Anie Edida Ubonowo Okosịm Emem?

SIA owo mîkemeke ndida emem ndi, nte oro ọwọrọ ke nnyịn idikwe emem tutu amama? Baba. Ukem nte Satan, emi okopde odudu akan nnyịn, edide akpan owo oro ọbiọn̄ọde emem ke isọn̄, kpasụk ntre ke Owo odu oro akam okopde odudu akan Satan emi ke akpatre edidade ubonowo okosịm emem. Bible, emi etịn̄de n̄kpọ aban̄a Satan, etịn̄ n̄kpọ n̄ko aban̄a Owo emi. Enye ọdọhọ ete: “Ubọn̄ onyụn̄ odoro enye ke afara; ẹnyụn̄ ẹsio enye enyịn̄, Utịbe, Ọnọ-item, Ọkpọsọn̄ Abasi, Nsinsi Ete, Ọbọn̄ Emem.” (Isaiah 9:6, 7) Anie edi Ọbọn̄ Emem emi? Enye idịghe owo efen ikan Jesus Christ, enye onyụn̄ ekeme ndida emem ndi sia enye enen̄erede enyene ukeme akan nnyịn. Ke mme usụn̄ ewe?

Mme Ukeme oro Akande Ukeme Owo

Ke afan̄ kiet, Jesus idịghe owo emi ekemede ndikpa. Edi akpanikọ, enye ama odu uwem nte owo onyụn̄ akpa n̄kpa uwa. Edi ekem ẹma ẹnam enye eset odụk uwem oro mîkemeke ndikpa ke heaven, ndien edi ke idaha uwem emi ke enye akabade edi Ọbọn̄ Emem. Oro edi ntak prọfesi kiet ọdọhọde ete: “Ubọn̄ Esie idinyụn̄ ikụreke.” (Luke 1:32, 33) Ke mîbietke Asoka, kpa edidem Edem Usiahautịn oro, Jesus eyedu anana utịt uwem man okụt ete ke usụhọde mme andida itie ibiatke eti utom imọ.

Akande oro, Jesus inyeneke idiọkn̄kpọ. Ukara esie ọkọn̄ọ ke eti ibuot oro otode Abasi ye ndinen edumbet. Prọfet Isaiah ama ebemiso etịn̄ ete: “Spirit Jehovah eyedoro enye ke idem, spirit eti ibuot ye asian, spirit item ye odudu, spirit ifiọk ye uten̄e Jehovah: . . . enye idikpehe ikpe nte ẹsede ke enyịn, idinyụn̄ ibiereke ikọ nte okopde ke utọn̄: edi eyekpe ikpe mme ubuene esịn ke edinen.” (Isaiah 11:2-4) Ke mîbietke mbon Europe eset, Jesus idisịnke emem ke obio esie ke adan̄aemi an̄wanade ekọn̄ ke isenidụt. Ke idak ukara esie, emem edidu ke ofụri ererimbot.

Akande oro, Jesus enyene odudu ndida emem ndi. Prọfesi oro ọdọhọ ete: “Spirit Jehovah . . . , spirit item ye odudu,” odoro enye ke idem. Spirit emi ke ẹkeda ke ndibot ekondo ye ke kpukpru okopodudu utom edinen ido oro ẹwetde ke Bible. Idem akwa andibiọn̄ọ oro, kpa Satan, inyeneke n̄kpọekọn̄ ndomokiet oro edikụtde unen ke ndibiat odudu spirit Abasi.

Mme Usio-Ukot Ndida N̄kosịm Emem

Didie ke Jesus edida ubonowo okosịm emem? Afo emekeme ndidu ke n̄kpaidem ndidiọn̄ọ ke enye ama ọtọtọn̄ọ. Ke ntịn̄nịm n̄wed Ediyarade, ẹkụt nte Abasi ọnọde Jesus itie edidem ke Obio Ubọn̄ eke heaven. (Ediyarade 11:15). Edieke nnyịn idụn̄ọde mme prọfesi Bible ket-ket inyụn̄ imende mmọ idomo ye mme n̄kpọntịbe eke isua ikie nnyịn, nnyịn ikụt ke edidori Jesus ke ebekpo nte Edidem akada itie ke edem ko ke heaven ke 1914. (Matthew 24:3-42) Oro ekedi akpan usio-ukot ke ndida emem nsọk isọn̄.

