Nte Afo Ekpenyene Ndinịm Enye ke Akpanikọ?
NTE afo omonịm Abasi-Ita-ke-Kiet ke akpanikọ? Ata ekese owo ke Christendom ẹnịm. Kamse, enye edi akpan ukpepn̄kpọ ọnọ mme ufọkederi ke ediwak isua ikie.
Ye emi ke ekikere, afo emekeme ndikere ke mfan̄a ndomokiet idụhe iban̄a enye. Edi mfan̄a odu, ndien idem ndondo emi ndusụk mme andinọ enye ibetedem ẹmenam ọkpọsọn̄ mfan̄a emi ototịm ọsọn̄ ubọk?
Ntak emi utọ ukpepn̄kpọ oro ekpedide akpan n̄kpọ akan ikpîkpu ediwụt udọn̄-ọ? Koro Jesus ke idem esie ọkọdọhọ ete: “Nsinsi uwem edi emi: ndifiọk fi, ata Abasi kierakiet, ye Jesus Christ emi afo ọkọdọn̄de.” Ntre ofụri ini iso nnyịn ọkọn̄ọ ke nnyịn ndifiọk ata uduot Abasi, ndien oro ọwọrọ ndisịm orụn̄ ọkpọsọn̄ mfan̄a oro aban̄ade Abasi-Ita-ke-Kiet. Ke ntre, ntak mûdụn̄ọkede enye ke idemfo-o?—John 17:3, Jerusalem Bible (JB) eke mbon Catholic.
Nsio nsio ekikere ukpono Abasi-Ita-ke-Kiet ẹdu. Edi ke ofụri ofụri ukpepn̄kpọ Abasi-Ita-ke-Kiet edi nte ke owo ita ẹdu ke Ibuot Abasi kiet, Ete, Eyen, ye Edisana Spirit; edi, ke ofụri ofụri mmọ ẹdi Abasi kiet. Ukpepn̄kpọ emi ọdọhọ ete ke owo ita ẹmi ẹdi ukem, ẹdi ata ọkpọsọn̄, owo ikonyụn̄ ibotke-bot mmọ, sia mmọ ẹkedude ke nsinsi ke Ibuot Abasi kiet.
Nte ededi, mbon en̄wen ẹdọhọ ẹte ke ukpepn̄kpọ Abasi-Ita-ke-Kiet edi nsu, nte ke Ata Ọkpọsọn̄ Abasi ọmọwọrọ ada ikpọn̄ nte san̄asan̄a, nsinsi, ye owo oro enyenede odudu akan. Mmọ ẹdọhọ ẹte ke ini Jesus okodude mbemiso ekedide owo, enye eketie nte mme angel, kpa isio isio owo eke spirit oro Abasi okobotde, ndien ke ntak emi anaedi enye ama enyene ntọn̄ọ. Mmọ ẹkpep ẹte ke akananam Jesus idịghe n̄ka ye Ata Ọkpọsọn̄ Abasi ke usụn̄ ekededi; enye kpukpru ini esidu ke idak Abasi, ndien ke osụk ododu. Mmọ ẹnyụn̄ ẹnịm ke akpanikọ ẹte ke edisana spirit idịghe owo edi edi spirit Abasi, anamutom odudu esie.
Mme andinọ Abasi-Ita-ke-Kiet ibetedem ẹdọhọ ẹte ke enye ikọn̄ọke ke ido edinam ido ukpono ikpọn̄îkpọn̄, edi ọkọn̄ọ n̄ko ke Bible. Mbon oro ẹsụkde ukpepn̄kpọ emi uyo ẹdọhọ ẹte ke enye idịghe ukpepn̄kpọ a-Bible, n̄wedmbụk eset kiet akam ọdọhọ ete: “[Abasi-Ita-ke-Kiet] ke ofụri ofụri ọtọn̄ọ oto ukpono ndem.”—The Paganism in Our Christianity.
Edieke Abasi-Ita-ke-Kiet edide akpanikọ, edi n̄kpọ esuene ọnọ Jesus ndidọhọ ke akananam imọ idịghe n̄ka ye Abasi nte ubak Ibuot Abasi kiet. Edi edieke Abasi-Ita-ke-Kiet edide nsu, enye edi n̄kpọ esuene ọnọ Ata Ọkpọsọn̄ Abasi ndidọhọ ke owo ekededi edi n̄ka ye imọ, idem onyụn̄ ọdiọkde akaha ndikot Mary “Eka Abasi.” Edieke Abasi-Ita-ke-Kiet edide nsu, enye omosụhọde Abasi itie nditịn̄ nte ẹwetde ke n̄wed oro, Catholicism ẹte: “Ibọhọke [mme owo] ẹtiene mbuọtidem emi ofụri ofụri ye unana edisabade, mîdịghe ntre, [mmọ] ẹyetak ke nsinsi nte eyịghe mîdụhe. Mbuọtidem mbon Catholic edi emi: nnyịn ituak ibuot inọ Abasi kiet ke Abasi-Ita-ke-Kiet.”
Do nti ntak ẹdu emi afo okpoyomde ndidiọn̄ọ akpanikọ oro aban̄ade Abasi-Ita-ke-Kiet. Edi mbemiso odụn̄ọrede ntọn̄ọ esie ye edidọhọ oro ẹdọhọde ke enye edi akpanikọ, edidi n̄kpọ un̄wam ndinam ukpepn̄kpọ emi enen̄erede an̄wan̄a ke ata akpan usụn̄. Nso, inen̄ede idi Abasi-Ita-ke-Kiet? Didie ke mme andinọ enye ibetedem ẹnam enye an̄wan̄a?
[Mme Ndise ke page 2]
Ufien: Ubobot n̄kpọ nditọ Egypt eke ọyọhọ isua ikie iba (B.C.E.) Adianaita eke Amon-Ra, Ramses II, ye Mut. Nnasia: Ubobot n̄kpọ Abasi-Ita-ke-Kiet eke ọyọhọ isua ikie duopenan̄ (C.E) oro aban̄ade Jesus Christ, Ete, ye edisana spirit. Tịmse, owo ita, edi ẹnyene n̄kpasịp ukot inan̄.