Obio Ubọn̄ emi ama ọkọtọn̄ọ ndikara, mme uyo ke heaven nte odotde ẹma ẹfiori ẹte: “Obio ubọn̄ ererimbot emi amakabade edi Obio Ubọn̄ Ọbọn̄ [Jehovah Abasi] nnyịn ye Christ Esie. Enye [Jehovah] eyenyụn̄ ada ubọn̄ ke nsinsi nsinsi.” (Edi. 11:15) Ntre kpukpru n̄kpọ oro nnyịn ikụtde iban̄a Obio Ubọn̄ emi ye se enye anamde odụri nnyịn esịk ekpere Jehovah ke idemesie akan. Enye esịn udọn̄ edisụk idem nnọ itie edikara esie ke nsinsi ke esịt nnyịn.
6. Ntak emi edide akpan n̄kpọ udọn̄ ọnọ nnyịn nte ke Jesus Christ edi udiana andikara ọnọ Jehovah?
6 Eye didie ntem nte ke Jehovah ama odori Jesus Christ ke ebekpo nte udiana andikara Esie! Nte Etubom Anamutom emi Abasi akadade ke ndinam isọn̄ ye owo, Jesus ọdiọn̄ọ se nnyịn iyomde ọfọn akan nte owo nnyịn ekededi ọdiọn̄ọde. N̄ko-n̄ko, enye ama owụt toto ke ntọn̄ọ mbụk ubonowo ke ‘idatesịt imọ odu ke otu nditọ owo.’ (N̄ke 8:30, 31; Col. 1:15-17) Ima oro okpon etieti tutu enye ke idemesie ekedi isọn̄ onyụn̄ edinọ uwem esie nte ufak ke ibuot mmọ. Ntem enye ama anam usụn̄ odu ọnọ nnyịn ndibọhọ idiọkn̄kpọ ye n̄kpa, ye ifet edinyene nsinsi uwem.—Matt. 20:28.
7. (a) Ke okpụhọrede ye itie edikara owo ekededi, ntak emi ukara emi edibịghide-e? (b) Nso ebuana ke “asan̄autom emi anamde akpanikọ, onyụn̄ enyenede ọniọn̄” enyene ye ukara eke heaven?
7 Emi edi ukara oro enyenede iwuk, emi ebịghide. Akpanikọ oro nte ke Jehovah ikemeke ndikpa ọsọn̄ọ ukeme oro ukara oro enyenede ndibịghi. (Hab. 1:12; Ps. 146:3-5, 10) Ke okpụhọrede ye ndidem ẹdide owo, Jesus Christ, kpa enyeemi Abasi ayakde itie edidem esịn ke ubọk, n̄ko ikemeke ndikpa. (Rome 6:9; 1 Tim. 6:15, 16) Mbon oro ẹdidianade ye Christ ke mme ebekpo eke heaven ẹdidi owo 144,000 efen, kpa mme anam-akpanikọ asan̄autom Abasi oro ẹsiode ke “kpukpru esien, ye usem, ye obio, ye idụt.” Ẹnọ mmọemi, n̄ko, uwem oro mîkemeke ndikụt n̄kpa. (Edi. 5:9, 10; 1 Cor. 15:42-44, 53) Akamba ubak ke otu mmọ ẹdodu ke heaven, ndien nsụhọ ke otu mmọ oro ẹsụk ẹdude ke isọn̄ ẹnam otu “asan̄autom emi anamde akpanikọ, onyụn̄ enyenede ọniọn̄,” emi ke edinam akpanikọ anamde mme ufọn n̄kpọ Obio Ubọn̄ oro akaiso mi.—Matt. 24:45-47.
8, 9. (a) Ewe ọtọ-ubahade, odudu ẹmi ẹkamade mbiara ke Obio Ubọn̄ edisio efep? (b) Ntre, edieke nnyịn iyomde ndifep edikabade ndi asua Obio Ubọn̄ Abasi, ewe n̄ka ye edinam ke nnyịn ikpefep ndikọmọ idem?
8 Ke mîbịghike idahaemi, ke edimek ini Jehovah, udịmekọn̄ esie ẹyetọn̄ọ edinam ndinam isọn̄ asana. Mmọ ke nsinsi ẹyesobo mbon oro otode ke ntak edimek idemmọ mîdiọn̄ọke Abasi, ẹsịnde ndifiọk itie edikara esie, ẹnyụn̄ ẹsịnde mme ima ima ndutịm oro enye anamde ebe ke Jesus Christ ke ndek. (2 Thess. 1:6-9) Emi edidi usen Jehovah, kpa ini emi ẹkebetde ke anyanini enye ndiwụt unen esie nte Andikara Ekondo.