Edieke oro edide ntre, nte ededi, ntak emi Ekọn̄ Ererimbot I akasiahade ke 1914? Ndien ntak emi isua ikie nnyịn okụtde ndioi n̄kan ekọn̄ ẹmi akanam odude ke mbụk-ọ? Koro akpa edinam Edidem eke heaven ekedi ndibịn Satan ofụri ofụri nsio ke mme heaven, osiode enye otop ọduọk ke n̄kan̄ isọn̄. Utịp-e? Prọfesi oro ọdọhọ ete: “Mbọm isọn̄ ye inyan̄, koro andidori ikot Abasi ikọ [“Devil,” NW] ama osụhọde etiene mbufo; enye asan̄a ye akwa ifụtesịt, sia enye ọdiọn̄ọde ete ini imọ edi ibio.” (Ediyarade 12:7-12) Ikpọ ekọn̄ eke isua ikie nnyịn emi ẹnyene ẹbuana ye ifụtesịt Satan. Edi tịmfiọk: Ifụtesịt Satan edi ke “ibio” ini. Ibịghike afanikọn̄ emi eyebe efep!

Mbemiso enye ebede efep, nte ededi, Ọbọn̄ Emem anam mme akpan ndutịm emem efen efen. Akpa kan̄a, ana ubonowo ọdiọn̄ọ abana uduak Abasi ndida emem ndi ebe ke Christ. Mmọdo, Jesus ama etịn̄ prọfesi ete ke eyo nnyịn ke “ẹyenyụn̄ ẹkwọrọ gospel Ubọn̄ Abasi emi ke ofụri ekondo nte ntiense ẹnọ kpukpru mme idụt.” (Matthew 24:14) Ke emi ndisu, Mme Ntiense Jehovah ẹmekwọrọ eti mbụk emi mfịn ke kpukpru ikpehe isọn̄.

Ekem, ẹnyene ndinọ mbon oro ẹnyenede esịt akpanikọ ukpep mban̄a mme usụn̄ emem, Bible ọn̄wọn̄ọ ete: “Jehovah eyenyụn̄ eteme kpukpru nditọ fo; ndien emem nditọ fo okpon.” (Isaiah 54:13) Ediwak million mbon oro ẹnyenede esịt akpanikọ ke ẹbọ ukpep emi idem idahaemi.

Usio-Ukot Efen

Esisịt ini ayak idahaemi ọnọ akpan usio-ukot efen ke ndutịm usịn emem. Nso idi oro? Se ediwak owo ẹdiọn̄ọde ke enyịn̄ edi emi ibat ibat owo ẹdiọn̄ọde ata uduak esie. Bible okot enye “ekọn̄ akwa usen Abasi, Andikara kpukpru n̄kpọ,” m̀mê Armageddon. (Ediyarade 16:14, 16) Ediwak owo ẹkere ẹbana Armageddon nte ekọn̄ nuclear oro edisobode n̄kọri n̄kaowo ifep. Ke edide isio ye oro, enye edi nnennen edinam Jesus, kpa Ọbọn̄ Emem, man anam mme n̄kpọ ẹmi ẹdide akpan n̄kpọ kaban̄a emem.

Akpa, Armageddon eyesio kpukpru owo oro ẹbiọn̄ọde emem efep. Prọfesi oro ke Psalm 37:10 ọdọhọ ete: “Osụk esisịt idiọkowo ididụhe: ndien ke afo etịn̄de enyịn ke ebiet esie, enye ididụhe.” Ih, Jesus eyesion̄o ‘ndiọi owo’ efep​—mme ẹsịn nsọk nnọ ekọn̄, mme abiatibet, mbon edinam oyomonsia, ọkọrọ ye kpukpru mbon oro ẹsịnde ndinyịme akwa Ọbọn̄ Emem​—efep ke n̄kan̄ isọn̄. Mmọ idinyeneke unen aba ndikaiso ndu uwem ke ekonde emi.​—Ediyarade 19:19-21.

Ọyọhọ iba, ke Armageddon, prọfesi Daniel emi eyesu: “Ke eyo ndidem oro, Abasi enyọn̄ eyenam ubọn̄ eke mîdisoboke ke nsinsi, adaha ada: ndien idikpọn̄ke ubọn̄ emi inọ mbio efen: enye eyenuak onyụn̄ ama kpukpru mme idụt ẹmi, ndien enye eyeda ke nsinsi.” (Daniel 2:44) Ubahade eke mme idụt oro esiwakde ndida nsịm ekọn̄ eyebe efep. Ke akpatre, ukara ererimbot ke ubọk andikara emi nnyịn ikemede ndibuọt idem ke esịt eyedu!

Ini ewe ke Armageddon edidi? Bible itịn̄ke. Edi mme n̄kpọntịbe ererimbot ẹmi ẹsude prọfesi ẹwụt ke enye eyedi ibịghike. Bible nte an̄wan̄ade ama ebemiso etịn̄ aban̄a n̄kpọntịbe emi edibemde iso ada itie. Apostle Paul ọdọhọ ete: “Ini mme owo ẹdọhọde ẹte, idu ke emem ye ifụre, kpa adan̄aoro ke nsobo abuat mmọ.” (1 Thessalonica 5:3) Ekem, ke ndondo oro mbabuat nsobo oro osịmde ata akpatre ke Armageddon ebede, ẹyesio n̄kpon n̄kan n̄kpọ oro ọbiọn̄ọde emem ẹfep. “Ibio” ini Satan eyebe efep, ndien ẹyenịm enye ke idaha oro enye mîdikemeke ndisịn aba ntịme mi ke isọn̄. (Ediyarade 20:1-3) Nso ubọhọ!