9 Ẹyesobo kpukpru nsunsu ido ukpono, ye n̄ko kpukpru ukara owo ye udịmekọn̄ mmọ, emi idiọk andikara ererimbot emi oro enyịn mîkwe adade usụn̄, ẹfep ke nsinsi. Ẹyesịbe kpukpru mbon oro ẹnamde idemmọ ubak ererimbot emi ke ndibịne usụn̄uwem idemmọ, unana edinam akpanikọ, oburobụt ido uwem, ẹfep ke n̄kpa. Ẹyetre Satan ye mme demon esie ndinyene ebuana ye mme andidụn̄ isọn̄, ẹkọbide enye mfọn mfọn ke tọsịn isua. Nso ubọhọ ke emi edidi ntem ọnọ mbon oro ẹmade edinen ido!—Edi. 18:21, 24; 19:11-16, 19-21; 20:1, 2.
MME UTỊTMBUBA ESIE—NTE ẸSỊMDE
10. (a) Didie ke Obio Ubọn̄ Messiah ediyọhọ uduak Jehovah kaban̄a isọn̄? (b) Nso ke emi ediwọrọ ọnọ mbon oro ẹdụn̄de ke isọn̄ adan̄aoro?
10 Obio Ubọn̄ Messiah emi eyenam akpa uduak Abasi kaban̄a isọn̄ ọyọhọ ọyọhọ. (Gen. 2:8, 9, 15; 1:28) Tutu osịm mfịn emi, owo omokpu ndinam uduak oro. Nte ededi, ẹma ẹda “ererimbot eke edidide” ẹsịn ke idak Eyen owo, kpa Jesus Christ. Kpukpru mbon oro ẹbọhọde nsobo ubiereikpe Jehovah ke akani editịm n̄kpọ emi ẹyediana kiet ẹnam n̄kpọ ke idak Christ nte Edidem, ẹnamde sededi oro enye ọdọhọde ke idatesịt man otodo isọn̄ akabade edi Paradise ofụri ererimbot. (Heb. 2:5-9) Ofụri ubonowo ẹyedara utom ubọk mmọ ẹnyụn̄ ẹbọ ufọn ọyọhọ ọyọhọ ẹto uwak mbun̄wụm isọn̄.—Ps. 72:1, 7, 8, 16-19; men Isaiah 65:21, 22 domo.
11. (a) Didie ke ẹdinam mbon oro ẹdude ke idak Obio Ubọn̄ ẹfọn ẹma ke ekikere ye ke ikpọkidem? (b) Emi edisịne nso?
11 Ke ini ẹkebotde Adam ye Eve mmọ ẹkedi mfọnmma, okonyụn̄ edi uduak Abasi isọn̄ ndiyọhọ ye nditọ mmọ, kpukpru mmọ ẹdide mfọnmma ke ekikere ye ke ikpọkidem. Ke idak ukara Obio Ubọn̄, uduak oro eyekabade edi ubọn̄ ubọn̄ ata idem n̄kpọ. Emi oyom ẹsio kpukpru utịp idiọkn̄kpọ ẹfep, ndien ke ntak oro Christ inamke utom nte Edidem ikpọn̄îkpọn̄, edi n̄ko nte Akwa Oku. Ke ime enye eyen̄wam mme okopitem andidu ke idak ukara esie ndibọ ufọn nto ekọmurua usio-isop idiọkn̄kpọ oro ediwa oro enye akawade uwem esie eke owo ọnọde. Enyịn ẹyen̄wan̄a mme nnan. Utọn̄ ẹyesịrede mbon inan. Obụkidem oro usọn̄ m̀mê udọn̄ọ abiatde eyekabade esehe akan eke eyenọwọn̄. Eti nsọn̄idem eyeda itie uyịre uyịre mmemidem. Usen eyedi emi owo ndomokiet mîdinyeneke ntak ndidọhọ, “Ndọdọn̄ọ,” koro mme owo oro ẹbakde Abasi ẹyebọhọ mfịghe idiọkn̄kpọ ye mme mfụhọ mfụhọ utịp esie.—Men Isaiah 33:22, 24; 35:5, 6; Job 33:25; Luke 13:11-13 domo.
12. (a) Nso efen ke mfọnmma ubonowo oyom? (b) Ẹdisan̄a didie ẹnyene oro, ndien nso idiwọrọ ito emi?
12 Edisịm mfọnmma, nte ededi, abuana se itịmde ikpon ikan edinyene eti nsọn̄idem ye eti ekikere. Enye esịne ediwụt mme orụk edu Jehovah nte enende, sia ẹkenamde owo ‘ke mbiet Abasi, etie nte Abasi.’ (Gen. 1:26) Ke ntak oro, eyeyom uwak ukpep. Emi edi obufa ererimbot emi ‘edinen ido edidụn̄de,’ ntre, nte prọfet Isaiah ekebemde iso etịn̄, “mme andidụn̄ ererimbot ẹkpekpep se inende.” (2 Pet. 3:13; Isa. 26:9) Edu emi ada osịm emem—ke ufọt mme owo ẹtode kpukpru idụt, ke otu n̄kpet n̄kpet nsan̄a, ke ubon oro owo otode ye, ke akande kpukpru, ye Abasi ke idemesie. (Isa. 32:17; Ps. 85:10-13) Ẹyekaiso ndikpep mbon oro ẹkpepde edinen ido se Abasi aduakde aban̄a mmọ. Nte ima oro ẹnyenede ẹnọ mme usụn̄ Jehovah enyenede orụn̄ ntotụn̄ọ ntotụn̄ọ ke esịt mmọ, mmọ ẹyetiene mmọemi ke kpukpru ikpehe uwem mmọ. Mfọnmma owo oro Jesus ama ekeme ndidọho ete, ‘Ami nsinam se inemde Ete Mi esịt kpukpru ini.’ (John 8:29) Uwem edinem didie ntem ke ini ofụri ubonowo ẹnamde oro!
MME N̄KPỌ ẸDINAMDE ẸMEWOWỤT IDEM
13. Da mme mbụme ẹmi ẹdude ke enyọn̄ emi ke ndiwụt mme n̄kpọ ẹmi Obio Ubọn̄ edinamde ye se nnyịn ke ntre ikpenyenede ndinam.
13 Ikpọ edinam oro Obio Ubọn̄ oro edinamde nte an̄wan̄ade ẹmewowụt mme owo oro ẹnyenede enyịn mbuọtidem idem. Mme mbụme ẹtienede mi ye mme Itien̄wed Abasi oro ẹsiakde ẹsịn ẹyeti fi ndusụk mmọemi, ọkọrọ ye mme n̄kpọ oro kpukpru mme andidu ke idak Obio Ubọn̄ oro ẹkemede ẹkpenyụn̄ ẹnyenede ndinam idahaemi:
Mmanie ke Edidem ekebemiso anam n̄kpọ aban̄a, ndien ye nso utịp? (Edi. 12:7-10, 12)
Ke Matthew 25:31-33, ewe utom efen ke Jesus ekebemiso etịn̄ ete ke imọ iyenam ke ima ikọdọk itie ke ebekpo imọ n̄ko mbemiso isobode mme idiọk owo ifep?
Didie ke ẹnam utom emi? Mmanie ẹbuana ke enye? (Matt. 24:14; Ps. 110:3; Edi. 14:6, 7)
Ntak emi mme andibiọn̄ọ ẹdide mbon ukaraidem ye mbon ido ukpono mîkemeke nditre enye? (Utom 5:38, 39; Zech. 4:6)
Nte utịp utom unọ ukpep oro ẹnamde, mme ukpụhọde ewe idada itie ke uwem mbon oro ẹsụkde idem ẹnọ ukara Obio Ubọn̄? (Isa. 2:4; 1 Cor. 6:9-11)
NTE OBIO UBỌN̄ ORO EDIBỊGHIDE
14. (a) Christ edikara ebịghi adan̄a didie? (b) Nso ke ẹdinam ke ini oro?
14 Ke ama ekesịn Satan ye mme demon esie ke editụn̄ọ ukpe, Jesus Christ ọkọrọ ye 144,000 mme andisan̄a ye enye nnyene udeme ẹyekara ke tọsịn isua. (Edi. 20:6) Ke ini oro ẹyeda ubonowo ẹkesịm mfọnmma. Ẹyesio kpukpru ukara ye odudu ye ukeme oro ẹbiọn̄ọde Jehovah ẹfep. Ke ẹnamde oro ẹkụre, Jesus eyefiak ayak Obio Ubọn̄ oro ọnọ Ete esie, “man Abasi ekeme ndidi kpukpru n̄kpọ nnọ kpukpru owo.”—1 Cor. 15:24, 28, NW.
15. Didie ke edi akpanikọ nte ke Obio Ubọn̄ emi ‘idibiarake tutu amama’?
15 Idaha Jesus ke ebuana ye isọn̄ ke ntre eyekpụhọde. Edi, itie edikara esie edidi ke “nsinsi,” Obio Ubọn̄ esie “idinyụn̄ ibiarake.” (Dan. 7:14) Ke nso usụn̄ifiọk? Ke usụn̄ifiọk nte ke odudu edikara idibehe idụk ubọk mbon efen ẹmi ẹnyenede nsio nsio uduak. Se Obio Ubọn̄ oro anamde ‘idibiarake tutu amama.’ Se Obio Ubọn̄ oro anamde ndiwụt unen enyịn̄ Jehovah ye uduak esie kaban̄a isọn̄ emi eyeda ke nsinsi.
[Mme Ikọ idakisọn̄]
a Se n̄wed “Yak Obio Ubọn̄ Fo Edi,” page 127-139.
Nneme Ndụn̄ọde
● Ntak emi Obio Ubọn̄ Abasi edide n̄kukụre usọbọ ọnọ mme mfịna ubonowo-o? Ini ewe ke enye ọkọtọn̄ọ ndikara?
● Nso akpan akpan isidemede fi ekikere kaban̄a Obio Ubọn̄ Abasi ye se enye edinamde? Ntak-a?
● Mme n̄kpọ ewe oro Obio Ubọn̄ emi anamde ke nnyịn ikeme ndikụt idahaemi? Nso ebuana ke nnyịn inyene ke mmọemi?
[Ndise ke page 84, 85]
Edinen ido edi se mme owo ẹdikpepde