Ererimbot Emi Odude ke Emem

Kere ban̄a idaha oro edidude ke ini oro. Andiwet Psalm ama etịn̄ ke prọfesi ete:’ “Mbon nsụkidem ẹyeda isọn̄ ẹnyene; ediwak emem eyenyụn̄ enem mmọ esịt.” (Psalm 37:11) Mbon nsụkidem ẹmi ẹyakaiso ndisu inem inem prọfesi Isaiah emi: “Mmọ ẹyeda ofụt mmọ ẹdom n̄kpọ ufụn̄isọn̄, ẹda eduat mmọ ẹdom ikwa udiọn̄ vine: idụt idimenke ofụt itiene idụt, mmọ idinyụn̄ ikpepke aba ekọn̄.”​—Isaiah 2:4.

ke akpatre, nte akpa ini toto ke Eden, kpukpru owo ẹmi ẹdude uwem ẹyedara edidiọn̄ Jehovah Abasi, ndien enye eyesu un̄wọn̄ọ esie emi: “Sese, ebietidụn̄ Abasi omodu ye owo. Enye eyenyụn̄ odụn̄ ye mmọ; ndien mmọ ẹyedi ikọt Esie, Abasi ke Idemesie eyenyụn̄ odu ye mmọ, onyụn̄ edi Abasi mmọ. Enye eyekwọhọde kpukpru mmọn̄eyet ke enyịn mmọ efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba; koro ebeiso n̄kpọ ẹma ẹbe ẹfep.”​—Ediyarade 21:3, 4.

Ọsọn̄idem Idotenyịn

Anie, ndien, edida ubonowo okosịm emem? Jesus Christ, kpa Ọbọn̄ Emem emi emekde. Nte emi edi ata idotenyịn ọnọ nnyịn mfịn? Ọfọn, edieke mme un̄wọn̄ọ Bible mîkpedịghe akpanikọ, ata idotenyịn ndomokiet kaban̄a emem ikpodụhe. Mme owo ke ẹkpekaiso ndin̄wana nnyụn̄ n̄wot kiet eken ye unana utịt ke ekikere. Edi Bible edi akpanikọ, ndien Obio Ubọn̄ Abasi ke ubọk Christ eyeda emem edi. Nnyịn imesịn udọn̄ inọ fi ndikpan utọn̄ nnọ eti mbụk Obio Ubọn̄ oro Mme Ntiense Jehovah ẹsidade edi ke ufọk fo man okụt emi ke idemfo. Do, ke adan̄aemi ini oro edide edisịm, afo akpakam edi kiet ke otu mbon nsụkidem ẹmi ẹdidade isọn̄ ẹnyene ẹmi ediwak emem ẹdinyụn̄ ẹnemde mmọ esịt.

Idotenyịn emem oro ẹnemede ẹban̄a ke ibuotikọ emi oto Bible. Mfịn, kemi ediwak owo mînịmke Bible ke akpanikọ aba, afo emekeme ndibụp m̀mê idotenyịn emi edi ata idotenyịn. Mme Ntiense Jehovah ẹsọn̄ọ ẹnịm ke akpanikọ ẹte ke enye edi. Mmọ ẹda Bible nte Ikọ Abasi eke odudu spirit, ntem, nte se idotde ẹbuọt idem ke esịt ofụri ofụri. Ke 1989 mmọ ẹma ẹmịn̄ n̄wed oro ẹkotde The Bible​—God’s Word or Man’s? oro ọnọde ekese uyarade kaban̄a akpanikọ emi. Ẹmeneme ẹ.ban̄a ndusụk ntọt ẹmi ẹdude ke n̄wed oro ke mme ibuotikọ iba ẹtienede mi, emi nnyịn inọde fi ikot ndikot.

Ntọt efen efen oro aban̄ade un̄wọn̄ọ Bible kaban̄a emem eyedu ke ibuotikọ oro “Emem Ererimbot​—Nso ke Enye Edinen̄ede Ọwọrọ?” oro ẹdimịn̄de ke nsiondi Enyọn̄-Ukpeme eke April 15, 1990.

[Se ẹwetde ke ikpọ abisi ke page page 8]

Jesus ikpọn̄îkpọn̄ enyene ukeme ndida ubonowo n̄kosịm emem

[Se ẹwetde ke ikpọ abisi ke page page 9]

Mfịn, ẹmekwọrọ eti mbụk Obio Ubọn̄ emi ke kpukpru ikpehe ererimbot